荒蕪

為免此泊落得過分荒涼，惟有到此一遊。

1. 股票有關事宜只適宜圍內傳，悲
2. 與個人情緒心情操守德行有關事宜，只於Twitter抒發
3. 其他有關雜事瑣事緊要事，公事公辦，或私事公辦

C.M. 題

係唔係... 路？

某圈講到民主與精英。

我唔知係咪自己搞唔清楚，定係真係有咁既可能：無論精英主義，定係所謂既平庸民主主義，最終都係要問番究竟想點，同埋個環境究竟可以造就到咩既政制。

如果個環境係適合養懶人既，就出現平庸民主，如果適合自立更新既，就出現民主精英制。平庸例子，可能好似菲律賓，由全亞GDP第一，到依家只講happy 唔happy；精英既話，就係美國。

唔民主，唔代表佢係精英制，好似家陣呢個情況，呢pk鷹算乜卵精英？佢個班底，邊個曉得好似以前咁打得，咁有說服力？

反而成個建制最輝煌時代，我相信係曾蔭權。佢年代既缺點，不贅。

民主，並唔係與精英敵對。如香港偏地皆精英，外國人也好，內地人也好，如果接受到「自由」既真正概念 -- 自身自由，亦賦予他人自由，佢地就自自然有開放既心靈去接受新事物。如果不斷追求新知識，不斷學習，就係一個精英社會必然要求，咁香港既文化，就絕對係孕育自由與精英既土壤。

亦因為咁，未充分體現自由價值既人，就正正係香港精英制度既敵人。


黃之鋒。

某程度上，我認同話，我呢d老餅比較迂腐，唔能夠理解黃之鋒突然呼籲進入公民廣場既理據。如果一個行動係令到同行者或者支持者感到錯愕的話，我好希望佢呢個決定，同我一向perceive佢所秉持既價值及手段仍然一致。我一向覺得，學民係「思潮」，係凝聚共識，係促進互相理解。沉不住氣又好，改變方針又好，正式表態又好，不再以筆、以話、以文、以理、以堅定既心，以靜制動，反以動制靜。咁就正正落入圈套，令所謂既邪惡預言一一實現。

我如果係呢個政府既話，我就係等你呢刻好耐嘞。


Hong Kong 碎拾

九幾年前，Virginia 唔再叫維珍尼亞，改叫弗吉尼亞。九幾年後，Trans-拼音後既Hong Kong，會叫「紅」「孔」。

早梁有特首之名，卻無「領導」「特區」之實。今李有教授之名，卻無「教」「授」之實。

於今再推孔子之君上臣下。目的，唔係蠢蘋果報所講既還債，而係順水推舟。蠢蘋果報，講政治，唔該就留意d 啦。呢個環境，係講道理，強化價值既時候，淨係以情緒字眼標題立論，只會令溫和派窒息，令人有機可趁。跪求你唔好再蠢落去。

路，係自己揀既。

越對前景悲觀，就越反抗現實

響紙扎工廠新職做左一段日子嘞，蠢仔如我，雖然技術上仲有好多改善空間，但總算掌握到一d 獨特竅門。不過公司唔係咁諗。

我明既，向來唔係一個識得同人表達，繼而爭取既人，只係一廂情願期望公司會開眼，睇到自己既實際貢獻。唉，做人治做到咁白痴，唔怪得自己一直咁兜踎。

上年老闆同我講，人人都話我勤力，係一個優點。我蠢，唔識反駁。我攰，無心情同佢理論。做左咁耐都只睇到我夠勤力，坦白講，即係我做唔出成績俾你睇啦。OK，我明，咁唔好預我繼續幫你，後會有期啦。

雖則最後呢兩句，我未講開口。我只係話，若果我既工作量都係維持咁既水平既話，你唔好期望我能夠改善到我既表現。

我個人好易氹既遮，你講一句好聽既說話，我同你免費做一年都得。但家下咁既情況，係我再冇心情同你打工。唔似我性格，我竟然覺得唔甘心。事緣最近終於有機會睇番人地點樣話我勤力。

查實勤力根本唔係同事接受（先唔講叫欣賞）我既重點。每個同事對我都有個評價，但偏偏老闆睇唔到，不論刻意定無心，我有小小著燈。

對於前途，縱使我仲要開飯，但我對錢唔係咁著緊（...正白痴），我反而著重自己既滿足感 -- 呢個滿足感決定左我既能力去到邊，間接決定我既市場價值。而老闆如果你繼續咁睇我，我一係同你講你查實應該要點點點睇我先啱，一係，我以行動證明你睇我唔同意你既觀點。

