Inhuman Resources

欲筆還休

2012-01-13T14:02:00.001+08:00

自己動筆就好似返教會一樣，一唔返開，就會冇左動力，冇曬紀律，開始搵藉口。

原因唔係冇野想講，至少個Catch（一個app ）每日都有少少新野，而係自己選擇左用逃避既方式去對待呢排既 distress。

I am too dark to be light.

自己逃避既方法，一係以更強既 motivation 去蓋過自己既 depression，果排所以經常聽 Rihanna (but this video sucks)。

另一個就係跟 Adele 隨波逐流，等自己慢慢 settle。

Always feel too old to be young.

一定要起返身。（唔可以淨係掛住 Rihanna 同埋 Saints Row III）

Last year

2012-01-01T00:04:00.002+08:00

Last year, I didn't quite like myself.

投訴無線電視新聞大播金正日喪禮

2011-12-28T13:09:00.004+08:00

無數名人及有貢獻政治家去世都未曾大播其喪禮，甚至Vaclav Havel喪禮都未佔去那麼多篇幅。

金正日喪禮關香港鳥事？金正恩哭如淚人又如何？這樣的喪禮真的這麼有新聞價值？

無線新聞你正表達的是什麼角度？！

（自梁家榮離職後連月未接觸亞視新聞）

********** 投訴表格內容 **********

播放時間：午間新聞，13:10

《投訴無線電視新聞大播金正日喪禮》

無數名人及有貢獻政治家去世都未曾大播其喪禮，甚至Vaclav Havel這位對歐洲影響深遠的政治家的喪禮都未佔去那麼多篇幅。

金正日喪禮關香港什麼事？金正恩哭如淚人又如何？本人認為這樣的喪禮對於香港人毫無新聞價值。本人認為香港人只關心北韓在金正日去世後對世界的影響，但對一位惡名昭彰，令北韓人民水深火熱的所謂領袖毫無惋惜！絕對不值得花過量新聞篇幅放在金正日喪禮的過程上！

強烈質疑無線新聞正表達的是什麼新聞角度！強烈質疑無線新聞部取材的原則！

烏坎這戶籍

2011-12-22T00:16:00.003+08:00

前幾天重溫突尼斯亞近年歷史，民眾講述今日的感受。一個小小的國家，一夜改變了。如果一個無論人口或土地或資源都比突尼斯亞大數十倍甚至百倍的國家要改變，縱使是最絲毫的改變，是否真的那麼難以想象。

烏坎這地方，本來寂寂無名。如今聲名大噪，天曉得誰弄的。

皇帝要周星馳解散丐幫，道理卻要皇帝治國有方，丐幫自然銷聲匿跡。

管理的意義，一方面含有操控、鉗制的意味，亦有理順、疏導、解決問題等的含意。

丐幫如是，烏坎如是。只是解決問題罷了。聰明地解決的，一石二鳥，國泰民安。莽撞地解決的，以為天羅地網，其實自投羅網。

枉法者火急通傳只為己，公告天下烏坎這戶籍的所有人皆亂黨，只為低層次上綱上線剷除異己之手段。但以此為脅，騎劫此戶籍之中小學生則屬無道、無法也。

烏坎這戶籍不會一夜消失，但也不要讓這戶籍一舉成名，因為戶籍這東西，從來不是讓人操縱他人的工具，更不是讓擁有者戶籍的人，成為他人成名的工具。烏坎也好，丐幫也好，他們要的，只是生活。

趕科場

2011-12-11T22:37:00.001+08:00

又係亂糟糟。

近排開始留意其他父母（幼稚園or 小學up），發覺似乎父母若果越多喜惡，佢就會越俾少選擇俾自己仔女。而希望唔係事實，佢地既小朋友亦係無咁開心。又環繞身邊朋友，緊張兮兮果個，媽咪佔多數。

好食懶非既人生，實在太多微不足道既不快，卻太少不枉此生既奮鬥。

熱血滾滾既人生，實在太多微不足道既不快，亦太多不枉此生既奮鬥。

前途似咁既人生，實在太少微不足道既不快，亦欠缺不枉此生既奮鬥。

挨年近晚，鄙人竟然同班後生爭飯食，申請左調職，諗住響第二個地方從頭黎過。以我咁既年紀，咁既環境，咁既心態臨老入花叢，真係人死茶涼。由呢刻到係咪確認調職差唔多仲有三個月時間，中間突然殺出一個程咬金或者採花賊打爛我個如意算盤，隨時可以一鑊斷送我成家人安穩既生活。開始管理自己既期望，到時食少d著少d忙多d，朝早派報紙，中午擺易拉架，瞓輪晏覺渣夜更的士，應該夠卦。

農業革命，工業革命。。。之後係叫資訊革命？科技革命？

覺得似係network(-ing)革命多d，唔係資訊，唔係科技，而係呢個世界突然間可以建立到一連串好superficial既network，上facebook、linkedin、微博、forum，虛擬變實體，實體又滲透虛擬。呢種人際網絡表面化（姑且）變成主流，opportunism 忽然大行其道，只係一個hype 定係dream come true？

我認為呢種network bubble始終建立唔到trust，無trust 可以建立，但中間就消耗左好多資源時間心力。iPhone既所謂偉大，就係吹大呢個bubble，直到開始有人醒覺，回歸基本步。前幾年管理學興講既guanxi，查實已經滲透各階層。

睇報紙有人批評香港教育政策，鼓勵求分數而唔係鼓勵求學。（欸！黑人亦認為通識科累死學生，令學生更缺乏思考）Well，觸發我響呢度懶巴閉咁試下指點江山/迷津。

問下家長，你地有幾位教過自己子女，應該點樣思考？應該點樣應對ambiguity？

係咪響佢地仲係幼稚園既時候，為佢地鋪排一條直往海外升學 via 國際學校 thru International Baccalaureate?（小珠，原諒我加左條wiki link）定係為佢地受洗受浸搬地址做埋校工，朝早畫畫中午彈琴下晝珠心算，以確保小朋友一條龍從 playgroup 直升傳統名中學？

唔係講反話，你個仔女眼睛實在太雪亮，太聰明伶俐喇。你一切既做法，看在佢地眼裏，絕對係一連串既勞心勞力！佢地大個一定會依足呢條途徑去領略呢個社會既競爭。

點競爭，就係曉得用策略，曉得繞過分數既篩選，用關係，用金錢，用所謂努力，去達到更高既social level。呢個就係仔女學到既一套競爭方法。

有冇試下問阿仔，如果發現通識科鼓勵高分低能，咁你有冇教佢點應對？教佢跟marking scheme 定係教佢率性而行？喂喂喂，叫佢呢個年紀自己決定，咪即係間接鼓勵佢跟返阿sir 果套遮。有冇教佢點樣應對自己呢個複雜既心情？有冇話佢知，如果率性而行，就算低分，老豆會一樣咁歡喜？有冇問過佢點答，然後了解下佢個分析方法？

我明，呢套野唔係個個父母都曉嘛，唔係個個都得閑嘛，我明，所以咪用錢搞掂囉，之又得閑去上慕道班囉。仔女ung細，都睇到學到你以為你冇教過既野，亦都學到你想佢學既野。

週一回顧

2011-11-30T00:18:00.000+08:00

轉寫週記非我所願呀。日日雖然都圍住唔知乜野團團轉，但查實天天都有接觸過唔少事物會引發一d 不倫不類既感想。印象中（唔得閑實地翻查），12月1號應該係我開鋪紀念日，至今大概。。。五年啦好似。。。昃番個 folder，家下正負二三十篇posted 文書札記紀錄屁話，剛好500篇咯。（係架啦，家陣咁既精神狀態典會記得咁清楚呢，是是但但算啦）

最近自把自為，同老細做左d 未探清佢心意既人治工作。呢d 人治工作仲要係同自己完全無關添，有時真係好唔明自己點解係鍾意做埋呢d 行先死先既野。。。都好，證明我仲有團火，夠膽死先斬後奏，打死罷就，心境年輕。

去圖書館睇到1948年響上海拍既某照片，話當年超級通脹，通脹率係過萬倍計。銀行擠提，仲著長衫既男男女女，似足人肉蜈蚣咁排隊，任何兩人中間連頭髮都攝唔入。令我諗起曾幾何時有好多人話中國人排隊係都要後面推前面，好唔文明好唔禮貌。呃，其實咁樣都反映左中國人對應對爭論既態度。呢種密集隊形，縱使外表好似唔禮貌唔文明，但實際上就減少左好多插隊既爭拗，即係以一致性既行動去curb verbal arguments。

朋友同我講，話佢響內地某高級主管會不惜一切，以走後門既方式去克服前面既一道專業障礙。呢道障礙話佢唔合資格攞工傷，但佢自己就認為一定係工傷。朋友好肯定咁話佢係為錢喎。我覺得，或者啦，雖則佢真係比我清楚呢個人，之又令我聯想起goal theory裏面既goal, path, tool。個goal 無論點大義凜然，走一條藐視專業既 path，準備一筆小費做 tool，得出黎既result，就係，隨便用一筆小費就可以大義凜然咁買起呢條友既專業。

睇左《作死不離三兄弟》！同事驚奇問我點解會帶埋兩隻野去睇，識睇咩？阿仔唔識架（似乎），阿女就追字幕，但追唔切，睇唔明，不過都睇到男主角個名叫藍丘囉。有時呢，小朋友都可以偶然參與一下大人活動，世事唔一定要完全明曬先可以做人架嘛。套戲，我會用Parsley, Sage, Rosemary and Thyme去形容，五味紛陳也。

CNN話黑色星期五搶購日超熱喎。正面意見話，美國經濟復蘇啦，咁叉多人掃貨。負面意見話，就因為預期乾塘，所以咪趁早趁平掃貨囉。

比對一下BBC同CNN既Top Stories，琴日 BBC講好多英國內部野，講下 regiona。CNN呢，竟然變左中東台，埃及也門敍利亞巴基斯坦 and Bahrain！（突然諗起副歌... Ming the minibus is on the road....），本地新聞少之有少。唔知係咪都反映左英國人同美國人對新聞內容既傾向呢？又會唔會反映美國人比英國人更外向，更鍾意好管別人（閒）事呢？不過睇番CNN既 Most Popular，又係比較local囉。Oops，返轉頭，似乎係電台既定位問題，卦。

阿米上次講開專業。我既睇法係，專業既基本目的，唔係錢，而係專業本身。意思係話錢唔係目的，正如Rancho話齋，唔好追尋成功，自己做好，成功就自然黎。道理一樣，專業追尋專業，就自然成功，追尋成功，就會失去專業。呢個道理應該好易明，因為如果醫學界再以維持質素為名，暗渡保護飯碗既陳倉，呢個專業招牌唔會守得穩，因為市民會懷疑提供專業服務既目的。又如果市民真係唔信任醫學界，咁，唔該咋咋林幫我check下有咩本地中醫集團股，等我瞓身買落去！

米爸又提到豁免考試。首要諗清楚，咩叫考試。招聘專業，從來唔需要考試。因為專業團體所賦予既名銜，就等同完成考試。你係CPA，Big4就認為你合格；係CFA，i-bank 唔會俾多份試卷你考。。。一個考試唔能夠證實或為你個專業資格正名。加入一個專業機構前要考專業試，即係唔認同你個專業身份。唔認同你專業身份就會打擊專業服務既信譽。所以考試，絕對不必，亦不可。

講返入職。試必須免，但篩選必須有。事前篩選就係選定專業資格。定好邊個專業資格合乎要求，免試。如認為不合乎要求，應聘都無資格。正如Qualified Accountant唔可以因為響會計師行考左試就可以認定佢可以做 CPA 一樣。如果醫管局要考試，即係話只請輔助醫療人員，唔係請醫生。此外，事後既篩選，主要係面試，審核資歷、性格（及其他參考資料）、確認經驗係咪符合要求、夠唔夠年資等等。

至於阿米話IQ果part，等佢請食飯再講！（恭喜升職加薪！）

係咪應該忠於自己？

2011-11-22T00:26:00.004+08:00

話唔寫港政，始終都守唔到寡。

教育界

我唔係支持唐唐，但聽到教育界話要領袖樣板喎，就覺得呢個要求唔係唔合理，而係唔多現實遮。

舉下幾個標準教室例子，以下三條友有幾個獨特特質，好多人都識：

1. A君婚後與數個女人有染，五名子女共經歷了19次結婚和15次離婚（維基資料）。

2. B君酗酒，好雪茄，與A君關係密切

3. C君素食，並主張禁煙，未婚但一般只有一位親密女伴，A君死時拍掌叫好。

選特首或者要兼顧個人道德，不過，既然係教育界，唔好鼓勵莘莘學子睇道德睇得咁片面丫。

未清ABC君所指為誰者，請移步留言欄。

醫學界

最近班私人執業醫生既咩咩學會，話擔心外國畢業醫生響香港執業會導致醫療水平下降喎。

用呢個咁既理由去反對外國畢業醫生響香港執業，令我極度鄙視佢地。唔係因為鄙視佢地既立場（呢個此其一），而係呢班友既 IQ（唔係智慧）。

咩原因唔想亦唔洗多講。總之，最好香港醫生大曬，專業界別永遠壟斷，以後就可以安享太平，頤養天年。

醫生話要同病人同生共死，有時一d 都唔偉大。

（題外話，琴日報紙評論話佢地點解反對係因為要政治正確。。。我披！連乜係正確都分唔清楚，講乜叉政治正確！）

唔公平

係，我真係覺得唔公平，亦唔係反話。

早幾年倉促搬屋，六月份阿女未經面試就入讀幼稚園下午班。

今日收到通知，阿女通過計分制再次未經面試入讀首選小學（以15分，即首名子女）。

同事話報紙講今年首輪派位中簽率新低喎，得45%，上年都有47%。報紙話有家長話制度唔公平喎（呢種角度係唔係記者都識用），都唔係大問題，始終一件野得唔到永遠都有原因、有理由。

呢位同事個女今次抽唔到，亦知道競爭大，同我講話自己成日都會擔心，又學唔到我地咁次次都咁自在。

老實講，我地其實唔自在架。對於阿女選校入學唔上心，唔係敷衍一句，話信得過大大老闆就說得過去。我地只係，阿女有更值得我地憂心既野：佢既性格發展、同阿仔同其他人既互動關係、點樣面對困難。。。

呢三樣都搞唔掂，讀乜小學都假，所以話揀小學，絕對超碎料。我同事話雖然明，但始終做唔到。

而我就覺得，既然自己揀左呢條緊張兮兮既路，就要面對呢條路所帶黎既艱辛。而我欣賞呢位同事既地方，係佢無怨天尤人，亦唔打算將佢既兮兮緊張傳染比佢個女。

我好鍾意呢位同事。

心亂如麻

2011-11-14T01:03:00.002+08:00

區議會選舉

感想有三。

1. 政治泡沫和經濟泡沫的共通點 - 議題炒作
2. 合理並合乎現實的結果
3. 公共政策尋求的是解決方案，然則政治尋求的是權力後台，前者是雞，後者是蛋。

討伐與懺悔

世上太多寂寞的心，太少撫慰寂寥的人，太多佔便宜的混蛋，太少撿便宜的好人。

不能從政的一百個理由

1. 太聰明，知道聰明必被聰明誤
2-4. 太多年少輕狂，太多感情缺失，太多蜚短流長
5. 志不在高，有錢則靈
6.-100. （待從政後再寫）

外傭居留權官司後感

1. 尋人尋物尋回音啟示：件事攤凍曬，幾乎唔再係話題；選舉之後更加渺無音訊

2. 先有法庭指首宗司法覆核只適用於該個別申請，而不適用於其他申請，後接二連三有外傭家庭申請司法覆核，部分被駁回。結果說明其中一個觀察：香港大眾對法理的理解，好容易受政治考慮所左右，亦容易受政客詮釋所影響。法律係專業，而詮釋或試圖解釋法律條文或法律觀點，係眾律師眾大律師既專業職責。我所觀察到既實情係，呢班法律既專業人士，包括政府班律師，都無好好協助市民去理解法律觀點，容讓市民去接受未受毫無專業訓練既政客既詮釋而不作任何反駁。好難怪市民會將來唔尊重專業人士，尤其班所謂法律專業人士。

3. 政府偏幫某些政黨意見已非首次，如果為左推行政策而去尋求政黨支持，亦絕屬無可厚非。之但，我等市民看在眼裏，知道政府明知有更強觀點在前而不進行及時修正，可見得呢個政府都幾弱勢（or 弱智），要聲東擊西先可以施政。

4. 繼續覺得，香港人越黎越討厭競爭，討厭提升自我競爭力。對於呢份感覺/觀察既一個古怪推測係：某d大財團扼殺合理競爭（即創造總體壟斷）既表現，製造出兩極感受，一，點反抗都無用，不如消極附從之；二，一定要反抗，仲要提升上政治層次去反抗！雖然感受處於兩極，但導向同一結果：外向型動力，以夷制夷。內向型動力，即自學，受到壓抑。心亂如麻。

政經以外

越黎越討厭談論政治，因為太多強加選擇予他人，要我逼人埋牆角實非我所願。要我下下以理性（理論）觀點去為視角辯護，又與我感性非常既性格相沖。真係好矛盾耶～

經濟更加唔在講，職場上股海中既高買低沽已經係我大半個人生既寫照，再講，隨時再次自我實現，不提也罷。

嗯.... 遲d 都係寫下Call of Duty 7: Modern Warfare 3 既打後感，應該比較容易入手。

Unaffirming political and economic activisms

2011-11-06T00:31:00.008+08:00

Abraham Lincoln

“You cannot bring about prosperity by discouraging thrift.
You cannot strengthen the weak by weakening the strong.
You cannot help the wage earner by pulling down the wage payer.
You cannot further brotherhood of man by encouraging class hatred.
You cannot establish sound security on borrowed money.
You cannot keep out of trouble by spending more than you earn.
You cannot build character and courage by taking away men's initiative and independence.
You cannot help men permanently by doing for them what they could and should do for themselves.”

Dr. Giles Fraser

"St Paul's Cathedral is built on a deep theological fault line. On the one hand it's set within the boiler room of global capitalism, and on the other it proclaims a theological story that has some pretty fierce things to say about money and wealth.

These two powerful tectonic plates, God and mammon, meet right under Wren's magnificent baroque masterpiece. It's little wonder that St Paul's can be one of the most challenging and uncomfortable places in which to do theology.

None of which is to say that the Church is in the pocket of any political creed or economic philosophy. Indeed, I'm not even completely sure that the Church should go too far down the road of proposing specific answers to complex economic problems.

Rather, it's the calling of the Church to draw attention to the human cost of financial injustice, and to reset the debate about our financial institutions firmly within the context of a bigger story about what human life is for.

This has nothing to do with bringing down capitalism. Markets create wealth and jobs, and indeed those who want to dispense with capitalism are often better at saying what they're against than they are at proposing convincing alternatives.

Nonetheless, part of the reason why Christianity is so suspicious of money is that the power and glamour of money can easily corral us into a narrower and narrower sense of what it is to be human."

Margaret Thatcher

"I'm never quite sure what you mean be consensus politics. I believe that what most people want in their lives, is what the Conservative Party wants to have for them. I believe that our policies are fundamentally common sense policies. Just let's take taxation for an example. Wherever I go I hear enormous resentment about the amount which people are paying out of their own pay packet in tax. And, this goes right across the income ranges. Socialism started by saying it was going to tax the rich, very rapidly it was taxing the middle income groups. Now, it's taxing people quite highly with incomes way below average and pensioners with incomes way below average. You look at the figure on the beginning of a pay slip, sometimes it can look quite high, look along the slip to the other end, and see how many deductions you've had off, those deductions have increased enormously under Socialism ... "

"... I would much prefer to bring them down as soon as possible. I think they've made the biggest financial mess that any government's ever made in this country for a very long time, and Socialist governments traditionally do make a financial mess. They always run out of other people's money. It's quite a characteristic of them. They then start to nationalise everything, and people just do not like more and more nationalisation, and they're now trying to control everything by other means. They're progressively reducing the choice available to ordinary people."

**Margaret Thatcher on Socialism

****************

人生不簡單之處，在於人必須事事躬親、持之以恆，方可尋找一套切合自己原則的信念和選擇。隨便或刻意以主義之名，以信仰之名，以大多數之名來替代自己所須的事事躬親、持之以恆，其前路亦將以新主義之名，新信仰之名，新大多數之名告終。倘若人生就是無限的選擇，二者擇其一即非人生、反人生也。

固然人生免不了要摸著石頭過河過紅海，惟世代人非先知非摩西，過河之法亦非得棒打大水領眾走旱地一途。

我見759阿信屋的故事等，即對某及某等財團心存惡感，想此乃人之常情。但同時亦警醒自己，我的惡感所為何事何干。

我獨以自己的認知、判斷、行動為芻狗。

淺談居留權與管理

2011-10-17T00:38:00.004+08:00

前文以「隔離政策」對比反對居留權之立場，實乃肺腑之感。Potato 君則認為：

「法律是回應社會經濟情況而制訂的。按照社會經濟情況詮釋法律又有可不當?就外傭永久居民身份的案件而言，法官拒絕參考有關基本法通過時立法原意的文件，又無視即使在英治時代，我們都沒有、亦無意讓外來傭工有永久居留身份的事實，只是按照字面來解釋基本法這類憲法性的法律，實在大大不妥。閣下世界大同的平等思想令人敬佩，可惜，人類大多數是自私的，所以有國界之分，以便政府制定政策，防止利益被界外的人分薄。這是人類世界的現實。」

除卻我當時的回應，我這次是從香港的利益去看這次事件。

開鋪早年曾撰《以 KPI 簡論《最弱的10%》》，旨強調「單一設限不能達成管理期望」。在我看來，以人大釋法去解決外傭居留權問題，同樣會出現一樣的不符期望的副作用。

其中一種副作用，就是深化香港的本土化（localization）和大陸化（continentalization）的傾向。這個結果不是單從所謂人大釋法導致什麼什麼放棄一國兩制之類的表面答案，而是釋法的結果，倘若真的如某類市民所願，向隔離政策傾斜，將會同時向所有外來國籍人士，包括來港來華經商、投資、服務之各國人士，消滅留港發展之誘因以及機會。

回看歷史，香港的發展「一直以來」都是以外來移民推動，本土化以及各種grandfathering policies，所產生的結果，就是原居民一類的自我保護機制以及文化。香港人固然有自由去追逐這種機制及文化，但我卻不，因為這樣將扼殺我等子孫接觸外界的機會，培養他們成為不接受外來競爭的一群。

又或許，你希望香港不再以舊有發展「基礎」，即一個開放城市的自由基礎，去追尋新的發展模式，但以隔離政策去成為這個改變的切入點，恐怕最終的期望（避免外人分薄了本地人的利益，甚至拖累經濟）將比完全開放更具侵蝕性（corrosive）。我這個危言聳聽的理論很簡單：社會不以前瞻性的方法去應對制度漏洞（if any）、去leverage外來勞動力、去強化香港對 diversified groups 的處理能力、去 promote the power of freedom，而這些都是香港未來正要面對的問題，反以為單一的設限方式可以一勞永逸的為「現有」的香港人謀福祉，這是短視和狹隘。

香港不是現有的香港，也是將來的香港。在考慮香港將來的承擔能力時，如果只是以「現今」的環境以「最壞」程度去計算「即時」的反應，此不單乃管理者的通病，於我經驗，「更是」組織內有心人的糖衣毒藥。這個七年居留可享永久居民身份，如果只看成一個領取福利的指標，就等同把所有人標簽成 Theory X 類人，可知同樣的身份，一樣可以成為 Theory Y人的動力。若某君只把人標簽為前者或後者，即不論單以一群人全定為 X或為Y ，足見其對現實、對人性的偏頗，這種單邊主義的取態無助得出合理的政策原則。

假如我是香港政府的決策人，便絕對不會考慮請求人大釋法，不單因為以上種種考慮，更因為如果人大真的接受這個請求，不單其經濟效果難以預料，更可能推倒中國多年來在外國人心目中所建立的信心。這張牌，中國絕不容易打。把一張牌由人大去打，輸的是全國，由香港去打，維持法規要求即可以了。（要求人大釋法是一種「陷老頂於不義」的政治技巧，有能者勿用）

在企業管理中，制定指標或基準時，有效的方法就是以一籃子的內容去應對問題，內容越豐富，就越使人難以濫用和鑽空子。相比之下，這個七年居港的分界線絕對不符這個法則，似乎所謂人大釋法有其必要性。可是，人大釋法究竟可以如何以何種內容去充實這個單一準則，我想絕對不會亦不可能以一籃子的形式出現。

我個人觀察是，這條規例本身所塑造的香港已經成型，亦將繼續如此塑造香港。而改變這個規例的必要性，有賴的不是這條規則本身的內容，而是制定人口和福利政策的官員的功力，和影響人口和福利政策的社會人士的長遠眼光。

其他：方潤引述的其他觀點，施永青的考慮一、二

誠徵成語

2011-10-12T22:40:00.003+08:00

誠徵成語，或者語句去形容比水深火熱更差、更惡劣的情況。急。

感激。

排洪雜憶

2011-10-02T22:35:00.006+08:00

事實與偏見

北京與紐約的距離可以怎樣計算？答案一，在地圖上由東至西畫一條直線。答案二，民航機的飛行距離。答案三，由北京往北穿過北極圈，再往南到紐約。還有一個答案四。甚至答案五，或更多。（我的答案四、五在意見欄，有興趣者看猜中否）

思維方式

良師曾說，思維方式/模式有很多種，莫因一種方式在某情況的優越，而忽略另一種方式在同樣情況的優越。同一情況之所以出現共同優越性，因為所謂的同一情況，根本不是同一情況，而只是翻譯者眼中的同一情況。

隔離政策

如果你反對外傭永久居留權，強烈建議你檢查自己對於平等的立場。如果你抗議國內城鄉二元制，又同時反對外傭獲得公民福利，就揭露了自身的虛偽自私。

如火如荼便高呼要求人大釋法，可知「釋法」二字本身只是一個「中立」的動詞，現在自作聰明地賦予一個「支持否決外傭永久居留權」的政治含意，是否意味「法」本身是可以按照經濟社會情況隨意詮釋？

誰個議員、候選人，在法律字眼和詮釋兩者本身尚未含糊不清或極具爭議的情況下，只是因為對福利和將來的預測產生疑惑而提出如此釋法，我的一張選票必不予他。

（另外，想香港不再成為外地人趨之若鶩的居留地很簡單，推冧它一切吸引人的地方就可以了）

生活哲學

我覺得哲學就像一個蜘蛛網。

從網的一點到另一點就是邏輯。從網的一點穿過另一個到達另一點就是思考。整張蜘蛛網就是一套哲學。

哲學是由邏輯組成，但卻不一定由「合理的邏輯」組成。邏輯幫助自己理解如何從網的一點到達另一點，但不能幫助理解為何他人的邏輯可以從這一點到那一點。當人以為絕對可以理解他人的邏輯的時候，就會產生所謂合理邏輯的判斷。這種邏輯，就等於人未死就知道自己死後的事一樣。

生活哲學，就是千張萬張蜘蛛網的交織。You can't solve puzzles by the same kind of thinking you used in solving mazes.

