一亂就寫，一寫就...

一寫就點？我都唔知。都係亂卦。

背景：

我呢個人亂呢，不外乎因為自尊心受創啦（不過復原都快）、感情生活空虛啦（但唔會苦悶）、瞻前顧後船頭驚鬼啦（嗯，呢個死症）。十之八九，都係心理或者上唔夠穩定，心虛之故也。

人物：

幾乎可以肯定我係一個自尊心超強既人，經常以工作成效黎判斷自己既存在價值。前排復活節同近呢幾日，原本打算響假期時段幫補下，清理下d雜碎，等返工日子可以專心打仗打真軍打大佬，點知係要等假期先黎病（嬲！）... is it a sign？ 「如果唔想過勞死，唔該主日返教會」

地點：

響紙扎工廠坐呢個低微既中層職位，我自問唔曉做到平常心。好似剛剛收到email，有個熟客叫我聽日打俾佢...。喜者，起碼有人信任你，假期都要搵你。亂者，連客假期都搵你，證明呢行幾大壓力。亂呀，煩呀，今日明日昨日乜日，多煩憂呀。

時間：

特選客戶交左個偉大（or浩大）既工程俾我，某程度上係佢地自己既事，但另一個方面睇，查實又完全可以係我地紙扎工廠既事 -- 差在我地唔做，最多係我地不該，但唔代表我地有責任。關鍵係，呢個係「特選客戶」。正因為佢呢個頭銜，我又一次失曬方寸。在公在私，我都要死頂落去。轉頭我就要將個工程進度通報俾全港十八區，然後有料爆料，有鑊爆鑊。病住放假仲要有心理準備返到公司俾人插，本人既（低）抗逆能力可見一斑。

如某日各人治部尊貴慿此（或慿這慿那）認出小弟的話，reject 前切莫告知原因，以保小的自尊心也。（求下你啦~）

人物：

如果紙扎工廠係我靈魂深處一切罪惡既源頭，或者貼切d講，催化劑，我會好坦白承認，我已經將半個靈魂出賣左。但又好奇怪，點解出賣靈魂（以及肉體、精神）都只係得雞碎咁多？係咪因為我出賣得唔夠徹底？定係響呢個香港地，出賣一切只夠換黎最低工資多d d？所以我已經算幾幸福，連業主第二次加租20%以上都仲頂得住？

背景：

香港政治環境係咪叫亂呢？如果係，亂既定義係咩呢？自由行之所以叫「恩惠」，頂多只係當年政府安慰人心之詞。查實，邊個國家響開放既途中，會繼續壓制人民自由出入境既需要？開放自由行，只不過配合國策，根本無所謂恩惠之含義。

無啦啦扯到呢樣做乜？Well，之所以「亂」，咪因為唔連貫遮。之但依家香港發生緊既各樣「政治亂事」，睇落其實有跡可尋，既然如此，何亂之有？

地點：

頻頻病，都係時候要全面檢查一下有冇暗疾。睇番成套銃夢Last Order，先發覺原來套野仲未寫完！剃刀陽子返緊去火星尋根，咁Chi Ming幾時先同阿雪有個了斷呢？唉，我夢想既自由天地，響邊庶呢~

其情如斯

呢年大部分人都應該其獨特既經歷，而我就同少部分人一樣，都係平凡過平凡。老死轉職既故事，似電視編劇堆砌安排；同事既愛情故事曲折離奇；朋友感情生活離譜過當年《XX夜中環》；又有人大起大落，未知來年上太空定跳懸崖。而本人呢年九成九時間，就屈響公司精修葵花寶典。

自左宮都唔知為乜。

前十一個月既時間，如夢。當然如果好似Sucker Punch 個過程咁刺激壯烈固然好啦，可惜日日做到無停手既結局，只係同呢套戲個結局一樣，個腦開完刀之後成個人癡癡呆呆。（題外話，套戲除左個女主角，個個女配角都好索好省鏡）

迷迷糊糊，十二月趁亂獨自去左Bangkok一趟。聞者都話紅色警示喎，保險唔包喎，連報紙個乜乜泰國通都叫人唔好去喎，同廠既BCG Cash Cow 部主管都話取消左曼谷最高機密會議喎，諸如此類。（第二次題外話，冇錯，我仲響紙扎工廠度做，OT情況有如狐狸康）

