07年美

原本打算好似往時咁，寫番篇 medley 寫謝 blog 詞，不過今年實在太精彩，我管筆，嘿，都係收返落床下底，唔好攞黎獻醜嘞。唯有一字記之曰： 美


集體主義的美
Collectivism - Collectivism is the value that people sees collective (community/society) needs a higher priority than individual needs and importance. In collective society, people are interdependent on each other. According to some studies, China and Hong Kong are culturally collectivistic. （係咪抄/寫得好學術性呢～） Just like the application of Economics, to me, it is actually a practice of collectivism.

Collectivism is somehow, being used by managers to exert CONTROL and fabricated as what we called "management". Alignment of goals - collectivism. Rules and regulations to keep away free-riders - collectivism. Punishment against behavioral deviance - collectivism. （以上如有雷同，實屬巧合）

Therefore, if management is an art, collectivism is an aesthetic.

係呢度寫blog 呢，有時我都覺得幾 collectivistic. 雖然並無合約管束、法律管制，但又行動一致：檸檬茶、交叉扑......，無論作為參與者定係旁觀者，都一樣咁開心。


盲目的美
有人討厭無主見既人。但我並不，因為我自己亦算係一個唔多有主見既人，所以我唔討厭自己。而我亦相信，所有人都或多或少係無主見既，無一幸免。

食飯牙？好呀。去邊度？你話啦。總之平靚正咪得囉。

送禮牙？好呀。買咩？是但喇。總之大方得體咪ok囉。

買衫牙？好呀。買邊件？總之係名牌子就得囉。

投票牙？好呀。投邊個？唔知喎。總之要捉到老鼠果個囉。

正如果位大前研一係《OFF學》度講過，佢「忠於」「標準物品」 - 因為慳時間，質量有保證，少uncertainty，仲唔洗傷神。尤其係唔洗傷神同埋更加安心，呢個簡直係符合人類天性。何況，以你所知，其實究竟知得有幾多？夠唔夠？係咪事實既全部？若果唔需要知道事實既全部，點解可以話你知道既比我所知道既更重要？你憑咩？ 憑你自己認為知道得比人地多？

係，我呢度係指桑罵槐咁講香港個社會環境。

做 Marketing 都知道曾經有d 經典實驗，就係幪住眼試飲 Coca Cola 同 Pepsi，結果大部分人都話 Pepsi 好飲d。但當比你睇到個牌子以後，就會話 Coke 好飲d。佢呢個結論當然係話 branding 係 Marketing 黎講有幾 effective 有幾重要。但對於我，呢個結果其實就代表：人唔係完全靠理性去作決定。

有人以為理性必定好，小弟則不以為然 - 因為當中絕對有人性的弱點 - stereotyping (branding), heuristics, fundamental attributional error ...... so what! （Well, 其實呢d 弱點係大部分情況只係每人係呢個世界上既錯誤判斷既其中一 d 既證據，並唔係咩大件事。） 你話你既理性，可唔可以肯定冇受其他人事所影響？我覺得如何 live with it 先係人得以延續既關鍵。

又不過咁，雖然大前研一講得啱，標準物品可以帶黎百般好處，但係，以想做一個 innovator 既人黎講，呢個方法，唔多可取。想做 leader （即係叫人 conform 做 follower），大可以叫人奉行阿大前生果套。但想不斷創新、冒險、嘗試、長大，大前生果套，太safe。

盲目都可以好靚... 你問下你枕邊果個就知道嘞。


過去的美
簡直美不勝收喇。你問我點解？我唔知播。總之過左去/過緊去既2007年，適逢其會有機會係呢庶(have been)開鋪(+ing)，雖尾矣，但亦係絕美。

絕美既，當然係第d blogger喇，無論佢地寫父母子女又好、公司又好、時事又好、家事又好、開心又好、悲傷又好...... 過去呢一年，真係令人好滿足。


笨的美
韓愈話： 業精於勤荒於嬉，行成於思毀於隨。

我就話： 暴烈過後，總有美事。

咁你話： 兩句關咩事？


我笨，但我總找尋到美事。關你咩事！ =P

（差d漏左： 祝大家新年快樂，身心健康！）

謝飯祈禱

這裡作個回顧。

烈夜

我心暴烈
請讓我獨處

拿著薄被枕頭
走出客廳
把苦茶喝完
關了燈
脫下眼鏡
便睡

無獎競猜遊戲

（注意： 以下遊戲內容不含任何影射或單打成分，請放心猜度。）

燥狂男：「你睇下，果個正一賊仔！一定要拉佢！」

唯諾女：「哦，佢應該都係借既啫，會還既。」

男：「會還？你睇下佢，攞完d野眯眯嘴咁偷笑，你覺得仲佢會還？！」

女：「.... 再睇清楚d先喇，如果唔係怪錯好人呀....」

男：「喂，你又睇清楚d喇，佢準備鬆人播。」

女：「唔係～　佢都未行出呢個門口，等佢真係出鬼左去先啦....」

男：「你啦乜鬼，佢依家出左門口喇，你仲唔快d追出去～」

（......半珦）

女：「等陣先，個職員咪走出黎捉住佢啦，唔洗我地出面 .... 幾好！繼續食野.... Yum Yum Yum （一路食一路講）.... 食快d ....」

男：「唏，有冇搞錯 .... 慢慢食啦，因住啃親呀 .... 呢呢呢，你睇下，個職員好似同佢講左好耐，佢係都唔認播 .... 嗱嗱嗱，仲唔比番人添，你話呢個賊仔真係丫！」