牛熊雜憶

前日有人提過愛恩斯坦的一句話："We can't solve problems by using the same kind of thinking we used when we created them." 指出解決美國經濟問題必須要有新思維。

歐美債務問題已經不單是股票市場、強積金資產的問題，而是在「政府」而言，是民眾的信心問題，是安全感的問題，是活生生的經濟壓力。

不錯，是壓力。但壓力，卻不是失去信心的理由，更不是埋怨缺乏安全感的理由。

縱使，可以是恐慌的理由。

同輩影響與同輩壓力

上集問塞米，在職場中會向你的同事學習嗎？我背後想問的，是一個人的「自學」和「模仿」能力。成人可以嗎？兒童又可以嗎？

小學學生主要年齡由六歲至十二歲，模仿能力強，自學能力弱。

在充滿「資優學生*」的小學，一個未知能力的學生可能模仿到同輩在課堂和學校中的各種行為，但要達成自學，這個年紀還只能依靠外力，例如老師、家長等的鼓勵。

*資優學生是一個非常個人化價值判斷，有人以為這是與智力相關，或與資源有關，或與性格有關。可是，不論屬於那種資優特質，這些都是不能模仿的。資優學生更不會在課堂是表現專注，勤讀課本，課文分享等等，這些讓家長以為可以在這些不勞而獲的名校贈品。

如果名校孩子的性格不夠好勝、甚至欠缺自信，父母所期望的同輩影響只會變成同輩壓力。也因此，我選校，不以名氣排位，不考慮學校的資優學生多寡，更不考慮中學派位如何，只在乎那些關鍵人物，即教學人員，是否能與我的孩子產生化學反應，繼而撥亂反正。

自學的能力，則需要長久的訓練或自己從生活中摘取合適的經驗，明白不會從表面的模仿，更能理解當中的真諦，然後按照自己的性格和喜好，去實踐最適合自己的學習方法，或從他人，或從遊戲，或從反面教材，或自成一家。

怪獸家長揀學校

2011-09-30T00:43:00.004+08:00

前排接左紙扎工廠安排既某個仆直，連平時僅有果三幾日旮旯空檔都抽走曬。一切都係自己攞黎。

撞啱要同阿女搵小學，上氣接唔到下氣。

鄙人查實出左名係怪獸家長。事緣有次阿女媽咪參加某次幼稚園搞既培訓班，佢分享俾其他家長聽，話我有次阿女唔肯做功課，於是我就掟左佢份功課出門口，搞到佢喊到拆樓。適逢犬女在校擔任某節目主持，在座人等薄有印象，引黎家長主任導師譁然。

住響呢個上流基層混合區（裏面既基層聚居範圍），接觸過呢區唔少中小學，至少一半都係名震港九，就算唔響璫璫，個名都已經夠雷，聖乜乜中學，咩咩官立小學，唔多唔少有種格格不入既感覺。

話就話感覺格格不入，事實上其他中產家長（同幼稚園）都唔覺逼得佢地既仔女太緊，偶然聽到佢地仔女會耍十八般武藝，但都只係少數。（補按：之但阿四媽話佢地班上流家長既小朋友，「每星期都於課餘學習五至六個項目」喎。）

反而認識唔少自細家境學歷一般，苦苦向上到家陣略有事業果批同輩，就相對超級著緊佢地仔女未來既「競爭力」。例如話驚錯過二三四五歲呢個學習高峰期，miss左排位賽首三名位置，擔心佢面試唔夠得體之類。

Well，響我心目中，同爸爸爭食「曬駱駝」、爭最快上床瞓覺、爭邊個可以最先返到屋企唔洗人抱，呢d 就話競爭遮，點知呢個年紀既競爭已經開始同成人既競爭接軌。響圍內既朋友當中，我都算怪獸（Yes! 我仲會打鬧、呼喝、跣佢地一鑊，總之聞者色變）。

一個月前，我心儀某聖乜乜女校，好在乜？嗯，我估係佢好在夠「傳統」（aka 好大直升某人氣中學），夠「出名」（aka 親朋面前夠曬威）諸如此類，卦。佢教成點、學校係點擺設點佈置，一概不知。實不相瞞，就算到家陣我都念念不忘，好想阿女能夠入到呢間小學，然後保證光宗耀祖至少六年，好彩再加六年。

講到咁，都知我今次無揀呢間。（小小background：今次只係揀一間小學，計分制，家長或子女同學校關連越多，分數越高，入讀機會越大。就算今次無收到令郎令千金，下次排名次選學校都有印象分。詳情唔講勒，因為我都唔太清楚）

反而揀左一間於我黎講事前木宰羊既小學，男女津貼小學，無同中學有關連（Well，無就假既，佢派去某名男官中人數似乎唔少），但小班教學，教師年輕，我甚喜歡。

當我同朋友講開我個擇校條件，佢地就唔係太理解我呢個精心計算。

首先，by elimination，我「一定」唔揀官校。我中小學都係有名官校，雖然已經係十年前既事，師資係點，我真係唔相信會有大變。武斷d 咁講（但又好客觀），佢地之所以係名校，純粹係班學生，完全同教學質素無關。官校班公務員個心態我真係感受甚深，係有幾個似乎真係為學生既，新意欠奉，花款欠奉，我真係擔心佢地適唔適應呢個年代既學生。

曾經有個念頭，計下如果阿女入讀我之前間小學名校會點，因為我係畢業生，阿女就係長女，入讀幾率係九成幾以上（題外話，木宰羊小學既校長竟然響開放日，提到呢間查實響另一校網既小學，並稱之「名校」！搞錯！），於是去圖書館搵下資料，發現佢地95%既教師已經響呢間小學有十年以上既服務年資，五年以上既就得5%，即係話佢地無新血！雖然好多關連名中學，唉，時不與我，都係線把啦。（呢個「公務員」觀點俾唔少朋友否定，奇怪。）好多所謂傳統名校，都有個流動固化既情況，響呢方面，可以做兼職人治既我，會有唔同睇法。

其次，我想搵男女小學，等阿女上中學之前可以響呢個俗世（試下）同班馬騮交往（即係prefer 師姑庵）。如果中小學都係齋校，儘管我可以帶佢去參加多d男女混合既課外活動（例如ballet之類必定剔除）黎抵消佢呢方面既潛在社交局限，始終一個人係咪成長點樣成長，唔應該只係得學業做唯一既判斷準則。

而呢次最終以木宰羊小學為目標，可能只係因為佢個校長夠直腸直肚，似足我個女，又或者，佢只係我地想呢區唯一參觀過既小學。（講真，洗乜去咁多丫，睇完咪又係唔知教成點，唔知仔女究竟適唔適合套方法～　好似其他家長咁請埋假走訪幾區，名義上俾自己多d 選擇，實際上擔心唔能夠證明俾子女睇，自己係一個盡責既父母。咁都擔心第日自己個仔女竟然會為咁小事而怪自己，究竟邊方面要檢討呢可？）

聽落好似太快手喎，之但我唔求其架。至少我度過，阿女就算呢輪唔收，縱使佢參加既興趣班唔多（除左畫，無琴棋書，無豬心算，無瘋歷史。）以佢大鳴大放既性格，應該OK既。而且如果真係入到呢間學校既話，佢仲帶俾我一個 benefit，就係到阿仔讀小學時，唔洗再煩。

怕煩，係我呢亭怪獸家長既通病。

**************

題外推介：塞米講香港交通系統，與民息息相關。

匯豐．代替品．架構

2011-09-13T16:15:00.003+08:00

香港匯豐宣佈三年內裁員三千，新聞紙政客市民齊插，此起彼落。

背景係香港HSBC有盈利（可圈可點一），仲要係火車頭（可圈可點二），加上大中華+新興市場發展策略（可圈可點三），以headcount百分比仲係其他地區之冠（可圈可點四）裁員點講都唔合理。生果報某財經專欄兩番質問王冬勝：《點解要係香港？》《告訴我，不是真的。》

神呀，點解偏偏降災俾我？神呀，唔該話我知呢個唔係事實。

雖然我覺得港人反應唔少係感情因素所致，起碼HSBC第一個英文字係H for Hong Kong，而唔係S for 上海，L for London，不過我仍然 share 少少（雖則亦非常少）呢位專欄作者講既「裁員係因為港人抵得諗」或者CK講既「邊個好蝦郁邊個」呢類 view。之所以只能share 得咁少，因為我覺得從micro 角度，無可厚非，但以決策者既 macro 角度黎睇就唔多 rational。

實情點解會出現呢個裁員三千既結論，作為局外人我梗係唔知喇，就算我睇曬佢所有年報、Financials 都只係管中窺豹（即係我無睇喇）。如果要我去rationalize 匯豐呢個決定，我會從自身經驗出發。

可圈可點一：盈利

今日盈利唔代表將來盈利。出糧派bonus就已經recognize 你既貢獻。個人第一個感覺，正係兔死狗烹，純功利唔講道義感情。投訴人如果只可以強調「企業盈利」，而唔係「社會貢獻」，投訴幾近自打嘴巴。

可圈可點二：火車頭

固步自封「唔應該」係香港人既特質。香港已經再唔係增長亮點，盈利主要係靠內部系統既持續改善、以及香港優良既商業環境，而非由創造力或領導力所帶動。理性投資，正係從一個有穩定盈利，但機會已經飽和既地方抽取資源，去探索另一個未有穩定盈利，但有新機會既地方。

可圈可點三：策略

呢個策略，唔係以香港作為大中華區總部，夜郎自大，而係借用香港已有營商環境同埋人才去拓展the new world。匯豐之前公佈既策略已經好明顯有 enterprising含意。香港已經係一個developed market，唔再係新興市場。

可圈可點四：headcount

有好多傳言同報道，例如咩「2/4/6」，或者後勤+IT部門為開刀對象等，如果從決策者角度，都合理。但呢度查實亦係我最質疑匯豐決定既地方。

向年資長、後勤、IT等首先開刀呢類諗法，不外乎係為左促進生產力（又，炒左班老鬼，乜唔係正可以造就你班社運年輕人上位咩？咦？係咪正係咁所以呢期社運人士無乜聲氣？），或者可以用更低成本尋找到更合適代替品。個人經驗唔否定生產力一說（亦非當事人所以亦唔肯定此說），但就對代替品一說表示極度懷疑。

當我首次聽到後勤/行政/IT等，自然即時聯想到外判，outsource去印度，去東南亞，去廣州。經驗所得，知識型工種既外判，如非判去一個擁有或培養知識型環境及文化既地區，最終既效用一係極低質素，一係極高成本。咁當然，代替品唔一定係vendor，可以係share work，可以係multi-tasking，亦可以render obsolete。

整體黎講，我認為香港響知識型既創造力方面，雖然唔及某d新興地區（可能因為佢地根本無野好輸），但響知識型既專業服務上面，呢d地區始終望塵莫及。如果綜合埋果d地區鼓勵創造力既土壤，例如社會文化、創造性耐力（creativity perseverance）、（尤其）「交貨可靠度」等，香港評分始終係高一籌。因此如果從效益黎講，向某d後勤或IT部開刀，然後將有關工作outsource去其他地區，風險唔細。

除非，匯豐所講既精簡架構、去官僚化，所指既係由 top-down 既chain of command 轉為 matrix structure。呢樣我真係無法評價，相信匯豐中人先至會「比較」清楚。

之如果真係要改成好似matrix 咁更flexible 既 organizational structure （或者只係集中響support services），我反而覺得呢個決定就算未合情合理，但決定大勢所趨。一個部門要孭起一個 technical/hardware support，唔划算。幾個share一個support，無論響（企業）資源分享同（企業+個人）經驗累積上面都優點多多。並唔係好似生果專欄哥仔講句「抵得諗所以要死」呢種「電腦令人力需求下降」既論調。

至於企業責任，你認為一個負責任既企業應該養咩人？所以作為半職人治人，唯一期望匯豐要負既責任，就係盡力做好每個人既evaluation (on skills, competencies etc)，盡量提高呢個evaluation 既效率同埋配套 (e.g. training)，maximize 果d 相關能力既人可以過渡去新既企業架構。

鼓勵企業去諗辦法解決問題，無論呢個「問題」有冇捉錯用神，亦仍然鼓勵企業中人去學習解決問題，去學習應對一個永遠變化緊既環境。

幾耐冇睇亞視新聞？

2011-09-08T23:45:00.001+08:00

前兩日亞視新聞部主管梁家榮辭職。

上次問過，都有唔少人夜晚睇亞視新聞。呢個唔少人既意思，似乎都只係得小貓三幾隻。

支持亞視新聞部既人唔少，但真係有幾多個睇過亞視新聞？又有幾耐冇睇亞視新聞？

有冇搞清楚咩係新聞自由，咩係編輯自主？班抽水既有幾多個呢幾年飲過亞視新聞既奶水？

梁家榮係點既人我唔知，亦唔曉唔得閑深究，之但我係亞視新聞既忠實番屎，睇左好幾年，亦都講比人聽好幾年。我鍾意亞視新聞，但唔知邊個係梁家榮；我知道邊個係方健儀，但
唔鍾意無線新聞。

梁家榮係咪新聞背後既無名英雄我唔知，但應該係我既無名偶像。

有冇惋惜，依家未，將來雖然會唔會我唔知，但應該都會。唔係因為邊個走左，而係邊個入左黎。

報紙話係劉瀾昌喎。聽到即刻炒蝦拆蟹。

睇佢主持既《把酒當歌》真係拎曬頭。唔係因為佢口才唔得（我口才超唔掂），亦唔係因為佢鍾意搵某某上去做嘉賓（我都想睇下佢點忽悠大眾加以警惕），更加唔係因為佢背景佢資歷（理得佢丫），而係因為佢節目起首既所謂重點新聞，日日都係一堆搔不著癢處既所謂新聞。到某d嘉賓想轉下敏感話題佢馬上就避重就輕。

做節目，迴避敏感話題，預左，但幾可肯定會削弱吸引力。冇耐，呢個節目就比我打入冷宮，寧願熄電視打機同阿仔阿女夜媽媽追追逐逐嘈喧巴閉。

好景不常，竟然聽到呢位仁兄授命主管亞視新聞部！萬一佢搞新聞，都好似做節目咁主動迴避敏感話題，你話係咪死得？

雖則我真係有少少擔心我真係將會好耐唔睇亞視新聞，但我都決定對家下仲響亞視新聞部既員工存留不少盼望，好令我唔洗夜媽媽陪果隻野癲，俾我繼續擔任呢個新聞部既無名番屎。

滬杭廣掠影

2011-09-03T22:55:00.037+08:00

剛剛響忙到碌地前，一口氣去左好幾個地方。

於二號terminal等上機。

到左SH，即坐磁懸浮，七分鐘車程花費RMB50一位。咁啱前面有位阿嬋級既美女戴住headphone引吭高歌，殺豬咁聲。至於地鐵就超多人，次次轉線條路都同香港站去中環站一樣長，行到腳都軟埋。有次響車廂見到兩操韓國口音男女，男士頸纏保鮮紙，女士戴花綠口罩穿著入時。香港人真係得一個字：悶。

如果鍾意影相，1933絕對係唔錯既去處。1933前身係屠宰場，人少陰氣重，夠涼爽。佢果度仲有個玻璃樓頂（有鋼+水泥structure支撐），可以俾遊人走上去。

SH有個（好似叫）正大廣場，我最鍾意商場入面條斜路，香港絕無僅有。

Another IFC ... 唔通其他名唔好聽？

同埋開瓶器。

以及V-69。

從豫園望向IFC，心諗點解唔係旁邊咁有靈氣既古樓發光既？

外灘。個人第一觀感係，比尖沙嘴既星光大道「氣派多了」。江邊建築較優雅古典，越入夜越靚... 之但老實講亦好世俗，因為全部掛曬「乜乜銀行」既牌匾，而且感覺上，呢d建築既Doric/Gothic/Carinthian 柱及外牆等部分裝飾早被拆去（借問有冇人可以話我知，呢類建築有冇可能有gargoyles？）

入夜之後，去左杭州西湖，想拍下前面呢位外籍少女，不過班蚊好厲害，影到腳毛都震曬。咋咋林影完走。

據聞HZ起緊地鐵，2013通車，條街好曬，好熱（夜晚一樣咁曬咁熱）。

肚餓搵位食飯，見如此奇景激發食慾，特此留念，不過就幾乎用左15分鐘先搞得掂部相機去拍呢幅（留曬汗，乘機問隔離HZ少女借紙巾）。鍾意食零食者可放大欣賞。

西湖邊既自動灑水系統。

可愛蓮蓬 + 白堤。啊，一提果日一落完雨，湖面即時千帆並舉，感覺十足走難。

踩單車擦傷，似俾蚊叮多d。

灑水系統夜晚既表現... 一樣腳震。

浙江民房。據聞尖拔甩既屋頂係俾祖先住既。

側聞河蟹號既官方硬照就係本人提供既。

查實我唔係想影架無軌電車，而係想拍周圍（不過效果唔好，冇貼）！呢個電車既位置（附近？）就係同時俾Porsche, Ferrari, Mercedes 既陳列室團團圍住！

我呢個有文化有質素既博客自然有去過上海美術館啦（雖則果時去到已經拴左門）。

為左呢幅相，我幾乎俾呢架車車死。而我之所以咁勇以身犯險，係因為響呢個位置先後俾兩位阿嬸搭訕：「先生，對不起，我不是壞人來的，我只是想買個麵包給小孩...」

消防龍頭？鏈頭？

又係據聞，呢間屋企湯館係源自杭州既。又HZ 有叫《外婆家》既餐館，其中較偏遠果間（地點得閑d先翻查），值得推介。

上海某路，巴士上，唔明點解同一條線會有對頭車。

自拍。地點：「新天地」，呢個地方，乏善足陳。最衰傳說中既「法租界」好似海市蜃樓咁，去左完全唔知係咪去左！

兩隻野終於出現。試下用自製廣角鏡影，效果滿意。題內話，我地租左個有浴缸既酒店，諗住俾佢地玩泡泡浴。第一晚玩到不亦樂乎，第二晚落水無耐，阿仔就大嗌話「媽咪，我要屙臭臭！」，好快就抱佢上水啦，阿女跟手就大嗌「啊！啊！啊！啊！媽咪，你睇下d水！！」... 呢次浴缸浮C，C 橫遍野，想嬲都嬲唔落。

GZ珠江新城附近。兩躉野咁對稱，九成九係二十一世紀建築。

周圍都係IFC... 呢個有d似俾條鐵鏈鎖住咁。

Vow，我至愛既迪卡儂。入到去真係開心到震，行左足足兩個鐘，買左唔少野，仲踩左十分鐘免費單車。（不過千祁唔好試玩佢地既滾軸溜冰鞋... 超臭）

Well，臨走前，影番張日落應下景先。

鷹派鴿派

2011-08-23T23:59:00.000+08:00

鷹派多流芳百世，鴿派多遺臭萬年

岳飛 vs 宋高宗
蔣介石 vs 汪精衛
丘吉爾 vs 張伯倫
篤人背脊 vs 息事寧人

You name it.

C妹最近share左一個幾尋常既研究，之所謂尋常，皆因早就知啦（Well，認屎認屁我至叻）。唔親自講出口，因為我驚爆響口等人知我底牌嘛。

向來我都係做鴿派，有咩事幹傾向四四六六拆掂佢，多過擺曬上檯揚開巷班馬吹雞。

我牙，無咩特別想講呀，淨係想話呢幾日唔多妥，求其亂up 舒緩下情緒，咁囉。

又，借問鍾意做鷹既人多定係做鴿既人多呢？

14. 三面不是人

2011-08-18T13:55:00.003+08:00

「為什麼走得這麼倉促？」我乾著急。

「因為我在這邊的任務已經完成了。」

「。。。」

「聽說你上次送 Meiji 回酒店哦。」

「！？」

「成功嘛？」

「你說什麼呀，哪裏聽回來的呀.... 我那天送他們回去以後，只是喝了一杯橙汁吧，馬上就回家了... 」理直氣壯。

「。」雪沒有回話，繼續低頭幹活。

天，那個晚上的事情（= 根本沒有什麼事情）除了我和 Meiji 以外，該沒有其他人知道的，除非..... 可是，Saka 覺得不是那種人.... 難道.... 中計！

整天的腦袋雖然不聽使喚，但阿頂給我的柯打我還可以水流作業的倒模給她。不爽不爽，既生瑜，何生亮？

「下班去那裏吃飯？」是阿潔。

我跟潔的關係已經熟透了，父母都見過面好幾次了。

「碰！三筒。」上家的伯母碰了我紅中，三番起胡。

心兒來電。

「你身體不舒服就馬上去看醫生，快快快！」「。。。」

「我現在就打給你哥哥著他接你去醫院！！」「。。。」

五分鐘後，我狠狠的掛了線。桌上的麻將牌和興致全被我燒光。不敢正眼望上下對家。

「對不起伯母，我要失陪一會了。」

「嗯，好的。下次再來哦。」

站在夜深街角，慣性地感染冷漠。人來人往，逼使我把烈怒壓下。

心兒的追魂曲沒有接下，努力說服自己只是過渡期的一點點正常反應罷了。

「明天下班不如一起吃飯？」

「好的。」

「你希望吃什麼？」

「不如這次我帶你去吧。」阿雪如常平靜的。

突然覺得自己這種拿破侖式內線 maneuver，明顯更上一層樓了。

亂寫小學習作

2011-08-10T20:54:00.005+08:00

On discrimination

If we don't admit a natural occurrence of indifference and resistance and fear for differences, we walk anti-discrimination laws and proclamations by their words, not by their spirit.

Discrimination must take into account of this natural occurrence in order to nurture mutual acceptance. Discrimination is not unidirectional but works both ways. While we admit we ourselves humans naturally fear, resist and partialize differences, we earn something bit-by-bit when we understand about we ourselves AND they humans.

The Genius of the AND has to be learnt. The Tyrannt of the OR is when we see all natural laws, beings and limits, with indifference, resistance and fear.

塞米：所以，從我所看到的，信仰的主體，一直是學習。

London in flames

Damn! It's not riot. It's a revolt!

It's too hard for me to share the views commentators put the blame on racial discrimination and junior unemployment when we can see children under 10 joined the ranks.

When children burn, rob and vandalise, whether agitated or at will, one can imagine how they communicate with their older ones, especially their parents.

This is a cultural revolt, a clash between the old and the young, not between races, not between social roles.

Deadlines and Stalingrad

又聽到大國某指令說，一定要在十月前完成某工作某任務。

讓我想起 Stalingrad。當年德蘇兩方只為一個名字一個意義搏鬥。

政治任務從來都是一將功成萬骨枯，勝者王敗者寇。

我的小學習作

2011-08-07T23:49:00.004+08:00

哲路暗示

低俗、墮落、平庸...

對於我這個科學人來說，這些名詞不難理解 - 大概都是 normal distribution curve 的左/右端吧。但對於同時作為人治副業員的我來說，這些名詞不過是一堆負面的情緒暗示 - 對語言暗示毫無防範的人所設的陷阱。

哲，可以係道，可以係學，亦可以只係（或唔係）路；或視乎當中有幾多只係情緒暗示，有幾多係真知灼見；或視乎行道的目的、目標。

菠蘿、香蕉、蘋果

小學既時候，本練習簿叫你三選一，四選一，揀出當中有邊個唔同。到左大學上策略管理課程，一樣有呢種exercise。不過可能人大左，對於小學練習有截然不同既感受。

課程導師 lik （起初蓄意，漸漸隨意，最後亂黎）三樣野出黎，然後叫各位試下玩簡單 similiarity and difference既遊戲：

A. 邊兩種性質（or whatsoever）相同，而又與第三種唔同
B. 三種有咩相同
C. 三種有咩地方完全唔同

起初：

1. 菠蘿、香蕉、蘋果
2. 車、馬、龍

漸漸：

3. 油燈、垃圾桶、汽水罐
4. 哲學家、科學家、傳教士

最後：

5. 電插蘇、石班（魚）、希特拉
6. 普洱、阿根廷、巴士

玩左一陣，突然覺得，原來果幾句：見山即山，見水即水；見山非山，見水非水 - 其實都幾有道理。

（老連：Genius vs Tyranny）

匯率.... 霸.... 權....

今日上網睇到一則評論（by Craig Stephen），話港美掛鈎既聯繋匯率，（好可以）係導致高通漲壓力、higher cost of living, from food to rents既來源。..... 所以 it comes as little surprise then that billiaonaire Li Ka-shing, who owns the largest property developer in town, last week suggested that a change to the peg could be dangerous....

經濟論者一派話「預期」主導，所以最好不變應萬變。

係既，我好認同。因為我完全唔相信金管局入面有任何人，可以曉得（=有能力、有學識、有魄力）跟住美元強弱買賣港元以外既市場操作囉。 Well，我唔係話佢地廢，佢地只係唔曉得啫。（嘿）

要變，即係同攞公帑較飛無分別。唔變，同剝削低下階層又庶幾近矣。

假設，呢個聯繋匯率制度係始作俑者既話。

哀鴻雜憶

2011-08-05T17:36:00.006+08:00

你：準備定兩箱啤酒，今晚旺角碼頭見！

我：我買生力！

你：我拎青島！

我：洗唔洗買埋繩同界刀？

***************

你：今日真係開心！

我：跌成咁都仲開心！？

你：因為有好多人陪我嘛。

***************

你：我突然間唔想去碼頭。

我：係咪想縮沙先～

你：不如買dom dom 丫

我： o_O|| 你唔係想打我主意下化...

你：黐線！我係話化悲憤為性慾，去portland街呀！

我：扯，咁dom 都可以慳番喇。

你：唔係嘛，乜你，咁污糟架

我：有冇常識架你...

散養家禽

2011-07-25T00:27:00.004+08:00

上個禮拜日同兩隻野去左睇《The Popper's Penguin》。

早前已經睇過一d 爛 gag 片段，又讀過一d 話部分情節會荼毒小孩心靈o既影評，不過仍無損為父入場雅興，親自確認虛實。

實情，無論大人小童，幽默情節非常少，令人會心微笑既位唔多，撫腹大笑更幾乎零。如果比我寫影評，我只可以話得番點點溫情。雖則又好可能，係睇戲時所採用既超仰角扯得全家面皮太緊之故。（中午皇室堡五十蚊一張飛呢個定價的確合符經濟法則）

同事P ：「聽講套戲好好笑固喎，咁佢地咪好開心囉！」

C：「Errr .... 小小喇，但一定唔係官方推介咁好笑囉。至於佢兩個呢，唔知喎，都未至於可以令佢地乜都笑一餐既地步。」

P：「o下？咁會唔會好side 呀，佢地都唔識睇。」

C：「理得佢地識唔識得丫，答唔到你明唔明，或者唔見笑到碌地都唔代表佢識得睇既。係咪先」

P：「咁又係。不過你之後有冇同佢地講返d劇情開心下呀？」

C：「小小喇，問返佢地好唔好養企鵝之類咁囉。呢，以前聽講話有個占基利賄賂管理員既情節，如果要我特登叫佢地唔好有樣學樣，咁遮係證明我點教都係失敗囉。」

P：「哈啊？你講咩呀，輪到我唔明喎。」

C：「Errr.... hehe，是但啦。總之教仔唔係一次半次既事，世界亦唔洗完美無暇，咁囉。」

Well，響現實中我都一樣鍾意借題發揮。

*************

近日睇番阿女，突然諗到點樣定義咩叫「港女」。

嗯.... 好簡單，層次低既就係「唔聽意見既女仔」，層次高既就係「覺得自己意見永遠比人地既好既女仔」。

*************

一直記得幾年前，阿鎚哥哥（家陣改名叫...）留言話：「幾驚你係啲咩車輪功既人，你個女病左都深信無為而治添。」。

查實邊係關咩事有為無為事丫，只係一般健康知識遮。知識... 老實講，真係唔敢講話呢亭叫常識。

人越老，就越難理解咩叫「常識」。越睇得書多，就越難理解咩叫「知識」。越睇得blog多，就越難理解咩叫「邏輯」。

由於深怕自己被呢d專有名詞導致精神分裂，所以日日要搽防曬搽美白抗衰老，仲要頂多打下書釘免得被蠶食心靈，最後閉關自守以保貞節。做人真係難。

講返正題，我覺得教子育女又好，談政論治都好，越係自問有常識有知識合邏輯.... 就最好問返自己點解要合符曬呢d 通則，先至叫「合理」？

*************

講個古仔。

從前有個教師，佢好想為民請命，覺得政府好多政策都幫助唔到。但係呢個佢身邊既教師同事，都支持政府喎。因為身邊個個都支持政府，所以令佢更覺得呢個政府係錯既。而佢，就由最初，倚賴政府去幫助人民，漸漸倚賴靠自己力量去幫助人民。

呢個古仔，據聞響世界各地發生左好多次。

*************

仍然認為，信仰既主題同主體，唔係意識形態，而係「學習」。

*************

心靈空間有幾大，個雞鴨鵝場就有幾大。

鑑圖辨色

2011-07-15T12:34:00.003+08:00

情景：某假日老父照常開工，帶左阿女入廠自由活動。

工具：紅藍黑三色原子筆及塗改液、A4 紙、Legal 紙

情緒：平穩，未見嘴角含春或奸笑

其他：另備風景照乙張，有緣再貼。

表示憤慨表示慷慨 (2)

2011-07-12T00:42:00.005+08:00

響呢庶及左近，可以博覽近日各方既演繹。

呢次事件可以從多角度傳譯，大致係：

1. 亞視作為中央十台，未問阿爺就私自爆料，抵死！

2. 明明係王征放料，衰左就縮沙仲劃清界線，無恥！

3. 弱台唔搶新聞點夠開飯！

4. 衰左廿年都仲死性不改，播新聞都俾人投訴，嘿！

5-10. 市場眾說紛紜，凸顯(a)權力鬥爭;(b)政治變數;(c)宣傳部政策;(d)國外媒體表現;(e)國內政治倫理解構;(f)公佈名人死訊生辰病況之道德判斷.....