後者，係蠢而缺乏勇氣既一步，而我，亦以呢一步為我傾向採用既一步。雖則我真係唔捨得我班同事。只係，機會來臨，唔係俾我，而係俾老闆 -- 我同人治部講左我好討厭老闆對於我勤力既睇法。中間發生咩唔講落去嘞，最後係老闆既開明令我動容，佢可以呢個高位，呢個attribute 絕對有關。唔理佢真開明定假惺惺，我信佢係前者。而起碼，佢採取左少少行動去打消左我它去既念頭，暫時。

工廠裏面，我只係希望盡本分，所得成績雖未話可以歸某一個人功勞，但全體功勞真係有目共睹，不能否定。勤力又好，努力又好，工廠冇合理回報，冇合理回應，響我字典，就係唔認同你。商業社會，你唔認同我，唔係留低爭取公司認同（以加人工作為商業社會所為認同既標準），就係離開去爭取其他公司認同。嗯... 我呢個諗法，應該唔會好偏激哦可~~

*********************

呢段日子我好懊惱，以前日日blog，家陣bi-annual 一獲。Miss左好多野。唔去判斷係咪大是大非，只係如果要過得人，就一定要過得自己，冇勇氣爭取，但又冇能力離開，咁要點揀？我既情況，咪硬食囉。

我算好彩，老闆開明，唔洗硬食，否則日日做到冇停手，又要自稱奴才前奴才後。

但對唔住，我對另一個現實就真係好反感，反感既唔係做奴才，如果你係康熙，我做奴才心甘情願。不過人地唔係呢，仲要當正你係奴才咁洗，講曬大話之餘，仲話你唔務實唔理性。你仆街啦。

我反抗現實。

*********************

又，唔通CK 嫌棄我（地）？所以落閘封鋪？

一亂就寫，一寫就...

一寫就點？我都唔知。都係亂卦。

背景：

我呢個人亂呢，不外乎因為自尊心受創啦（不過復原都快）、感情生活空虛啦（但唔會苦悶）、瞻前顧後船頭驚鬼啦（嗯，呢個死症）。十之八九，都係心理或者上唔夠穩定，心虛之故也。

人物：

幾乎可以肯定我係一個自尊心超強既人，經常以工作成效黎判斷自己既存在價值。前排復活節同近呢幾日，原本打算響假期時段幫補下，清理下d雜碎，等返工日子可以專心打仗打真軍打大佬，點知係要等假期先黎病（嬲！）... is it a sign？ 「如果唔想過勞死，唔該主日返教會」

地點：

響紙扎工廠坐呢個低微既中層職位，我自問唔曉做到平常心。好似剛剛收到email，有個熟客叫我聽日打俾佢...。喜者，起碼有人信任你，假期都要搵你。亂者，連客假期都搵你，證明呢行幾大壓力。亂呀，煩呀，今日明日昨日乜日，多煩憂呀。

時間：

特選客戶交左個偉大（or浩大）既工程俾我，某程度上係佢地自己既事，但另一個方面睇，查實又完全可以係我地紙扎工廠既事 -- 差在我地唔做，最多係我地不該，但唔代表我地有責任。關鍵係，呢個係「特選客戶」。正因為佢呢個頭銜，我又一次失曬方寸。在公在私，我都要死頂落去。轉頭我就要將個工程進度通報俾全港十八區，然後有料爆料，有鑊爆鑊。病住放假仲要有心理準備返到公司俾人插，本人既（低）抗逆能力可見一斑。

如某日各人治部尊貴慿此（或慿這慿那）認出小弟的話，reject 前切莫告知原因，以保小的自尊心也。（求下你啦~）

人物：

如果紙扎工廠係我靈魂深處一切罪惡既源頭，或者貼切d講，催化劑，我會好坦白承認，我已經將半個靈魂出賣左。但又好奇怪，點解出賣靈魂（以及肉體、精神）都只係得雞碎咁多？係咪因為我出賣得唔夠徹底？定係響呢個香港地，出賣一切只夠換黎最低工資多d d？所以我已經算幾幸福，連業主第二次加租20%以上都仲頂得住？

背景：

香港政治環境係咪叫亂呢？如果係，亂既定義係咩呢？自由行之所以叫「恩惠」，頂多只係當年政府安慰人心之詞。查實，邊個國家響開放既途中，會繼續壓制人民自由出入境既需要？開放自由行，只不過配合國策，根本無所謂恩惠之含義。

