聖誕交叉Blog 之 ClubEddy聖誕錦囊：Party is King!!

有說聖誕最怕無伴侶，不知何時，這個神聖的節日變了消費節，變了情人節，變了單身孤獨節；戀戀X'Mas，週遭也濔漫著一股浪漫氣氛（細心看卻是古怪的社會現象）。

宅在家有「灰爆」的感覺？
單身感到空虛、寂寞？
金融海嘯令你添煩燥不安？

藉著這次聖誕交叉Blog 2008，ClubEddy送上這篇文章，讓你快樂過聖誕。

===== 我是可愛分隔線 =====

錦囊主題：Party is King!!
目標：一班人聚首一堂，營造歡樂氣氛
裝備：聖誕帽、最愛的衣著、避孕套

Party林林總總，有紫醉金迷的、有情情色色的、有狂歡盡興的，形式可以是三五知己，也可以一大堆陌生人，重點是：一班人！

下面提供一系列給你參考，此文的刊登時間應該已是平安夜或是聖誕正日了，不過不用怕，立刻打開你的電話簿或MSN（Live Messenger），相約幾個同伴，一齊出動。


Club Party
人數：200-數千
推介指數：★★★★★

ClubEddy有名你叫，clubbing當然是放在第一位！Party越多人越好玩，酒精、party music更令人情緒高漲，中環蘭桂芳是ClubEddy首選，各間club都有party，看到一堆人在門口等候的，就走進去試試吧，感覺不好便轉場。記著，抱著獵物的心態會嚇走人，祇要懷著玩樂不羈的心，人家也會happy together，來！擴闊你的生活圈子！


Join-U Party
人數：100-300
推介指數：★★★★

大學生又未曾去過clubbing的話，可以先去Join-U Party暖暖身，與club一樣是partying，且一大群學生，年紀相若，大膽向人say個hi，話題集中在對方的生活、興趣、未來，避免談煩惱、學校、私人事，要認識新朋友，絕無難度。認識到新朋友，可以轉去其它bar再玩！


Karaoke Party
人數：50-100 或 5-20
推介指數：★★★

不敢去面對幾百個陌生人的話，也可以與一班已認識的朋友去玩，最common、最易約人的，應該是卡拉OK吧。除了日常去那些自己人一間房的形式，ClubEddy推薦你去karaoke bar，一大班人那種！若不能接受太多人的話，亦可以去book一間房，就像平日一樣，大唱大喝，戴著聖誕帽交換禮物，總之節日有歡樂便足夠，對嗎？


Game Party
人數：3-10
推介指數：★★★

自認宅宅不外出，又或心裡還未準備好的話，可以找幾個好友到家一聚，打機也可聯誼，玩Wii身體活動一番，又或PS3，也可以是PC game。ClubEddy個人認為，酒，是必須的！嘿嘿...


Movie Party
人數：3-10
推介指數：★★★

原本ClubEddy是想5顆星推薦較大型的home gathering party的，不過1天是不夠時間準備吧。Okay，祇要找到一個主題，就可以是一個party！例如相約幾個朋友到家看電影，調一些配合電影情節的酒，relax、enjoy!!


Internet Party
人數：無限
推介指數：★

ClubEddy不太推薦，不過，太忙、太怕羞、太宅導至不能與外人見面，網上party也不失為辦法。同是天涯淪落人，打開你的web cam，在螢幕前與幾個知己，甚至開個group容納幾千幾萬人，狂灌啤酒，盡訴心中情。