承有頭無尾之上集，我好感慨：「香港既第四權，只能夠存在於市場形式，不同擁有第四權的媒體互相競爭，同仇敵愾，屬於競爭手段。新聞自由，並非第四權力爭既焦點。甚至有官方對於某單一媒體發出通牒之後，其他媒體繼續剝花生飲啤酒，經常批評官方打壓傳媒的記者協會以及其他組織，更獨善其身。」

亞視既報道，雖然已經俾官方指責，但並唔表示呢則新聞就係謊言。俾官方指責人所共知，媒體向江家屬道歉（見有向官方機構道歉乎？）亦屬事實，不過呢度睇到既，並非代表亞視既報道失「實」，只代表媒體受到壓力。單就呢個「壓力」，向來自詡高舉新聞自由既各方媒體，試問何曾就此份壓力表態？個個唔係噤聲，就係認定以官方消息為依歸，名人生死必須政治正確。

你話，俾我點會唔覺得各界尊貴今次咁慷慨，自願送上《新聞自由》呢個牌匾丫。

表示憤慨表示慷慨

2011-07-09T14:45:00.000+08:00

中聯辦對亞視報道表示憤慨
港政媒對新聞自由表示慷慨

（再講）

新聞價值

2011-07-07T14:00:00.002+08:00

昨天晚上亞視新聞報導說，前主席江澤民逝世了。

有人覺得，這則新聞背後另有新聞。

官方辟謠，指屬謠言。

新聞報道，猶如迷霧中探索，右手觸摸到一些東西，就會馬上說這是什麼，那是什麼。嚴謹的，會雙手摸清楚，再近一點仔細看看。功力深厚、時間充沛、得老闆支持的，不只看，還會多方求證。

電視的觀眾，其實也只是聽眾，單方面收集新聞報道員的資訊。新聞的真與假，有多真或有多假，聽眾的信與不信或半信半疑，都不是最終的影響。信，不是終點，反而是起點，主導群眾為一則迷霧中的探索，作出評價。

這種迷霧中的探索，就是新聞價值。是探索的過程，而非真與假，才是新聞中的最大價值。事實與謊言，在一則新聞報道裏，對於觀眾也不過是信心頻譜的某一「點」，重要性還不能也不及在這一「點」打後的演繹和實踐。

「觀眾」「聽眾」要什麼新聞，可圈可點。但我覺得肯定的是，「百姓」要的新聞，不是官方統一口徑的包裝成新聞報道式的行政指令。

新聞，就是探索，不是一個全地域統一口徑的事實。縱使這則新聞當中可能包含謊言與片面的事實，可是百姓要的新聞，就只有那些可以滿足百姓探索慾念，能夠在收到行政指令前，獲得一個存在「新」價值的角度，一個讓自己去選擇如何理解的角度。

也在我角度，亞視這則新聞，是一則擁有新聞價值的新聞。而我這次，是一位老百姓，不是觀眾，不是聽眾。

Overheard - 歪

2011-07-05T13:42:00.002+08:00

C: 出左新電話未？

X: 無端端出咩新電話唧？

C: 乜你唔係從善如流，聽我講出歪風咩？。。。

X: 滿城盡是歪風，何堪再撥。

C: 汝欲歪理迎歪風，撥亂負負反正乎？

X: 歪風四面八方吹，欲拒還迎迎不上；撥亂不成成亂撥，莫辨正反反正亂。

（中下籤）
（剛才廟祝病眼昏花，執錯籤文。）

站在遞補替補後面

2011-07-04T00:34:00.007+08:00

林瑞麟之前個方案，略有所聞；之後個方案完全未聽過，亦唔覺新聞有介紹過。

Well，之但無論個方案查實係點，我都一樣反對。

反對原因，完全唔係咩馬嶽教授話齋，敗者替補，絕無僅有。亦唔係阿沈某日所羅列既七宗八宗罪（而我亦完全未睇過）。對於我，呢一大堆，雖然重要，但都唔係重點。

香港人呢，始終有個心結，就係乜叉都要同「自由」扯上關係。

我都唔例外。

香港班政客，縱使一塌糊塗，廢話連篇，甚至搞亂曬原則、責任同埋社會規律，佢地as a whole 咁多年黎come up to 一樣貢獻－爭取選舉自由。

係，響我角度，係 as a whole，唔係淨只泛民或郁民或乜建港聯盟 or alike（個別其實都幾asshole），先至得出呢個「爭取選舉自由」既大方向，少左豬王芬、阿達、阿謙之流等等等，香港人都未必會咁急切希望爭取選舉自由。

觀乎爭取立法會特首普選、乜乜比例代表制、區議會選舉、選舉條例..... 都係為左體現自由。大大聲要話比全世界聽不自由毋寧死。

所以我覺得，新補選機制，無論最終形式可能會係：自動遞補替補、或自動懸空、或重選、或抽籤、或輸打贏要、或擂臺對決，都完完全全唔重要。最最最最重要係，我地呢班自由慣既港燦，有冇影響力甚至決定權，響任何新選舉形式有 SAY。

個新機制係咪世界首創，定係靠咩邏輯理論原則，甚至有乜漏洞需要堵塞亦根本無關宏旨，關事既，只係香港人對於自己既選舉制度，有幾大部分可以體現當中既港式自由價值。

而呢個人才濟濟既政府最大既敗北，就係完全唔曉得究竟呢種港式自由價值係乜。（...我認我都唔多曉得）

所以建議班高官隨便問下成日北上班骨精同雞蟲咩係港式and 港式自由價值，佢一定可以好詳盡咁指點你迷津。自由，如果能夠體現響最唔顯眼既地方，先至係真正既自由。

*****************

港島主義

阿靚仔某日提出過「香港本位主義」，不明所以。今日鄙人提出「港島主義」，一樣不明所以。

有冇問下，點解香港遊行示威，凡牽涉到政治性或議會層次，地區味道較薄既議題，都會搞著香港島呢邊呢？

一係灣仔，唔係就係中環或者西營盤（題外話，查實我對於班非街坊下下話「西環西環」真係覺得太離譜，為左容易上口就話衝擊西環乜乜物物，對香港一個小地方都唔認真，我好懷疑你對成個香港有幾認真呀），係咪純粹因為乜叉政府主要部門呀、會議中心呀、政府總部呀、禮賓府呀、中聯辦呀所在，所以就淨係響港島出沒？

係咪同樣體現緊某某最唾棄既「中環價值」先。符號主義？潛意識作祟？

呢，上次北角瞓街算有新意勒，超出曬北角同東區班街坊既預期。係咪有咩訴求，唯有響港島區提出先可以引發支持激發討論掀起波瀾？定係政府話響彌敦道遊行會搞亂經濟秩序，所以一定唔批？

（算啦，根本唔會有人會理會咩大港島主義。早抖~）

The ebb of the innocent

2011-06-29T23:45:00.007+08:00

The ebb of socializing bloggers

The new bloggers are liberators, seldom rescuers; enforcers, seldom correctors; social beings, seldom socializing beings;

We changed the atmosphere of blogging and reshape the way we are going to act, eventually the way we think and in turn the way we are.

This is the psychological transformation and unfolding through "auto" behavioral modifications.

Seldom we are transformed into what we should be, often, into what we should not be. Sometimes we are transformed into what we wanted to be, also, into what we didn't wish to be.

The ebb of brotherhood

By the time we argue what we should be and what we are supposed to be, we resist. We resist to re-examine status quo, ourselves and simply persistently, if not superstitiously, convey everyone we are what we are. No experiment, no evidence and all conclusions.

No judge, no jury and all executioners.

We don't want to be controlled, even by ourselves.

The ebb of childhood

IMAGINE you are about to make a slight deviation from the original course you believe you are heading. You believe things might go wrong and even you believe you are going wrong. Fear started to seize you.

Let's look all over you. WHAT is wrong? Why care so much about wrongs? Am I afraid of being wrong?

The ebb of maturity

It's not signalling nor projecting yourself nor anything related to conspicuous consumption. It's simply how and how much you understand yourself.

The ebb of direction

Positive deviants are change initiators and pioneers of a better world. Not all deviants are positive, neither are they constructive. While there are negative deviants, the positive counterparts stand out by being recognized as a civilised example, as a figure for mass learning. Education helps people differentiate the positives from the negative ones.

The ebb of ...

Choice

互聯網法律，組織

2011-06-20T22:00:00.004+08:00

睇完黑人呢篇，關於法律精神，想記下些少感想。

法律條文在現代社會，最先限制的，是組織，其次才是個人。所謂槍打出頭鳥，正是源於法律精神，而法律精神源於維持社會穩定，維持社會穩定首要減低顛覆的程度，而顛覆的能力以組織比個人強。

所以當法律倘若定義某個體為組織，或組織的先導者，這個個體便成為規管的首要對象。

在香港一個自由至上的社會，與自由相對抗的成本甚高，因此互聯網法例的發展趨勢，亦只能（只合）以組織為重點規管對象。

*******

其實我最想講既係：有組織，與無組織呢樣

扯遠d，北望。原本中央重點打壓既，係有組織XX（be it 維權/上訪 among others），而地方重點係傾向打壓個人，防止演變成有組織。

呢個係法律現實，將某部分精神引用落去。而相較地方，中央係較符合法律精神，地方政府採用既係「新美國方式」即 pre-emption（就好似入侵Iraq咁），相對欠缺法律理據。（補按：，拿，呢度講法律，唔係講公義，唔好撈亂）

再扯遠少少，如果任何政府單位（不論層面）個社會整治重點偏離呢個打擊「組織」，而向「個人」懲處既話呢，我就會解搆/讀為「偏離法理依據」既一個重要綫索。

死亡的設計

2011-06-17T22:51:00.002+08:00

有渠務工人在沙井工作時被大雨沖走失蹤，最後消防蛙人在十幾米深的水渠內尋回。

在極度的恐懼中，腎上腺素會極速分泌，瞬間控制人所有的感官，奪取所有知覺，掠去所有記憶。

這種生理機制使人在獲救之後，可以過渡那段不解的痛苦。亦可使人在生命終結前，不讓這根窒息的黑暗絞著脖子走。

昨晚誰令我覺......

2011-06-16T20:12:00.002+08:00

警長殉職，是為了執行職務，為了保護市民。為了誰而死，不是為了那個誰做了什麼，而是為了去避免誰去做什麼。

這一場意外帶來了片刻傷感。至少，那警長是為了他人為了一個合理目標而殉職，而成就了某些義的。對我這等外人來說，哀而不悲。只願他的家人們節哀。

火燒舊樓，母親連腹中孩兒，連手抱一歲的孩子，連六歲的孩子，以及一名少女，通通葬身火海。

這一場意外帶來的傷感納著極度恐慌，在倉皇迷蒙中失去性命。聽罷讓我這兩子之父雙手發抖，悲從中來。不知也不能知是為了誰，為了什麼。那些孩子當時在想什麼，在想媽媽？在想爸爸？有沒有哭？有沒有害怕？他們的眼裏，看見了什麼？

有冇搞錯。真係有冇搞錯。

睇相相人自相點相

2011-06-10T01:31:00.001+08:00

前幾日迷迷糊糊（好似）見到厚黑老師。我一黎腳痛、頭痛、唔夠瞓、重感冒、手足口病疑雲纏身、做到死仲要頂硬上。。。總之九百幾樣濕滯濕熱焗住全套burqa，一個字記若：懞。

我知道佢響我公司附近返工，但幾年黎都無撞過佢。聽講佢成日飛，所以喎。今次見到佢查實唔係好肯定，外表嘛，幾年無見，感覺呢，聽唔到佢把聲確認。我都係十分鐘後返到公司個右腦先慢慢浮番佢出黎。第一個印象，就係佢相人好叻。

相人，大概就係去 profile 一個人。相人叻既，一兩眼就睇得出對方諗緊乜，下一步會做乜。我諗，唔少人都應該遇過相人叻、三言兩語睇穿曬你既人，亦probably係你親密朋友或者老細。

雖則好多人都覺得可怕，而坦白講我以前都對呢d人敬而遠之，大約因安全感不足是也，又或者因為妒忌佢相人叻過我，卦。

當年面對佢，我潛意識+下意識降低身份同能力，去換取自以為可以換取既「學習態度」，可惜事與願違不特止，更幾乎令自己終身沉淪。後話係，呢次沉淪令我更認識自己，呢種「得著」唔係任何經濟收益可比。厚黑老師佢正係呢方面既直接功臣。

家陣見番佢，諗番似乎覺得都有少少距離（話曬佢依家係某超大企高層喎），不過就無以前果種身份上既比較。（咪駁故先喇，總之有距離唔等同身份比較！）。。。唏，是但喇，有都理得佢丫。（蝦，玩陣Angry Birds唔記得想講乜添...）

... 啊係，講開相人又令我諗起當年走去大笪地比廿蚊阿叔「測字」。當年中六七同幾個唔記得響邊度識番黎響對面海返女校既朋友一齊玩測字，雖然廿蚊測個字幾貴，但又樂此不疲。

應該就係響過時揭開自願比人品評既序幕，自此人地對我說三道四評頭品足，我都略略可以用測字既態度面對。（嗯，除左果次、果次、仲有果次、同埋果次，好似仲有果幾次例外）即係比人睇相之時，亦同時學睇睇相佬個相，以其人之道還諸彼身也。

不過可惜丫，學藝未精，碰壁既多，洩氣既更多，邊度可以好似阿CK 咁成日有團火丫（講小咩，佢話團火細左都無人信啦）。好似我細個果屎都已經無乜火氣，家下燒極都唔旺... 恨鐵不成鋼？嘥Gei屎喇。

為左掩藏我心底既空虛，於是我就走去學人「自相」，呢，即係屙督尿照鏡果種。得出黎既結果，都係話IQ幾高、EQ有咩弱點、性格有咩特質、身高體重投資能力有幾燈之類。有冇準木宰羊喇，不過我硬係覺得，比人品評測字睇相甚至自相又好，比埋幾百蚊美金買份乜乜 full profile 都好，我始終都係唔係咁易改變自己對自己既睇法。

Well，後果可以係一世無發達既，不過既然我接受得到咁既結局（Errrr....），咁叫我去遷就以上咁多計算咁多分析咁多結論，去改變去改良我自己，我又覺得無需要囉。

不過，無論點，我覺得任何人點都要學下自相，就算最終收場如我一樣，乜都改變唔到，但我肯定有樣既我係成功既：就係氹到你睇到呢度，齊齊浪費下美好既光陰。（去瞓覺先）

當年今日、果日、明日

2011-06-06T23:08:00.000+08:00

當年今日

- 盟軍登陸諾曼第，代字Overlord。

- 香港政府指令海外信託銀行暫停營業

- 世紀烹騾宴

當年果日

- 鹿死

- 病

當年明日

果日咩日大家都知，但我真係唔想果日變左一個值得忌諱既日子。遮咁，我唔係話高官要正字正確，或者希望市民大眾因為咁咁咁原因覺得唔需要提唔好提，亦唔係高呼要日日穿著裝戴都鹿死上身。Well，我都係一年講一次遮。我只想講世事唔係mutually exclusive 囉。

鄙人唔係果種覺得你唔認鹿死就係罪人，你高舉鹿死就係清白既阿叔。我唔係。你提又點，唔提又點，響果日去左維園又點，唔去又點，都唔代表你響你既神面前、或者你親戚朋友面前、或者你政敵黨友面前，確切係一個「點」既人。What you are 唔係因為你一兩次表態就證明倒。反而，自己平時係一個點既人，到呢個時刻先至高呼自己對呢件事同自己有幾切身，更可以令自己睇清楚自己有幾虛偽。

我唔係pointing fingers，亦唔係責難或者擁戴對於果日有幾關注或者有幾厭惡既人，而係存在響天地間「最多 mutually exclusive既野」，唔係物理學上面、唔係邏輯學上面、更加唔係哲學上面，反而係「人既選擇性」，而唔係「絕對性」。

奉行mutually exclusive 政策，排外，排他，否定人其他既優點、認為對方作出左致命既錯誤選擇．．．都係自己既選擇。不過，如果你越肯定自己既選擇正確，就代表你認為呢個世界其他人已經做出一個錯誤選擇。假如你講緊政治，咁諗固之然無可厚非，亦理所當然。但如果你唔係講緊政治，而係你真心信奉兩者必有抵觸呢個哲學，咁你，就已經將果種內容，成為信仰一部分，縱使信仰係咪應該或者應該點樣包含呢部分內容，並唔係一句 mutually inclusive 就可以另兩者合二為一。

果日咩事，唔應該簡單用黎分辨敵我，或推心置腹、或水火不容。人地點睇呢件事，點對待呢件事，只可以獲知呢個人微小既一部分，以呢件事為自己做擋箭牌戴光環既人，隨時更容易讓人作出錯誤既選擇。

正如鄙人某日既自白，呢個見習高管越靚女，我就會越提防。

Be water, my friend.

政府社運

2011-06-02T23:40:00.010+08:00

呢幾日暈陀陀，七點幾返到屋企就瞓，瞓到十一點零起身食飯，食完飯沖完涼再瞓，最多只係立下新聞。

可能香港真係無新聞，日日都講僭建，以為俾社運團體騎劫左，黎個「全港踢爆僭建運動」。之睇番，原來呢個社會運動既源頭，查實來自政府！

原本槍頭唔知指去邊（Well，查實係我唔知，因為我病到懞左），到依家好多支槍亂咁指，反對僭建直頭變左政治正確既新sound-bite。該煨咯。如果政府可以從呢次政府自己帶頭既社會運動得到咩教訓，或者以後自己曉得點樣搞社運，唔洗靠班XXX既話... 啊，哦～

****************

題外話，心目中僭建我覺得分左四種：

A 無危險 | B 無危險
.. 合資格 | .. 不合資格
--------+---------
C 有危險 | D 有危險
.. 合資格 | .. 不合資格

有冇危險只係一個籠統量度，無分短期中期長期危險，總之人老左就要死，無保養會皺皮之類喇。

而合資格，就係有冇所謂合法批文，呢part係程序公義，亦係寄望有效既程序可以減低危險性，甚至帶出其他公平性，例如點樣分配公共空間，容許私人空間等。（補按：阿靚仔提醒，仲有「釐清責任」）

先講 A，我諗香港大部分既建築都應該屬於呢類卦，大概都係從所謂日日講既「法治社會」倒轉頭推論出黎遮，無咩特別。最特別係，呢期正字正確風吹向呢邊，無人敢say no。

B呢，應該就係所謂「無即時危險既僭建」勒，亦係話題所在。由 B 轉去 A，搞番好手續，或者改改公共空間分配原則，或同時用私人空間個人財產第三者人格做交換... 嗯，我都係亂up遮。（呢 part 咪政治囉）

呃，基本上，港人心目中既 C 應該唔存在，雖然偶然會引爆一兩次人為過失，不過呢類黑天鵝無得估亦唔得閑估，要靠專業人士定期檢查，輔以有心人維護維修，轉 C為A。（之但，世事係咪咁理想呢？）

D 呢，亦係所謂「僭建」，但同時存在明顯潛在危險（...又明顯又潛在，即係乜？），所以務必要拆。不過據聞乜署人手不足，而且 C 同 D 兩類既擁有人士你推我讓，再加上焦點放曬響爭論個別人士既 A 或 B，鷸蚌相爭之下令 D 得以苟延殘喘。

如果你係決策人士，你個焦點又會放響邊？

一個李嘉誠

2011-05-28T01:26:00.001+08:00

香港有一個成功既李嘉誠，同時亦有999999個失敗既李嘉誠。

正如遺傳工程學有個懸念，問如果希特拉可以被複製，咁呢個/呢幾廿個新希特拉會唔會同樣可以令世界發生第n次大戰？

一Q樣遮。

我讀生物出身，受「環境支配論」（if not evolutionism）影響好深。

一隻雀仔唔會因為自己幾把炮所以就曉飛，環境可唔可以令佢飛得起佔好大比重。有毛有翼先要睇父母有冇餵飽佢，又要睇下有冇偶然食錯野瓜鬼左或者病到五顔六色，跟住又驚會唔會鵲巢鳩佔俾人狸貓換太子..... 再對比下自己努力同付出成唔成正比，最後先得出一個點樣既李嘉誠。

做個「努力過」既李嘉誠都唔係好失禮遮，唔洗下下要做個「成功左」既李嘉誠先代表有呢種DNA下化。Well，遺傳工程學如是說。

（重感冒+肚痛+腳痛中，家陣再逼自己死去瞓）

廠務碌碌

2011-05-26T00:33:00.008+08:00

日日繼續天昏地暗的工作，一為唔想聽到前度響我耳邊 wung wung 聲，二為新歡Eminem! ：Love the way you lie:

記得一定要聽埋Part II，極力推介！家陣已經完全唔記得邊個係Taylor Swift...（但仲記得Cyndi Lauper!）

***************

係，今日響工廠賴左野！

事緣孖屐亭 head office出左個依貓批文，勒令要所有廠務人員－　東至日本廠，南跨澳洲南非智利，西達阿拉斯加，北連伯令海，上至各級老闆，下至各層薯仔,intern,件工,forced labour等等，最遲響聽日匯報新letterhead 應用進度。

呢類批文成日都見好正常，今次同以往亦出現同樣醒目仔都會犯既錯誤，唯一唔同既係，呢個錯誤之所以一錯再錯，係有好多人都以為自己無錯。

孖屐亭HQ 個email批文，set 左個新 mailing list，將工廠所有人放曬落去，然後比個名叫letterhead council。個email 順順利利 send左去letterhead council，跟住全世界都知咩事。點知同以往一樣，有d 唔清醒但又好好學既，想confirm 下個deadline幾時，一下REPLY ALL.... 全廠連山旮旯office 過萬人個inbox 就收到一封 junk mail，然後過程中有問有答又收到一堆filtered 唔到既junk mail。

都算，呢d 事，成日發生，自不然會有人出聲叫停，叫班孜孜不倦既學子唔好再REPLY ALL 勒，跟住有人覺悟，有人投胎。點知可能因為今次個新mailing list 實在太人性化勒，俾人誤會係hotline！唔同以前咁，乜乜department，乜乜region，乜乜business unit，一睇就知send曬比全世界。一封普通enquiry，變左x10,000 封follow-up，再變x100,000 封話唔知點解俾左佢，再變x1,000,000唔好叫人唔好REPLY ALL，如此類推。

嘿，我以為自己好聰明，於是一野同成萬人講，叫佢地唔好黐個新mailing list落去就得，OK，都相安無事，仲有來自Aberdeen（唔係香港仔，而係蘇格蘭果個！）甚至Fargo （咪雪花膏離奇命案果庶囉）既靚女acknowledgement，心諗，應該奏效勒卦。

嘿嘿，點知俾個響Badajoz 果邊IT總部某靚仔analyst 話我添亂。好心著雷劈。都算，解釋左雖然換唔到咩，攞番個彩條氣都無咁chok。

嘿嘿嘿，咪話我地工廠d人秉性真係純良，竟然破紀錄由以往五封起七八封止，都家陣卅封以上就快破50大關！

嘿嘿嘿嘿，50遮，碎料喇，身邊同事雖然媽媽聲但都慣曬，見一封delete一封，Aberdeen個姐姐仔（定係妹妹仔？第一次傾計，唔識）佢話我聽都係咁策略。

嘿嘿嘿嘿嘿既係，我send出去以為好有型果封email，換黎無花無假過千封Out of Office Reminder 同埋 Undeliverable warnings，逼爆我爆唔可爆既mailbox！頂，邊有工廠同一時間咁Q多人放假架...

just gonna stand there and watch me burn...

忙，隨口up

2011-05-19T14:00:00.002+08:00

家陣幾點鐘？今日星期幾？

就係我呢幾日，差唔多收工前無啦啦問自己既問題。

公平正義，是否只是感覺？

的確是感覺，不過也是大眾的感覺。採用何種科學方法、客觀標準、計算模型、邏輯推論，最終的目的，都是要說服大眾這個感覺是否或夠否合理。感覺往往主宰一切最終決定，此刻於我覺得（又是覺得）最合理的解釋，就是感覺維繫了意識與意志，說服自己是存在的、是值得存在的。

Glencore

試圖踏入一個未知既世界，恍恍惚惚、惶惶恐恐，不斷說服自己是值得走這一步，不斷說服自己比其他人更用於嘗試。

Competitive Animals

不斷比較，不停比較，不斷惶恐，不斷製造追趕自己的巨人，不斷逃跑，不斷告訴世界一切都是自己將恐懼轉化成動力的功勞。

發情期

弊傢伙！近排見到一切女性物體竟然激發神秘敏感荷爾蒙！（前上司除外，佢會啟動我 cannibalism 既基因）

借問飲多d水可唔可以稀釋？運動多d 可唔可以縮短半衰期？

Greensleeves

竟然搵到當年ONJ果首！

Taylor Swift!