女：「唔好咁心急住，再睇埋落去先喇，好似個職員仲比多樣野佢添播，或者個賊仔.... 咳咳，或者佢同人老友都未定呢。」

男：「唔係化，你呢d咩價值觀呀，朋友都唔可以咁下化，又食又lik 唔比錢，呢個世界仲有公理既？呢d唔係偷野就係貪污。」

女：「喂喂，你唔洗咁勞氣下，人地係自己既地方，想點咪點囉，你嬲乜？算啦....」

男：「乜算呀，姑息佢呢d咁既人，佢第日點帶住個細呀？」

女：「.... 下？咩邏輯呀 .... 」

：
：
：
：
：
：

問題一： 果個賊仔全名叫咩？
問題二： 你睇完呢個故仔有冇咩啟發？

（特別節目： 太陽院線上映滑鐵盧）

*******************（後按）

唉，係咪我出個題目出得太隱晦呢 ...

再比多少少貼屎：「問題一」個答案呢，同前排某上市公司名稱好似囉。咁「問題二」個答案就應該好易估倒卦，而且，我又再淨雞雞加左多 d d 貼屎 ...

抖下氣先

呢排吊緊頸，差d 斷氣。前日趕完第一條死線之後，即時頭暈眼花，仲要旁邊位靚女扶一扶先唔洗跌親。而第二條死線又黎緊，真係從未試過咁緊湊。

講開呢兩條死線，雖然係表面上面差別唔大（都係死線，no delay），但係思考方法上，就須要轉啱 channel 嘞。

第一條死線呢，就好似一個 Strategy Proposal 或者 Feasibility Study 咁，要表明清楚個 proposal 優劣既地方，用唔同既 Perspectives 去講述同一件事係唔同情況既後果同埋資源需求。對於我黎講，呢個 feasibility study 就好似做人咁，你想點樣可以開心過，其實好睇你自己點睇，而唔同既人，就會有唔同既需要、唔同既前因、唔同既理解。一個策略性概念，其實根本唔係一個，而係千千萬萬個概念。（吹水啫，呢樣我掂呀！）

但第二條死線呢，就好似一個 Sales Proposal，做好 Analysis 然後集中去說服個客你個 plan 有d咩優點，有d咩好處，點解用呢個 plan 而唔用其他 plan...... 坦白講，呢種 proposal 我知道我自己唔係好在行。唉，之前都試過做，做到一塌糊塗。我覺得，呢d proposal 雖然可以有好多方向同方法寫，但其實又好似只係得一種方向同方法，就係要說服人。說服人之前，概念要鮮明，要有立場，前文後理要通順，總之呢，要你貼貼妥妥。（呢傢野大鑊，真係唔多曉...）

依家完成左第一條死線既工作之後，就要即時處理第二條死線既工作，條天線頻道都未轉好又黎料，真係好難應付。況且，要我做 Analysis 寫 Sales Proposal 真係取小弟狗命。唉...... 點解做人要寫咁多 Sales Proposal 架 ...... 今次實比老細插到九彩 ......

***************

做到悶悶地，忽發奇想 ...... 若果好似做人咁，明明要寫 feasibility study，但又用 sales proposal 個方法寫。而又明明應該寫 sales proposal，竟然寫左 feasibility study...... 唔知後果會點呢...... ？

係我衰(...d)

其實死期將近，唔想分心寫野，不過...... 諗落，都要寫呢篇黎懺悔。我呢，好少係公開場合道歉，但對於某些人，我想同你地講句對唔住。

事緣我今日見到有某君同某君：阿乜哥，我見你呢篇寫得幾好，所以我係我鋪頭引用左你呢篇，如果介意，請通知。

噢！I am sorrrrry..... 各位巴打sis打，我無心架，我一向都係咁，粒聲唔出就借黎用架啦。不過咁，我好多時只係會放條拎落去，咁，應該唔會有人當正我寫下化。希望你地真係唔好介意，成日嚇親你地.... 拿，不過咁，單打既野另計（雖然我講過話唔做，不過都好似破左戒... 算啦，我認我律己以寬）。

其實我睇到類似呢句說話好多次，都唔覺得自己有咩問題，但無啦啦今日先有d 體會，覺得自己原來一直都無乜... 禮貌... （卦），因為覺得人地兩個可以咁客氣，以禮相待，好羡慕（嗚嗚）。再諗深一層，或者我以後都應該學下佢地咁，我應該要學識咩叫尊重人......

。
。
。

好！我從今日開始，所有轉載報紙既報道，我都會寄番封信比編輯部「單聲」；所有覆述名人高官講既說話，我都會打個電話比佢地秘書「單聲」；所有我講到隔離屋同對面部門既壞話，我都會發番個瞄通知佢地；寫披爬之前後，再拜訪番各位教授話我已經引述左佢地個研究。

。
。
。

我講得出，就要做得到！

講真，我真係有悔意架，信我喇。

（不過咁，如果你地真係需要我咁做，請回函通知小弟，否則小弟一定死性不改，繼續闊佬懶理。）

*********************

拿，等陣先，各位仁兄仁姐千祁唔好要求我 quote 你地d 野前單聲呀，我唔睬你架。（...乜我精神分裂咩？）

年尾收爐，年頭開拖

經歷左呢幾日，我真係唔能夠唔承認自己真係老喇。通宵對我黎講，真係好大負擔。之後果日，朝早死死下，下晝仲要請假休息。都唔知為乜。

*********

點解叫年尾呢？哦，因為開鋪雖有一年，但一直乏善足陳，一事無成，依家連童心都無埋，真係大鑊。

*********

琴晚睇完新聞，嘩，阿局長（據聞仲有其他與會人士）咁講野，嚇死我。

雖則，我呢，就覺得不至於要一個講錯說話（哦，乜你覺得佢講得啱咩？OK。）既人落台，原因咪就係言論自由囉。縱使你係局長高官，你講呢d說話，都有你自由既。喂，佢都無講粗口，又無犯法，佢又一直依法辦事，大佬，佢依家錯咩先。