===== 我是可愛分隔線 =====

Party是何物？其實都是一群人，在同一地方，做一件事，體現群體生活之情趣，無論是節日又好，有甚麼喜慶也好，隨便找個理由都可以搞個party，開開心心。

衹要一班好友相聚，不亦樂乎。聖誕沒有愛情，其實沒甚麼大不了，有party，冇lonely！

MERRY CHRISTMAS
AND
HAPPY NEW YEAR!! :-D

休娛期中的片刻胡思

聖誕交叉

第一年叉，老實講，似發癲多 d，嗯... 想寫續集。

聖誕老人

想了很多年聖誕是否只是聖誕老人節，嗯... 今年總算有點眉目了。嗯... 我今年不會抗拒聖誕老人了。因為虛幻與實在，只在乎「心」。

聖誕樹

第一年買聖誕樹。嗯... 買時妙妙，擺時了了。

自由

想了很多「怎樣才算自由」。嗯... 原來我的自由只是表現真我。對，我並不常表現真我。

良知危機

嗯... 看肥醫生吧。

阿女

你要開始需要接觸世界了。嗯... 你的世界，不單只是父母。願你獨立敢言的個性，成為你額上的記認。

阿仔

嗯... 慢慢再跟你說。

休娛期間

十級攰，嗯... 要死撐。

傷心人

嗯... 聖誕快樂

聖誕快樂

祝看到的，都快樂，開心，釋放。嗯...

休娛期

貪念

朝早坐巴士，明明超眼瞓，聽到腳步聲，硬係要睄下係咪靚女。
個袋得十蚊，明明掹掹緊，見到六合彩，硬係要買番注博富貴。

文化改造

一個企業，必定有文化，就算文化係點，都係未來文化（新文化）既基石。改造，唔係 Destruction and Rebuild。文化被破壞左，成個企業就玩完（點解？嘿。）。事後孔明黎睇，王維基最初犯左一個大忌：話亞視「無文化」。

人事

遲下先講返，呢排超忙。

十蚊麵

唔明。早好多個月，甚至兩萬八點果史，食十蚊麵既人排到出門口，呢兩個月斷斷續續食左幾次，越黎越拍烏蠅，係咪d野越黎越難食？定係 d 人越窮越唔想虧待自己？（定係又一次小陽春？）

食物銀行

Recap。

休娛期

大鑊，交叉卜 deadline 到，仲未諗到！今勻變左交差卜添！

假咨詢

小弟開鋪成兩年，你覺得有咩地方需要改善/改變/改革？

Between greatness and me...

前仆後繼

唉，三歲定八十...




看，天各一方...

夜了，潛龍勿用。

仔細看（看啥？）

兩者分別在......

十指緊扣也

忘記開鋪剛好兩年，當時 quote 過 "... the only thing standing between me and greatness is me." 翻查，原來出自 Woody Allen。他也說過 "To love is to suffer..."

我想我要說："I must get moving and I must get suffered."

真我

果晚，與眾樂樂。雖未至於酒池肉林，但總有炒蝦拆蟹。

朋友們並非識於微時，只係偶有聯絡，一年見面一兩次咁大把，甚至有一個，我係初次會面。

席間我口沫橫飛，儀態盡失，有味爛gag 諧音粗口講齊（仲響靚女面前講添），都幾唔正常。

大佬，對你黎講係碎料遮，但平時冇人見過我咁架。就算多年老死同事好友，全部都未見過架。我道貌岸然左咁 Q多年，依家先黎破戒，真係天收囉。

你知喇，我成日覺得自己翩翩君子傢嘛..... 我肯定係比旁邊 d人影響左遮，我本性唔係咁架！

琴日去搭地鐵，心口孭住阿仔，一手拉住個大o急去工展會掃貨。

穿過商場簡直唔止要乾坤大挪移，仲要使出淩波微步。先用左手用力推開玻璃門（clockwise轉），一路推一路轉身，然後背向後行兩部拉個o急穿過道門，再要一秒鐘內逃離現場，否則就會比到玻璃門夾住個o急。好彩今次拉o急，唔係推車仔，如果唔係仲煩。

係咪我樣衰所以冇人幫手拉住道門？！（拿，小心d講野呀...）

嘿，入左地鐵上車勒，竟然冇人讓坐，眼尾睄下個班C9 阿伯後生仔女，全部都目光呆滯。就算我用淩厲既眼神橫掃千軍，個個仲直頭瞓著曬添。可想而知，我呢趟旅程係幾咁愉快。