拿，我係聽聲咋，佢乜樣我一無所知架。Well，Amy Winehouse太潮，Taylor 呢個鄉村腔比較arm我呢亭老餅囉。

Cannibalism

... 兩點鐘開工先黎噗響檯面瞓覺... （五内翻騰...）

人性共管

2011-05-10T16:23:00.012+08:00

（呢篇主要吹水，順便抽水。）

我所講既「共管」，即co-managing，例如兩個team leaders 同時管理一條team。團隊共管，亦可以叫 shared leadership，一山藏二虎也。

共管有幾個形式：

(1) 兩個阿頭有完全相同既職權+功能+責任，只係執行管理既時間不一樣，例如管唔同shifts，或者比較高級既阿頭飛左，由佢第二把交椅署理事務。

(2) 兩個阿頭職權 and/or 功能 and/or 責任都唔一樣，亦同時管理同一個團隊。例如某HR Manager睇曬成個team，另主打manpower planning，而又有個AM主力睇住C&B，但隨時要 support MP team。

(3) 兩個阿頭有完全相同既職權+功能+責任，同時管理同一個團隊。

以上形式純粹以幾個簡單criteria黎分類，讓彼等對共管有個初步印象。出黎做過下野既，都可能試過同時比兩個阿頭指點 + 指指點點。基本上，大部分經歷過比兩個阿頭共管既同仁，大致上都係同樣既感覺：折磨。

入正題，我剛剛上左神枱，同以前阿頭共管一個小team。

響紙扎工廠做踏入第 n 年，頭一年做人 in-tray，成枱都係野。第二年開始，(1)，跟住 (2)，到家陣 (3)。

成個過程由零開始，到最後 share 一 team人，唔係自己醒，而係我前阿頭不（夠）濟，加上幾個環境因素：幾個主力走左，個客又唔生性送鬼死好多野俾我地扎。我呢條粉皮能夠去到呢個階段，只係因為搭左一趟順風車遮。

我同前阿頭之間既恩恩怨怨其實一直存在，呢 part 唔講勒（雖則每次提起都想爆粗）。正如好多乜叉世代鴻溝，講出黎去self-prophesize，咪盞令自己更加唔曉得反省。我已經夠自大自我，唔想泥足深陷。（欸又，唔通我個預言咁快應驗左？）

中途抽下水，我會問，星期六日既然唔洗返工，咁要幫公司響非工作日 update facebook又算唔算返工？係，幾分鐘既事，咁你又唔做？係，因為你請我所以我要做，咁係咪見工果史已經同我講清楚我要星期六日做公司野？係，星期六日要哺住電腦前面，又無iphone 又無無限數據plan 又無輕觸式手寫，係要逼我響屋企某時段出勤，咁唔通我就唔算犧牲？最後一句，咁簡單幾分鐘野你又唔做？

呢位女上司個情況當然未必完全如我推算，但以上情況查實我想帶出，呢個正係我幾年黎既處境。

話說我地有個紙扎客，佢星期六日同公眾假期係要我地work at home 幾分鐘既（事實如此）。做左幾年，唔係覺得無野，而係既然得閑，咪做囉。但我作為一個好Q老既老鬼，最唔likey既係我前阿頭果種闊佬懶理既態度：delegate左俾你咪就係你既責任範圍囉。「如果賴野既話係你一個賴野咋，唔關我事呀。」你睇，我點會唔爆粗？之但，我爆粗唔係因為我星期六要犧牲，而係我犧牲既時候你完全無諗過 recognize 我既犧牲。如果我推算既情況無錯，果位女上司口中既八X後o靚仔既犧牲，我完全理解，呢亭上司既然睇唔到下屬既犧牲，淨係睇表面，究竟從佢身上學到咩，我呢個旁人真係好存疑。（一人離職影響運作，邊個責任大？唔通係個細咩！？）

而我，經歷過(1),(2)兩個階段，開始有自己既下屬，呢個「下屬」既意思唔係響 org chart 入面你個box下面連條線呢種，而係能夠響受formal authority 壓制既情況去運用你既影響力，去「產生」一個「垂直」工作關係。如果要好基本咁 recognize 下屬響假日既犧牲，簡單如一句「呢兩日同我 update 左 facebook，唔該曬」或者「我聽到你琴日好似去左街，我已經同你update左fb 勒」。Empower之餘不忘自己個accountability同role。咪自然有人明白上司下屬一樣會為叉錯負責。引文果位8X後令我覺得，「犧牲」只係表面原因，上司既不負責任同不體恤，先至係佢講唔出口果部分。

都係果句，我唔鍾意世代話題。之但正如我最開頭上面講果三個contingencies，其實同我唔鍾意既野好有異曲同工之妙。（我認我成日自打嘴巴）同者，就係「分類」既方法。

講返共管。

共管，存在兩個管理人。目標清晰。8X後+老鬼。目標明確。如果有個situation好容易將目標分類成「兩個」，係，易於理解，易於討論，但亦易於誤解，易於發洩。前阿頭佢無優點咩？有格，但你叫我講佢優點？不如你俾我爆曬粗先喇。CK講老鬼時我第一個就諗起佢，咁就證明左：一，我一樣鍾意「二元化」，聽到正邪黑白即時勃起；二，我能人所不能，竟然醒覺到自己會有非性興奮式勃起。

無論管理人地定係管理自己，「自覺」真係好緊要。

如果俾我再抽多少少水，我會以 co-management 角度去延伸理解+分析香港前路+為此前路追求答案，而非齋以 principal-agent 定位。最後有篇幾警惕同發人深省，但又要小心容易墮入一個非黑即白既誤區（即二元化地看人性），黎和應黑人果句：「... 一個proactive mindset，將解決問題的主動權帶回自己手上。」

咪以為俾兩個阿頭 managed 係折磨，co-managing 果兩個一樣持續互相折磨。所以話，唔好淨係掛住睇自己，試下企響人地角度睇下喇 ....... 仆guide。（家陣好想有人和應）

小 C.M. 今日假期孤獨地響辦公室書於 4:20 PM

靚女高管

2011-05-04T22:52:00.004+08:00

好怕靚女，除左因為令人分心之外，仲因為暗黑老師曾經警告：矮人多計，靚女免問。

佢話一切都係同動物既催情激素有關。矮仔好多因為外形欠佳，所以會努力用腦搭夠。而靚女，因為由細到大都靠樣殺曬，所以九成自信爆棚，自視過高。

睇黎CK講既Kathy隨時靚到dum一聲。如果真係咁，俾著我就一定三思三思再三思勒。

我遇人不淑？唔覺得播，我識既靚女裏面，職位越高，穿戴越正既靚女（拿，我唔係講一般靚女，而係講連隔離公司都會談論既靚女），佢地既能力..... OK 啦，但一定唔值果個數。有d懶到出汁，淨係識得delegation，有d 乜都唔識，除左識得鬧，有d 好好學，但咪一路學囉。其中仲有d ，去到邊升到邊，好似好醒，查實只係靠個助手，自己不過係搭順風車遮。

係，靚或者真係可以幫公司帶黎生意，帶黎和諧既氛圍，帶黎九百幾樣美學感官上既得益，不過維持得幾耐？真係好實在？

之但呢d都唔係我最唔想請靚女既原因，而係高管，除左響單打獨斗了得，可以響自己部門獨當一面之外，最重要係幫助到老細。

而老細（泛指一切見到靚女就充血既老細），最重要既，就係佢大腦。當靚女日日響身邊chik cheuk咁轉，少不免比一個鬍鬚核凸既孫明揚（or孫柏文？）肺腑之言來得舒服，但就因為呢種舒服，老細就隨時喪失部分大腦功能。亦正如果呢個靚女醒到加零一，老細就更容易迷失，以為美貌與智慧並重既高管全因自己幾生修到。傻啦，呢種靚女百中無一，若果神級高管智慧萬中無一，兩者合體全港都只係剩得十個唔夠，唔通咁都博得過？

咁當然外貌同智慧都有分高低，要求唔高都可以搵到個左右手。不過最後都係果句，奉勸見到太靚既，就要睇得格外清楚，否則一個唔好彩俾個假象蒙蔽，到最後唔想要佢幫手果陣，以我宅男經驗，靚女比醒目女仲收買人命呀。

如果你一個人響超級市場困住左....

2011-05-02T15:56:00.002+08:00

剛才問阿女咁既問題，結果當然係喊到飛起喇。

不過呢個早就預左咯。而且呢個問題都 plan 左好耐，點樣 deliver，點樣應對，目的係希望扭轉一個會令小朋友喊都飛起既問題，可以成為佢地克服內心恐懼既一個小訓練。

朋友

2011-04-30T00:03:00.002+08:00

會關心你係咪傻左
會著緊你係咪行差踏錯
會響你行差踏錯扯你上黎
又唔怕你鬧
因為佢一定比你聰明
一定比你更明白自己
難求
亦唔好強求

李卓人，去PK啦你！

2011-04-26T22:57:00.004+08:00

最低工資實施之前信誓旦旦話唔會影響低學歷群體就業，家陣響電視面前叫政府設立學徒制，係時機推行培訓乜乜物物。

PK啦你！

亞視反擊戰

2011-04-22T00:38:00.007+08:00

琴晚臨瞓前睇到電視無啦啦插播亞視某發言人，好高調咁質疑無線同索福瑞（某不知名之但又據聞係唯一一間電視收視調查公司）造假收視率。

事件沉澱左一日，用google 搜索以「亞視」或「亞視質疑造假」為keyword既新聞...

ATV新聞，新浪新聞，成報，TVB頻道（最後呢個用google search 「網誌」instead of 「新聞」）；蘋果評論標題《無線斥亞視誣衊失實；東方標題《無線發聲明轟亞視》，留意兩報標題皆以誰作主體。
》

嘩！係咪好奇怪？！

奇一：Google 竟然search唔到蘋果、東方、明報等大報有關呢件事既新聞！（今次真係要投訴google！）

奇二：竟然唔覺有人挺亞視

奇三：我經常以為自己特立獨行，原來我睇開既亞視一直都好多人睇！扯．．．一廂情願。

奇四：查實係一d都唔出奇... 雖然我早知收視調查用咩方法，但我咁耐以黎連個收視統計器都未見過，仍然無質疑過究竟有幾可信！慚愧慚愧。

＊＊＊＊＊＊＊＊＊＊

本身我飲無線奶大既，開始睇亞視大概始自2003年，果陣中午有段空檔可以catch到香港新聞。然後又過左幾年，由追無線節目到「裝下」就算。心血來潮翻查自己講過乜，原來自己響2008年已經有五成時間睇亞視，到依家至少有八九成時間都係睇緊。老實講，我覺得亞視雖然自己既演員未必有無線既咁自然，之但睇得出佢地比左心機落去。新節目亦比無線有創意，唔係純粹令你心境舒暢令你滿足到聽日後日大後日。

記得有日同同事social 講開亞視播張達明主演果套《吉星高照》，佢同我都話主演果幾個d戲屎到無人有。買套咁既劇返黎真係幾眼冤，無線果d真係好佢多多聲。Well，係丫，我同意，之不過呢套胡鬧劇，亦睇得比無線果d 悲情、鬧交、冤家路窄、門口偷聽返炒無數次既自然好多播，似番套戲，而唔係似virtual reality。

聽到好多人重複一萬次話慣性收視，咁眾卿家有冇諗過點樣解決自己個慣性？係咪真係無線好睇過人？定係自己鍾意一路睇一路鬧？有冇試過「認真」俾自己重新選擇？

如果連自己都未認真試過隔離台點點點，齋話無線掂掂掂，個主播好好好，洗個面照下鏡先啦。

香港人又無冒險精神又鍾意做大眾主流.... 真係。

又或者，家陣有冇開始諗下「慣性收視」四個字，只係無線既宣傳伎倆，或者係評論員既理所當然，甚至係 refer 緊自己既惰性？

（嘿，誰知亞視竟然話收視原來可以追貼壟斷台喎。咁我係咪又變番大眾主流？）

＊＊＊＊＊＊＊＊＊＊

自2008年以黎，曾經略略提過亞視兩三次。其中一次，提到王征。而今次王征呢個名義上投資者，幾乎成為呢次反擊戰既幕前統帥。

今次唔止亞視反擊展開序幕，加埋今次大報傳媒偏袒、前排無線賣盤、臺灣資金入股、樂壇抵制、高層被調查，話時間係咪巧合，觀察係咪武斷，係咪有政治瓜葛我唔曉評論，之如果無涉及政治，就肯定係競爭對手打蛇隨棍上，而我亦估計幕前統帥，會乘勢革新亞視幕前幕後各項環節。與此同時，無線各利益盟友，或坐地起價或看風轉舵。

我呢個場外打手除左借此踩我前奶媽兩腳之外，亦對新乳娘同佢身邊既變化，拭目以待。

奶粉，家長，Power

2011-04-17T01:09:00.004+08:00

呢篇refer to 阿米果篇咪當父母係白痴。

畢明（廣告中人）響AM730一連寫左三篇《疑似selling point》，講醫院藥劑師學會「揭發／踢爆」奶粉商巧立名目果件事，避重就輕此其一、提升信心此其二、創造恐懼此其三。不過，呢幾樣策略只係果幾間最尋常既廣告策略，在我黎講，無咩希奇。如果好似阿米咁就咁話目標觀眾唔係香港父母，而係內地父母，嘿，咁真係好睇得起香港人。

我最想話，響育兒同照顧 BB 健康方面，好多父母真係白痴（有時甚至係超級大白痴... 真係多多得罪）。

話佢地白痴唔係話佢地 IQ 低，當中更不乏經濟自由人士，而係佢地對於點樣打理子女健康真係完全零知識。話人零知識唔係代表我自己有咩專業資格去評論，不過如果你第一個感覺我需要有專業資格去評論，咁你就係奶粉廣告既目標聽眾。

便便奶粉借 facebook，借益生菌，都係賣 product advantages，即係 choice。同樓盤廣告一樣，都只係賣 product，信心略略趔過，但幾乎唔知邊個發展商。

奶粉廣告，低層次既賣 product advantages，中層次既賣信心，高層次既賣 brand。

兩三年前斷斷續續提過名奶製品公司 Wyxxx既 Ad campaign，當時既角度主要圍繞住肺炎鏈球菌，唔係奶粉，見 (1), (2), (3), search for "Wyxxx"

我覺得部分奶粉廣告同鏈球菌廣告策略相同，即係利用 Expert Power。（魔術師提到既conform to social norm，就係institutional theory 裏面所構述既其中一個最重要既社會傾向）

而講到 brand development，當中最強既，仍然莫過於 Wyxxx。齋講處理便便，Wyxxx既手法唔係話食左有幾暢通、令父母有幾開心，而係咁。

香港父母好多都係經濟至上既動物，生之前最擔心既唔係子女健康，而係自己將來有冇能力供養，第時會唔會影響自己生活質素等。其實對於未有過下一代既男女黎講，要佢地想象子女會為自己帶黎咩影響，除左日常接觸既經濟活動之外，又的確好困難。呢個觀察之普遍性，我覺得除非香港經濟競爭呢個概念沒落，否則就一定同我地後代既父母並存。所以我唔會怪責父母，反正呢 d 係個人選擇。

不過，我最想話，生左之後，先前既毫無準備，就影響左之後既結果。既然生之前完全無優先考慮子女健康，生之後就「好自然」將照顧子女健康既責任假手於人，聽從醫生、聽從長輩、聽從朋友、聽從 baby kingdoms, social groups.... ，倚賴 expert 意見。

無論香港父母有幾咁 educated，我相信大部分對於 experts 有好強心理倚賴。呢個亦apply to 內地父母。

奶粉廣告不過係俾個意見你，俾個你未見過既choice你，等你響毫無頭緒既時候多一樣煩惱。其實便便廣告只係食住條水，去catch 一下眼球，製造 exposure 咁遮，真係當香港人或內地人會因為呢類「專業意見不夠充分」既廣告黎買既，有得幾個？俾咩人睇，唔係分香港內地，而係普羅大眾，我唔會睇得呢類廣告有幾 specific 地高章可以引起所謂目標觀眾既信任。話分兩頭，如果一個提供新 choice 既廣告 exposure 係俾其他牌子優勝既話，咁呢個又會產生另一個優勢。

關於最後呢點，有d個人睇法：我諗好多家長都試過唔同奶粉，BB 無結宮屙血都唔會點轉架勒，反正就算無咩腦部發育元素，大個逼佢上多d playgroup、補習班、興趣班應該補番有餘。家長對於奶粉構成，無傷害就夠勒（例如棕櫚油）。另一方面，如果西醫話，隻隻奶粉一樣其實俾bb 多 d 水就唔會有便便問題，亦係真既話，咁所謂燥熱呀熱氣呀之類，都只係個別 bb 既體質同奶粉既成分扯上關係（應該好多家長相信呢樣固喎！）；亦即係話，有soundbite製造更多 exposure 既奶粉，如果可以俾多個 choice家長，然後俾家長口耳相傳，就將會係最成功既廣告。都係果句，奶粉廣告我唔認為會特別指向某類消費群體。

至於同奶粉廣告同樓盤廣告既分別，唔多講勒，用以上角度比較己可見一斑。

插句嘴，雖然睇落好多日本牌子或 Mead Johnson A+ 搶到缺曬貨，但要記得缺貨唔等於「好賣」，只係代表供應比需求少咁解。如果接受呢個供求理解，就應該可以更加接受奶粉廣告效力同市面觀察到既情況未必有任何關連。

講返 Wyxxx，睇落佢好明白 brand reliance既重要，以奶粉黎講，我唔知過往銷售情況，所以唔能夠判斷 Wyxxx有幾好賣，不過我幾相信。Wyxxx 隨時響肺炎鏈球菌疫苗呢方面賺一大筆，應該係佢地成個 brand building 策略裏面一大成就。奶粉campaign 標誌住呢個策略既延續。奶粉、疫苗同埋各類牽涉醫學知識既產品，brand reliance會俾一野賣斷既產品（甚至可以轉手賣出既產品）黎得重要。就算便便廣告可以引起幾多共鳴，始終唔及人地企響「專業高地」同你講輪狀病毒可以點點點黎得深入民心（又唔講下smallpox、Ebola 可以點點點？check下occurrence先喇）。

至於好多香港父母既白痴，唔一定係自己攞黎，而係，呢個教育制度根本無教你生兒育女，提醒你同買股票既本質上好似：informed decisions 唔夠令你穩操勝券，就算 information 好似來自有幾專業既 source，都一樣可以係山埃。

結語：

我相信城市人天生有保護子女既能力，正如麵包發黴發臭就知唔食得，唔係等包裝上既食用期限話你知得唔得。多d帶佢地出去曬太陽、去下郊外、落下沙灘、做下運動；好過出街唔比曬黑、一歲前未去過公園驚其他小朋友傳染、之但又可以去playgroup 摸呢樣摸果樣喎。班友咁容易病咪最終又係令自己辛苦。

************************

關於阿歌德講果樣：「近排係roadshow成日播個個「教仔廣告」」。

作為巴士常客，呢個節目梗係有睇，comment：簡直濟世為懷！

雖然有d細節因應唔同小朋友性格或環境或情況作出微調，但基本方針正確。我覺得最大既信息有兩個：

一，阿父母，唔該提升下 EQ
二，阿父母，唔該俾d 創意，俾 d 聯想力，唔好用成人角度去「培育」小孩。

蠢動？

2011-04-15T16:50:00.001+08:00

Q: Hi.... I am a bit curious. Where are you from?

Q: By the way, my name's Q.

K: .... Hi, I'm from ((place name)). K.

Q: Are you seeing someone tonight?

K: .... Nope... and you?

Q: Hmmm.... maybe seeing you?

K: Hahaha. Never thought HK people are so straightward.

Q: Oh, please. I was, actually. Years ago. But tonight I just wanted to see how people envy me.

K: ... so, where to?

理性撕裂談談性

2011-04-13T22:27:00.003+08:00

題目

呃，剛剛先發覺原來向來寫標題黎反映自己發噏風時個精神狀態，far 多過內容既主旨。活到老學到老，好，好。

原先

梗係想講政治啦！我呢亭阿伯最鍾意吹水搭爹隨口噏，不過最近飛滋同一時間生左四粒（其中三粒響條脷度），噴政治廢氣都悶死自己，等下次有心有力先。

隱婚．晦婚．尋婚

老實講，我好少講亦唔係太曉得男女關係、性文化，今次都算破格/例/戒/處（第一次寫喎，乜都破啦）。

睇過下近排陳奕迅劉若英果套戲既影評，嗯...... 求職或工作上故意「隱婚」，話自己單身，未試過。嗯，我覺得不外乎兩個原因，一係成班麻甩隱黎都無用，二係成班慳d啦baby隱左手尾長。幾年前有次以為我隱婚，幾乎俾人反枱咁滯。

之但晦婚，唔故意透露自己個婚姻狀況（a.k.a. 被經濟操控狀況）呢，就幾乎響間間公司都試過。或者覺得無必要啦、或者覺得有必要啦、或者有心有力想呢度食呢度屙啦、或者覺得屙完可以唔洗抹啦、又或者唔曉用英語外語北方腔表達自己已婚之類，總之人死必有其原因。

從來唔否認甚至好認同，晦婚的確可能帶黎唔少經濟上既得益，甚至工作上既便利。不過呢刻借第史還，晦婚積積埋埋還min pay 根本唔係長治之計。所以到左某一刻，好似本人咁醒目果d，都會將呢個晦晦地既身份變得無咁晦。Well，manage expectation 嘛。制定好 exit strategy 之後，慢慢黎，大家好。

咁當然，唔一定要再世潘安先至有人注意既，或者你聰明過人、博學多才、有修養有魅力呢（明嘛）。之但猜猜尋尋的確耐人尋味嘛，尋婚既男女，desperate 果d 會睇下你戒指戴邊隻手指呀（我戴中指），比較confident 果d 會睇下你有冇戴戒指呀（我唔係戴右手），入世未深果d 見到你就即刻除眼鏡呀.... 都希望搵到合適既之餘，亦唔想俾人突然一鑊撬起。所以就算晦婚，都要留少少餘地，所謂盜亦有道，唔好殺到人措手不及丫。

逢場作興怕咩？大滾油話投桃報李遮，人地俾兩個大桃你，你點都要送番個小李人地卦。（.... 真係唔止點回敬佢）

科學

拿，有一件事，絕對唔可以話俾任何人知。就係曾幾何時，有人好認真咁以身犯險
，調查同紀錄過經常共處一室既男女對於婚姻狀況響公事合作上有幾大影響。結論唔講喇，總之耳熟能詳喇，至於結果喎，咁未至於一身蟻就唔好追究勒。

藝術

唔講唔知，鄙人查實對藝術都好有研究！所以一定會求其搵個藉口話開會見客老闆追朴直，然後約埋大滾油狼友同coyote man一齊去揣摩揣摩呢個新派後現代藝術性代表。放心，條 link 對目標觀眾群完全無spoiler，之但各位師兄弟入場前後記得各取所需，對辦唔對辦都唔好找我呢個維園阿伯晦氣。

原則，就是預測

2011-03-29T20:30:00.005+08:00

最低工資與僱傭合約

對我呢個退休中既人治人黎講，果堆乜野有冇飯錢、休息日應唔應該有薪、會唔會更改僱傭合約之類，查實無咩爭議。再講清楚少少，係對我「個人既原則」「無咩爭議」or 「好少爭議」。爭議點主要在於點樣 communicate，點樣 negotiate 甚至點樣皆大歡喜。

無爭議既地方，係我既底線，每月收入唔可以少過最低工資生效日之前。

如果就呢一點，即係話，我唔會同意乜乜政黨或工會認為最低工資應該要放埋落有薪休息日午飯時間之類（總之唔係工作時間都有收入）。呢方面我既原則係，最低工資水平係保障工作時間的收入，而唔係為休息時間提供工資保障。

如果每小時的工資提高了，縱使收入跟以前一樣，那就意味著休息的時間多了，比如可以照顧家庭、減低過勞而受工傷的機會等。我想，這個理念已經達到那些努力推行最低工資法例的政黨與人士的「原則」，如今多了新原則，要符合之前所簽的僱傭合約。於我，沒有爭議的地方是，僱主能做到，就做，做不到，商議重新制定合約，甚至解除合約好了。

被僱主解除合約，或商議重新制定合約，是合約自由，是一個人或企業跟另一個個人訂立合約建立關係的自由，尊重法律條文，尊重雙方彼此的自由就可以了。這個結果，正是推動最低工資立法的眾社運或政黨人士求仁得仁而來。

重新制定僱傭合約在商業社會經常出現，個人認為僱主最必須要肩負的，是新合約跟舊合約的受僱日期保持連貫性，不可以騙去僱員舊合約之年資。如果還想負多點良心的，戮力提供平等機會給員工就足夠了。

原則與預測

一個好平凡既推斷係，人越大，經歷越多，自小建立既原則就越豐富。最近黑人講，話「常言「勿談國是」，原來因為政治跟宗教差不多，很大部份都不能預知結果，並且需要一定信念去維持。」，真係一言驚醒。

阿女出世會嗌到有奶飲，兩歲發脾氣就係原則，四歲隨心所欲就係原則，到十二歲朋友講既就係原則，到二十歲自己理想就係原則（嘩，好理想喎，想當年自己仲係一舊飯），三十歲結婚生埋仔iphone99 就係原則。「原則」隨成長隨環境改變，一路演化逐漸產生「預測功能」，預測越準確，原則就越堅固。

嗌得多有奶飲，準。發脾氣你會氹，準。我想點就點你唔會阻止，準。準到咁上下，登登登鄧，新的港孩正式畢業。

不過我硬係唔明，點解有d人好有原則，之但佢地既預測完全離曬譜！點解呢？係咪佢地既自我補償/安慰/維穩機制特別發達既呢？（嘻嘻，都係預測遮，未必準既...）

文字雲既如此云，來去都係一舊雲

側田又一次好帶挈：http://timc.idv.tw/wordcloud/zh/

今次學人玩文字雲，呵呵呵呵！

Well，我最初仲以為個口頭禪一定係「查實」，點知竟然係連自己都唔相信既「可以」。搞咩呀，可唔可以係「唔可以」呀.... 係咪代表 action-oriented 呀，有冇僱主對我有興趣呀？ ;>

老實講，我覺得呢個 engine 有個好大盲點，就係「無單字」，我諗住十個有九個都應該係「我」字（or equivalent）既雲最大架勒，不過無辦法證實到，算咯。（扯，呃人既，點會俾到咩提示話你聽係咩類人丫....）

咦？唔知呵邊個同阿邊個有似係邊類人呢？昃昃先～

（哎呀！原來我舊雲放左響屋企，返歸再貼... 噢，已貼）

仔女小記

2011-03-24T19:13:00.006+08:00

連續幾日俾阿仔阿女荼毒之後，慘，我竟然臨老入花叢...

...and this.

記昨日之後

2011-03-21T20:18:00.004+08:00

雖然日本核災陰霾暫且褪去，不過心情依然沉重，吹水解下鬱。

前事

果日媽咪同事與仔女之母不約而同告知超市食鹽被搶購一空.... 還以為防輻射雨具已經是趁勢炒作的絕橋，如今終於證實大眾原來絕不平庸！食肆需求大，被搶購的食鹽、豉油.... 心諗慘咯，連豉油撈飯都食唔起咯。都好彩，到左琴日終於清醒番d 咯，阿邊個話如果呢個謊持續落去，可能就開始有報道，揭發有人用工業鹽扮食鹽，到時又無啦啦驚一餐咯。

荒。慌。謊

我覺得，唔係乜乜羊群反應or 類羊群反應，就可以叫做「慌」。

造「荒」的時候，「慌」係手段，「謊」則係工具。大部分羊群反應中的「慌」不是對政府或所謂主權管理者等的不信任，而是對其他subjects/citizens/neighbours 以及「環境」的不信任。所謂政府只是一個比較明顯的圖騰讓大眾宣洩自己的疑慮，甚至rationalize自己的愚昧。

因此不同意這個角度的評論：http://news.enorth.com.cn/system/2011/03/17/006163631.shtml

很多評論都「過分高估」 (1) 市民對政府的依賴程度 (2) 市民對政府功能的認知程度 (3) 市民對政府行政表現的期望。然則在實際情況評論者亦「需要」高估，否則不可能得出合理的「政治推理」，並推動市民或團體接受。

以上是對香港的情況說的，至於日本，不敢說。不過，如果作一種遙遠的猜測，我會採用institutions 而非政體來解釋香港、國內，以及日本在應對危機時的差異。（如果曉得經濟學我梗係會lik 呢套黎解釋啦）

沙士之後

有人話，香港人的所謂危機感，其實是過了火的危機感，或是驚弓之鳥的危機感，即驚死感。

其實，有冇聽過雙方交戰能引起最大恐慌的，其實係聽到第一響槍聲？人既心理stabilizing 機制可以用一條sine curve 黎描畫。Fight or Flight 呢個決定，其實係響槍聲第二刻先至會出現。而我係觀察日本人既反應（增派死士），而非中國人（扮弱勢輸打贏要）既反應所得。慣左 fight同樣既 foe，立架生自然快人一步，但面對唔同既foe，又要適應一下。

沙士，只係教曉香港人適應左一種危機：病從口入。如果人地對住你打乞嚏或咳兩聲，雖然仲會幾敏感，但早已見怪不怪。輪到新型危機，一樣可以走難咁。始終香港人自由慣，覺得自己做選擇就最好，所以... （OK，武斷咁講） ... 要香港人試下聽權威、問意見，不如自己憑所謂半桶水常識好過，反正唔洗死兼唔犯法，做左先講。

危機感，從來唔係單一既。傷風咳，都已經免疫喇。至於如果下次大亞灣有咩事既話反應會點，我諗... 我呢一輩可能會慢d，下一輩或者未嚐過呢次日本危機果一批，反應就唔止咯。

退鹽之理

如果大眾需求必須要考慮的話，如此不問情由讓民眾退鹽又是否合乎「民主」呢？

簡單回應 Kenka上次之評：「CM講的institution的全貌應該是：官的權責很大，沒有互相約束，也不容易受罰。在這點而言，是文官政治極容易滋生的毛病。」

不。從institutions的角度，我所指的教育的目的，「完全」沒有考慮「民官」之間或「官官」之間的約束，而是「民民」之間的約束。民民之間的約束並非由官所牽頭的所謂人民互相監視，而是對抗一種「集體壟斷」的傾向，即 Institutionalization。

而我下筆的焦點，是集體壟斷與反壟斷，是環境的局限與突破。官，只是一個太容易取得的目標。民，才是那難觸摸卻更重要的目標。

昨日今日明日（後補）

原來我係想講我阿嫲。

據聞佢已經九十有六咯，上星期腳軟仆親起唔到身入院，最初都話無野。後來我地探完佢，經姑娘話佢盆骨骨折。琴日仲話要做手術，今日先知原來唔做手術萬一有併發症就大件事。佢仔女知道之後，就咋咋林今朝開刀。好彩收工前消息係做完手術好好精神啫。嗯，咁大年紀做手術，唔擔心就假咯。

特別介紹：驚恐讓人瘋狂

盲搶鹽（笑中帶淚版）

2011-03-17T23:17:00.002+08:00

Pakkin兄的盲搶鹽，睇完一定盲腸炎！

多謝你（們）。

恐慌情緒 Exploiter

2011-03-15T18:44:00.003+08:00

琴日公司班餵開日本奶粉既爸爸媽媽開始騰雞，「搶購」呢個詞語已經形容唔到果個情景，因為，已經無得俾佢地搶，唯有四處張羅、搜刮、求救。

原先呢班爸媽正想避開果隻超級奶粉既熱潮，一黎唔洗同人爭，二黎又平d，諗住一舉兩得，誰知世事難料，日子又再令人危機感爆滿。

響香港地生活一向都無咩心理保障，走難一齊走，返歸一齊返。係咁。可能有專家話羊群心理籠罩小島，之但呢個「羊群」，查實有冇諗過響邊？

百間超市無奶粉，泰然自若無幾個。家陣為左仔女，同你搏命都得。向來奶粉個需求都無乜彈性，爸媽咩心態唔講喇，我呢亭上左岸邊唔倚賴奶粉既無乜說服力。又或者咁講，我個衰仔食人奶食到兩歲，試過幾隻奶粉，一滴都唔肯飲。死未（提起都把幾火）。

今日固然收到阿鹿米講果個email，信既人固然多，半信半疑既人又唔少，但係想exploit呢個情緒既又大有人在喎。

呢排雨衣雨傘雨具呀，防酸雨兼防輻射帽呀，隨時 chur 到行。

不過，我唔係想講呢樣喎。如果唔係涉及「民生」既，理得佢丫。買多左，咪最多放響公司吽囉備用囉。

反而，如果涉及衣食住行，作為管家家庭主婦模範夫妻獨立經濟體系whatsoever，你會點應對呢種恐慌性搶購？窮既驚買唔起，有錢既驚買唔到，跟住齊齊入貨，十足十打到黎咁款。查實有冇諗過呢刻既「掠奪性消費」對其他人有幾大影響？

Mercy 唔係以有贈無，亦唔係以權操縱生死。

而係，留有餘地。

搶米搶糧爭啖氣，為自己為自己家庭為自己家人，無可厚非。不過既然你有能力，何以不留一點餘地？買貴左又何妨？香港買唔到米，仲有能力親自飛泰國揀米選米兼度假。精打細算運籌帷幄既滿足感，係咪真係可以淩駕施比受更有福既滿足感？

香港人唔係慣左見大場面架，淨係成功人士上曬岸果批（我又有份？）先至得架咋。講到兵荒馬亂、世界末日，自然有人搵到唔少high tea，最可惜係想食大茶飯果批（即係好似我咁呢），到時只有被人牽住鼻子走，貴有貴買，冇就去搶，咁囉。日本人劫後餘生中點點點，香港人睇左幾日新聞立過幾十個blog，佢地幾鎮靜唔洗我重覆。點解鎮靜？咪就係因為爭先恐後+響乞兒兜拎飯食既人少囉。我知，唯恐天下不亂既人都係搵食遮，唔係犯法既。

喂喂喂，唔好話我曲高和寡喇！我知實有人附和我既。雖則，我又真係唔會話你知我今晚去邊庶搶糧搶米搶奶粉搶0.03mm雨衣囉。

（所以老實講，我唔支持「李卓人式」全民退休保障架，保咩障嘖，香港地梗係爭下先至過癮，先至顯示出獅子山下拼搏精神嘛..... 不過咁，如果我有咩冬瓜豆腐，唔該幫我照顧住家中老少丫，見到面先還俾你。）

Socrates....