呢個香港，合唔合資格做局長，你諗清楚，係用咩標準先。唔係一講錯野就要落台咁嚴重下馬... 喂，人地唔係民選出黎架，合唔合資格，唔該，睇下特首頭丫。

雖然比著我睇，雖未至咩人生攻擊（Well，你覺得自己唔係既話，咪當人發噏風都得下化... 其他人又洗咩講到十萬八千里遠呀），但又真係令我覺得局長好小氣。阿局長，你認為人地無料扮野搞啅頭，咪係會議過程比d 顔色囉，玩都唔好玩二三線枱底野喇，局長級人馬，點都應該明刀明槍先體面傢嘛，如果唔清楚咩叫體面，問問你阿頭先都得卦。

之不過咁，又有 d人，成日土共前老毛後，真係好唔 Pro，咁又咪同自己所講果 d 土共老毛一鬼樣～。點解係要搞到呢個世界，sorry，呢個香港，要分清楚男左女右，良心狗肺先至安樂既嘖。喂，人人都有理想架，係咪你個理想一定比人地高尚 d 先。

唉，點解全香港人講野都係咁。依家d人，好似根本唔係要人認同，想果d 異見改變態度，反而係叉叉叉！好似叉完就可以改變呢個香港，唔該，唔該，諗真 d，究竟人... 人呀，究竟係點先會改變喇，講咩知識型社會，真係... （又或者，只係我思覺失調都唔定...）

我都好同意人係要有立場，就算無，都無所謂，但係，到你好聰明咁以其人之道、還治其人之身既時候，其實大家咪都不過同類～。Well，最後呢幾句，係比我自己既，用黎慶祝自己開鋪一周年多d d。

The halo over a single swan

（近日需要急於整理《兔子和狼》系列，死期將近之際，無啦啦我係孫公個 blog 插嘴講咩黑天鵝，之後一路搞到自己注意力無法集中，抵死。所以決定今日清清腸胃。本篇純屬洩洪之意，並無關任何看倌如何對待黑天鵝理論。）

前言

The Black Swan... 係由某學者 Nassim Telab 寫既一本書。而當中既 Black Swan Theory 大家都應該耳熟能詳勒，少了解既，查下 Wiki 條 link 啦。（蝦，咁我又寫乜鬼，真係發癲。）

依家坊間好多人都講咩咩係 Black Swan （即之前無人認為會發生既 unexpected 事件），或者咁咁先係 Black Swan。查實呢，我真係聽到...厭。（多多得罪）點解呢？因為我只係凡人，對於日常經常接觸到既野都有 threshold。接觸得太多，會飽死。又因為，對於我黎講，Black Swan 並唔係咁用囉。（係，我係鑽牛角尖）

有前因？

就本書所提出，"almost all consequential events in history come from the unexpected"（抄 Wiki，大意即 "歷史上各肥皂劇都是由於意外所引致"）。呢句說話對於小弟，並無一個當頭棒喝既感覺，反而第一個反應係：鬼唔知阿媽係女人咩。不過諗深一層，其實呢個意思無講錯，因為包括我，都好可能認為好多野（尤其某些過去事情）都可以推算到一個 "前因"。

不過之所以我如此反應，其實可能因為我本身對於歷史認識不足，根本唔知各種官方/科學化既"前因"，所以並無受到太大衝擊。（好明顯我呢d叫不學無術）

又而且，我覺得之所以沒有多少可靠前因，因為歷史過程同影響是由"人"所組成，由"人"去作反應。歷史只能夠反映人某些"行為"。而"人"對於所謂前因既判斷，根本從歷史紀錄上，無法獲得確定。史實和史觀（註：Elvis對於史實史觀寫得精彩，教小弟敬佩羡慕不已，不過最近佢 privatize左個blog，無法連結相關文章，遺憾遺憾），只能反映"人的行為"（尤其這些行為乃集體性，而非個人性的） 。可是，呢d人既行為對於如何/能否影響歷史進程，於我，有很大很大保留。（ 唉，講起又諗到特首文革論，不日再談）

補充： 小弟並唔係否定事出無因，正如 Geoffrey 兄所講，每件事都有其原因，我既意思係每件事情既發展，未必係因為 "人" 所推斷得出既 "原因" （例如唔同史觀所帶出既原因，都會唔同），反而可能係因為一連串人所睇唔到既原因（亦以後都無人知道既原因），呢d原因，就係所謂 the unexpected。

The temptation to predict

雖然作者企圖強調 "Black Swan logic makes what you don't know far more relevant than what you do know."，但係，好多讀者都唔理會呢個含義，並嘗試猜測下一個黑天鵝會唔會/幾時/咩情況出現。

其實預測唔係錯事，仲係"人"為左令自己對於前景覺得安穩既一種好普遍既做法。不過，係quote 黑天鵝理論既同時，又問會唔會/幾時/咩情況出現黑天鵝，咁似乎，好似等於一方面 quote理論，一方面否定理論。（或者係我理解有問題，但我真係覺得呢個情況好有趣。）