心諗，錢唔係你自己出，你梗係可以苦口婆心啦，家陣機票買埋，酒店俾埋錢，假都安排好，人又壓抑左九年，理得佢係咪打到黎丫。何況，泰王生日後，乜momentum都化煙啦；七一都淨係港島北遊行遮，唔會去到旺角十八鄉大拗門har far；個泰國通梗係要政治正確啦，唔通話曼谷歡迎你唔洗劣咁話咩。算。

總之一切都係錢作怪。

查實今次去既景點，我諗去過曼谷既人都全部去過，都係Skytrain沿線，而我呢次第一次BKK之旅，因為去前到埗後都係咳到肺甩咁走馬看花，所以坦白講，唔係太enjoy。如果要enjoy，我諗除左身體健康之外，下次有機會一定要拉埋一眾色途老馬先得。

簡單講下觀感做個記錄。

曼谷太重商業味，無論睇鋪拉客印你落曡，唔會好似臺灣咁真係賓至如歸俾人呃都抵，甚至深圳明買明賣俾人呃就預左咁。或者對呢個城市同人認識唔多啦，又或者我仲係返工mode 未stand down啦。就算有錢，都未必想去曼谷銷金。

武斷形容：Merchantilism。街邊公共垃圾桶唔多個，或者學日本啦；行人道窄而且失修，好d既行人道只係大商場外面見到。反映public representation 或 public spending 唔足夠。得閑真係想研究下佢稅務制度係點。市場表面上算自由，但商家亦似乎壟斷部分主要收入板塊，小市民主要靠飲食業或雜貨零售或替大企業體系打工為主。專業服務呢... 唔知。但主觀上市民尚算 happy....。算，記錄完畢，嗶~

講講下令我突然覺得有d不安，醒起 Chatuchak Market。呢度好熱鬧，實情係太熱鬧。雖則只係weekend market，但安全隱患甚多（好似好大陸字眼，借問有冇港/廣府用字？），對於火災或人流管制似乎毫無準備，烏鴉嘴講句，萬一起火、恐慌.....。

又，有一件事不能不記錄，就係我有三次買野找錢，竟然唱少10 baht俾我，有兩次仲係響Skytrain票務處唱！我check下，問佢好似唱少左佢（地）先至俾番10 baht我。唔係化！（唔好批評我個樣，反面架！）可能我冇準備連曼谷都係咁，所以好難放開懷抱去享受呢個難得假期。唉，番深圳好過啦。

又又，唔好盡信Google Map！佢累我原先搭啱車，跟住搭錯車，最後要搭的士先去到酒店，錯得太離譜。正PK！枉我幾乎自認Goo粉！OK OK，係我錯囉，得未？

又又又，最大得著可能係令自己反省下，咩叫歧視。或者咁，未見過，未見識過，未認識過，的確會令人恐乜恐物。響香港只係見過男+女、女+女、男+男；到泰國再見到老外男+嫩泰男、男+人妖、女+人妖，等等等等。突然間覺得自己好似開竅咁。如果政府或平機會或某某組織推動性別歧視條例或鼓勵市民接納不同性取向人士，認真建議設立旅遊基金，資助港人去泰國觀摩、認識、理解甚至研究性、性關係、性倫理、性工業...。特此建議，下屆參選特首者可考慮納入其政綱。

第三次題外話：Pattaya 即日來回半日遊。嗯...... 唔多啱小朋友玩，海灘唔夠靚，垃圾又多。Well....

小總結，曼谷可以係成年人既樂園，芭提雅可以係成年男士既樂園（哎呀，臨走前先見到大大招牌寫住有body massage.... 唔該下屆特首認真諗下我個提議）。帶小朋友的話，可能去布吉、華欣、Samui等較好。

中短期，如非公務，都未必會再去泰國（有豬朋狗友帶路例外）。至於下年，講講下又快到2014年，無啦啦返工mode 唔知點解switched on 左，聽日之後既聽日，平凡既日子又再開始。

祝大家來年多姿多彩。

廢人紀事

...然則關人卵事

幾個字

選舉前，對梁英，有四個字評語： 我唔信你。

得選後，對梁英及新政府，三個字： 睇定d。

今日，自覺對於之前呢堆人，實在太真，傢下剩得兩個字： 討厭

又或者係三個字： 好討厭

甚至都係四個字： 好卵討厭


廁talk

廁所向來都係男人面壁思過既好地方。無啦啦問自己點解，點解唔可以得失朋友，但又可以得失大大老闆？點解唔可以對唔住老婆，但又可以得失大大老闆？點解唔可以欠人一個幾毫，但又可以欠大大老闆幾噸感情債？