2011-03-14T00:48:00.005+08:00

"The Delphic oracle said I was the wisest of all the Greeks. It is because I alone, of all the Greeks, know that I know nothing."

找錢丫，唔該

2011-03-08T20:36:00.003+08:00

良心老闆, 不推不是人 - 北河燒臘飯店（今期《飲食男女》：老字號俠客行　北河燒臘飯店 2011年02月25日）

部分節錄：

*************************

「喺咁 o架啦！有啲失業咗幾十年，有啲老人家又冇人理，呢度成日有道友呀，羊癎症嗰啲人嚟食，亂咁大叫又有，食食吓暈低又有，好平常啫，都係人一個，都要食飯嘅！」
為了讓人們有飯吃，他一年開足三百六十二日，只年初一至三關門。
餸菜也不求其，有魚有肉有菜，有蒸有炒有炸，務求營養均衡一點。
材料都有考究過，泰國米、韓國糖、荷蘭麵粉，絕少用大陸劣貨。
「辛苦搵嚟自在食，日日食曳嘢，人都頹啲啦！要平得嚟又要好先得 o架！」

為了收得平又做得好，他扭盡六壬。人家一早去菜欄買靚貨，他專登留到十一點才到。
「頭輪攞完，剩番嗰啲菜販會減價，係冇頭輪咁靚仔，但係唔差得幾遠咋，最緊要平好多吖嘛！」
一有時間，又會去人家的貨倉，找些接近過期的減價罐頭，慳一大筆價錢。
天天用的豉油，是去元朗曬場找最底層的頭抽。
「呢層豉油有渣，冇人要，最便宜，其實返去隔一隔渣，同頭抽一樣，豉油味仲濃啲添。」
甩了頭的蝦、斷了腳的蟹，他買回來炮製。用茄汁煮一煮，用咖喱炒一炒，頓時起死回生。
「冇錢賺 o架呢啲，不過食客每次見到，對眼都會放光，梗係！十幾廿蚊有海鮮食喎！去邊度搵？」

也許好人有好報，他的平價飯菜，得社區組織協會青睞，主動跟他合作，推出飯票，免費派給有需要的貧苦家庭，賙濟窮人。高佬明知他們做善事，更特別減價，每套飯菜，收平兩蚊。後來東華三院又向他買蒸飯，送給老人院。
教會和私人機構找他合作，做飯盒派給露宿者。高佬明也只收回成本價，不望圖利。
只是，仗義而行，並不代表無風無浪。
很多批發商，就是算準他老實，想盡辦法騙他，賺到盡。牛肉灌水呃秤，菜噴上化學劑扮新鮮，死魚死蝦死蟹端上來。
「呢行好多蠱惑嘢 o架，入貨真係要打醒十二分精神！」
所以，他每天買貨都要親力親為，跟奸商鬥智鬥力，忙得連食飯都要五分鐘搞掂。

*************************

咁啱 C.M. 開始中年甩毛，問朋友 K 有冇識得咩上海理髮幫佢頭頂做搭橋手術。

K 話：「喂，你問阿 Q 喇，佢前排去樓梯底飛，五十蚊貨仔，效果幾唔錯，遮到下。聽講阿Q仲醒多十蚊當貼士，抵玩啦。」

講講下先知原來阿Q既洗錢哲學係（K轉述，甩毛C傳譯）：「做人最緊要consistent。開口埋口投訴貧富懸殊，但自己就蹺住手食住花生鬧政府唔做野點得架。你以為逼到政府之後就一定如你所願？先唔講呢個可能性有幾大，省察下自己先。你話受人以漁咩？有冇落手落腳教人先。濟貧咩？你又有冇做過先。」

「好，就算你做齊，係咪夠consistent？未必喎。夜晚同條女撐法國餐，埋單俾左幾多貼士廚師呀，同朋友落bar 叫啤酒，又俾左幾多貼士拳手呀，去剪個髮5舊水又醒左幾多俾個靚女洗頭呀。」

「人地唔夠工開，你唔會專登幫襯俾佢地開多d工；服務賣平d你又覺得 quality 接受唔到；好有一餐唔好又一餐你埋單都係揦喳面正正廿三蚊，明碼實價唔俾多唔俾少；阿婆鋪塊席賣十蚊一個指甲鉗，唔係嫌貴就係擔心唔知邊個用過。下下叫班官體恤民情，但就望都無望佢地一眼，甚至一生人犧牲一兩次，忍受下自己個髮型、肚皮，又高舉咩大市場，話擔心令佢地有false hope以為自己既service 或product值一個更高既價，最終害左佢地.... 乜乜物物去 rationalize 自己個想法，令自己個理念更consistent.... 如果真係擔心比多d 貼士佢地會令佢地有日開天殺價導致走火入魔、影響競爭，諸如此類有違人道既普世價值，咁，be consistent，同你鬧緊班官握下手，一齊做番d 各不拖欠明買明賣既等價交易啦.... 我咁講，絕對唔係話你應該乜人都俾溢價，亂咁黎，之但鼓勵人自力更新呢個溢價，唔通你俾唔起咩？....唉，總之，be consistent 啦，咁大個人唔洗教。」（此段經甩毛哥哥修飾+加鹽加醋+狂抽水）

K 話果次俾Q 好似教訓完之後，成個人醒曬，即係咋咋林上左深圳dup X骨，話以後遇到平價貨都會俾多d貼士喎。

頂，真係好學唔學。

殊途同歸：由富商到阿嬸的對話

幾種可行派錢方法（轉貼）

2011-03-05T18:43:00.004+08:00

（C.M.:講埋/轉貼埋呢part真係要收工，要轉channel勒）

上集魔術師講左幾個派錢方法：

我師一向實事求事，自從曾劍財話１８歲以上三粒星香港居民每人派６千之後，便開始諗下點派法先合適。

派現金

優點：簡易，一勞永逸。
缺點：唔安全。派錢嘅地方（郵局？）咁多現金，又多人出入，會惹來賊人。一派錯咗就追唔返。

自動轉賬

優點：簡易，一勞永逸。變相靠銀行核對身份和年齡。
缺點：要入銀行。有人（長者、病人、貧窮人士）可能無銀行戶口，開小額結存戶口又易被銀行食手續費。市民去到銀行被人sell嘢又會話「官商勾結」。要登記賬戶號碼。如何登記？上網？唔係人人識上。填表？唔係人人識字，或者識得填表。就住要照顧老弱病患者的權益啊！

（C.M.補按：自動轉賬其中一個missing link，相對新加坡而言，係中央公積金制度）

郵寄劃線記名支票（crossed order cheque)

優點：安全，不會遭人盜用。變相靠銀行核對身份和年齡。
缺點：要寫名。就算人民入紀事務處有準確紀錄人名和年齡，亦唔保證地址紀錄正確，可以寄發支票／取票通知書。如何更新地址紀錄？上網？唔係人人識上。填表？唔係人人識字，或者識得填表。同樣有要存入銀行的煩惱。

派現金支票（bearer cash cheque)

優點：等於現金。支票唔使寫名。市民只要去到「派錢」地點就可領取，不用指定一個地點給已登記的市民領取（好像投票一樣）。需去銀行兌換現金。因有支票號碼，會有某程度保障；即使遺失被劫，通知銀行不要兌現給疑人就可以了。不用存入銀行戶口。
缺點：同真錢一樣，市民跌左張票就無了。要有效率地登記身份證號碼，不容重覆取票。

C.M.既方法係：

先登記，後領取現金支票，即你（魔術師）提出的最後一個辦法。

容許多種方法登記，登記後方便政府核實資格（甚至可即場核實資格），憑身份證領取，一張身份證足可解決（期間遺失或更換身份證者另外處理），而且核實後完全可以避免重覆取票。派發地點在即場確認後，告知市民領取地點（郵局或民政署）。如果屬行動不良或時時刻刻為口奔馳者，可由社工協助。銀行亦可同時增設柜位，於取票期間集中處理（只兌換現金，必須present ID card）。

缺點係，可能有不合格資格人士登記，或存有爭議情況（例如市民誤解或政府資料庫不夠準確），較需時處理。而且，如果採用上網登記，核實登記人身份比較繁複，例如驗證要求，令即場登記所需人手增多。

優點係，如果採取即場登記，可以俾機會果d太有錢唔稀罕，或者自願被政府forfeit既“無須人士”，為公帑作出另類貢獻。間接減省點樣篩選呢六千蚊究竟用響邊類人既制度成本。願者上釣。

（補按：支票可以係記名，領款/存款時必須與收款人一致。）

再補充，此方案既弱點係欠incentive 比銀行去預備大筆現金等市民領取（擠提乎？），如果要offset銀行呢方面既不合作，就可以採取分餅方式，分期（例如年紀大先領取）提供銀行數筆資金備用，多除少補。除左解決銀行壓力，亦提供誘因比銀行增強服務形象、爭取客戶（應該蝕）、免息短期融資（？）。

坊間流傳（隨便google所得）：

http://news.sina.com.hk/news/2/1/1/2034439/1.html
http://forum.cyberctm.com/forum/viewthread.php?tid=187575

你點睇果六千蚊？

2011-03-03T14:18:00.002+08:00

財政預算漸漸塵埃落定，所以思緒就慢慢轉返去institutions，試下回應Kenka。

不過琴日經家中老闆一問，若有所思/失。。。立立雜雜講返果六千。

派錢方法

可能因為自己經常接觸制度，所以原本想講下點樣將d錢交去市民手既各種可行途徑，不過睇完唔知邊份報紙都講過下。算啦。不過題外話，上集所擔心既呢個法律問題，應該睇睇。

你會點睇果六千蚊？

呢六千蚊，對於唔同人有唔同層面既理解。Well，之但對於果批唔滿意咁派錢既人，甚至因此而變得唔尊重呢個政府既市民，我覺得其中一個原因係政府俾唔到人一個政府應該負既責任：「制定政策」。

響呢個責任既角度，毫無理念既派錢，正係政府失職，所以市民扯火，我覺得有理。

至於其他角度，例如 eligibility，邊個先有資格，邊個無資格，咁呢.... 我覺得上兩星期電視播果套《Babel》，俾我個感覺係：everyone has his reasons.

上次鬧乜其中一段話：「中產之所以有購買力，唔係單單因為佢地夠醒夠勤力夠功績，部分係因為佢地已經 exploit 左低下層既廉價勞力。」我終於醒起點解咁講，查實果史我係 refer 緊蘋果日報某日某財經專欄，作者要求全面退稅既 point，認為退稅先可以回報多勞多得既市民。（純粹憑感受，如有 source，敬請提供，謝）

我想話，人人均等，唔等於共產，唔等於乜乜平均主義，唔需要下下都扯上理念或政治信仰，而係制度上無法有效分辨應該以乜 criteria 去發放現金福利，並達至何等最佳效益。

你會點「洗」果六千蚊？

哈哈哈，呢個問題先至係我最想八既！

阿側田仔，可唔可以講下究竟你會點用呢筆錢呢？

當年我係咁既心態既。。。嗯，唔知我今次會坐上層定下層呢？

斷估點解唔派cash？

2011-03-01T00:31:00.001+08:00

紙扎工廠自己有個 ORSO 福利計劃，所以上個禮拜收到積金局話有個seminar，講解下呢次曾財官個proposal。

經歷過上劑擾民工程，派六千，capped 10K人工 + 其他conditions。佢地呢次醒左少少，美其名講解，實質試探下各位將會有幾勞嘈，響個invitation 叫各機構：「提示下積金局要注意既地方」。

Well，MPFA算有誠意勒今次，縱使最後都係要我地呢亭廠仔死掂佢。

呃，唔講看官可能真係唔知，我地呢亭有ORSO既廠仔上次強積金注資既時候，政府係出左條法例要我地「死掂」MPFA個requirement。每間公司可能有自身既內控守則，例如「為左保障員工私隱，所以唔容許公司保存僱員既身份或護照號碼超過六個月」太耐。頂，咁咪大鑊囉。皆因條新例勒令我地要提供所有「有關」僱員既資料，包括佢地個HKID/Passport編號，搞到我地四圍搜刮 d外派人員呀，駐港人員呀等等既身份證/護照號碼。加上上次注資個eligibility都算麻煩到暈（詳情不贅），積金局個requirement又含糊到暈，最終做到暈暈暈。。。

老實講，呢個階段十劃未有一撇之餘，變數又多，呢個seminar真係幾sai氣。不過我地個大大佬，就咋咋林叫幾個老闆，的埋我呢個書記開會，商量一下聽日點「提示」積金局。

丫又，我唔係想講上次今次點點點喎。而係今次幾個老闆開會，講返上次同今次呢單野，好自然就立埋其他措施一齊各自發表。不謀而合既係，眾人槍口一致，向空氣質問點解政府唔學澳門咁派cash？

夜，point form綜合結論：

1. 懶 -- 一條新法例，就可以要僱主+官方機構兩條龍搞掂曬佢，皆大歡喜。

2. 各部門無額外資源/人力去搞，即係「唔願意」，亦無人敢孭鑊，保證萬無一失，唔會比人穿柜桶。

3. 如果自己搵有信譽既私人機構代勞，可能要出tender，budget唔知幾多，preparation 唔知幾耐，收集數據唔知掂唔掂.... 總之呢條係dead end啦。

4. 監管思維 -- 有MPFA 做監管代表，社會無人敢有意見（well，監乜管丫佢.... 邊識？咪又係信曬僱主資料，年薪過百萬都分到六千，你點知？）

講真，派錢唔係唔可行，斷估只係政府思維局限左響監管呀、監管呀、又係監管呀上面。驚死派錯人、重覆派、應派點知無你名、唔知邊個負責派、預左派無人攞。。。呢個，我明既。（補多句：痴線！）

係咪居民 or 永久居民，入境處一清二楚啦，如果擔心違憲或者法例所限乜乜物物，咪學選民制度，登記先囉。核實身份再搵郵政署又好（郵政署話double工作量喎）、便利店又好（政府唔放心）、銀行又好（銀行睬你都傻）、庫務署擺counter 派錢都好，一樣得遮。

點解係要搵廠仔笨之時，又比incentive 基金公司去幫你做communication？唔該，今次全民都有份又好，部分人有份都好，自己賣廣告講明點搞啦。

真係正仆。。。

鬧財政預算 d乜？

2011-02-27T21:02:00.001+08:00

鬧乜，方向、手段。佢地點表達已經唔計，如果計埋就仲勞嘈。

作為一個經常有頭無尾既犬儒市民，梗係唔會睇得個預算案咁仔細喇。又當然，身為無恒產唔洗交標準稅率，又無資格申請綜援公屋既蝸居既一家之主，查實最多只能體會下層而唔係中產既苦況囉。

之但咁講，一個有上限既退稅，如果夠錢，都係應該既。不過我仍然要強調一個我深信不疑既理論：中產之所以有購買力，唔係單單因為佢地夠醒夠勤力夠功績，部分係因為佢地已經 exploit 左低下層既廉價勞力。即係話乜？是但喇。

先講退稅。在我黎講，唔係急需，因為中產最多只係購買力下降，但唔係水深火熱。如果你高舉小政府理念，咁自然有你既原因。不過我始終覺得，有錢派，不如改生果金每月加兩百喇。

MPF/ORSO派六千呢個 idea，我無 comment，完全改退稅六千我唔贊成，皆因接近65歲或近退休既未必有退稅，反而呢六千佢地好快有得搣。（另外比退稅OK）

改派錢？查實我覺得唔錯丫，每個有成人身份證既香港市民，去民政事務署 lik六千，就算李+x 去攞都無所謂，呢d 係制度上必要既損耗，address左就唔係壞事啦。

最滾查實都係同其他人一樣，鬧守財。低下層市民購買力明顯受壓，出乜招救急都得喇。。。點知乜叉都無。係得個捱到半年左右既電費補貼。喂，加個全年十零億資助食物銀行有冇得諗？

成個預算案無一個軸心方向我覺得先係最敗北。

如果將焦點放響扶貧，先救急（低下層），再救貧（下層至呻窮中產），唔會咁勞嘈囉。加稅驚比呻窮中產鬧我明，利得稅加 0.5% 得喇卦。商家你估會睇你加3%就撤離香港咩。佢地留響香港就係睇你大中華區既機會，同埋預期嘛。如果預期你呢個加稅係陸續有黎，足以offset呢 d 機會既話，咪鬆囉。既然政府可以大大聲話香港充滿機遇，驚乜加利得稅？如果你仲話乜春賣地成績可能唔理想、樓況隨時逆轉屍橫遍野、乜叉乜叉原因要預留儲備，剛剛果年講左啦，比d 新意好冇？

百廢待興，阿財官們，唔該預留三百億救急救貧，唔好繼續黐線喇。

（加煙稅救煙民？諗清楚目的係咩呀？煙民需要大d定係逼食二手煙市民需要大d呀？查實你地曉唔曉心理學架？明唔明市民要乜呀？）

都係要鬧！

2011-02-24T22:49:00.002+08:00

查實我呢排重新follow番上篇講institutions個思路，之但，聽完睇完理解完琴日份財政預算... 頂，往年我都無乜大反感，今次？

... 九兩菜！

（想講乜叉廢話都唔記得曬！）

路遙，預先要知馬力

2011-02-21T20:29:00.000+08:00

老實講，琴日果單革命新聞真係令我緊張左好幾個鐘頭，所以去左圖書館睇西方歷史。

令我諗返起滿清衰落以至最後被革命推翻收場，內部敗壞只係一個原因，列強踩到頭上百幾年點搞都毫無曙光，先至係扼殺社會希望既原因。

自商周以來既九州，有邊年真係可以成功搞到所謂「社會改革」，有邊年真係公平廉潔、白璧無瑕丫。背後原因，我不求甚解，只曉得歸咎於「教育水平」。

題外話，所謂「不偏不倚」，或者公平公正（諸如法制或政制之類方面），查實（我睇）唔係講乜乜制度有冇漏洞，或乜乜體制健唔健全，而係，係咪對各方面都予高度重視。意思係，不偏不倚，唔係eliminate 各種 negatives，而係 address 所有 positives。案例越多，一個法官先至可以 address 最多既 positives。

呢個題外話查實想兜翻講「教育水平」。即係話，要人人都有相當既教育水平，咁先至可以做到社會體制不偏不倚。（所以自汶川地震之後，我唯一關注既唔係工程技術，或者貪腐程度，而係「對教育既重視」）

Well，我唔會話呢刻想搞「花花革命」既人戇拂拂（雖則我係咁諗），之但呢一個花花的確可以製造兩面危機，一手放寬「操控」，一手加強「監控」。

九州每次改朝換代，都代表左一次革命。收場響史書上一般盛世不出三代，之後沒落，之後中興一兩代，之後乜乜干政乜乜流寇乜乜外族。先唔計當中有幾多成分或角度係以「漢族」做中心（係扯遠左，唔講住），咁多年累積落黎既「結果」，都仍然走唔出一個中央集權體制，Pros同Cons既考慮，都係圍繞住社會穩定，馬照跑舞照跳呢個核心思想。

我想話，眾官如果真係想洗滌呢個社會上各種不公，唔該，歷史已經講左搞「革命」既下場，至於有冇能力推動一次又一次既社會「改革」，就睇大家有冇智慧（係，我覺得下下都只曉得流他人既血黎解決問題既人都幾智障），有冇憐憫。如果呢刻革命，我諗家陣最偏遠既農村，前日電視上 Unicef 介紹果幾個家庭，將更加無人理會，更加死無對證。

點樣從中央集權轉移到一個權力比較分散既體制，當中涉及既元素好多，但如果要確保最終得出黎既結果係「穩定」，即係可以維持延續力，甚至可以不斷自我演化既話，教育水平就決定左「穩定」既基礎。

丫，又題外話，唔知邊度聽到，話埃及（等）既「知識分子」成為反對派，而國內既知識分子就向體制（or 當權者）靠攏，所以國內出現重大乜乜危機既情況會好細。跟手有評論話國內知識分子無風骨無腰骨之類。

如果呢類評論真係尊重「知識分子」，或者認為世界上既知識分子都有相同既優秀特質，咁我會認為，知識分子靠攏既方向，就表明左當中既意義同埋價值。靠攏邊一方，並唔能夠表示佢已經失去左應有既特質，又如果所謂既知識分子已經失去左應有既特質，我會好肯定大眾亦唔會認同佢地以前既名號。知識分子如果本質未變，佢靠攏果一方，縱使係高牆縱使係斧頭幫縱使係額頭鑿住黑社會，佢既立場仍然應該值得細想。認清本質，而唔單單係企響邊，先更可以分辨到條腰骨邊個夠硬。

條路咁長，要知己，先知彼。

忙裏偷寫

2011-02-01T18:49:00.001+08:00

Patterns

話說你上年某夜做到不似人形，你老闆好唔通氣咁威逼利誘（威:利 = 9:1），要你簽張賣身契。簽名無問題，最大問題係張契個內容要你自己draft！果晚，幾乎要通頂。End of story.

琴日，你竟然收到大信封，話你已經成功賣身勒！成個朝早陸續收到電賀。當中來函既 pattern 你發覺，竟然係全女班，而且仲係幾個月唔見一次果d！？End of another story.

論述

民主，唔係放任，唔係 laissez faire；唔係混沌，唔係 chaotic。

係有序作出決策。

將自由放任混和民主忽悠大眾，好一個新論述。

Grooming

最煩係剃鬚！

埃及 and 香港

阿Jay貼出某評論，想問，查實有幾多個人望住個無標地名既世界地圖，就知道香港響邊呢？又有邊個知道埃及響邊呢？（我估大約四分三人唔知，我一屋四個，得我一個知曬咋喎... ）

試煉自由

搶奶粉，搶住房，查實你仲係咪支持自由貿易？我係，仍然係，只因為兩個字：自由

我覺得有時香港人強調自由寶貴只係另一個假象。唔該，影響到自己自由既話，咁人地既自由就要.... 遷就下咯。

今天的工作，是為了明日爆鑊

2011-01-25T19:28:00.001+08:00

阿朋友，

乜你唔知你今日做既野，就係為左聽日爆大鑊既咩？唔止你，每個打工仔都要承受呢個過得一日得一日既命運架啦。

你睇，你爆左鑊咁多次，點解死極都死唔去既？咪就係因為你生存既原因，唔係就為左第日死得好慘咩？

我知人人都話你靚仔，但都唔可以打橫黎，當無事發生過固喎。既然呢隻鑊同搞大人個肚都差唔幾，咪咬實牙關咕聲吞左佢囉。

往日掛響嘴邊 Who wants to live forever! 跟住打死罷就，至死方休既豪情氣概去左邊？！你有冇試過做野前已經預左今次出錯機會率係百分百？未咧，咁咪代表你仲唔化囉。繼續做庵春喇你！

篤背脊

紙上我係偽君子，人前我係真小人。響老頂放假期間篤佢背脊都夠膽死，嘿，嘿嘿。

道理響我呢邊我怕乜！嘿，我篤背脊成個過程一早就 jar 住呢隻中指喇，梗係臉不紅耳不赤喇，做 whistleblower 喎，威！儲定彈藥孖叉人，擺正鋪士捉人黃腳雞，餓狗搶屎扮比人跣低有幾難？

之但，阿老細，又唔洗去到咁盡，比次機會佢喇。（你話呢份虛假人情味係咪又可以令自己立於不敗呢？）

小肥羊

同 AK，綿綿，嘉倫妹一齊烚下烚下。剛出城既我都係第一次去小肥羊，抵食就唔算架勒，不過地方就確係幾適合聚舊囉。

呢排幾位既近況，各有各精彩。個個都已經磨拳擦掌有曬計劃（滿肚密圈），唯獨得我見步行步（如履薄冰）。Well，鬼叫我多女吼咩，做人真係幾煩。

中年男人最唔曉反應既說話

- 你係咪男人黎架？
- 今晚做咩唔得既？
- 我已經係你既人咯。
- 不如送條呔比你丫？
- 等陣陪我買衫！
- 你有幾多條o靚呀？

（by 另一位中年）

華

2011-01-09T02:03:00.000+08:00

她叫華，我們叫華，他也叫華。

並無想過為剛走的那個華題題字，不認識就是不認識。我在外地聽到他離去的消息的時候，反應是，他竟然走了。呆了半刻，努力讓自己回到原先的思緒。不想自己胡亂猜度他走後特別那幾位某某為他前仆後繼，表明立場非敵即友。明者自明。

固然我的亂猜十有八九中的，心理上倒理解甚可為他們說項。這是調節自己期望，扭曲情緒接軌理性的條件反射。

他是個什麼樣的人，與我無干，他如何影響該你我他，無從稽考。

那天，我只是感到有點空虛。

今日比佢笑死

2010-12-28T20:43:00.002+08:00

韓寒，《後會有期》：

http://blog.sina.com.cn/s/blog_4701280b010176x6.html

************************************

各位朋友们，在此向大家证实，《独唱团》的确已经无限期的停止。本来想用精力有限等原因搪塞过去，但总觉得为了避免各种猜测，应该向大家有个交代，事实是由于我能力有限，《独唱团》的第二期乃至未来各期在均无法出版，所以特此宣布独唱团之团队解散。

文艺杂志《独唱团》于2009年年初决定开始运作，一开始是聚星天华文化公司处于市场考虑倡议开办，并投资500万元作为启动和筹备的资金，不过这笔钱分文未用全数退还。工作室开始构建《独唱团》的雏形。后来由于聚星天华公司被盛大文学所收购，所以《独唱团》的出版发行事宜自然就转到了盛大文学，盛大文学将其发行权交给了旗下的华文天下图书公司，在经过了将近一年超过十家出版社的辗转审稿以后，由山西书海出版社以丛书的形式出版了第一期，在印刷期间一度被强行叫停，由该省相关部门再度审查，出版日期再次延误，所幸最终出街。出版之后，至今实际销售了150万册，按照行业惯例，则应该算是1500万册，主要是承蒙大家的捧场和错爱，当然，还有原因就是人家只卖一个月，这个一卖就是大半年。

出版后由于被认为是以书代刊，所以相关合作单位受到牵连，为了避免牵连到市场上其他一些丛书的出版，做到完全符合国家的相关出版条例，所以《独唱团》转到了磨铁图书之下作正规刊物化的努力，但所有的努力包括已经谈定签订的多家合作方，均会在谈判完成或者下厂印刷之际突然表示无法操作，我对此深表理解，但为了防止造成误会，我也多方打听，只能说这确非新闻出版单位或者宣传单位施加压力，大家不要错怪，但其他打探都无果，可能中国相关部门相关人太多，太多人都有让文艺读物变成文物的能耐，所以具体我也不清楚是怎么回事，也不知道是得罪了哪位朋友，我在明处，你在暗处，山不穷水不尽，柳不暗花不明，若能知晓，恰能相逢，我不记恨，但请告诉我，这是怎么了。

《独唱团》在屡次手续齐全的印刷过程中均遇到困难甚至化浆，过于浪费纸张，不符合国家关于节能减排的号召，再坚持下去，不光出版无期，恐所有工作人员和合作方都被节能减排，而且对于这些供职于《独唱团》的年轻的朋友们和读者们把青春耗在无尽的无望的等待中也没有意义，经过慎重的考虑，由于本人的失职与无能，决定无限期的冰封《独唱团》，《独唱团》的团队原地解散，留一人处理善后，公司将继续全薪供养团队所有员工半年，作为大家另寻工作的准备，所有被选用但未及刊登的未来几期稿件，《独唱团》将支付一千元一篇的退稿费用，或者作者可以选择接受一字一元的稿费价格，编辑部将负责推荐给其他优秀文艺杂志。编辑会在年前和所有的供稿者们完成后续处理，作者也可主动联系我们。

最后，感谢所有的读者，感谢所有的作者，感谢所有的主创人员和工作人员，我们的遗憾是作为一本准备时间足够被充分的文艺读物，第一期做的不够好，不幸让大家给看见了，第二期有了长足的进步，不幸大家都没能看见。需要提醒读者的是，虽然独唱团失败了，但市面上在成功销售的小开本独唱团，独唱团第二期，独唱团第三期，合唱团各期，明天独唱团等均是盗版，请谨慎购买。最后希望朋友们新年快乐，因为此事既无关死亡，也无关永别，而冬至花败，春暖花开，都是生活常态，所以并无需惋惜。后会有期。

************************************

韓寒，後會有期丫，呵呵呵呵～～

如果... 有日要走難

2010-12-22T15:56:00.005+08:00

查實邊有諗住有續集架，之但歐洲大雪學生滯留港府話去打救，令我感受到彼方此方方方恍如隔世。

好耐之前我一直有個天真到傻既想法，就係如果有日真係打到黎，雖然會見到現實殘酷屍橫遍野，但仍然都會見到人性光輝互相守望：「你走先，我仲頂得住！」你推我讓之聲此起彼落。

誰知有人傳話，話爭先恐後既見得仲多。

講真，官員該煨香港都未至於淪落，家長已亂心煩自求多福亦人之常情，新一代未見過世面可以慢慢耳濡目染，但牛龜咁大個法寶盡出**踩住人**上/走/飛，先至最眼冤。

如果我對仔女夠膽死懶醒咁同我講點樣扭盡六壬快人一步理想達到，我就一頭坎落個死仔/女包個頭度睇下個天收邊個先。

如果...