On focus

重點係：歷史呢樣野，以史實而言，根本無"重點"。唯有史觀先會產生"重點"。

雖然小弟同意："almost all consequential events in history come from the unexpected"，但係，世界既轉變並唔係由一連串所謂的 "consequential events" 所組成，反而係每個人好微小微小咁集合累積而成。這些"連串事件"，只係史觀所形成既焦點。簡單黎講，Black Swan Theory 雖然提及 Unexpected events，但並唔代表歷史因為 Unexpected events 而左右。

此理論既讀者，好容易會產生一種虛假既想法，就係：

1. 歷史係因為 Unexpected Events 而成就
2. 就算我地唔可以推算呢d events既產生，我地點都要做番d 事後準備（或者 Contingency plans）
3. 結論：Black Swan Theory 點樣好，點樣掂

以上三點反映，讀者好容易過分看重黑天鵝理論所提及有關 Unexpected events 既影響力，但其實只係讀者對於呢個理論 "合情但不合理" 既期望。（呢個期望源於呢個理論既來源，即 "黑天鵝" 本身）。

...唔明白？整個錯誤就係：過分強調 Unexpected Events 係歷史同世界發展既功能，潛意識上否定左個人既努力/選擇同埋各項最微小事件既相互影響，於我，其實世界發展根本不在乎所謂咩 "Episodic events" 或咩 "100 great impacts that change the world"。

...唔同意？咁我就用番 Thomas Edison 既名言：Genius is one per cent inspiration and ninety-nine per cent perspiration 同埋 Winston Churchill 既 Courage is going from failure to failure without losing enthusiasm 去表達我對於所謂 great discoveries 同 unexpected events 既態度。

Perception of 911 as a Black Swan Event

完全唔同意。

對於美國人，甚至其他有睇過 911 呢件事既人，都可以係一個好大既 Surprise，而且影響受害者家屬既心靈、影響唔少人對於恐怖主義既態度... 有人話，意義深遠。

但其實，我相信 911 係50-100年之後，所謂深遠既意義，不過同依傢好多人對於文革一樣，漸漸被社會遺忘。例如，我地可以反問，若果記得半島戰爭時候既游擊戰爭既教訓（或可採用更好既例子，呢個例子反映，911只係另類既游擊戰），就會避免 911？但要留意呢度同作者曾反問如果採用了點樣點樣既情報，能否避免911既意義唔同。

我呢個問題既意義係：歷史事件其實係度不斷重複緊，呢d所謂深遠既意義，其實根本沒有意義。

歸根究底，人根本唔能夠避免所謂 unexpected events：

其一因為萬事既複雜性；
其二因為"群體"唔能夠有效學習；
其三因為"群體"唔能夠作出有效判斷；
其四因為呢d 所謂 unexpected events，根本係由人做出黎既。

正如 911，根本係 Al Qaeda既精心策劃，同黑天鵝理論中既 "自然性" 同 "隨機性" 不能混為一談。狹義一d黎講，911 對於 Al Qaeda，甚至對於部分痛恨美國既人，係呢一刻，絕對唔係一個 unexpected event with great impact，因為呢d impact已經開始消失得無影無蹤。（嘗試問問佢地既意見啦。）

視 911 為 "大件事" 既人，只有美國人（等）。呢隻所謂黑天鵝，好似已經越飛越遠。過左幾十年或者百幾年，又再次發生類似情況之後，又以為呢隻鵝飛番返黎。其實，呢隻鵝，根本就一直係身邊。

Laser, PC, Internet 係黑天鵝？

同理，咁電燈、飛機、紙筆墨硯、粥粉麵飯都曾幾何時係黑天鵝卦。

或者喇，但係，究竟呢d產品第一次出現既時候，究竟引起幾大既回響呢？係咪好 unexpected 呢？大佬，比著我只係100年前既人，依傢咩都預料唔到喇！

我既意思係，若果黑天鵝要造成衝擊，咁呢個衝擊真係攤長左好多年囉。咁係咪未見過 Internet，一見到先發覺原來世界已經係圓既，先叫衝擊呢？我咁大個人未見過黑天鵝屙尿，突然有日比我見到鵝原來唔會屙尿（其實佢地係屙固體既 Uric acid），又係咪 Black Swan Theory 作祟呢？

對於我，黑天鵝其實係一群又一群，但又只係令人震撼，再被人遺忘，不斷重重復復再震撼又被遺忘既黑天鵝。歷史/世界上，根本無單一既黑天鵝。

Personal Black Swans

話分兩頭，相對歷史，以個人作出發點既 Unexpected Events，就可以引起好大 Impact。例如一個車禍。

車禍前，司機之前估唔到，計算唔到，盡力避免但總要發生。

大而持久既衝擊，始終對於個人，先有意義。

When Black Swan meets Paradigm Shift

黑天鵝理論，從我個人觀察，最有效既範圍，只係個人、其次群體，絕不適用於特定某時期既所有社會，甚至人類整體；時間性而言，只適用於一個 Period、最多一個 Episode，完全不能用於歷史。

坊間流傳既 Paradigm Shift 適用於個人，但對社會則有好大爭議性；不過對於科技實用性黎講，Paradigm Shift 代表住劃時代既轉變。

從小弟角度黎睇，黑天鵝理論隱含 Paradigm Shift 價值，而非相反。但 Paradigm Shift 並沒有黑天鵝理論中既 Psychological Surprise 元素。而黑天鵝理論中所述既一連串 Unexpected Events 既元素，雖然企圖以 "歷史性大事件" 黎作推論，但並唔能夠說服小弟，因為所謂 "歷史性大事件" 只係由人性史觀所建立，嚴格黎講，人從所謂歷史性大事件中所得到既意義，只能 "推論"（即黑天鵝理論所反對既方法），而唔能夠獲得證實，甚至建立有決定性意義既關連。