無啦啦扯到呢樣做乜？Well，之所以「亂」，咪因為唔連貫遮。之但依家香港發生緊既各樣「政治亂事」，睇落其實有跡可尋，既然如此，何亂之有？

地點：

頻頻病，都係時候要全面檢查一下有冇暗疾。睇番成套銃夢Last Order，先發覺原來套野仲未寫完！剃刀陽子返緊去火星尋根，咁Chi Ming幾時先同阿雪有個了斷呢？唉，我夢想既自由天地，響邊庶呢~

其情如斯

呢年大部分人都應該其獨特既經歷，而我就同少部分人一樣，都係平凡過平凡。老死轉職既故事，似電視編劇堆砌安排；同事既愛情故事曲折離奇；朋友感情生活離譜過當年《XX夜中環》；又有人大起大落，未知來年上太空定跳懸崖。而本人呢年九成九時間，就屈響公司精修葵花寶典。

自左宮都唔知為乜。

前十一個月既時間，如夢。當然如果好似Sucker Punch 個過程咁刺激壯烈固然好啦，可惜日日做到無停手既結局，只係同呢套戲個結局一樣，個腦開完刀之後成個人癡癡呆呆。（題外話，套戲除左個女主角，個個女配角都好索好省鏡）

迷迷糊糊，十二月趁亂獨自去左Bangkok一趟。聞者都話紅色警示喎，保險唔包喎，連報紙個乜乜泰國通都叫人唔好去喎，同廠既BCG Cash Cow 部主管都話取消左曼谷最高機密會議喎，諸如此類。（第二次題外話，冇錯，我仲響紙扎工廠度做，OT情況有如狐狸康）

心諗，錢唔係你自己出，你梗係可以苦口婆心啦，家陣機票買埋，酒店俾埋錢，假都安排好，人又壓抑左九年，理得佢係咪打到黎丫。何況，泰王生日後，乜momentum都化煙啦；七一都淨係港島北遊行遮，唔會去到旺角十八鄉大拗門har far；個泰國通梗係要政治正確啦，唔通話曼谷歡迎你唔洗劣咁話咩。算。

總之一切都係錢作怪。

查實今次去既景點，我諗去過曼谷既人都全部去過，都係Skytrain沿線，而我呢次第一次BKK之旅，因為去前到埗後都係咳到肺甩咁走馬看花，所以坦白講，唔係太enjoy。如果要enjoy，我諗除左身體健康之外，下次有機會一定要拉埋一眾色途老馬先得。

簡單講下觀感做個記錄。

曼谷太重商業味，無論睇鋪拉客印你落曡，唔會好似臺灣咁真係賓至如歸俾人呃都抵，甚至深圳明買明賣俾人呃就預左咁。或者對呢個城市同人認識唔多啦，又或者我仲係返工mode 未stand down啦。就算有錢，都未必想去曼谷銷金。

武斷形容：Merchantilism。街邊公共垃圾桶唔多個，或者學日本啦；行人道窄而且失修，好d既行人道只係大商場外面見到。反映public representation 或 public spending 唔足夠。得閑真係想研究下佢稅務制度係點。市場表面上算自由，但商家亦似乎壟斷部分主要收入板塊，小市民主要靠飲食業或雜貨零售或替大企業體系打工為主。專業服務呢... 唔知。但主觀上市民尚算 happy....。算，記錄完畢，嗶~

講講下令我突然覺得有d不安，醒起 Chatuchak Market。呢度好熱鬧，實情係太熱鬧。雖則只係weekend market，但安全隱患甚多（好似好大陸字眼，借問有冇港/廣府用字？），對於火災或人流管制似乎毫無準備，烏鴉嘴講句，萬一起火、恐慌.....。

又，有一件事不能不記錄，就係我有三次買野找錢，竟然唱少10 baht俾我，有兩次仲係響Skytrain票務處唱！我check下，問佢好似唱少左佢（地）先至俾番10 baht我。唔係化！（唔好批評我個樣，反面架！）可能我冇準備連曼谷都係咁，所以好難放開懷抱去享受呢個難得假期。唉，番深圳好過啦。