2010-12-20T23:40:00.003+08:00

如果香港要辦亞運，最好同深圳合辦。

如果社會流動真係咁重要，唔該廢除無聊既資歷架構，停止多餘既大廈管理行業規管，以及削弱一切無謂既所謂專業機構限制有志者入行既權力，仲要叫各位人治部大佬大姐唔好淨係以為學歷經驗所佔既比重最大。

如果完美主義者要既係絕對性結果，咁佢地既相對性要求只係一個欺騙自己或他人既幌子。

如果生死真係上天注定，咁生同死之間既過程中，就充滿住選擇同埋被選擇。

一場遊戲的三種角色

2010-12-07T19:53:00.004+08:00

Well, 我後天唔係 major in econ，而且天生「恨」錢，所以對於大部分以金錢/資源為尺度既分析呢～都會有種唔自然既條件反射 - 抗拒。（我記得自己細細個有次，Scarlet 某日連續同我講左幾個關於錢既笑話，我果史都仲未發完老脾，跟住就....慘不忍睹）

起初寫上集既時候查實都有d 燥底。覺得點解坊間個個都往錢看架，而最令我「忍唔住」既，雖然可能係因為，我根本永遠唔能夠追得上坊間大部分既上流要求 -- 起跑線啊既得利益啊乜乜物物啊咁。（酸葡萄理論）

我唔係 contrarian，亦唔係逢乜必反，之但，以財富、收入、職業、地位（尤其商業地位）去評論社會流動力，對我呢個丁屎咁細既胃口，真係已經飽到上心口。我知，係我唔啱。咁我真係唔係「趁勢」派丫嘛。而且某程度上講，以狹隘既指標黎分析流動力，我覺得唔夠現實，亦「唔夠道德」囉。

不過，真係諗下啦，究竟香港社會流動力既出路，係咪真係得家陣果幾條先？

*************

哈，上集舊街坊提起「遊戲規則」，醒神！

用一個簡單既 tripodal framework去睇一個遊戲既三個角色：制定者——參與者——裁判。

值得留意，有時規則制定者同裁判，都可以同時為參與者。

之但當制定者同裁判都成為參與者既時候，本來只係參與者就會無啦啦變得認真起黎勒，最終變成一場嚴肅而又唔好玩既遊戲。

其中坊間多數評論都圍繞住制定者同埋參與者，例如講下制定者點點點唔公平、參與者咁咁咁受魚肉，與此同時忽略左遊戲規則既「裁判」（Referee, Umpire）。

裁判呢個角色，有時會集合埋制定者既角色，簡單講，響呢個情況，個規則屬於一個 Closed System，遊戲過程係點、變化係點、結果係點，都容易被制定者+裁判操控。坊間亦多以此角度評論。我會亂噏咁話，呢個角度隨時係「先摸瓜後順藤」既結果。

之但查實好多情況，尤其我覺得以香港各社會最受關注既議題計，反而係「傾向」Open System，然後裏面有數個小圈子 Closed Systems。特點係，規則制定者同裁判，係唔同個體。（世界上咩會係完全Open System？木宰羊。）

就好似教育制度/選拔方式咁，香港人咁多choice，絕對係一個open system，但有時又有咩貴族學校呀，世襲制呀，乜乜歧視制度呀咁呢類小圈子 systems。用放大鏡黎睇 closed system，梗係乜都唔公平，乜都係遊戲制定者玩曬喇。

喂喂，事實係咪真係人地玩曬先。

唔知有冇人會覺得家陣d 報章評論已經悶到極點？投訴唔公平既人究竟係想盅入去玩小圈子，做埋一份「裁判」，定係好有理想咁要打破小圈子system？

今日唔記得邊個比我立過阿李寶寶中學單野，表面証供睇老實講，我佩服個媽咪不得了，佢個仔應該要自豪。立意響一個closed system 做「新裁判」，雷。之若放到成個教育制度既層面，其實對於大部分既參與者，影響始終唔大。因為九成參與者（+父母）同教育從業員先至係當中既裁判。

裁判先會左右制定者將來既路向。

眾説紛紜的社會流動力

2010-12-06T20:43:00.003+08:00

上個topic 講起學生貴族化（並見各留言），呃，好極。往往當有人提起社會流動力，我就recall 返自己原來好耐之前叫做寫過下mobility。

但又當睇番果個人講乜乜「社會流動力」，就會發覺佢地「未必」係同我講既「social mobility」係同一回事。

Well，原諒我，我真係會唔妥某d 新聞評論界（唔洗點名，好多）或者係某類社會行動派（更多）對於「社會流動力」響定義上既狹隘囉。我知道我偏執（真係唔想認，查實我外表斯文，內裏好 open 架），觀點都係五十步笑百步。但既然我九幾年前提過下 mobility，我點都要講兩句 defend 下我個mobility查實點同呢部分人講既mobility有咩相異+相依之處囉。

講返，坊間好多評論都將「貧富懸殊」同「社會流動力」互為掛鈎，呢個correlation我唔否定。社會流動力固然會影響個人財富既累積，無論緣由係出自結構性定係原則性定係處境性定係個人性（hehe，就快連我自己都唔知講咩）甚至呢個性+果個性，都唔可以話唔正確。

兜個圈講，即係話我唔能夠否定，但又唔多同意咁講囉（好明顯喇查實）。

我最想話，人地個流動力同我個mobility，最大分別唔係在於「財富」，而係在於「影響力」，而我要強調，呢個「影響力」，唔係一般講「流動力」既評論所講既「搵錢權力」（之類）。我講既「影響力」，亦唔係唯有響政治制度所存在既權力，而係響「各社會階層」所存在既「影響力」（即對他人所發揮既「the power to change」，呢個power唔係直接等同所謂「指令式權力」，而係「人既力量」）。

上次同匿名君講起：「。。。查實我一路響度諗緊，究竟所謂“階層”同“社會流動力”，係咪同一回事呢？狹隘d咁睇，當然可以係啦。但查實，lik德蘭修女呀，社運人士呀（雖則我唔想lik呢個example），議員啊（我更加唔想lik呢個example）以及一眾貢獻社會不求自擡身價既人士，佢地又響邊個階層，佢地既“地位”又算唔算我地人生更值得追求既目標呢？。。。」

我講既social mobility，其實完全唔係曹仁超式激將法果種，亦唔係沈旭暉式分析法果種（即目標為本分析法），更加唔係陳云式批判法果種。同地位，同中產，同權力，根本係兩碼子事。我講既 Social Mobility，唔係講點樣比名幼稚園選拔出黎直升名小學，然後由於家境更容易得到更多資源跑出，最後成為金融界年青才俊；又或者講點樣響底層掙扎求存，養妻活兒避免呢代或隔代貧窮。完全唔係。

而係講，各人有各人既理想（即自由選擇），各人有各人既天然優勢（即天賦差異），各人有各人既責任（即從自由選擇所得既社會職能），各人有各人既貢獻（即從自由選擇+天賦既結果），各人有各人改錯既機會（Errr....），（查實我諗自己都花精神時間定義清楚，有機會）。你話丫，舉個例咁問，德蘭修女（之類）係社會既上流定基層人士？鄧紹斌呢？何俊仁呢？昂山素姬呢？無國界醫生呢？

下下扯上同乜中產乜年紀乜世代乜家境，拜托，唔好代入我呢個social mobility 體系囉。

如果真係要研究社會流動力，查實，淨係睇財富得唔得？定係可以探索下，究竟呢個社會有幾多可能性，你個兒女，將來又可以會有幾多可能性？

短談審計直資school

2010-11-30T20:42:00.002+08:00

查實次次審計報告都掀起輿論，再一次證明審計署的確幾有公信力。

我無特別留意呢次個內容，不過有時人之常情呢，偶然聽到一兩個觀點之後都想發表下自己d 偉論既。呵呵呵呵。

1. 究竟審計邊一個

阿篤話係審教育署喎，我信佢。審計署點會審核政府部門以外既機構丫，係咪先，唔通收教育界/外界/商界錢咩。

不過無論係 audit 教育署，定係 audit 直資學校個運作，我極度傾向阿篤個觀點：教育署責無旁貸。

就算私營機構，每次audit 都隨時發現到唔少紕漏，唔係問題，改正，咪fine囉。之但有d嚴重既case，教育署都 spot 唔到，有嚴重漏洞啦。我明，教育署係官僚丫嘛，按本子辦事丫嘛。係，但咁咪可以話教育署個本子唔夠「高能」囉。不過我都知，改？下世啦。

2. 直資學校 & guidelines

最令我震驚係苦瓜講果部分：「.... 更有學校在合約中寫明，供應商必需每年向校方捐款某個數額」。呢個真係唔知咩世界。

如果供應商收既錢係學校既（即係個飯錢係學校sponsor）既，咁即係話筆數會通過咁既方式改變左性質/用途。問題一。

又如果供應商收既係來自家長既，咁就即係話用家長錢黎sponsor學校開支。問題二。

至於咩買股票定基金。我覺得身為教育界（無論學校 or 教育署），條界應該識得分卦。全人類都被逼買既各類MPF股票基金，得勒卦，都係穩健理財其中一法遮，個weighting見仁見智因時制宜啦。如果直頭買股票？嘩，咁深，買孖展得唔得？過大海玩百家樂得唔得？呢d唔洗指引啦下化。如果下下講咩得咩唔得，成份迷債合約咁，教育署邊曉搞呀。

審計署按章工作，係人都知啦。醒既從善如流咪ok 囉，懶醒既咪做你班學生既好榜樣囉。

3. 貴族化

鹿米似乎覺得直資學校有責任有教無類。

令我諗起受電視臺訪問既家長。其中有個話「唔加介意學費喎」！豪囉呢亭咪。

又令我諗起某 d 機構積極推動「最低工資」個金額，然後趕絕缺乏競爭力既小商戶。

琴晚發白日夢我見到有位老豆話「我地學校加學費？好丫！等果d 資源無咁多既學生咪可以去其他津貼學校囉。唔洗等佢地覺得自卑嘛。德政德政。」（剛才用字經過修飾）

4. 社會流動性 - 公平競爭

公平丫我覺得。資源多，咪入 d 需要地址，背景，父母職業要求較高既學校囉。

既然家長有選擇權，點解學校唔可以有選擇權先！咁先至唔違背學校之間公平競爭既原則丫嘛。（拿，我真係咁睇架）

唔同層次有唔同層次既競爭，社會要流動自然會有力量壓制社會唔流動。好似你呢份做左八年既工咁，隨時一個出黎做左兩年大學生已經可以應付自如，咁你會唔會好大方咁讓個位出黎先。大部分人都可能會用唔同既原因去defend自己幾咁有價值（例如我八年食鹽多過你食米之類）。然則，呢兩個力量就驅使整體（全個社會計）去朝住某個方向進步。

學校我覺得真係一樣。係，直資門檻真係好高，但比起我地呢班70後既年代，家陣津貼學校d質素係咪高好Q多先。雖則，我咁結論都可以好片面，之但，講公平，一向都係片面咁講架啦，邊有綜合公平力可言架。

。。。查實，都有既，不過詳情唔好問我，請向各大政黨查詢。

我唔係阿媽

2010-11-24T19:43:00.005+08:00

呢排阿米四媽火妹講父母仔女，心生有愧。

當時我問阿米個問題（我對自己為人母親既期許其實係咩？），原問係：「你對你自己「為人父母」呢個身份，有咩期望呀？」（我終於知道自己個中文程度應該去到盡咯）

我無火妹四媽咁母性，愛如潮水，亦無阿米諗咁多會點樣做一個老豆。坦白講，我問阿米果條問題，根本從未問過自己。

偶然我帶阿女阿仔上我公司，或者一齊同去下同事朋友搞既gathering，又或者唔得閑都響pantry互相交流管仔教女心得（a.k.a. 互相比較臨床管理實務 best practice benchmarking），有意無意同事朋友們都對阿女各項性格指標流露各式情感，然後問我佢個仔個女既情況點教點睇。

查實，我鬼知咩。

做人老豆，返工廠搵錢囉，返屋企食飯囉，上床瞓覺囉（前奏係入房鎖門打機）。大部分親子時間，都係用黎做自己事居多 -- 工廠事已經煩到死，仲想我點？（主啊，千祁唔好比佢/佢地睇到！）況且，對腳自從兩年前開始唔聽洗，又痛又溺唔到重野，響屋企玩抱抱玩空中飛人騎膊馬都嗌生嗌死，好難講呢條豆腐乾仲可以擺得幾耐（如有雷同，唔該抱抱）。

講開返工，今日仲犯左個低級錯誤，比個客好兇狠咁表揚左好幾句。就算自尊未至於到受損咁嚴重，都對自信構成少少打擊（頂，越入中年越多心理衝擊）。我明，正面d睇，下次唔錯咪得囉。之但家陣晚晚玩 Civ5 玩到三更半夜呢下野，仲未搣得甩呢。你話，仲邊有心情講睡前故仔，猜包剪dup 催功課丫，唔同阿女鬧交玩冷戰已經良辰吉日咯。

追開AM730，有位陳扉爸爸，成日提住佢仔仔各次面試幼稚園既準備，見佢努力為仔女擺脫港孩宿命，貧父如我等唯有自嘲無意為該等努力引以為榮，真係唔想自尊心走出黎大聲話佢係典型港爸。但細心諗下，呢位典型港爸又真係比我呢個類50後典型港爸投放更多更多更多更多更多更多心機同注意力落對仔女度囉。

問返自己之前問阿米果條問題之前，我會懶有系統咁先分三類父母，第一類主動型，第二類被動型，第三類不動型。自問界乎第二類同第三類之間既我，阿女阿仔成長成點，可以用阿女琴晚無啦啦響我食完飯打緊機既時候大呼小叫「爸爸，我唔鍾意你呀！媽咪，我唔鍾意爸爸呀！」（重複至少三次）反映出黎。對住仔女，有時真係阿媽先會做到99 percentile 全方位主動型。

好多人見我對仔女無要求，但又出到個似樣既女，嘩，學而時習之，不亦樂乎啦。Tiu，最弊佢地睇唔到，我竟然對自己點做老豆都一樣無要求！（呃，比個藉口自己，查實都有要求架，不過係被動d d 咁解，之嘛。）

何況，我唔鍾意黃袍加身既，要我話比人聽自己點點點用心教女，我個motivation 會被crowded out 喎（然後以打機麻醉自己，不斷說服自己真係好少時間親子，跟住進入 vicious circle）。

有咩期望啫，阿女阿仔大個左唔怨我已經謝主隆恩喇。若果真係有咁值得感恩既一日，媽咪居功至偉。（嘿，我就食住花生睇你捱到佢地出身！）

Benchmark 阿爸阿媽一、二、三、四、五、六、七，多勞多得。

***************

（2010/11/25）丫，其實仲未發完噏風。

響我地「父」/「母」vs「子」/「女」呢個Matrix 上面，「母」係佔左上面所講第一類既地位既，「父」就基於九百幾樣自我（or 自私）原因，同埋一個「順其自然」既原因（所謂情勢使然）退位讓賢。呢個位，或者叫「Trusted Advisor」，父母兩者已有共識。

工廠入面行多維matrix reporting system （即係個個都係老細！），做人阿四阿五六七咁多年，呢一刻應付呢個老細，果一刻應付另一個老細，係就係慣左預左，之但要得心應手，最好個環境仍然係：有d老細比較強（硬），另有d比較容易話為，咁我地呢班基層工人就生存得較順暢。若果見慣呢類matrix system 既朋友，大概都知道仲有另一種令從屬關係過得寫意既方法，就係「你（可以）比你老細更強（硬）」。

阿女就係咁既case。佢心目中已經有一位Trusted Advisor做老細，問完老豆呢個老細轉頭就同另一個老細講：「媽咪！爸爸話..... 喎。」冰封三尺非一日之寒，事已至此老豆都不欲多言（50%不明不白+50%死得眼閉），惟有「順其自然」。而呢個老豆，經過《久久共識》，就不情願咁繼續響呢位Trusted Advisor 後面指指點點，做Trusted Advisor既Advisor + Observer + Off Map Barrage。

阿米近日提到一點：「探索」（aka 「條界响邊？」）。呢兩個字令我好認真咁諗諗「探索」緊乜。

探索自己個付出（方法/模式/角色/時間 et cetera）？定係探索仔女點樣收穫/成長/學習bilibala？

好仔細睇番自己既探索歷程，「目標人物」（自己或仔女）唔係重點，反而正係自己響「父女/子」關係中既結果。例如我同阿女咁，關係上面（角色/溝通/分工等）個平衡點大致上已經出現。條界唔係來自自身既各種constraints, needs, ability, responsibility whatsoever，而係父女產生互動之後，因而誘發響阿女身上既各種互動需要。

都話，我傾向被動+不動，而既然阿女係會主動向老父尋求供應既話，老豆就會頂硬上（或者敷衍下），條界唔係亦阿女既將來未來為依歸，而係以當下父女倆個需求與供應之間爭取平衡。

比對「母」vs「女」，「父」既主動付出絕對輕於鴻毛，但商場有云「上司越能幹，下屬越低能」，所以呢個老父仍然可以維持自我感覺良好，懶理人世間互相benchmark 比對個體，而非比對「關係」。從來感人的家庭故事都來自關係的成果，而非個體的成就。

我唔係阿媽，雖知阿媽係女人，但肯定做唔到女人。

有些日子

2010-11-22T11:35:00.000+08:00

有些日子，你宣之於口，直至人心生厭煩。

又有些日子，你默然無語，即使呼喊不斷。

亦有些日子，你裝瘋扮傻，為了自圓其說。

更有些日子，你食不安寝，除非忘卻那些日子。

工廠事小記

2010-11-17T19:30:00.002+08:00

唔化

做左咁多年人，覺得自己仲未到化境。睇野都仍然唔係好透徹。三句五埋兩句就同老頂開拖，置家中老少於不顧，唉，點解我仲係咁唔生性？

點解你仲唔炒我？（泣不成聲）

薪酬調查

前排收到紙扎工廠話加薪幾多幾多.... （點呀，滿唔滿意呀？）嗯，滿意喇.... 老細，你想我點解啫。

我地班紙扎中高層雖然唔算香港地既基層勞動人口一部分，但唔少都隨時跌落綜援網（下？又係日本菜牙？廻轉壽司算啦。下？三千蚊剪個髮正唔正？咁包唔包洗頭呀？）。佢地份糧已經同薪酬調查脫鈎，完完全全脫鈎，因為佢地份花紅已經脫離「每月薪金」呢個傳統現實。

作為紙扎工人既我，繼續慨嘆（即係周圍呻），薪酬調查就算有五個巴仙，或者多通漲兩三個巴仙（噢畸噢畸，唔係兩三個，只係半個一個巴仙囉），老細一句（你雙糧咪算八個巴仙囉）就抹煞曬。今年開始，要睇化lu 。

生仔責任

有個客好奇問點解紙扎工人生咁多個（真係多？都似係。）。有冇覺得要社會其他人幫手養埋，查實對其他人好唔公平。（做乜講講下公事燒埋我家底呀）

頂，最弊佢係客，你點話點好啦（響你面前）。

呢度講呢度散丫，查實部分小朋友將來會係照顧你既醫生或者係護士，又或者係你響食店招呼你既服務生、修路既工人。（甚至幫你家屬整紙扎公仔，然後燒埋俾你果個）

除非你擔心班細路將來「全部」都會係花光你積蓄的騙子、庸醫、基金經理（or 政府），否則，今日既付出同將來既收割相比，要無細路既他人去分擔責任，真係一d 公平性都無嗎？唔通你比既丁屎咁多稅，真係無數？

響考慮「家陣」公平同埋他人責任既時候，「將來」既公平同照顧自己既責任又係邊個黎負呢？無仔女幫你燒衣，都要搵人幫你執骨假，斷估。

道德呀選擇呀，咁

2010-11-08T20:33:00.006+08:00

呢幾日做緊一d好唔道德既事（丫well，諗落查實日日都做緊），庸人自擾，所以無暇發表想講左幾年既驚天地哭鬼神既題目《人治部廢柴當道如何考驗施庵春的道德倫理構想》。既然唔得閑，唯有蜻蜓點水四圍發表犬儒睇法。。。家陣睇番，原來好多正反睇法都係圍繞「道德」同埋「選擇」：

1. 兒女輸在起跑線 vs 去你的起跑線．奔向你的終點

兩位同學既分別，好明顯就係一個以他人做標準，做比較，而另一個就單單同自己競賽。

睇番自己，咁講，家底薄、住蝸居、得一丁友搵食、兒女又剛剛要準備/已經入學.... 我諗住應該點都比果d家底厚既「夠資格」講起跑線卦。

遮咁，我就比較商業味道重，用 business strategy 個角度諗。一間公司有唔同既 edge，細公司可以做到 facebook 咁大，大公司又可以做到 General Motors 咁差。其實，我覺得乜起跑線都係假，每間公司都有自己唔同既起跑線，起跑線的輸贏，決定於間公司點樣 evaluate 自己個 edge，然後專注響自己個 edge 發展。好似我個女咁，鍾意跳舞鍾意畫畫，咁呢d 咪係 possible edge 囉。洗鬼同人響 Red Ocean 爭咩。講真，Blue Ocean 呢本野講到咁勁，無理由唔活學活用架。

2. 買樓 vs 租住先

唔多講勒，我算係眾多租客裏面既得利益者。一個素未謀面既業主，將一個（我覺得）高租值既單位以低於市價至少40% 租左比我，感激。但我硬係覺得呢個業主應該係老人家，靠間屋養自己.... 咁點算？買樓？有錢先喇。

3. 萬聖節真能只是個商業化的鬼節嗎？

標題不錯，讓我再想想：聖誕節真能只是個商業化的生辰嗎？不過，真正深刻的，仍然是耶穌的「死」與「生」，兩者的意義對於我們，在取態上有何種分別。

如果作個粗淺的論述，我會簡化一切「商業化節日」的分析，很粗疏的看「商業化」就是「普及化」，而「普及化」就趨向「個人化」。我不反對人對於各種意義，採取商業化、普及化或個人化的取態，就算對於某些人來說有某種「搞亂檔」的傾向，其實也可以對於該意義覆蓋給更多人。我如果從這個角度來看，就得出一個方向，「個人專業化」「普及專業化」以及「商業專業化」，來對待某些自己覺得重要的意義。

補充一下，商業，就是普及的動力。完全否定商業，人只傾向閉關自守，且看千年中國如何對待商人的時候，有否同樣感想？

4. 富商與性工作者

如果視那些應捐什麼關愛基金的富商為洗底，呢d不義錢財，我等義人唔稀罕，那不如想象一下他們與那些捐錢給慈善機構、賑災、教會、寺廟等的嫖客有何分別？

點解有分別，點解無分別？咁如果係性工作者捐錢，又會點睇？若果話尊重，咁點解自己唔去嫖，點解唔比老公去嫖？點解嫖客捐錢（or 贈送性服務）無原罪，富商捐錢就絕對樣衰？

5. 哪些公司已經準備好，聘用自大的人？

試想想，這個現象其實早就存在千百年了。看看那有一間公司的老闆高管們不是自大的呢？什麼報章什麼傳記都推崇那位謙虛的老闆高管成功人士，並非因為他們不自大，而是真的太稀有了（已經假設報章傳記內容全部屬實）。

世界就是這麼奇怪，唯有自大，才會受自大的老闆高管們尊重。

6. 不免心痛

遙望看著那自我折磨，雖然帶著傷痛，竟刻意按捺那衝動，以免撩動那正平復的心情的。我不值得受重視。

「寫封信給我，當做最後約定，說你在離開我的時候，是怎樣的心情。」

7. 意見調查

問：請問阿生你認為香港應唔應該搞亞運呢？
答：唔應該
問：先生，多謝你既意見，咁請問你幾多歲呢？25-30，定係30-35？
答：（支吾以對）
問：咁請問你結左婚未呢？
答：好似結左。
問：咁請問你同你太太收入幾多呢？一萬至三萬？超過三萬？
答：少過一萬。
問：少過一萬？？Errr....
答：（等反應）
問：哦，咁多謝曬你。

（連「多謝我寶貴意見」都唔記得講，露曬餡，真係唔專業）

8. 超級市場

呢間超市有好多好多種類既貨品，但又唔係人人都啱洗固喎。只係呢間鋪頭日日都人頭湧湧，況且熟客太多，就算來者不拒，阿老闆根本無幾多定方再招呼新客，遑論將入面d 貨賣比呢位新客？阿老闆查實都可以賣些少既，之但，熟客優先囉。係咪？

（佢話，每個結左婚既男人，都係一間超市）

9. Unlike

千祁唔好like，佢呢排戒鹽。

菲島小記

2010-11-01T20:30:00.002+08:00

紙扎工廠除了要我簽生死狀外，還外派這個將死的人去菲島接受培訓。嗯，這樣說說菲島並非單要強調自己如何大鄉里（對上一次從香港機場飛好像是十年前的事了，總之太久太久了），而是想記下一點感想。

簡單來說，馬尼拉是一個農村化的城市。

堵車很厲害，高架天橋少，集體運輸設備少（地鐵欠奉，巴士不多，街道多Jeepney及Taxicab，所謂的火車就像LRT）；教堂建築設計有時令人眼前一亮，其他建築所賦予的感覺，足與國內三線城市互相輝映；菲女可以很漂亮，大部分好像很純良；菲男樣子或許要人敬而遠之（不論什麼原因），大部分都比較... 缺機心。