Tolerance, Sensitivity, Assimilability

對於我黎講，Black Swan Theory 本身（留意：唔係話"作者" 或該書，而係理論本身）所帶出既，主要唔係關乎 "Unexpected 或 Surprising Events"，亦同點樣處理黑天鵝所帶來既後果唔係太大關連（恕罪恕罪）。最大的關連，其實係同 Tolerance of Uncertainty/Unexpected （即對於不明朗/意外情況的容忍度）有關。

從社交關係黎睇，由自己到身邊人，到鄰舍、社區、國家、其他國家、火星、銀河系等等...... 一路往外輻射出去，對於突發事件既容忍度會不斷提升。自己打擊最深，社區以外既地方早已未能感受到其切膚之痛。而對於呢d 突發事件，唯有自己敏感度最高，覺得所有事情都係沖著自己而黎，但身邊人，已經開始覺得你過分敏感，國家嘛，認為你只是民意中既一個微不足道既百分點。再且，當呢d突發事件牽涉到越黎越多人既時候，人越多，消化能力就越高，對於所謂大事件既影響，亦會驅散得越黎越快。

即係話，Black Swan Theory 按照 "數量" （尤其人）同 "距離" （尤其人際關係） 成為決定衝擊係咪重大既主要因素。

但我會進一步問，有咩 Great Events 能夠帶黎足以令整體 (1) 覺得 Unexpected, (2) 受到深遠影響？

以上問題，恕小弟才疏學淺，我覺得從世界角度，呢種 Great Events 幾乎不存在。於社區之中，呢種 Great Events 好快就會被遺忘，但又係歷史中不斷重複。

Black Swan Theory 對於現今既世界，並唔能夠幫助任何人去解釋所謂影響世界/經濟/政治層面等重大既事件。黑天鵝，其實相當個人化。

結語

（呼。雖然錯漏百出，但終於可以瞓餐飽，唔洗心掛掛。）

Black Swan Theory 比我個人最大既價值，就係比我再次見到 Halo Effect 再一次展示強大既影響力。

對於我，Black Swan Theory 既可讀性 "指數" 與 Da Vinci Code 同等 ～～ 睇少一本書，完全無壞。（係呀，我不學無術。有偏見又點？人生苦短呀我。正如我呢度，你睇少一篇都賺左時間啦。）

- E&OE -

***************

2008/07/19：歌德哥哥睇完本書之後講黑天鵝，仲正呀！

佢認為本書主旨無上篇Fooled by Randomness咁清晰。而我呢，就抽左一d我覺得係佢個重點：

1. casuation，correlation，同埋「科學論證」既問題
2. blackswan一書最有意思既係，佢背後既論證，或哲學
3. 哲學上懷疑論對「科學知識」既質疑
4. 最重要，亦都係重點既，其實係「知識論」問題。亦即，懷疑論問題
5. 當我地試圖汲取資訊，又或媒介嘗試給予我們資訊時，我地應該要懷疑資訊既「可信性」。
6. Karl Popper, Thomas Kuhn 既哲學. （尤其Popper，超重要）
7. blackswan一書最值得讚頌既係，係過程，而非結論

一百步紀念日

我嘛。呢篇查實係第一百篇。

若果根據之前口聲聲話，一個星期寫三篇，咁應該係2007年3月左右已經達成目標。依家足足遲左成8個月。又想湊夠開舖一周年先寫，但諗諗下，忍唔住爆出三個字：哈．哈．哈。寫咪寫！

原本今篇想寫d野紀念下呢個整數，不過又發覺，原來當人生踏入某一個整數，成個人既思想都會突然轉彎。原本人生好好地應該係一條好連貫既 Sine Wave，突然到左呢d 整數 moments，滑滑既 Sine Wave 突然多左好多稜角。

唔知係好彩定唔好彩，呢d多左o係我「歷史」既稜角，都係比較細微，無咩值得回顧。觀之其他人，佢地既歷史稜角，有時真係好岩蠶，好值得紀念。

不過從另一方面睇，我既「歷練」稜角，反而變得岩蠶。以往待人處事既方式，都有好大轉變。或者身邊人唔多覺，但其實我既陰暗面，同呢d稜角一樣，越黎越明顯（或者越黎越陰暗）。我嘛，呢d先叫做「偽善」，其他人唔該借孭。

所以嘛，好想講句：我，「萬劫不復」（或者：晚節不保）。我想懺悔，都已經太遲。

雖然多左呢d 岩蠶稜角，但亦有一樣值得自己老懷安慰既係，我個 Core Values 仍然都係（暫時都係）無變：學習。雖則睇番轉頭，似乎學壞左居多。

呢篇一百步，寫比可愛既你．妳．您，同埋．我既 Da Da。


... 到最後，都寫唔出一隻字紀念呢一百步...... 算喇。（呢兩個字係人老左既標記。）


[蝦，近排呢，我鋪批評癮又起，想講下 Black Swan，Long Tail，Best Practice 既 Halo Effect 同埋 Democracy vs PM。（... 查實我係講下啫，邊寫得出丫）。]