你話丫...... 若果多幾個我呢亭扮可憐博同情想攞特權既帶子洪郎，嘿，香港仲唔陸沉！

銅鑼灣大丸出閘，冇辦法，梗係要用全個站一千零三個闊閘機喇（另外一個響波斯富街，一個響時代廣場）。

見到個闊閘機前面有個肥佬孭住個大袋，拎定嘟嘟卡準備出閘，佢後面仲有三數個兩袖清風既後生排隊，頂，響執邊（只係一步咁遠）唔洗排隊已經可以出閘喇，做乜鬼要同我地呢亭師叔爭呀，後面仲有個推車仔、推輪椅添！！

拿拿林生平第一次明刀明槍打尖：「你不如用隔離出喇。」。個肥佬窒左窒，唔知發生咩事，就縮一縮讓左俾我嘟先。我仲係孭住阿仔拉住個o急咁打側身插入去架！出左閘望返轉頭，唔理佢地有冇媽叉我，唔理佢地有冇醒覺我發咩癲打咩尖，總之淨係見到佢地仲係排緊隊，唏......

呢d 完全係地鐵公司既錯，點解唔將d 氹氹轉機全部換曬闊閘機呢？

查實最衰都係我，因為我出左閘，都仲響度鬧。

開心可以解決問題？

哈。今日同事話我癲左。

前日曠工嘛，所以今日返到黎就要搞呢搞嚕，跟手仲開會添。哈，原來今日做 chair，拿拿林周圍去搵個魂魄番黎。哈，呢家野真係運氣，又比我搵到。好啦，開會。頂，搞乜要大老闆出埋黎呀，十年都未試過呀，仲撞正係元神都未坐暖自己個位！哈，阿 sir 大力拍我心口叫我唔洗驚喎。大老闆梗係講先喇，之後走架勒。哈，運氣始終係我呢邊。呵呵呵。

喂，等陣，搞乜部腦咩事 login 唔到？唔通大老闆指住空氣講咩。

哈，不如 C.M. 你講先喇。嘩，又玩 twist of pattern？（唔洗講 Eng 門下化...）

曲終人散，個 pattern twists 左不下數次。次次都好似玩針對咁。哈，咪睇你點玩囉。

返埋位，今次瀨野喇，仲要咩隻鑊。哈，最多下次放假醒 d 囉，send 定 reminder 俾阿頂，c.c. 埋俾阿 sir，咁就萬無一失勒。（哈，若果唔成日主動 twist 下自己個 pattern，會好容易會痴線架）

呢幾日見個市升成咁，但又冇錢入貨，一下子心裏面果堆貪念突然間變得好奢侈。哈，返到屋企阿女一路捉住我要我玩番涀泡，佢見到d泡沫爆破果刻，竟然開心卡卡笑。哈。

唔通開心係一種 disruption of pattern？哈，記得果史 NLP 個導師（上左兩堂咁大把）話過，幽默感，就係一種 disruption 勒。（咩係 pattern？中 jackpot question 喎。）

哈，原來 missed expectations 都未必係咁差遮。咦？或者 false hope 都可能係正野黎播..... （你睇，呢亭咪係我既拿手好戲偷換概念囉。）

哈，之所以開心，咪因為發現到新鮮事囉。

原來開心真係可以解決好多問題架。哈哈哈哈。（苦中作樂遮，咪柴台丫）

12. 別人的羈絆

這幾天發生了很多事，使我難以成眠。

獨坐在窗外細想，何解我竟一次又一次成了別人的羈絆？

馬尾女孩那夜跟我把酒，問我能否說清楚我和她的關係。之後，她旋即與一位商場俊傑展開了戀情。大抵，她先前是怕我會為她愁煩而先下手為強。

那天我請心兒吃了一頓山頂料理，席間，我倆，和平，分手。過往雙方共同擁有的一切，各取所需，又或你送我贈的所有，各自留念，又或你虧我欠的全部，都不用本利歸還，哀樂自決。其實也不是完全自決，說自決，此刻，有點那個。我相信，時間和精力還是學習「放手」的必要代價。

兩位阿姐級人馬自海外分公司來港考察，義務接待兼打發悶氣的我，帶了他們往煙花之地購物兼吃喝。過後順道送她們回 International House，順道跟 Saka 說再見，順道送 Meiji 回房，順道坐在床邊閒談公私事，順道喝了半瓶果汁，順道不留痕跡的離開。