好頽廢

連續大半年每個星期六七日每日十幾個鐘既營營役役生涯，冇嗮以往燈紅酒綠，花天酒地既日子，真係覺得個人好廢。廢到我呢刻查實都係響公司打緊呢幾句廢話。

朋友叫我過檔幫佢，開出條件又算優厚，之但做既唔係自己熟悉果瓣...... 係咪覺得保障唔夠？人大左最大既問題，係咪唔敢唔捨得放膽再博，亦唔想放棄已擁有既野，而從新黎過？

忙啫，但點會唔記得

抱歉，來晚了。

語言仍無味

查實一直都有寫，只係冇貼，亦冇長篇大論，只係碎碎唸。

女友人K話，當我啟動冷眼旁觀 mode 既時候，講野最流暢，最有決斷力。言下之意，我既力量來自「做就有心無力」。亦所以我鍾意睇，多過做。鍾意評論，多過實踐。

忙到癲左，做人就缺乏左方向。做野既時候，就只係記得d client要乜，同事要乜。到得閑既時候，都仲只係記得公司要乜，老闆要乜......至於家人要乜，朋友要乜，自己要乜......線把啦，再得閑d 先諗。

但我又唔係想呻咩喎。我係想話，做宅男真係唔容易。日日匿入自己個空間，見到高登友點評論高皓正，高生絕對比高登高，高主教之名當之無愧。只係想勉勵高生一句，同凡人講道，唔好用方言。凡人唔理解既，就算你道理再響，都只係掃羅旁邊既人聽到既雷響。WWJD，唔係齋得 interventionism。雖則我唔排除，你可能係先知。

老實講，我完全唔想去承認人世有幾醜惡。寧願奢望上帝繼續忍受我地，比機會我地。亦但願我唔係試探佢。

那邊廂，普選已經開始捲起議論，無論係梁文道講既「敵人．權力」論，定係喬曉陽講既「不能對抗」論，抑或真普聯講既「談判」論，對一介宅男亦即準備轉行 jar 的士既我，都太理論化啦。係人都知我份人最L 憎理論，對於我地能唔能夠普選到一位正正常常既特首出黎，擔心呢樣影響大局，擔心果樣令國內風雲變色，都只不過係企響自以為國人好脆弱既角度去諗。一國兩制咁叉多年，固然有國人仍然好脆弱，但唔該佢地仲比你地呢班憂國憂民既強，起碼唔係淨靠把口搵食呀。

如果一個政府，一個機構，一個authority淨係靠把口，捉字蚤，玩斷章取義呢套既話，結果係點，查實同做人交友做老闆當下屬無分別。

後知後覺，逢星期日既蘋果副刊，向來都係一堆文學作者既天下。我唔知佢地算唔算文學家丫，不過以一個宅男角度，佢地寫既野係文學......嗯，大概係有種若即若離既感覺。好多時寫既似文學傳記，講下某某生平點點正氣，某某邊件事值得令人回味反思，某某對住邊個名人(or vice versa)可以暗喻點樣雞蛋高牆。成個感覺令我覺得，係咪就係專寫「人」既，就係文人呢？將人性人格人行勾畫到淋漓盡致，以一個理科人既角度，絕對係嘆為觀止，幾乎將humanitarian 與文人等同。亦難怪我等理科人或理性治國者，對文者輕之鄙之侮之。明，我明。

又查實我係偽君子。所以唔返教會，免受批判，所以有意無意比公事纏繞，免受良心譴責。我想安靜一下，掉走一d 垃圾。

等陣，會返公司，覆下依喵。

每每

每每去叫停他人，卻不願去叫停自己。

這就是貪念。

莫言政治

報紙話莫言齋講文學唔講政治，所以乜乜物物。

我心諗，政治一定要係講出口既咩？雖然對莫言既小說完全無興趣，但道聽途說，佢揭露既黑暗面同令人反思既能力，不下班自命清高既所謂學者、政客。莫言如果真係再講報紙所謂既政治，跟手俾人推舉做殉道者，最終損失既唔知會係邊個。