下榻的酒店（Mandarin Oriental）我想畢生再無機會再去：房價不清楚，設備殘舊程度如三四星（香港標準計算），服務員及接待員卻達五星，商務中心的接待妹妹體型外貌達六七星（最笨忘了跟她拍照！）；跟幾個同事在酒店用膳吃了兩個小時，幾乎悶死；在房間打了四通電話，每分鐘收費超過50港幣！其中兩次沒有接通的，在我要求下她們就waive了，打通了的六分鐘，就花了三百多港紙。

有兩晚我一個人離群到街上消磨尋歡，有像其他地方，小童們跑到馬路向司機兜售物品，偶見遊客注目會起哄求買（挺保守，沒有國內的進取）；有年輕人拿著一小方盒標籤著“Viagara”的東西，索價1000披索（還是3000? 不記得，總之我有心有力！）；酒吧門外有阿叔問：「Are you lost? I found a good way for you」（全馬尼拉最有幽默感的竟然是呢位阿叔！）；有兩艷女追上問地埗：「Two hours 500 pe, one hour massage, one hour sex」，走了幾乎兩條街，推說 I have friends with me 才可保晚節。

幾乎每棟樓房或商鋪無論大小都有一位保安員或所謂看更，大多為男士（不論年齡），次為阿婆阿嬸；每條村雖烏燈黑火，但觀乎當地人的眼光遭劏死牛的機會該不太大；很奇怪有些村幾乎被所謂「韓國餐廳」（或韓國什麼什麼的商鋪）所淹；大型商場（Ayala Center 等），還可以，但當問到服務員關門時間竟然一個答我八點半，一個答我九點，一個答我九點半，另外一個竟然還要問另外一個！大型超市地方裝潢比美香港吉之島，鮮魚鮮肉多，唯包裝產品種類較少（一行人的手信就只有7D的芒果乾）；偶然在超市跟一位華籍 Grandma 搭訕，我倆用英語交談，她說不要到城外去，丈夫曾經被打劫，搶了三百萬（3 Million，該沒有聽錯），聊了很久，我說不如一起拍照，然後送電郵給她就好，跟著就給了我中文名字，給了我她的電話、地址、電郵，說如果在這邊有什麼事需要幫助都可以找她（當地人的安全感與無奈感可見一斑）。

三天過去，我還念著那位漂亮的外國同事。

（本記純屬小札，希望不會為我帶來噩夢連連。）

*************

為保貞名節，決定加貼：

1. 酒店房門（《請勿打擾》可略見Logo）。

嘿，此房間實乃偷情家庭房，房間裏面有另外一道門，可以連接隔壁房間。

2. 房間

嘿嘿，茶几面的黑色碟不用說明咯。原本會盛著小小的Welcome fruit，不過呢，其他同事都有，我的欠奉。而且，縱使這次旅遊培訓是每人一個獨立房，其他的都有單人大床，我的，就這樣咯。

3. 往探險途中的街景（隨便拍）

4. 超市一角

一月一度又甩look

2010-10-14T21:26:00.002+08:00

忙到抽筋，講正經野唔夠閑情，心情唔好，講廢話都無心機。

求其講幾句，參與一下大眾「消費」。

紙扎工廠

真係自作孽，繼續死守紙扎工廠。就算忙到死阿蛇仲有新仆直要我跟，跟手有份生死狀要我去簽，簽之前要我渣扶埋個內容。真係佢都得。

我話不如唔好搞呢味野喇，簽左死唔去咪丟人現眼，如果有幸死左，咁我熬夜渣扶呢份生死狀既心機咪白費？唔好喇。我呢個星期已經得番半條人命啦，放過我啦。阿蛇話，咁牙？。。。你下星期一比我囉。（頂）

紙扎工廠雖然最近必唔到幾個大仆直，但舊客比既新仆直真係夠玩死我兩個月，到出年三月前又係我一支公去砌，諗番兩年前數手指既日子，俱往矣。

無黎政經

施政報告，無野講。有轉變已經算好事。要十全十美？揀啱果日結婚就得，搞民生邊有10年10月10日10時10分10秒架。

就算兌現其中3成，擴交通津貼，留港305日夠資格拿生果金（之但剩番果60日點算？），加書簿津貼.... 已經幾好。樓市點？花無百日紅，是但啦（萬一租左五年後我唔想買樓會唔會沒收打算退比我果一半？）。

都話領導力咯

唔記得響邊庶講過，竟然同阿示巴拿講既意思一樣，其中都話「有領導能力唔多，就算有都未發圍」。再記得上兩星期阿某某專欄，好似係阿王生，話人奢求有出現領導能力既人可以咩野「強政勵治」係無聊諗法（「無聊」呢個評語係我interpret得出既，並非佢原文）。

雖則佢近來寫既野比以前持平左好多，無咁多小動作同怨氣，但如果我當面聽到佢講呢番話呢，我就真係想「請教」佢究竟咩叫領導力呀。

記得我舊公司有位Pantry阿嬸，佢真係雷，唔係皇親國戚，唔係蠱惑中女，一丁友可以搞掂得幾條team人化敵為友，仲以初中程度既學業水平搞掂幾條team既客戶難題，就算升左senior OA，走埋，幾添人都阿姐前阿姐後當佢再生父母咁。呢d 咪leadership practice囉。仲未講果d唔係head住人，但人地自然聽你支笛果幾個尋常你我他。領導力唔一定要強政勵治、教無類殺無赦黃袍加身果種既。

人走茶唔涼，都睇到一二卦。

明白與不明白

2010-10-04T21:03:00.005+08:00

最近同阿女去賣旗，先知道原來「會主動」買旗既人，大部分都係上左年紀既阿婆，然後輪到中年女人或帶子阿媽同埋上年紀既公公，跟住到女仔，最後先至輪到一眾中青男士男仔。雖然大部分阿婆捐既錢好多人（包括我）都未必睇得上眼，但睇到佢地同細路女打招呼既方法，同埋點鼓勵小朋友既態度，顯得聖經入面果位捐身家既老太婆既故事，原來好合理。

我唔係未聽過已經離開 NGO 既舊同學講過賣旗既錢會點洗，不過我覺得，就算呢個社會真係邪惡成咁，或者呢個外表風光既組織黑暗成咁，做老豆既我，都唔應該抹煞剩番果1%既光明。呢場賭博，我自信輸得起。

果日我帶住佢，先問左佢幾個成人問題，諸如「點解賣旗呀？」「d 錢點用呀？」「點解爸爸要賺錢呀？」「無錢點算呀？」之類連我自己都答唔到既問題。由同佢一齊搣旗仔、一齊揹住個錢袋，然後企響佢後面support佢處理成個marketing + sales + admin + cs既作業，到最後企響佢對面等佢自行發揮，先發覺原來放手唔係難，亦唔係易，只係需要好有紀律咁調節自己個心態，等自己有充分準備既時候，就要決絕咁比佢獨立。

唔否認，同個女賣旗絕對係一個好值得珍惜既親子活動，我要放棄呢個所謂機會去比我觀察佢處事既另一方面，的確掙扎過。老實講，唔係我權衡輕重過，寧願放棄一個機會去換取另一個機會，甚至奢望兩者兼得，而有少少係想體會一下，人係咪一定要明明白白咁犧牲自己好明白既野，然後先可以不明不白咁獲取自己永遠都唔會明白既野。真係一個謎。

三天濃情一天清

2010-09-27T20:22:00.017+08:00

上集同匿名B講起personality。我覺得做人老豆，最怕被人話教兒不善。我只係係怕，唔係責怪旁人，因為自己對住人地個B既時候都好可能係咁。尤其當我自己響公司獨當一面，覺得無野係做唔黎既時候（雖則呢個又唔係事實喎），就更加覺得阿仔阿女既性格呢，一定有得搞。

丫well，我係樂觀左d，不過亦好明顯一直咁「搞」落去，唔係我黐線就係佢地發癲。所以搞搞下，要搵人幫手，雖則呢隻手又只係得「佢」（即係有時覺得我唔洗搞咁多野果個）。

嘿，講左咁多題外話，講返正題！

丫，又見到阿四媽自從某某日之後，已經唔會再貼小C正面照，我響度諗，查實，我貼，都係怕揀相麻煩遮.... d 相影得已經一般般，仲要好心機（+心思）搵（+影）背面（+側面）照.... 以我技術（+美學觸感）勉強 d 喎。（又是但 or 隨緣？俾人話行貨好耐喇....）

是但啦，簡單鋪排一下，濃縮左既結果就咁：事緣，果幾日，出左海，跟住，返屋企。

0. （先講夢想中既世外桃源係點）

1. 落船以後，掉低行李，阿老豆就歷史性咁做左餐飯俾全村人食，食完就等巴士，細佬問家姐，係咪去大澳呀？

2. 去緊大澳途中，阿仔（暈車浪）嘔到佢自己成身都係，禍及旁人。瘋洗左至少半個鐘（慘，成身日本奶粉強勁奶騷味）。

3. 咁順便，就響洗手間對出個小紅樹林（+垃圾崗）影左幾幅，其中影到一隻螃蟹求偶（+螃蟹追殺彈塗魚）既景象。

4. 又順便影下浪蕩天涯既牛牛們，同埋幫牛牛清潔既雀仔們（真係第一次親眼見到）。

5. 最終頂唔順，走左去沙灘沖身。d沙雖然黑mung mung，但勁幼！成個沙灘有好多蟹仔白色小bivalve，走入左海30米都未到條腰！當然喪玩。

6. 響水面學寶黛麗出水芙蓉，見到遠山如霧似煙... 忽然畏高。

7. 跟住拖男帶女走人，女既著住男人衫，男既著住女仔衫，毫（+好）不溫馨。

8. 夕陽無限好...... 查實 d水開始凍。

9. 所以到夜晚，就拍一張冷夜的照片（恰，點解忽然轉台既？）。隻手震到呢...

10. 據聞追月果日木星跟個月亮可以同時見到，之但技術太差，手又震，所以，呢個木星似星雲多dd。

問如何盡如天意

2010-09-21T20:25:00.003+08:00

好鍾意打機，前排尤迷《Call of Duty 4 - Modern Warfare》，絕對可以打到天昏地暗。如果響入面比人射瓜左，佢會好唔通氣咁整句某某名人既quote，係要黎個小反高潮。之但，我又好鍾意呢兩句（摘自Call of Duty 3）。

"A thing is not necessarily true because a man dies for it." - Oscar Wilde

"All nations want peace, but they want a peace that suits them." - Admiral Sir John Fisher

阿女有兩個癖好，一個畫畫，一個發脾氣。通常，佢畫完畫就會放埋一邊，隨意棄置，任意踐踏，只有小部分佢會話送比邊個邊個，或比我保存入電腦。

前排我心血來潮，就響佢其中一幅畫寫左幾隻字（紅色smear 本為阿女個名），然後靜靜雞放響檯面。日頭真係比佢發現左！。。。嗯，如果用勃然大怒黎形容佢即時既反應，都庶幾近矣。佢話：「我唔鍾意爸爸寫呢幾個字！我唔要爸爸鍾意我！」（非身在現場，E&OE。）總之，佢老豆我聽番，都呆左半秒。

都唔係呆好耐遮，皆因未上心未上心。

近日又當眾發脾氣，甚至話「嫲嫲煮飯都唔好食，媽媽煮果d先好食加嘛！。。。唏，真係好大壓力呀。。。」不得了，真係鬼知響邊庶學返黎。在場親友明言行為過分，跟阿仔的乖巧順服相去甚遠，問我有否想過送「醫生」治理云云。我一不置可否，二直言未曾想過，三實在不急定罪。返屋企後講返，阿Moon 跟我莞爾一笑，想法大同小異，或抱殘守缺，或明知不可為而為之，不爭朝夕。

無論小孩子與老年人，我能給的空間是相對比成年人大很多的，對於他們，我的耐力也是相對大很多的。

小孩子既反應，由外而形諸內，環境帶動性格，影響行為，行為即時反映既，唔係性格，而係環境。而老年人，則漸漸對環境絕緣，行為源自內心既有既判斷，他朝君心也相同。

當然，我唔係完全正確，而且小朋友響大眾面前失禮，的確反映禮數教養。不過，我得承認，阿女人前明顯既好曳，加上阿仔人後唔為意既好曳，都反映左兩隻野真係無乜教養。但我就一定唔承認，佢地兩個，連我地兩個，都無好好學習到點為之符合禮數。

怒眼妹話必必佬佬妹妹兄妹仨，理應如此。雖然其理何在我不甚了了，但切膚之痛呢該不遑多讓。

阿女三歲前絕世可人，三歲後叛逆難馴，親母之時與老父若即若離。大脾氣的確令老豆好忟憎，但呢股脾氣亦令佢唔會咁容易同人妥協，就算父母唔在場，佢都可以為自己爭取。阿仔呢，其實如老父一樣，響性格中隱含另一面，外人根本唔會察覺到，唯有家中父母日對夜對先會充分了解。相比阿女大鳴大放，兩姊弟其實各有千秋。四個人裏面至少六個關係要點處理，來日方長。（親友們如見字切莫不屑。）

阿仔呢，再過一陣就知分曉勒。如果佢地兩個既性格都唔係處於極端既話，我地兩個做父母既，都已經足夠安心咯。

隨風而行，就算唔可以盡人意，或者，都可以盡天意... 卦。

盡頭的微笑

2010-09-16T00:59:00.001+08:00

清早，我還在浴室整裝準備上班。回房間，見朋友曾打電話來，沒有接。

沒有在意，在上班途中才爽利的回覆他。他說咱兩的好友茉莉的爸爸病重，醫生說可能過不了這兩天。愣了一會，喉頭和鼻孔漸漸繃緊。問了資料，說今天下午會請假去。為免茉莉添煩，只給了一個短信：I'm with you. I'm with you.

公事繁忙稍稍消除了憂慮，呈了假單後，還跟同事叫了外賣，打算飯後起程。

還有一刻鐘才到午飯時間，茉莉來了一個電話，告訴我，如果要來，現在就來好了，他爸爸快不行了。

這通電話促我幹了幾件事：按了鍵，把剛完成的資料傳送給老闆；交了外賣的錢給同事，叮把便當送人；跟上司說了句醫院急事，拿起包就走。

外邊藍天白雲，在的士上竟不斷問自己：Am I asking to let him see me or to let me see him?

到了病房，茉莉雙眼已經通紅，繞在世伯旁邊的，只有她兩位不常聯絡的親戚，以及她的未婚夫。這時還未到一點鐘。

世伯的臉龐好像變大了，大到我平日見到他時也不察覺這麼大，想起姨丈當日在醫院病重的時候，也是一樣的大，大到我發覺原來一直以來自己都沒有正眼看過他們的臉。今天也是多年來最仔細的看他的臉。他的牙齒帶點血絲，戴著面罩呼吸，偶然會喘一下，眼皮和眼角濕濕的滲著淚水。

茉莉說他打了嗎啡，可能沒有大知覺。但她肯定的知道他會聽到我們說話的。她叫我去。

世伯，我來了。撫摸著他的手和額。然後說說家人的近況，嘗試細說往事。卻竟無法記起他曾給我們說的一個笑話。馬上哽住了。床邊的心跳計顯示著微小的起伏。

說起嬤嬤和我一起的小故事，也就是世伯在十多年前走了的母親。心跳計反應劇烈。再哽不住了。

茉莉接住。爸爸，孩子來了，孩子來了。身邊還有表姐、表姐夫、孩子和哥哥。我們都在。

哥哥和表姐都挺不住，但不想給世伯聽到。心跳計和除顫器此起彼落的信號聲響讓在場人的心情跟著此起彼落。一時一刻，護士終於為我們準備好那刻的來臨，把那心跳計關掉，讓那床尾的除顫器繼續告訴我們什麼狀況，把床邊的簾都拉了。我就在這個機器旁邊，看著電子圖像化了的心跳，感受著世伯的心弦。45, 44, 46, 43, 40, 42, 43, 44, 46....

好不容易，從這些數字抽離，不斷問，不斷尋求。人生的路，是跌撞交織，也是苦樂共生。

茉莉說，爸爸已經說過沒有遺憾了，最希望的就是女兒可以隨心所欲選擇作自己認為開心的事。茉莉也在跟爸爸重複著相同的話。不斷的說女兒對爸爸的感情，重新把過往和將來的日子編織成一幅美麗的畫布，也不著跡的流下眼淚。

下午一時三刻。世伯還在抽喘。女兒知道爸爸的堅強，多年來獨自堅守著自己唯一的女兒，作任何事都可以堅定地說一句無愧於心。意志非凡人可比。除顫器還是如常的起伏。世伯絲毫沒有退縮。

女兒早已經作好面對兩難，寧願自己背負那個選擇。

爸爸，我的愛已經伴隨著你，你好走。茉莉已經有哥哥照顧，你可以安心了。嬤嬤已經做了飯等你，大孩子，吃飯了。。。。。。

不斷親吻他。不斷勸說。直到淚乾。

明白了。我終於體會到茉莉的決定，鎖著眉頭報以微笑。世伯，我們會幫你照顧茉莉的，你放心。

二時許，唯有茉莉察覺到一道陽光從雲冠邊緣突然灑進來。她給我一個照面，回頭微笑著跟她父親說：爸爸，你從來都是守時的，兩點了，有光來接你了。

除顫器上，25, 23, 20, 19, ..... 12.....

閒談嫁娶與三城

2010-09-13T23:51:00.005+08:00

c.m. 終於成功成為Cola 第n位無抵押債仔，交收後吹水當還息。

《結婚年齡》

Cola 響大城住左超過十年，兩個女都開始讀小學。睇佢一表人才（尤其仗義呢方面），加上底子厚，應該唔少螞蟻嬲蜜糖，笑笑口問佢入籍咁耐有冇行差踏錯。嘿，以為佢答案唔係有就係冇架喇，點知佢話，行差踏錯既唔係佢喎。嚇，唔係反高潮...阿嫂...下化...

都唔係。

佢只係慨嘆，依家發達大城既家庭問題淋淋種種，反問我香港呢邊點，原來係擔心兩個仔既將來。

佢覺得，經濟情況，並唔能夠徹底解釋婚姻同生育既關係。發達大城既人口老化，在於好多人將結婚年齡推遲。套用個亂黎理論，結婚越早既地方，其人口流動性查實就越低。而人口流動性越高的地方，結婚年齡越高。

佢話大城好多人，就算俾你生十個，佢地都未必生。職業或者想享受自由，固然係一d好顯而易見既原因。不過佢話，查實係因為結婚年齡推遲左，所以先至減少生育意欲，職業或其他乜經濟物自由既原因，好多時都只係由於結婚既年齡。佢無統計響手，但就覺得大城係咁既情況囉。

c.m. 諗諗下，表面上似係，之但身邊好多都似乎唔係咁喎。（不過佢都知道債仔同債主拗係會比雷劈既）

原來Cola 係擔心佢對女，香港人身份 + 國內大城居民身份，會令佢機會少左，然後遲婚，最後可能唔生！問我點算。（洗唔洗諗到咁Q遠呀，係咪想借加依暗示想我個仔娶童養媳呀。）

《菲律賓與深圳》

講講下仔女，突然跳到菲律賓果件事，猶有餘悸。兩條友本能默哀半分鐘之後，繼續吹水。話題去左貪污。

Cola 話大城貪污家陣唔再存響暗角位，反而越需要專業既地方，就越成為貪污既溫床。港式買辦質檢自然有，會計審核一樣多。反而政府部門，技術官僚，已經無明顯笑吟吟勒索行徑。搞掂就關人。好明顯佢唱反調，唔同意c.m.成日講咩自組織有利社會呢套，亦唔同意自組織係社會進步過程中既必經階段。之不過，佢都同意菲律賓真係完全無專業人士。

佢強調呢個唔係睇電視報紙周刊所得既觀察，而係佢接觸過菲律賓既所謂專業人士，佢地個思維好少去到 mastery，頂多係technocrats既級數。雖則佢同意菲律賓人大部分都好善良（甚至善良得過分，信仰住佢對人好，人就一定會對番佢好），但佢幾怕同菲律賓人傾生意講合作。是關你個生意夥伴如果真係表現得毫無機心，你個戒心同警覺性反而會更高。心理壓力仲幾大。（c.m. 不置可否，淨係覺得菲律賓既女仔好似幾易呃）

然後無啦啦扯上深圳。佢覺得相對深圳，唔係金融中心、唔係採購中心、唔係乜乜中心，專業貪污唔多覺囉。

嘿，Cola 已經落戶大城攞綠卡，邊度會曉得深圳呢d 小故事丫。專業層面貪污c.m. 唔認識，但廠佬小商百姓都好似繼續要遵守呢套規則喎。Cola 諷之，話：嘿嘿，我點會唔知，但你唔覺你講緊既，係邊方面既深圳？... c.m.思索本刻，懶得理會。

齋睇貪污，查實深圳同菲律賓比，甚至再同大城比，真係有唔少地方唔同，亦有唔少地方唔一樣。睇清楚分別響邊度，然後追本溯源，可能要再借多次錢先有結論。

閒談深圳起動

2010-09-12T15:01:00.002+08:00

與老同學 Cola 飯聚吹水胡扯閒聊後，決定來個大雜燴。

《深圳軟變革》

Cola 在國內大城就業置業成家，講起大城中的各種故事，評論社會文化人文衝擊，提起深圳。

他覺得深圳，就像一個紅樹林，鹹淡水交界之處，跟河流與大海連接。如果中央不以深圳作為新一輪變革的試點，那誰才夠「資格」？言畢即席跟c.m. jam 歌，不亦樂乎。

Cola 以他財務專業的背景，自然離不開公共財政、資源分配等角度。而我則以拉雜業餘的心態，將地緣、流動力、人口、文化、制度，跟他的理論取長捨短，嘗試不著邊際的憧憬著將來的變化。

我倆今趟一致的樂觀（相比子女教育的方針，他的緊張程度小的鞭長莫及）和有相當共識。地緣形勢，分四區：香港、一線特區、二線特區、特區外。啟動變革的區域，預計將以一線特區（即羅湖福田南山鹽田區）起步，然後伸延至關外的二線特區。我們當年都曾經一起在深圳打拼，在其中一段比改革開放要短的時間，見證著二線特區的逐步開放以及跟一線特區的接軌，所以這方面的觀察都大同小異。開放與接軌的目的，都是為了減少各種經濟和生活指標的落差，以「持續」而非「最終」滿足人民預期上的落差。

漸漸扯到流動力、人口結構、文化生活方式。預計這些考慮將會是「制度」變革最需要考慮的因素。戶籍制度暫不會被直接涉及，如何「固化」人口流動，然後取用「固化人口」中的自發性（institutionalized）社會動力，卻會是制度「軟變革」的基本。因為「深圳」本身就是一個固化人口流動的誘因，所以變革的方向將會在如何取用社會動力著墨。當中涉及成本與利益的考慮，可惜這個吹水飯局實在無法道盡。

記得 Cola 提到，按照那赤色思維，在中國成功變革，必須為政策的執行者提供誘因，否則一切變革將會徒然。可是，Cola 不如此看深圳。他以發達大城中的經驗看，經濟力量與資訊力量在國內大城市已經不可逆轉，這些大城已經不再成為個人經濟利益的鬥獸場，反而跟社會一樣自動進行產業升級，官員之間對於利益的爭奪是以「間接」而非「直接」的形式體現，即由單一「cartel」變成多方面「competitors」。雖然大勢未成，不過正醞釀沉澱，白熱化可期。c.m. 對此雖有體會，卻無法完全認同，因為始終對深圳財政制度欠缺信心。而信心的來源，c.m. 估計，大概如尋常深圳居民一樣，是缺乏透明度所致，而要改善居民對財政運用的信心，卻又非單單居民參與可以令人釋然。

不過 Cola相對樂觀，認為這就是切入點。社會軟變革的同時，財政透明度相信會進一步放寬，他理解正正這不是一朝一夕的事，在變革的過程中更不斷受到關外區外甚至全國的官場文化所影響，Cola 認為，萬事雖起頭難，世事卻不斷在進步，歷史如果真的是一道洪流，一旦產生了動力（他用了Momentum），舊有的路障關卡大爺之手全都是螳臂擋車。他說他是見到一眾曾經隻手遮天的大官大腕們起落無常有感而發的。這讓 c.m. 感慨地想起曲舟的泥石流。

作為散戶，必然問及深圳變化所帶來的股市前景，以及胡主席高調接見李首富之事。Cola 推說不熟悉，卻覺得，胡李相見之事他不會揣測，只覺得主席面見首富，不是利益輸送就是賦予責任。李是明智人，一定可以火中取栗，視利益與責任均等。至於深圳下一階段的發展，既然是配合這樣的一種「從下而上」所推動的國策，而如果「取用固化人口的自發性力量」的確成為重點的話，服務和跟民生有直接關連的行業將最受惠。

聽畢，c.m.仍然不明所以，於是顧左右而言他，問問他活在這個風雨飄搖的世代，該如何教育子女、如何應對貧富落差、如何看那美國蚊型教會的炒作、以及如何向一位許久未見一見卻遭查問借款能力的朋友借錢。

（如果借錢成功，不日再詳述c.m. 如何渡過這風雨飄搖的日子）

尋劍道

2010-09-03T01:19:00.004+08:00

施老偶耍劍為樂，喜與江湖劍客切磋共尋劍道。

一日，路過碰見名劍獨孤求敗。劍客設陣明言求各方賜劍求敗。施老早就耳聞目睹獨孤劍法七七四十九變，未嘗一敗，坊間亦有九九八十一變之說，劍詣高超。

旁觀對陣良久，施老察見獨孤求敗劍招甚為綿密，防禦固若金湯，狀似死門破綻卻為請君入甕。施老銹劍忽然劍性突起，強拉劍主上台比劍。施老圖先發制人，卻劍不過三合，被獨孤四十九變的第十變《求仁得仁》所退。

施老唯回茅廬面壁一夜，苦思若失，遂於陋室樑上揮配劍刻字顧影自憐：

《不敗在心心有劍．獨孤尋劍不尋道》
《尋道在心心無劍．老伯尋道不尋劍》

自此自問，獨孤永不能敗，老伯永不求勝。若乞有緣人不果，乃卒。

（嘿，今次肯定是繼側田後，從黑人《把妹達人》惹來的病！）

哀，不卑不亢

2010-08-24T22:35:00.003+08:00

昨夜在辦公室看網上的即時新聞，同步跟朋友通話由他即時轉述電視新聞。一邊急著完成工作，一邊乾著急。

我想很多人在熒幕前經歷過後，都睡不寧，寢不寐。感覺就像當年鹿死，就像當年九一一。總之，都有一個身份，就像受害者的家人，就像自己是其中之一。

雖然我們大部分人，過後仍會繼續嫁娶如常，可是，誰會質疑我們會忘記這種這些切膚之痛？

但願我們大部分人中的一部分，會更學會不卑不亢的生活。讓將來的世界，會因這份不卑不亢，看到我們堅強生活的一面。

主題、佈局、規條

2010-08-23T00:13:00.004+08:00

西九second round咨詢有三個proposals，分別有三個主題。

但最妙既，我覺得唔係呢幾個主題，而係阿堂堂司長不忘補多句：「查實唔一定用呢d元素架，如果市民鍾意，溝埋都得架。」

聽完把幾火，美其名取長補短，實際上牛頭搭馬嘴。下？唔通又想黎個四不像？

唔該，我真係好想主題行先。曲高和寡都係咁話。

************

Well，我對美學無乜認識，就算上次中央圖書館劣評如潮，我都唔曉反應。但用落，去過好幾次，一個字：「差」。

差在「功能」。圖書館ung大都好，ung多藏書都好，但若果唔係一個適合「讀書」既地方，sai 曬啦。又咁，都適合用黎「借書」既，之但如果淨係適合借書而唔適合讀書既話，開個「倉」咪得囉，洗鬼開「圖書館」咩。

小朋友係嘈係走係嗌架啦，呢個係佢地生活模式黎喎，小朋友學習唔係更加要互動既咩？要靜靜讀書嘈唔到人，點解唔採用密閉式？就算香港其他兒童圖書館個設計，都好過「呢個」中央圖書館兒童圖書部十倍不止。

自修部又係咁，d人出出入入，上上落落，就算唔嘈喧巴閉，都夠擾擾攘攘勒卦。

雜誌部kingling kanglang 在所難免，想零分貝，最多唔睇囉。

其他部就算講兩句，甚至同職員講野都要刻意壓低把聲，細聲傾電話都有制服人員叫掘住你皺曬眉頭殊殊聲叫你唔好傾落去，你唔好去 X。（噢畸，收尾呢堆係發火時既主觀感受。）

我都係用家，唔想搞住人地，亦唔想人地騷擾到我，但唔該，想問下設計果位係呢度特別應聲，定係管理太「有規矩」？

************

設計主題，點樣佈局，就會影響往後既管理規條。

我唔想因為咁L Q多規矩而影響我去享用社會設施既樂趣。

閒話廣告

2010-08-20T11:51:00.004+08:00

響巴士站睇到一個幾mandom既電影廣告：《The Expendables》

一路睇下有咩卡士，一路對下人頭.... 唔對路，明明話有阿諾舒華生力啤，仲大大隻寫住Schwarzenegger，但點解個wedge formation唔見佢既？

問阿二，佢話：「係呀，我都睇到呀。你話丫做緊州長點拍戲呀？或者左邊有個係佢細佬呢。」咁又係喎，醒。

Source: http://www.movietalk.com.hk/the-expendables

跟住check imdb，真係無佢喎（另見留言），睇埋英文版。。。

啞左。

尋常一日

2010-08-17T17:13:00.001+08:00

08:00 起身，磨下磨下，出門口 09:10。

日出而作，忙到飛起。

個客又殺出要做特別野。趕比佢。

唔想分心，所以一路聽住 MP3 一路做。

隔離同事L 走左成個月，所以唔再聽到佢叫我唔好唱出黎。

連同三個阿爸加一個新晉好仔同隔離部門新同事一齊食飯，湯飯24蚊，唔知邊度可以再平d。

繼續聽歌，趕工。又有客殺出要求做d做過百次既 liu lung 野。

阿二打黎，約今晚食飯。

轉英文台，同M Office既同事開conference，對腳想較，好彩進度算快，頂多可以慳倒 20% 肺話。

查實想睇下我唔係度個開會結果係點。

唔記得，打番屋企 check 下有冇漏水爆渠。

阿女今日又發脾氣。都算。

但點解要發到連個電視機都可以跌落地？仲連個電視柜都側埋？

如果我在場應該打到佢飛起，剷到佢上天花板。

諗落應該唔夠佢打，跟住佢就比雷～～～睬～睬～睬～。

事到如今，我 concede，我套教女方法得個講字。

野性難馴，係遺傳既。度下今晚點炮製佢。

繼續聽歌。

隔夜飯

2010-08-16T15:04:00.001+08:00

唉，生活太倉促，苦短的人生時會出現遺漏，也因此，經常黐線。

天災人禍

我黐線，所以肯定一切天災都「一定」涉及人禍。

我黐線，所以不會經常問什麼什麼災難是否人禍，既然「一定」的事，問來考究來是為拿個博士學位？何不乾脆說又來人禍？

The Affinity to Correlate

This is not a problem. This is one of the ways to deal with ambiguity.