這些絆倒別人的日子活得輕描淡寫，沒有多少哀怨，也沒有多少歡樂。只因我也作了繭，整天都在惦念著一個人。

那天起，我開始默默的，寫那《簡史》，想起那首歌。

窗外

在十三樓的窗外，看見女兒和推著嬰兒車的媽媽在團團轉哈哈笑，一番滋味在心頭。

***********

同事 A 話，你睇，小兒科果班細路真係幾叻，應該係尖子班出身。

同事 B 話，咁叻可能經唔起挫折咧，我就唔想我仔女係咁勒。

同事 C 話，唏，查實可能係我地 d 仔女冇人地咁叻，所以唯有要佢經得起挫折遮。

***********

Davout，一位甚得拿破侖寵愛的「鐵元帥」，多次以寡擊眾、背水抗敵。縱使他對波旁皇室恨之入骨乃路人皆見，但仍可以於拿破侖被第二次放逐之後，被復辟的波旁皇室所接納，不但恢復封銜，還受皇室冊封貴族。

Manteuffel，一位二次大戰後期深得希特勒賞識的德國將軍，以統馭裝甲部隊聞名，曾屢次領單兵深入敵後遏止和擊敗蘇軍的攻擊，並於突出部之役初期讓美軍受到重創。二戰後，更獲邀於美國西點軍校任教。

Rommel, 以沙漠之狐揚名，二戰中讓邱吉爾慨嘆，讓英軍肅然起敬，讓巴頓摩拳擦掌的德國元帥。因涉嫌參與暗殺希特勒，被逼服毒自殺。他是唯一一位在納粹戰敗後還立有紀念碑的二戰德國元帥。

中國人之中，there were a few Rommels，但誰個可以 retire like a Davout and be respected like a Manteuffel, by the enemy?

***********

繼續忙，夠變態的我似乎還要讓一把一把的忙碌弄死自己。

進修，為的是取功名，我也不例外。側田說，曾幾何時為了一分半分做生做死捱更抵夜..... 原來我年輕未曾受苦過，如今要還年輕債。此刻我這個年紀，與不同年齡的同學一起上課，純為過關有之，一為神功二為弟子亦有之，為了一分半分做生做死捱更抵夜更不少。一星期讀兩科連考試已經要命，讀三科應該算自掘墳墓了。

望著窗外，為得與失沉吟。

蒸雞翼

好記性既同事知道我鍾意食雞翼，每次中午去飲茶就「幫」我點碟雞翼，南乳煎雞翼、瑞士雞翼、碳燒蜜糖雞翼... 查實我都好少掂... 熱氣不特止，係茶樓食黐立立既雞翼，隨時會食到幾烏where。係，好香口，不過，一聯想返阿媽整果 d 蒸雞翼，就自然會覺得，呢d美味雞翼加工得太多，尤其是淨係覺得塊皮有味，d 肉就寡到呢～ 好似咬擦字膠咁。唔係講笑。

好勒，到我同人講，話我最鍾意食既雞翼其實係要「蒸」既，十個有十個都顯得好愕然。

乜雞翼可以裸黎蒸既咩？（點解唔得？）

會唔會有「雪味」架？（唔覺喎，想冇雪味咪買新鮮雞翼囉... 又可以加少少紹興酒，香d）

蒸雞翼好食咩？（你試過未先...）

有冇「秘」左d 水佢呀？（有時喇，你想秘左佢都得格。）

蒸魚就得遮，蒸雞翼得唔得架？（呢個問題答左你啦...）

蒸雞翼我由細食到大，係阿媽既首本名菜，亦係我最鍾意既葷菜。

阿媽話，用雪藏雞翼得勒，先用鹽腌左佢，腌幾耐隨自己口味喇，唔洗用其他野腌（紹興酒就腌既時候加又得，蒸之前加都得）。一般可以用飯煲蒸，飯滾既時候放腌好既雞翼落去（大概每次八至十二隻左右，太少唔夠我一個人食），飯熟自然可以食得。（鍾意落鑊蒸當然得，咁要自己調教火候勒。）