叛

對工廠保安工作、甚至咩係管理，都一無所知，對國情更加係白紙一張，兼任呢個保安部主管一職，外人眼裏係不自量力，而我只知道，有何不可？做啦！

廠房，分南北兩廠，相隔一街，另宿舍數棟、飯堂兩個。

老狐狸，五十零歲，廠長，聲大夾無準，但經常係旁邊搞小動作。慣哂。（佢同我都慣哂。）

阿辛，四十零歲，副廠長，原兼任保安部主管。比我接管當然有d唔高興，覺得老闆懷疑佢能力，不過，佢都算合作。佢份人... 算啦，我都幾尊重佢咁喇。

保安隊長阿袁... 你，我知你想我走，當然喇，我年紀比你輕近廿年，經驗比又你少一大截，連普通話都唔曉，做你老頂，我都覺得唔好意思。呵呵，唔好意思！....... 不過我係要食住你！

副隊長阿非，二十來歲，高中畢業。最值得我信任。

隊員阿風，二十出頭。對我講從家鄉出走，因為當時參加左傳銷，欠家人同鄉親一大筆，於是走黎呢度打工賺番d還錢。其中一隻食指比一般人短，似係工傷做成。

隊員阿禮，二十出頭，剛剛從軍隊退伍，直。講野都直。同樣為左傳銷離鄉，所以同阿風私交甚篤。

阿梁，三十餘歲，報稱退伍。但當我叫佢寫出當年學過咩槍既時候，佢個答案呢...嘿。深藏不露，要小心。

阿標，三十餘歲，報稱退伍，阿梁之堂弟。古惑，講就天下無敵。

老龍，五十餘歲，主要負責宿舍保安，原來同阿袁係對頭人。

另有其他隊員，包括日夜兩班，全體共16人。（d名就快唔記得哂）

**********

接管保安部不足一星期，終於寫好一份保安計劃書，全書18頁，用手寫（唔曉打簡體字呀！點呀！五筆？咩黎架...）原稿比老細，副本比阿袁再轉交下屬傳閲。精華包括分區範圍、巡邏方式、隊員守則等。（按：現已失傳。）

阿袁話全部隊員閱畢。好，唔該集合所有非值班保安黎一次會議。

會議中已經唔記得自己講乜，總之普通話加廣東話大兜亂。其中一位哥哥仔因為某某有病，所以未能前來。好。（事後老龍告知因為呢位哥哥其實去左同某某人之老婆幽會，所以...... 但唔記得最後有冇比人揭發）

會議之後，雖然都知道阿非未必能夠完全認同我既方法（當然喇，乜都唔曉就做人大佬），但係都明白我既用意，亦採取合作既態度，配合我既調動...

題外話，所謂調動，有時可能係果位高高在上既老狐狸搞出黎既...（達賴喇嘛！果度無人睇住個門口喎，我都話你地班保安唔得架喇...） 嘩，好有共鳴！自然和應 NLM。

講番轉頭，阿非就合作啫，但阿袁就唔係囉。一黎阿非年輕有為，二黎都知道自己都係呃飯食啫，三黎梗係因為身有屎驚比人踢爆喇。所以，阿袁表面上就同我合作，實際上就同老狐狸串謀。

查實佢地兩個老師傅串謀我都無咩野（包括心情），反正我香港黎，最多咪香港去。不過咁，我係度做緊野，就咪搞亂檔！成日話我呢個保安要炒，果個保安唔應該請，喂喂喂，d保安唔係我請架，你當時同意咪你炒鬼左佢地囉！所以... 你講咩，我都左耳入右耳出啫。最難為既，其實係我 d 細，搞到佢地漸漸唔敢撐我。

**********

阿袁嘛，嘿。你遇著我，總算係你唔好彩。用左一段短時間，就摷倒你同以前果幾單工廠偷料案有關連（喂，你明明果幾晚應該當值，點解咁啱你又調左班？！），仲比我捉過你幾次夜班當值瞓到嗝嗝聲添（...淩晨三四點呀無陰功）。哈，你d痛腳咁多，弊喇你！

老龍、阿非分別都同我講過阿袁其實同阿梁、阿標等人（即係唔只佢地三個）正暗自開會，似乎對我有所圖謀。哦...既來之則安之啦。（好彩我都有準備。）

至於阿梁呢個衰仔，坦白講，有時我真係捉唔倒佢究竟佢立場係點。雖然我好清楚知道佢入廠其實立心不良，但係，既然我封殺哂佢要攝既位，我係唔應該咁緊張。（嘩，真係無人知道我用左幾多心血去防備佢地，又，我可能唔應該徙咁多時間去做，反正吃力不討好）至於我咁著緊，又可能係因為第一次做人大佬卦。而阿梁佢，老謀深算，Friend or Foe？ 要抉擇。我都捉過佢瞓覺，事前仲信誓旦旦咁話絕對唔會。唔會？呵呵，睇下點，咪又係衰比我睇。

而阿標呢？呢份人做衰野太容易被人揭穿，所以不足為患（我估）。佢又太多口。所謂言多必敗，佢副底牌不過係老頂面前唯諾，背後藐嘴藐舌，連最蠢既都睇到佢副嘴臉，不足為懼。

阿風。雖然已經事過境遷，但其實我到依家都未敢完全相信佢。佢曾經做過某d野令我好懷疑佢既誠意（不過我已經唔記得確實係咩事）。係。我係容易相信人，所以我會加倍時間去證實我有冇睇錯，不過到依家我無得再證實啫。夜闌人靜，一樣好瞓。

最後到阿禮。唉。呢個後生仔。唉。等陣就明白......