方言

首次跟上海姑娘互通消息，學來新詞彙：搗漿糊、麻利、淚崩、浮想聯翩。。。還問我Tinshuiwai 是一個怎樣的地方。

乜咁深架。

積木

買了一盒塵封舊式積木給孩子，幫助腦部成長能力不詳，提升創意能力不詳，延續專家什麼理論不詳，擴闊家長交流內容能力不詳，充實孩子投考心儀小學的撲福利奧能力不詳，提升孩子倆爭奪玩具能力則一清二楚。

衡量價值

事人治部者，難免需要量化一個人的價值，亦難免要抵受量化人者亦被人量化之煎熬。

平常心對待人家的評頭品足，始終不是人人都有這個胸襟。

說三道四這門職業

2010-08-09T20:20:00.005+08:00

當中可以有作者、作家、評論員、文化人、識字份子、師奶、八公，或者以上全部都不是。

我的思維過分沉醉於有來方有往的模式，沒有外在刺激，人就如鹹魚一條。

那位時而讓我喜愛，時而讓我思而弗得輒起繞室以旋的梁文道，又跟人家一樣來老生常問「這條算式我用了好幾年都算不通」，為「作家、編輯和一切有關人等花了不可計量的心血」抱不平。

啊，對了，我只是做做文章，練練思維罷了，莫見怪。我等庸人寫字多累贅，覺得都是修煉思維的某一種，希見諒。

道長的想法，我好幾次坐在廁板上旋了又旋，還弄不清他會這麼想不通。我總覺得，他早就想通的。他知道就算金融才俊肩摩轂擊的中環街市，都有一個讓清潔工人、遊客、家長和一切有關人等花了不可計量的心血才可以讓他人、自己、仔女坐得舒服的廁板。這條算式誰用了畢生都算不通。

寫作不過是創業罷了。再寫作不過是再創業罷了。如此胡亂推論，天天新聞也不過是天天創業罷了。

側聞創業三年內的倒閉率達百分之九十以上（若我的資料跟政府資料不準，都是腦袋坐在廁板上惹的禍）。那肯定如果天天創業，終有一天，會倒閉的。

可幸，正因為天天創業，所以天天都可以捲土重來。如果天天都在創業，難怪心血是不可計量了。我明，我明丫。足苦躓焉；既久而遂安之

嘗又聽到香港作者們心血也太不可計量，與國內從業同行不可同日而語，這個我挺理解，從什麼二零一零年全港薪酬行業分類報告，呻笨者多如繁星，道長又抱不平，凡塵事總會傳千里。

寫作創業收穫之低，大概因繁星太多有關。當我正在感到因為資訊立雜得多如繁星的同事，也正因為選擇夠多、自由夠多，而令我對創業者們心生有愧。

縱使我在毫無意義，別無理想，旁若無人地繼續說三道四，我還是多得創業人士在心血上的犧牲，因為他們工資不夠養家，所以沒有心血應付我等胡說；又或者，因為他們天天創業，所以我才可以漁人得利，一同享受創業自由，濫竽充數。

略略睇番

2010-08-04T19:56:00.003+08:00

我一直都算係一個幾「博」既人。

講夠曬客觀既經濟性結果，博出黎之後，鑊鑊都唔係好野。反而論自我催眠既主觀性人生體會，無心插柳，終於博到首期八百萬之終身債務。

我唔係吹噓我有幾幸福，有幾自我感覺良好，只係你見唔見，我環境 ung 差，都未「頽」過。

環境差果史，我認我會抑鬱、我會乜都唔想諗、我會唔想見人、我會淨啃白飯，不過依稀記得，一定未頽過。（Well，唔係話完全未頽過既，之但一定唔係環境差果史咯，以前頽，多數會係響老頂闊佬懶理果史呀，人心不足蛇吞象果史呀，恆指跌左兩萬點果史呀咁。）

撐住啦。最緊要撐住自己，唔好俾自己放軟曬心情，就算玩瑜伽，腳趾公都要掂倒個鼻哥窿架。

好多人話正因為無野可以再輸，所以更加要博。呢句我雖然幾抗拒，但真係有道理響入面。

外面九萬幾人話「博一博單車變摩托」。講物質回報，係架。就算講非物質回報，我經常都覺得一樣可以咁睇。拿，阿仔就係樣辦。邊會諗到睇準時間都會有差池既遮。

或者又咁，我個世界觀，係大包圍既。就算一粒塵跌落地，我都可以諗得一餐，睇下呢粒塵可唔可以同阿女果日碌左兩級樓梯做比較呢？

我又曉得計劃將來，諗下一旦比人兜左，渣的士會唔會撞車兼賠錢呢？或者過兩年年老色衰靠唔到塊面搵食既時候，我應唔應該去磨皮兼去斑呢？又或者昃下自己仲係咪有心有力，整多件細佬妹比阿仔？

我知道，我得，你一定比我更得，頂，淨睇外表都贏我開巷啦。之但我家陣贏你既，其一係我博得多過你，其二係最後埋單計數，「輸」既次數多過你，而我，就係響度博大大老闆，會照顧果位黎緊會輸得好很甘既我。

大人節目

2010-08-03T00:28:00.001+08:00

私人節目

最近有位仁兄又liu 起我一段Alfred Adler既名言：We are not influenced by the facts, but by our interpretation of the facts. 佢問左我一堆問題，一堆好含糊但查實又毫不含糊既問題。

個問題係，查實乜野證明到我地依家處身響reality，而唔係響 dream? 好有 Inception 同Matric feel? 諗諗下應該有一套仲經典：《叮噹》。（查實我心目中仲有一套冷門更加深刻，但完全唔記得個戲名，要花時間搵下..... 弊！唔知會唔會係《The twilight zone》其中一集呢？！）

再講.... 不過下次講，唔會touch 到dream 或者reality。一定唔會。

大人節目 I

今年第一次去書展，起初以見識同碰運氣心態，睇下有冇合適書本比阿女阿仔睇，點知...too many trees too little time。

食飯果史阿邊個同我講，話書展人山人海，好多香港人都係趁墟心態囉。丫well，神經反射話唔同意，再細想都有可能既。不過我硬係覺得，最主要原因係香港人「窮」囉，買書等減價兼大手掃貨，仲唔係窮？.... 之又諗真d，窮未必最真，但書肯定係太「貴」囉。

同阿邊個講講下，覺得有d唔妥。佢話，如果書展繼續叫「展」，咁年年個話題都應該幾豐富囉。

大人節目 II

響書展淨係去左兒童天地，都未行曬，原想去睇成人書，搵番本《馮象譯本》都無機會，你話，係咪逆權侵佔reality 版丫。

大人節目 III

阿米真係明智，唔去逼，之前仲有兩手準備，去左航天城。咿，我對腳痛到死呀仲。

我又諗，如果想小朋友可以接觸下小動物，係咪應該試下買一隻羊或者龜番屋企私養做寵物，定係洗多少銀兩帶佢地去外國既野生動物園實際d呢？

大人節目 IV

午飯跟同事閒談，講起幾位朋友點為子女勞心勞力。同事講開佢另外兩三位朋友響子女教育上面有分歧，一個既宗旨係全方位，另一個就是是但但。佢覺得，各有各好，不過太計較結果就唔係太好。跟住唔知點樣扯到去我兩件化骨龍，話我是但得黎太計較... 總之百詞莫辨。

是但喇，總之我話咁就咁！

施家孩子的憂患意識

2010-07-29T20:57:00.004+08:00

都是側田~~惹的禍害的苦帶的挈~~迎的福。早晚要給他撰鱔稿一則道一萬個謝。

鄙人施庵春同樣姓施，相比施四面先生有若螻蟻（特指身家貨底）。

有謂一動不如一靜，無事出街小破財，閒暇與家中老少近到街口公園，遠至市區海濱，偶爾望海興嘆，已經萬幸萬福。帶孩子們外遊，不是沒有這個奢望，只以螻蟻家庭各人現時之狀況，幾近不可能。可是，財力不遞，只佔很少部分緣由。

施先生今趟自認孩子的憂患意識薄弱，源自自身。帶他們外出旅遊，幾等我輩抱女踢拖落街到街角便利店，享片刻自由奔放。

有街坊（各位正屬施庵春鍾愛者）評施先生毫不客氣，衷心直說。雖所言甚是，卻又給我添兩分遐想。

家長的「問題」呢，固然是對的，不會有錯。施某看「這個問題」多年，這個絕對不會錯（自滿語氣與張五常教授揮筆評經濟時可比）。另一方面讓我想到的，卻不是這個問題 problem，而是一個問題question --- 究竟問題 problem 是家長們沒有省察自己的過分放縱，還是家長們沒有省察自己的入木三分？

嗄。施某的意思是，施家孩子沉醉安逸，相信施先生是有深刻省察過的，也正是先生以筆懺悔的企圖，因為正是職場以至人生的無為而治，讓施家孩子感受不到憂患。因為生活太舒適，世界太怡人，歐洲太風情，日本太豐富，所以體會不到憂患，也就體會不到父母希望遺傳給孩子的憂患。

對。憂患，即這個需要正視的問題 issue。也回到這個問題。

父母一窮二白，身邊社會的富裕與生存的壓力，就是孩子憂患的來源。孩子就是通過憂患，學會解決自己在憂患的不安，例如肩負責任。或許這一方面，正是施先生的所思所想。

施某也是一窮二白，卻很奇怪，孩子心態還很充滿安逸，或許年紀還小，所以尚未察覺憂患與責任之間的關連，更看不穿為父帶給他們的社會環境中的憂患，且還竟可對同學們（囂張地）說：「我家的客廳很大呀，你們一起來丫」.... 唯有自我安慰，至少學會好客之道，有進步。唉，無論或子或女，窮養定，沒它法了。

顯然，施某並不滿足於培養好客之道，更想他們歷驗憂患，或流放他們於茫茫超市中，或送他們汪洋邊踩水，總之不斷以折磨漠視驚嚇欺騙及橫蠻無理等方式，製造人工憂患。

這就是我等家長窮時絕時懶理社會有否憂患時的內展課程。然則，相信中產上產父母對於這些人工憂患其實該也似曾相識。

對了。孩子們一歲遊戲班，兩歲游泳小精英，三歲野外體驗行，四歲德蘭修女之旅，五歲解放軍不吃人間煙火營...... 十二歲暑期工，十五歲送到山旮旯名校留學，都同樣是創造憂患的最佳實踐。

試問，誰個家長的問題，都不是圍繞這個「憂患」而活呢？（.... 還是，這「家長」二字，只會跟父親男士扯著辦？）

觀心神功

2010-07-28T19:40:00.005+08:00

（以下資料由廣告商提供）

貴為亂泣派睇相幫掌門，眼見世道不彰，人心慌亂，決定求其拎某畫作一幅藉以介紹本派得意神功《看圖觀心》。本派乃非牟利謀人組織，旨在尋獲有緣人得承救世神功，搭救眾生，一切願者上釣。獲受神功者毋須任何費用，運吉白撞踩場者請埋便。

《看圖觀心第一訣》——

《一家四口狀甚溫馨圖》

心訣註解：

左方鬍鬚核突之徒明顯四口之領頭男，水桶身形暗示胸無城府直腸直肚，King Kong面型配不對稱黑框眼鏡透露其剛陽不足鹹濕有餘之陰暗面。

中間上窄下闊者表示三扒兩撥肚滿腸肥容易受擺佈，目光呆滯精神死撐強裝愉快之色，乃璀璨歲月遭無情摧殘卻仍懞然不知之表徵。右手不見與男緊握卻兩拳相向，明顯表示素有嫌隙明爭暗鬥。左手與妙齡女十指緊扣與兩拳相向互相輝映。

右方長睫毛少女頸長無肉表示偏食，頸幼若此仍大頭企穩表明硬頸容易動氣。左手緊握其勢見重量級左鉤拳全力一擊，敵我意識強烈，長髮邊陲略遮蓋其左之懵懂女子屬強者食住父母之兆。

四位一體見鬍鬚佬靠前懞婆置中惡女殿後位位笑容可掬，進可攻退可守笑裏藏刀戰陣也。

若有緣嘗問一男兩女四位何來，足証施主骨骼精奇玄女下凡或販夫得道，可喜可喜，必為觀心神功命中注定傳人。所謂四位之正解，見身懷六甲吸吸呼者是也。又曰施主審多左誤以為五位將來者，縱合神功奈何有走火入魔之險矣。

通理心訣後，請覆函附上撲滿利是乙封連手續費大牛乙張，寄施庵春謀人心靈之家，以便代有緣人轉達亂泣派睇相幫掌門遙距上網發功助貴客消災解難。

閑思搐言

2010-07-26T14:46:00.008+08:00

久不久就會有野發生打亂思緒。

多元情感

黑人tweet：「原諒佢」呢句說話真係有千鈞之重。

「當一聽到新聞報導，我第一個想起嘅就係果個父親。」

Control geek

如果唔係涉及「責任」，我多少可以隨遇而安。之但，不明確責任多如繁星，所以周時都會庸人自擾。

老頂個老頂同我傾偈，話會盡力挽留我。我同佢講「隨遇而安啦，船到橋頭自然直。」

我成日都唔明白自己究竟講乜春。

Control ... freaked

友人給了我們short notice，瞬間誕下麟兒。（語病語病）那天，眾同樂。

那天之後，媽媽卻在精神上感到極度不適，朋友忙亂近慌，唯有務實務虛，雙管齊下。要若即若離，當父母的難為。

冀早日渡過難關。

又一個理論

由小孩們所建立的體制。

巴士班次少左，可以減少污染？

唔係逆向思想，純粹擦槍走火（見左丁山）。

... 看到Melbourne 以及世界其他城市疏落的公共交通班次，可能反而驅使更多市民自駕，從而令污染向另一個方向失控... 我越來越覺得，（社會）解決空氣污染的時候，隨時進退失據。

著跡

燈要放響檯面，定係檯底？

燈，梗係要放檯面啦。但咁唔係樣樣野都係燈黎嘛。可以係燈油、棉芯、威士，或者係餅碎、麥穗，甚至係吹到好大好大，但越吹越令盞燈更光既風。

**************

（後補）

事不關己 (2)

呃，突然記得兩件事，浮光掠影。

1. 書展禁肉模

淨係曉得拆開兩部分，民意、文化。然後好負面咁睇。

文化，等於虛偽文化，肉模登堂入室，係社會自己裸黎，求仁得仁。

民意，理得佢係乜文化，總之阿媽女人家長話唔得。（家長既上街示威機會會唔會比求仁得仁既大？）

咁決策者查實應該base on 咩黎決定俾咩人入場參展呢？

2. 廣人捍衛廣東話

嗯... 查實我第一個反應係，超，捍衛咩遮。除左滅族或者種族清洗，語言唔係話殺就殺嫁，你估一把刀捅落去就可以殺左語言咩？（所以局內人，查實係諗緊其他野；而心水清既外人，就擔心其他野...）

又咁，有冇睇過果套《Windtalkers》？語言有價值，就自然有人捍衛（或利用）佢。如果無價值，唔洗捍衛都會比人唾棄。

捍衛肉模文化！

事不關己

2010-07-23T16:38:00.003+08:00

似事不關己，也未必。

或許只是沒有想過關己什麼事罷了。

遠在它方，近在咫尺，竟可以同樣絞心。

務虛行動派

2010-07-22T19:03:00.007+08:00

有些人，如我，總是不會顧及禮儀和身份的。隨便走進人的家指指點點，或看見你的衣著便評頭品足。

這正是教人尊重的務實反面教材。不過，也正是務虛行動派的正面教材。

務實可以分真務實，也可以分假務實。真務實降龍十八掌，假務實花拳繡腿。務虛亦可以分真假。真務虛淩波微步，假務虛神龍見首不見尾。

C.M.曾為務虛行動派入室弟子，喜以似是而非誤導群眾，每以習非成是誤導自己。沉溺多年之後，那招是實招，那招是虛招，連自己都已經搞不清楚了。

事實上，這名入室弟子剛剛被踢出師門，暫且束髮成為務實行動派之俗家弟子，懞然不知何時會再被逐新師門。

***********

圖窮匕見

人窮志短，亦會發窮惡。所以我好惡～～～心情，焦躁，笑裏，藏刀，想炒，我，唯一下屬，姓老，名細，之魷魚。

***********

時窮節現

勞苦愁煩多的是，就算 Ung 複雜的事情或人際關係，抓緊一兩個基本原則，大多已經可以應付過來。

原則一：務虛是連鎖式作用與反作用力反應，不是推與被推。
原則二：務實是意志力與行動力的結合，是實踐與嘗試。

基本原則一：時窮節乃現，要定睛看清什麼時，會現什麼節。
基本原則二：不再算自己窮與富，只算自己有節還是無節。

***********

假如還應付不過來，只因自己在務實與務虛之間徘徊。

本文，謹送吾胞弟。

大浪西灣

2010-07-19T20:13:00.003+08:00

C.M.個facebook荒廢甚久。

好日唔會入去，今日摏入去竟然見到小蛛同Tommy 加入左《強烈譴責魯連城破壞大浪西灣自然景觀生態, 要求立即停止有關建築工程！》群組。

裝下咩事，再睇埋新聞片段，真係 Kor Lao Yeah！

仲應承左家中老少搵日去試下沙粉磨面，爽過淺水灣粗沙攙腳板底。100萬個頂！

*************

有冇其他野可以做？仇富會唔會令自己舒服d？某行政會議成員有冇表態？起哄去大浪西灣會唔會令到白沙變黑沙？媽叉政府官商勾結定媽叉議員監督不力好？樣樣做齊爆粗阿女會唔會有樣學樣？

... 理得阿女係咪有樣學樣，就算乜都唔做，爆句粗都要～～～我di....

（講左喇，冇寫出黎之嘛）

談判再培訓

2010-07-19T05:16:00.000+08:00

小羊憤怒的逃了。

老練的豺狼伺機行事。

羊：「唔啋你呀！」

狼：（唔啋咪唔啋囉，又唔係第一次，嘿）安坐梳化。

羊：「唔准入廚房！」

狼：（嘿）竊笑。

羊：「你地全部都唔准入廚房！」

狼：（嘿嘿）大安主義。

羊：「你地全部都唔准入廚房！」

狼：（嘿嘿嘿，有冇講第二句呀...）豺狼外張內弛，亦步亦趨，啟動談判程序。

羊：「你地唔好行埋黎！」

狼：（嘿，竟然有新意喎）

羊：「你地唔好行埋黎，唔係我就跳落去！」

狼：（！！！）（！！！）張弛不定！

羊：「你地唔好行埋黎，唔係我就跳落水！」雙手推門

狼：（！！！）（聽真d 先，唔好驚住...）豺狼穩住心神，再跟羊媽吱吱噚吱吱噚。

羊：「你地唔好行埋黎，唔係我就跳落水！」雙手推門

狼：「拿，開門先啦，爸爸唔會鬧你」有人開始失去方寸，打亂章。

羊：「你地唔好行埋黎，唔係我就跳落水！」繼續雙手推門（唔鬧？信你至奇！）

狼：「拿，乖，不如開門先，媽媽想入廚房呀。」（這部分屬於談判程序嗎？）

羊：「你地唔好行埋黎，唔係我就跳... 落水！」繼續雙手推門，開始甩字

狼：「乖，爸爸依家入黎.... 唔好推門住，會夾親爸爸架....」慢慢接近疑犯受害人，準備賺門~~嘭嘭嘭~~安撫工作

羊：「都話唔好行埋黎咯，我會跳落水！」小手似乎無力，開始放軟

狼：「真架，爸爸唔會鬧你，比爸爸入黎先...」（成功奪進門）

羊：「哼！我係唔會啋你格！」餘怒未消～

狼：（... 唉，今次一定唔會同你計較...）

羊：「哼！」繼續發佢個脾四。

狼：「阿女牙，頭先講咩話？講多一次比爸爸聽？」豺狼半跪，套取羊女機密

羊：「哼！」談判破裂？

老狼緊抱羊女十餘秒，坐下，驚魂未定。

羊：「Hum! 」變調，屬軟化跡象

狼：「乖啦，你講多次你頭先講乜啦～」外表輕鬆，外弛內張

羊：「Errrr.... 『唔好開門』？」表現輕鬆，卻眉頭稍緊... 一樣外弛內張？

狼：「係喎，你有講喎，仲有呢？」

羊：「Errrr.... 『乖』？」

狼：「都係，不過仲有冇呀？」（patient.... patient....）

羊：「Errrr.... 」

狼：「呢～你係咪話跳落.... 水？」

羊：「Errrr.... 係。」誠惶誠恐

狼：「哦？原來你想游水牙？」

羊：「係！我地走走走，跟住剷起 d沙，然後用 d沙堆堆堆.... （下刪數十火星用語）！」

狼：「好好好，不如咁啦，下次如果Da Da又推住道門咁要講咩呀？」

羊：「.... 對唔住。」

狼：「都係。咁啦，下次如果你唔想俾爸爸媽媽入廚房，你可以話..... 『你地唔好行埋黎，唔係我就... 食曬 d雪糕！』」

羊：「！」瞪大雙眼。

狼：「又或者話....『食曬 d 提子！』」

羊：「哈哈哈，食曬 d 雪糕呀.... 食曬 d 提子呀.... 哈哈哈哈.... 唔係我就.... 哈哈哈哈.... 食曬d .... 食曬d ....」

狼：「益力多！」

羊：「哈哈哈，唔係我就飲曬 d益力多... 哈哈哈哈.... （再下刪數十亢奮宣言）」

事情的一面

2010-07-17T23:20:00.003+08:00

人生總有些疑問，是不該太在乎有幾多面。

騎單車人車合一，就要形神體三合一，及或要腦手腳三合一，及或眼觸耳三合一，及或... 掌握好一面兩面多面，都不一定會騎得好單車。

性開放，跟騎單車帶著同樣疑問。

唔食翅，鯊魚會死少d？

2010-07-14T00:44:00.001+08:00

如果呢條係辯題，究竟有幾多人會話「唔係」呢？

前排，有人講左一番咁既說話...

香港人高叫唔食魚翅，咁d鯊魚係咪真係會死小d？

短期既答案：唔係

因為產業鏈既關係，理論上少左人食翅，d 翅會平左，咁響南美呀之類出緊海用殘忍方法（即只係切左佢地d 鰭，然後掉番落海由得佢地典典下餓死）殺緊鯊魚既窮漁民們，唯有再努力d，殺多兩條鯊魚，先可以維持番佢地之前一樣咁既生計

有冇可能會因為香港人嗌下口號，就真係會所有人都唔食鯊魚？而除非你可以做得到真係令所有人都唔食（但現實上係冇可能），否則個問題係冇解決到。

又，再諗番轉頭既，其實好多人反對既唔係「食鯊魚」，而係頭先講既捕臘方法──咁反而係咪諗下用咩方法去幫啲漁民改善佢地生活先，再搵方法規管捉鯊魚既方法... 我都明白以上講既亦都係紙上談兵... 但就算揾唔到solution，都起碼要諗到咁既層面，而唔係一味覺得嗌口號就可以救到鯊魚... 或更甚咁，一見其他人食鯊魚，就指住人去鬧...

因為咁樣，對件事（即係救鯊魚）根本無幫助，甚至，會好心做壞事。

.... （好似）而家藍鯨吞拿魚就泥絕種啦，按道理d 漁民夠冇理由要再大量捉，令自己第二時冇魚捉啦！但而家個現實就係因為d 藍鯨吞拿越少，所以d人反而越努力去捉，連dBB魚都唔放過。

唔好忘記，人永遠係短視既。短期頂得到而又方便既solution永遠都係最受歡迎... 哪怕長期其實係有害...

飲鴆止渴自古已有

丫well，講完，梗係比人圍喇（拿，邊個覺得抵死，就出黎隻楸！）。

若果唔想人地食魚翅，大部分原因係可能係純粹覺得殘忍，切曬d 魚鰭就掉左一條仲痛緊又血淋淋兼且唔會對人構成威脅既生物落海。又有部分原因，係覺得（過分捕獵）「無謂」、「浪費（生命）」、「打亂生態」（此三點總和統稱叫「環保」）。

查實，採鑽石呢？

邏輯呢家野好蝦人，你話丫，「1+1=2」呢個叫邏輯，「增加貨幣供應會導致通漲」呢個又叫邏輯，「一隻蝴蝶響南美比隻麻雀追瘦可以增加澳洲人性行為帶黎既歡愉」呢個都叫邏輯喎。

而咁arm 我記起一年前講左番咁既說話，就證實左比自己聽，縱使受過教育，都一樣可以好唔理性。

呢，講返香港呢度丫，膠袋稅唔通真係可以減少塑膠產量咩？（我諗講完呢句，加上一日一鋪屎，應該唔會比人圍，卦）

散戶看國企保險股

2010-07-13T14:02:00.001+08:00

琴晚睇夜間新聞表示，「中國保監擬將傳統壽險預定利率市場化」。幾隻保險股顯著下跌。

然後有財經評論員話，「市場反應過敏」並認為「放寬制訂（保證回報）利率，可以擴大市場份額，抵消因利率（因競爭）上升所增加的成本」。

作為一個無買保險股既明燈散戶，最大興趣係，呢個消息，究竟可以令保險股下跌幾多，然後可以趁低吸納？

係咪應該聽班財經評論員/演員講，短期股價仍然會受壓，但中長期對呢堆公司影響不大？

如果比我呢個散戶睇，第一感覺唔係「市場反應」係咪過敏，亦唔係某某公司總裁話對收入影響不大，而係，中國保監「點解要放寬」？

原因我只得一個：「外資對手太強，亦越來越強」。

基於呢個（明燈得出黎既）原因，我諗我唔會沾手國企保險股。又，竟然響呢度講股票，我真係黐左線。

（哎吔，我仲未講鯊魚同埋agnostic 添）