自己都親自落廚整過三幾次，雖然只有阿媽六七成功力，但試過既人都一致讚好，佢地之後仲會返屋企自己煮添。

雞翼蒸完之後，都會蒸出成碟雞汁，阿媽多數會留返響隻碟道，事關佢知道我地鍾意撈埋d汁送飯，而且，仲可以保持d 雞翼既濕度同溫度，唔會咁快乾搞到黐立立。連汁食真係好惹味。

嗯，我知道就算我話蒸雞翼點好食點好味都好難令你動心架勒，不過咁，我仍然好期待，有日呢個簡單菜色，唔係淨係得我一家鍾意食、唔係淨係得我一家食過。呢篇，唔係整蠱 post。

你，敢唔敢整「蒸雞翼」？

作死

無論o係邊間公司，幾乎「所有」上司都認為我係一個「好員工」。又或者有部分（尤其係隔離部門既高層）可以睇穿我，其實我只係「扮好員工」。

不過咁講，比著我以第三者角度睇，係咪好員工，又好視乎究竟你真係幫到公司幾多，而最後呢個問題，好多時唔係咩人都有同樣既理解，例如究竟應該公司財務表現先行，定係出糧既老闆既心情先行？（所以，都係唔好去諗其他人點理解，費事諗爆頭。）

果d 聽到話我 c.m. 係好員工既老闆，大概都會掟鞋鬧我：「作死牙！」不過更作死既係，我查實係度準備講某人。

佢呢個人，我會定義為超級「眼見為實」主義者，但係不見並非一定為虛，而係斷估為虛，斷人性本惡，人行善必虛偽。

我受佢影響好深，所以我整個人生觀都同佢幾乎完全相反。冇錯，「相反」。點相反法呢？例如我就會「眼見可以為虛」，人性本善，惡人必有善其中。

直到依家，我都受佢思想束縛同掣肘。

所以我響辦公室著力扮演壞員工，傾公事時手舞足蹈，打電腦時引哼高歌，交換資料時嘻嘻哈哈，適當時候講唔適當既說話。睇落，我好似輕輕鬆鬆，查實我緊張兮兮，咬緊牙關，好想鬧人....

又查實，就算我講既表象千真萬確，又代唔代表我係一個壞員工？甚至老闆係咪一定認為我係一個壞員工？係咪一定眼見先為實？唔通，人係唔應該用心去感受另一個人既真實？何況，你我本應血濃於水？反而，萍水相逢既，你竟然可以大條道理將心比心？

嘿，原來人人都曉得用心，只差在用響邊庶，係咪用得公公道道遮。

我呢排猛講阿女，其實只有一個重心：我唔會將我呢一代既意志留比下一代。

嘿，俾二至五見到，肯定又會話我作死。

假如我係阿女

（警告：此篇 HR 高層或 Recruitment 從業員止步）

好早就見到鎚哥哥吹號玩「聖誕交叉卜」，查實，我都想玩。

之前冇玩，因為驚。今年未報名，都係因為驚。

驚交唔到貨。

我覺得寫卜可以當食生菜果d，真係好勁，佢地似乎係有無窮無盡既題材，信手拈來。功力深厚者寫卜可以寫到出書，犀利。我呢亭，只係希望搵到三數個人可以插下我眼既，就於願足矣，屙呢吉帝。見到呢排咁靜（好似），估計可能係金融海嘯卦。連家母同阿仁兄前排都不約而同話捐錢（well，值得鼓勵丫），我諗成條街都真係好灰，令到d人不期然諗下究竟發生左咩事。

哎呀，樂觀d得唔得呀，大哥大姐細路妹妹，得閑學下阿鶴咁啦。（真係想搵野撩興佢，等我同佢鬧下交沖喜下....）

我呢，平日最鍾意搞爛gag，撩下d 女同事傾計（仲要響佢地最忙果時撩傾計），或者一路對住部腦打打打，一路同隔離阿姐/妹傾下兒女經（似乎d人都怕左我）。就算公司愁雲慘霧、風聲鶴唳，香港政府抵打抵鬧，都一於少理。總之，我地呢種唔鍾意束縛既人，覺得最緊要係及時行樂。做到好似冰冰咁，應該幾盞鬼。