又又，唔好盡信Google Map！佢累我原先搭啱車，跟住搭錯車，最後要搭的士先去到酒店，錯得太離譜。正PK！枉我幾乎自認Goo粉！OK OK，係我錯囉，得未？

又又又，最大得著可能係令自己反省下，咩叫歧視。或者咁，未見過，未見識過，未認識過，的確會令人恐乜恐物。響香港只係見過男+女、女+女、男+男；到泰國再見到老外男+嫩泰男、男+人妖、女+人妖，等等等等。突然間覺得自己好似開竅咁。如果政府或平機會或某某組織推動性別歧視條例或鼓勵市民接納不同性取向人士，認真建議設立旅遊基金，資助港人去泰國觀摩、認識、理解甚至研究性、性關係、性倫理、性工業...。特此建議，下屆參選特首者可考慮納入其政綱。

第三次題外話：Pattaya 即日來回半日遊。嗯...... 唔多啱小朋友玩，海灘唔夠靚，垃圾又多。Well....

小總結，曼谷可以係成年人既樂園，芭提雅可以係成年男士既樂園（哎呀，臨走前先見到大大招牌寫住有body massage.... 唔該下屆特首認真諗下我個提議）。帶小朋友的話，可能去布吉、華欣、Samui等較好。

中短期，如非公務，都未必會再去泰國（有豬朋狗友帶路例外）。至於下年，講講下又快到2014年，無啦啦返工mode 唔知點解switched on 左，聽日之後既聽日，平凡既日子又再開始。

祝大家來年多姿多彩。

廢人紀事

...然則關人卵事

幾個字

選舉前，對梁英，有四個字評語： 我唔信你。

得選後，對梁英及新政府，三個字： 睇定d。

今日，自覺對於之前呢堆人，實在太真，傢下剩得兩個字： 討厭

又或者係三個字： 好討厭

甚至都係四個字： 好卵討厭


廁talk

廁所向來都係男人面壁思過既好地方。無啦啦問自己點解，點解唔可以得失朋友，但又可以得失大大老闆？點解唔可以對唔住老婆，但又可以得失大大老闆？點解唔可以欠人一個幾毫，但又可以欠大大老闆幾噸感情債？


好頽廢

連續大半年每個星期六七日每日十幾個鐘既營營役役生涯，冇嗮以往燈紅酒綠，花天酒地既日子，真係覺得個人好廢。廢到我呢刻查實都係響公司打緊呢幾句廢話。

朋友叫我過檔幫佢，開出條件又算優厚，之但做既唔係自己熟悉果瓣...... 係咪覺得保障唔夠？人大左最大既問題，係咪唔敢唔捨得放膽再博，亦唔想放棄已擁有既野，而從新黎過？

忙啫，但點會唔記得

抱歉，來晚了。

語言仍無味

查實一直都有寫，只係冇貼，亦冇長篇大論，只係碎碎唸。

女友人K話，當我啟動冷眼旁觀 mode 既時候，講野最流暢，最有決斷力。言下之意，我既力量來自「做就有心無力」。亦所以我鍾意睇，多過做。鍾意評論，多過實踐。

忙到癲左，做人就缺乏左方向。做野既時候，就只係記得d client要乜，同事要乜。到得閑既時候，都仲只係記得公司要乜，老闆要乜......至於家人要乜，朋友要乜，自己要乜......線把啦，再得閑d 先諗。

但我又唔係想呻咩喎。我係想話，做宅男真係唔容易。日日匿入自己個空間，見到高登友點評論高皓正，高生絕對比高登高，高主教之名當之無愧。只係想勉勵高生一句，同凡人講道，唔好用方言。凡人唔理解既，就算你道理再響，都只係掃羅旁邊既人聽到既雷響。WWJD，唔係齋得 interventionism。雖則我唔排除，你可能係先知。

老實講，我完全唔想去承認人世有幾醜惡。寧願奢望上帝繼續忍受我地，比機會我地。亦但願我唔係試探佢。

那邊廂，普選已經開始捲起議論，無論係梁文道講既「敵人．權力」論，定係喬曉陽講既「不能對抗」論，抑或真普聯講既「談判」論，對一介宅男亦即準備轉行 jar 的士既我，都太理論化啦。係人都知我份人最L 憎理論，對於我地能唔能夠普選到一位正正常常既特首出黎，擔心呢樣影響大局，擔心果樣令國內風雲變色，都只不過係企響自以為國人好脆弱既角度去諗。一國兩制咁叉多年，固然有國人仍然好脆弱，但唔該佢地仲比你地呢班憂國憂民既強，起碼唔係淨靠把口搵食呀。