**********

清君側。面聖。

呵，誰不知老細竟然叫我 hold 住阿袁單 case ！撞鬼，老細，你係咪琴晚輸左 80底麻雀？

仲話鍾意阿梁呢兜友仔添（話曾經好醒目咁送老細返宿舍），大鑊。

**********

突然一早，阿禮同阿風一齊係廠門口等我返工。阿禮口鼻流血，仲甩左兩隻門牙（無錯，係門牙！）

事緣係阿袁帶住全體保安做晨操（以往停左一排，係我叫佢地做番，最初我都在場好好地），跟住... 總之有d踫撞，再有口角動武。阿標從後捉實阿禮雙手，然後阿梁就出拳打左幾野。最後例牌散場。

大佬，依家我做咩都無用... 老狐狸同阿辛叫我應該即刻報公安，仲話因為係非工作時間，所以唔洗賠工傷，然後借機炒哂班友仔。（Well，咁既事應該點做我唔識架當時）我問番阿禮點解唔報公安，佢就話因為我可以同佢作主，主持公道（無端端做左包青天），所以一定要通知我。咁又唔打我手機？無？頂...

好，先帶阿禮去到醫院。我比錢。唔記得比左幾多，總之無問老細攞番。然後同阿禮、阿辛去報公安。

公安之後開架吉普警車車我地幾個摷兩條友出黎，最後搵到阿梁。阿梁賴死唔認，仲係我面前裝傻。天，我原來之前比機會你地只不過係令一個後生仔以後要帶假牙！心情... 唔識講。

阿梁最後被囚禁係派出所，幾時放出黎，唔知，罰幾多錢，唔知，以後佢既一切，我都唔知。

至於阿標，就好似無事發生過咁，仲係廠門口附近抖黨等阿禮同阿風結完工資出黎，要找晦氣。（其實不外乎要錢... 我估）

我見到當然扯火，未諗過自己係人眼中有幾矜貴，然後單槍匹馬去同呢條 LT 講數，打完人地兩隻門牙仲要攞錢！

Well，火還火，但係我關注既，唔係我，係兩個後生仔，我終於做左一個我知道以後都“唔會”做既決定，私自比左300蚊比阿標，叫佢以後唔好搞佢地兩個。阿標當時都同意，仲話其實唔關我事... 不過，唔關我事又點，錢照收。

番到廠，我同兩個後生仔講，你地兩個馬上收拾所有物件，再三叮囑佢地要即刻離開呢個鎮，再醒多兩百比佢地搭車。唉，又係話一定一定....

**********

夜晚，我去另一個鎮夜蒲作反。

誰不知，阿袁一個電話比我，話阿標帶左成八九個人去宿舍要摷阿禮同阿風出黎... 頂，你倆兜友唔係仲未走下化...

趕番去，人去留空。

最後唔記得點樣，阿風接觸我，話果晚佢地兩個真係未走，（真係，頂，你地搞乜！）。

再再之後，我好高興，就係另一個鎮，見到阿禮，佢似乎都好開心，對門牙仲補番（唉...），返緊另一份工，係屋村做保安。

**********

我係度諗，咩叫... 叛？點解要叛？係咪我逼成？

我不曾為「民主」祈禱

肥醫生寫了一篇參加佈道會去慶祝回歸，然後再寫一個續集。

其中網友 Carla 寫的，讓我再次有機會看清楚自己對於「靈巧如蛇」的取態。但肯定的是，我欣賞她。

至於我嘛，慣於不守人道。所以... 後天待續。（嘿，一定唔會爛尾！）

*************

現續。

一禱三頓

當領禱人於主日崇拜中領大眾一起祈禱，說「但願這個地方會有民主」... 我便從專注中驚醒。

對，我相信，信徒之所以祈求，是因為信徒們認為民主制度，是一個合理的制度，能夠為社會帶來更美好的將來。

可是，一個共產國度，人人皆可平等地使用公物（很早以前不是說要同物公用的嗎？），不是更應該值得爭取嗎？何以爭取民主？是否因為民主制度能帶來什麼？（當然民主制度比共產制度好啦，歷史已經充分證明了！）

或許有弟兄姐妹認為我這樣爭辯無益，因為每個信徒都可以有自己的政治主張，而且，這個民主訴求，幾乎是社會共識，同心為此祈禱並無不妥，甚至更是以身作則之舉。

明白，好明白。讓我再次投入...

然後，當領禱的說，「經濟好轉了，我們應該感謝上主，因為... 」

不過，我又反射式地皺眉。若人知道，大概會說我性格奇怪，喜歡鑽牛角尖... 繼續...

領禱的再說，「我們基督徒，要... 」

此刻，我知道往後的祈禱內容，我都不應該是參與者，我默然。

民主、經濟、基督徒

現在的我，縱使我這個世代已經轉換為不民主，甚至王權，極權的世代，我也不會向上帝呼求「民主」。因為社會境況之好壞，不是因為民主，而是統治者有否濫用權力。人心之趨向，也不是因為民主，而是各種人民如何對待歧異。

人說，C.M.，你都說你自己是民主Skeptic，當然不會在禱告中支持喇... 對！其中一個原因正正就是這樣！既然有人會不同心，為何要為民主祈禱？

民主，可屬信徒的人生目標？聖經內有說我們要支持民主嗎？或你會反問，民主不好嗎，何以不能祈求？

我，不是阻止信徒們祈求，你們求什麼也可以，而是，於我，求民主，對自己無益。對於禱告，我會很關注用詞，因為每個用詞，背後都隱含大眾的理念。而這個理念的背後，是為了心靈，還是為了身體？民主制度，能創建心靈嗎？