我曾經同阿邊個講，我覺得人呢，係需要有d幽默感架，（呀，唔知爛gag算唔算呢？）點解呢？我都唔知。我淨係覺得，若果一個人可以得閑搞下gag，就算瘀爆都好，其實都應該係自我肯定既表現黎既。比著旁人睇黎，呢類人應該唔洗太擔心佢會打家劫舍、殺人放火（拿，我估應該咋，亦唔係話世事冇例外架）既，至少，佢地唔悲觀囉（又係斷估）。

阿女開心好易，只要送粒糖比佢就可以開心幾粒鐘。大人醒過細路咁多，冇奶油唔得。d咩研究學者教授話大人咁Q多野諗，咁L多野擔心，梗係冇咁容易開心啦。哦，係卦。

琴日走去同隔離枱同事傾閑計（仲要揀人地超忙果史），分享一下兒女經。跟手提到報幼稚園，佢不解家長原來分兩派，即九龍塘派（or 名校派），同街坊派。佢起初以為香港地全部都係九龍塘派，依家睇真原來唔係。同事有女兩歲多，雖然佢自問九龍塘派，不過我睇落佢唔係不擇手段果種。佢只係希望，個小朋友大左生活可以舒適 d，然後就可以更開心。

嘩，好正路，好 Red Ocean。

我問番果班街坊派阿姐阿妹（成派得我一個阿叔），睇落佢地真係比九龍塘派既開心d，搞gag頻率亦高d，擔心阿仔阿女身體健康多過擔心佢地學業既會多d，請假同仔女玩（或幫手做功課）既又多d。

「DaDa，乖.... 唔好喊.... 想唔想食糖糖？」

妖～ 寫左咁多字，就當交叉卜得唔得？（妖～，求求其其過日神有咩唔好！）

功夫

內家心法

寫左九百幾字講因性施教，手起刀落，扠左。因性施教查實個個都曉，亦都會做，但唔係個個方法都一樣。總之，超級腦震蕩亭喇。因材施教同因性施教最大既分別，我覺得，才幹係可以睇得見既，本性係要用心去感受既。

四兩撥千斤

爸爸夾舊叉燒比未來港女。

「嫲嫲，你食呃」港女唔食，夾曬比坐響隔離既嫲嫲食。

十八路譚腿

「我要去街街！我要去街街！我要去街街！我要去街街！我要去街街！我要去街街！我要去街街！我要去街街！」港女自己攞曬衫褲鞋襪，氹曬地。

緊箍咒

「哇呀呀呀....我要去街街.... 嗚嗚嗚嗚....哇呀呀呀.... 我要去街街.... 嗚嗚嗚嗚.... 我要去街街.... 」

燕子飛

父喝：「坐定定食飯飯！」

港女一路卡卡笑一路走落地玩。

隔山打牛

「下，做咩咁曳！？唔食飯飯！？係咪想.....」
「嘟...........」（cut 線）

敵不動我不動

「坐。定。定。食。飯。飯。」（老父擋住前路）
「.....」（港女，靜極不動，目無表情）
「.....」（都係，目無表情）
「.....」（又係，目無表情）
「.....」
「.....」
「.....」
「.....」（如是者成分鐘，兩個都係目無表情）

黐手

「我要聽歌歌！」
「不如睇電視先喇....」
「我要聽歌歌！」
「比爸爸睇新聞先喇....」
「我要聽歌歌！」
「食橙橙好唔好？」
「我要食橙橙！」
「好啦，食完橙橙聽歌歌啦」
「我要聽歌歌！」
「好啦，小朋友食邊個橙？」
「我要食呢個橙橙！」
「好啦，食深色d 呢個喇！」
「我要食呢個橙橙！」
「好啦，食完呢個橙橙睇新聞喇。」
「我要聽歌歌！」