稍歇，稍忙

臺灣

去了臺灣旅行，為的是找回一點點自我。是否真的找到，還看明天。


工作

雖然旅行前超忙，但歸來仍要還債。


狼英？

不提也罷。


歉意

縱使萬分歉疚，無改虛偽品格。講緊我自己，比狼英衰十倍。


活

活得不耐煩。活該。


書

一本《帖木兒之後》，一本《中國歷史》。一定會睇。


歌

一位 Anya Marina，一位 Sara Bareilles。繼續會聽。


誌

經歷越多，越應該寫。不可告人既經歷越多，越應該摺鬼左佢。

漂之白、之泊

CK問：到底學童既真正得益係乜？

呢句野纏繞住我好一陣子。

承上集，如要推行社會主義，就唔需要考慮到究竟學童/用家真正既得益，而只係需要考慮點樣維持社會主義既倫理架構。學童既觀念如果影響到呢個倫理架構，就必須要犧牲學童既得益。要個體為整體犧牲，係我呢個盲毛所摸到既大象。

唔係指引問題，唔係洗唔洗腦問題，唔係國民教育四個字既問題，而係究竟香港呢個社會應該朝住邊個方向行既問題。

香港唔應該行一個，強迫個體為整體犧牲既方向。為整體犧牲，必須要係自願。被逼，邊會有幸福？

之但有人話，交稅夠強迫啦？係....但查實真係咩？如果唔係交稅可以維持法制、可以維持社會運作、可以俾機會你賺錢，你會有機會交稅咩？（呢個肺論早幾個月我都講過咯）

自由珍貴，言論自由珍貴，賺錢自由珍貴，學術自由都一樣珍貴。學術自由係一樣好值得珍惜既野 - 教，要真實，要批判，要警世，要交待，學，先至可以再教。訛傳，並非學術，只係漂白。

曾幾何時，香港推行黑社會洗底計劃，俾人改過自身。真係潔身自愛既，或者可以徹底洗滌心靈。否則，只係表面漂白，純為逃責。香港自由在你噏乜都得，就算上堂幫人漂白都得，亦好自然會有呢種人。既然水清無魚，無謂潔癖上腦。之不過，如果要我積極不干預自己仔女學校既辦學方針既話，無格，用腳投票囉。

一個無左歷史基礎既野史可以獨立成科，仲要成為呢種投票方式既決定性原因，OK，一個政府鍾意多門法定宗教，都幾得意架。所謂無宗教，潛臺詞就係自己係唯一既宗教。

講真，法定宗教既危險性，反宗教人士應該最清楚啦。雖然我有人稱宗教既信仰，但如果政府有日將呢個信仰成為法定宗教既話，我就知道香港會陸沉，唔係死守，就係走頭。人生漂泊如此，談何容易？

教番中史，學番中史啦。人，就自然會留低架勒。歷史，就係「家」之起源。

經驗、年紀、時代

紙扎工廠有幾個部門，我以前就任OEM部，部門專責來料加工，客路穩穩定定，就算晚晚加班，夜晚都趕得切。家陣轉左去ODM部之後，一切都唔同曬。最唔同既，係對於年紀輕既一輩既睇法。

以往做OEM，跟班舊客戶，來來去去都係果籠要求，經驗因此最重要，所以我地呢班老屎忽好緊要，講野亦周時比班新人大聲好多。

ODM個遊戲規則就潤腸唔同，經驗固之然緊要，尤其響技術層面，但響了解客戶需求既層面，經驗有時反而會係一個負累。經驗成為負累既例子周圍都有，係我地呢班老屎忽唔肯認啫。如果真係虛心去諗番，我地後生果屎同當年既老屎忽相處既時候，一樣出現呢d問題。縱使事後證明我地做後生既時候真係講中曬，但輪到我地家陣做老鬼就先入為主認為班後生無知、衝動、懶有遠見理想，呢d 唔知係咩心態呢可？

究竟咩心態，我都想知。其中一個環境證據係來自年紀。

正如為退休投資一樣，年紀同埋 “social” expectancy 呢兩個因素，好多時決定左人呢一刻既選擇，究竟係趨向進取定係保守。呢個 “social” expectancy 唔係社會人均壽命，而係個人對於往後有生之年既睇法，例如如果一個20歲人，只睇往後兩三年既話，呢個 expectancy就算短。以下呢個粗略既 matrix 或者可以解釋兩者既關係。

題外話。呢個 matrix 係要好中性去睇 character，唔需要加上偏見。正如我班工友大部分雖然都係出左黎一兩年，應用呢個表黎睇，話就話多數（character）都響隨波逐流呢個grid，但無論待人定處事都好成熟，響公司都好幫得手。「跟隨潮流」，並唔係一樣值得批評既事，正如返工著西裝，出街化曬妝，冇咩出奇。