如果一個政府，一個機構，一個authority淨係靠把口，捉字蚤，玩斷章取義呢套既話，結果係點，查實同做人交友做老闆當下屬無分別。

後知後覺，逢星期日既蘋果副刊，向來都係一堆文學作者既天下。我唔知佢地算唔算文學家丫，不過以一個宅男角度，佢地寫既野係文學......嗯，大概係有種若即若離既感覺。好多時寫既似文學傳記，講下某某生平點點正氣，某某邊件事值得令人回味反思，某某對住邊個名人(or vice versa)可以暗喻點樣雞蛋高牆。成個感覺令我覺得，係咪就係專寫「人」既，就係文人呢？將人性人格人行勾畫到淋漓盡致，以一個理科人既角度，絕對係嘆為觀止，幾乎將humanitarian 與文人等同。亦難怪我等理科人或理性治國者，對文者輕之鄙之侮之。明，我明。

又查實我係偽君子。所以唔返教會，免受批判，所以有意無意比公事纏繞，免受良心譴責。我想安靜一下，掉走一d 垃圾。

等陣，會返公司，覆下依喵。

每每

每每去叫停他人，卻不願去叫停自己。

這就是貪念。

莫言政治

報紙話莫言齋講文學唔講政治，所以乜乜物物。

我心諗，政治一定要係講出口既咩？雖然對莫言既小說完全無興趣，但道聽途說，佢揭露既黑暗面同令人反思既能力，不下班自命清高既所謂學者、政客。莫言如果真係再講報紙所謂既政治，跟手俾人推舉做殉道者，最終損失既唔知會係邊個。

稍歇，稍忙

臺灣

去了臺灣旅行，為的是找回一點點自我。是否真的找到，還看明天。


工作

雖然旅行前超忙，但歸來仍要還債。


狼英？

不提也罷。


歉意

縱使萬分歉疚，無改虛偽品格。講緊我自己，比狼英衰十倍。


活

活得不耐煩。活該。


書

一本《帖木兒之後》，一本《中國歷史》。一定會睇。


歌

一位 Anya Marina，一位 Sara Bareilles。繼續會聽。


誌

經歷越多，越應該寫。不可告人既經歷越多，越應該摺鬼左佢。

漂之白、之泊

CK問：到底學童既真正得益係乜？

呢句野纏繞住我好一陣子。

承上集，如要推行社會主義，就唔需要考慮到究竟學童/用家真正既得益，而只係需要考慮點樣維持社會主義既倫理架構。學童既觀念如果影響到呢個倫理架構，就必須要犧牲學童既得益。要個體為整體犧牲，係我呢個盲毛所摸到既大象。

唔係指引問題，唔係洗唔洗腦問題，唔係國民教育四個字既問題，而係究竟香港呢個社會應該朝住邊個方向行既問題。

香港唔應該行一個，強迫個體為整體犧牲既方向。為整體犧牲，必須要係自願。被逼，邊會有幸福？

之但有人話，交稅夠強迫啦？係....但查實真係咩？如果唔係交稅可以維持法制、可以維持社會運作、可以俾機會你賺錢，你會有機會交稅咩？（呢個肺論早幾個月我都講過咯）

自由珍貴，言論自由珍貴，賺錢自由珍貴，學術自由都一樣珍貴。學術自由係一樣好值得珍惜既野 - 教，要真實，要批判，要警世，要交待，學，先至可以再教。訛傳，並非學術，只係漂白。

曾幾何時，香港推行黑社會洗底計劃，俾人改過自身。真係潔身自愛既，或者可以徹底洗滌心靈。否則，只係表面漂白，純為逃責。香港自由在你噏乜都得，就算上堂幫人漂白都得，亦好自然會有呢種人。既然水清無魚，無謂潔癖上腦。之不過，如果要我積極不干預自己仔女學校既辦學方針既話，無格，用腳投票囉。

一個無左歷史基礎既野史可以獨立成科，仲要成為呢種投票方式既決定性原因，OK，一個政府鍾意多門法定宗教，都幾得意架。所謂無宗教，潛臺詞就係自己係唯一既宗教。

講真，法定宗教既危險性，反宗教人士應該最清楚啦。雖然我有人稱宗教既信仰，但如果政府有日將呢個信仰成為法定宗教既話，我就知道香港會陸沉，唔係死守，就係走頭。人生漂泊如此，談何容易？

教番中史，學番中史啦。人，就自然會留低架勒。歷史，就係「家」之起源。