點解整呢個matrix，查實係因為近排整理番 collectivism 同埋 individualism 既舊料所得。呢排香港出現好多「爭」（爭取、爭拗、爭辯），trigger 我嘗試理解雙方既差異。而其中一個最響亮既 first shot of war，就一定係「學民思潮」，另一個，係北京一再「堅持和發展中國特色社會主義」。

原本純粹一個辯論議題，學民思潮年紀輕輕，竟然可以走出黎去貫徹呢個議題既一方，唔係好似我地當年齋講，齋由評判比分，齋按照辯論規則分正反方、主副辯、台上下。呢種行動力同自發性，除左當年暴動浪潮，邊有個年代會有咁。而同果股浪潮比較，今趟既分別亦實在太多。不得不承認，時代真係變遷得好快。

我個人傾向 evolutionary centrist，認為應該變就變，唔應該變就唔變。唔需要話呢個變係邊個導致，邊個誘使，邊個推動。因為有需要變既話，就一定會有人行出黎，無論佢地跟住係生係死。社會生態就係咁，冇野保証出頭鳥唔會有天敵，會萬世永續。儘管第一代始祖鳥已經絕曬種，但如今羽翼已豐既品種，早多如繁星。值不值得見物種多樣化，只視乎呢個森林有冇呢個承載能力。

我想有。否則，無論點講咩增強社會流動力，點樣增強經濟競爭力，都只係少量物種既流動力同競爭力。可惜丫，懂大政治既人多，識生物學既人少。

另一個燃點我火頭既，正係「社會主義」四個字。

基本上人係群體動物，亦係孤獨既動物。所有人都游走響絕對群體與絕對個體之間，亦因此有國家、有城市、有家庭、有廁所。如果要追求絕對群體，就一定違反其他人追求絕對個體既意願，亦因此適當既社會體制，會顧及雙方，而達至波動性平衡。

根據 http://geert-hofstede.com/china.html，中國仍然係一個非常collective 既國家。單以此推論，強調社會主義，強調集體，似乎符合國情。亦正因要配合集體，所以一切社會「約章」亦必須要為集體服務。不過特別在，此約章只係上者對下者有所要求，而非與社會文化相扣既collective social contract，即上者對「下者與另一下者」的要求。簡單講，要求「養吾老以及人之老」，無，亦無貫徹於機制裏面；而對國家，對領導既忠誠，比目皆是。

情況在於，一日強調「只有社會」，一日強調「只有社會主義」，即強調所有決定皆以社會為服務對象，而最終因為社會並非由「多數人」管理，所以當中既法律，亦只能以「少數社會管理者」為主要服務對象。

即覺得，如果要集體司法機制過渡去首重個體既司法機制，似乎響我有生之年，只可以響金融領域或部分大城市既基本民生可以見到。

今日我飲茶時睇到「融樂會」總幹事Fermi既訪問，令我好羞愧。我唔相信中國人係一個自私既民族。

香港，如果只係中國人既香港，佢絕對唔配「國際」之名，更唔配因「國際」知名。

摑民教育

唔洗問，睇標題就知道我咩想法。

查實父母對子女既期望好簡單啫，我覺得，就係期望佢地「似自己」。

呃，我明，好耐之前我講過呢番說話，阿邊個又質疑呢個想法。而我呢，近乎深信不疑架。

呢個「似」，唔係在乎父母職業，話希望自己子女會走自己條路，而係在乎點「對自己既子女」（唔敢講係咪可以同樣「對他人」）。父母希望自己既子女，會好似爸爸媽媽咁對待自己既下一代。

雖則我相信實有人唔同意既，OK 喎。

就淨係上面呢句，就表明我自己對子女既期望係點：容許子女有思考既空間。

Well，唔知乜水定阿乜乜物物話，國家就好似我地父母，對我地無微不至，有要求有期望。換句話講，即係呢個國家希望佢既國民似佢地。

我呢亭做人仔女既，好明白父母既心意既，不過，如果你係要格硬塞個飛機杯俾我，話我聽用呢舊野可以領略倒人間肉慾頂峰，咁既理由呃小學生就得。我唔想阿仔淨係用杯用到老死囉。

我自以為自己係一個開明既父母，所以先會好開明咁期望子女接受一套開明既觀念。

黎緊阿女入讀小一，我會密切注意究竟呢間學校會有幾開明咁對待佢既學生，做好隨時轉校既準備，用腳投票！

下星期日，我同埋成家去。

妖！憎死我自己！

Declaimer:

I no intent to replays blogger to tweeter