若認定耶穌為榜樣，祂曾否為羅馬政府如何執政而祈求？

經濟好，心靈就好嗎？經濟差，心靈就差嗎？

「好了，若經濟好，窮人便得益。經濟差，便會有更多窮人受苦。」

光以現今的情況而言，經濟好了，窮人得益了嗎？經濟好了，公義就“順帶”可以彰顯了？

「C.M.難道你想經濟差，連自己一家人三餐不繼，就是你所祈求的嗎？」

不。無論經濟好壞，我們也為生活奮鬥，不過，為經濟發展而祈求的同時，會否同時為自己的安穩舒適而祈求？又，若為窮人家三餐溫飽祈求的同時，會否同時為自己“毋須介入和付出”而祈求？又好了，若你大公無私，那請你再問一次自己，為何要為經濟祈求？

若認定耶穌是榜樣，他又如何為耶路撒冷的經濟而祈求？

「可是，基督徒不是要關注鄰人和貧乏人的需要嗎？我們基督徒應該要行公義，好憐憫，存謙卑的心與神同行！」

（明白。但在此往後所寫有關“我們不應自稱基督徒”的言論，請有心人自行取態。）

不錯，「信徒」們應該如此行。但是，當信徒認定自己就是個基督徒的時候，他往後的日子，就有機會無端為自己肩負一個笨重的泥耙，“活在別人，而非神的要求當中。”

信徒們，你們一定不記得《使徒行傳》第十一章26節所寫：「門徒(被)稱為基督徒，是從安提阿起首。」 (The disciples were first called "Christians" at Antioch)。

由於信徒的行為，所以“被人”稱為基督徒。（？？？）

信徒們，你們努力爭取成為榜樣，原是值得敬佩，值得欣賞。不過，從開始認定自己就是基督徒，就等於從一開始認定自己就是榜樣。或許信徒們沒有察覺到自己究竟是何時開始稱呼自己做基督徒，但容許我問一句，你們曾否稱呼自己為“信徒”？

「C.M. 你太執著。」

是，我執著。因為我所看的是，得救，是從恩而來；但名譽，乃是從人而來。而這個名譽，就是一個信徒，能否得人的確據。在得人以先，我不能容許我借基督徒之名，擡高自己得救的身份。原因一，乃不符基督徒之出處，二，因我作為信徒，還需要一個目標去爭取。

你們稱自己為基督徒的時候，如何制定自己的目標？靠教會上升了多少人？靠點算多少人決志？作為信徒的成功，就一切靠“自己”去量度？

因為我，要靠人家去量度，所以我，執著。

聖經、人、謙卑

Carla, 認真地說，我是敬佩你的。因為我知道，你愛人，也很認真對待「真與假」。

我作為一個平信徒，未受浸禮，也未嘗餅和酒之味... 這刻，我的心情，就正如我寫《神跡於我》系列時一樣... 無人見到。

你在肥醫生網誌中的留言，容許靈性貧乏的我，回應你給我的回應。我這篇回應，不是針對你，而是聽到的信徒們，包括各位認為自己的是信徒或基督徒，甚至靈性長者的人。

我明白你們在爭取人，爭取順利舉辦佈道會時的難處，這些難處，定不足為外人道，也從當中可以看到自己想爭取的順利。作為沒有參與是次佈道會的人，我不能質問你今次「靈巧如蛇」的必要性，因為已經做了。沒有人知道，若沒有如此做，繼續堅持，會有什麼後果。不過，這些都不是重點。

因為，我希望你明白，「靈巧如蛇」，不對「事」或「物」，而是對「人」。亦只有對「人」。

有人說，聖經，所述說的，是救恩、是歷史、是神與人的約。不錯不錯，作為平信徒的我，這些統統皆是。不過，還有些同樣重要的，你們看到嗎？

就是「人」。因為神所關注的，不是政制，不是經濟，不是「約」本身，更是徹徹底底的「人」。

信徒們，你們所認識的「約」，是一種約束性的誡命嗎？背後所關心的，還不是「人」？

何以關心？還不是「愛」？

從聖經中，你們認識「人」嗎？有否領略過，「得人」之道嗎？全本聖經都在敘述「人」的時候，有否學習過「人」的種種？信徒們關心「人數」的時候，關心有沒有下雨的時候，關心是否需要妥協的時候，你們有否關心過「人」呢？我當然知道「有」，但是，關心的「人」在前，還是「後」？謙卑的意義是什麼？

我會如此看謙卑

謙卑需要學習的嗎？不需要。因為「學習」本身，就是謙卑。

我並未有看完全本聖經，但敢大膽地說，神大抵沒有叫我們「學習謙卑」，祂直接只叫我們謙卑。有時候我們或會覺得，神要我們謙卑，就是屈服、臣服。因此人或會覺得，神，是有強權無公理。可是，謙卑於我，根本跟屈服、臣服完全不是同一回事，所以我膽敢說，神，沒有叫我們“學習謙卑”。

叫我們謙卑，就是叫我們學習。向神謙卑，就是不斷的學習。（這裡的謙卑是主動的，被動的，我暫且稱作謙虛。）

《兔子和狼》所講的職場衝突管理，說穿了，其實就是「學習」對於人生起跌的影響。也就是說，謙卑，作為「做人」，以至作為「做信徒」的背後的方針。

唯有不斷的「學習」，才會明白何以神要我們「悔改」。因為「悔改」，就是徹底打破舊我，重新上路「學習」的意思。而作為「人」，作為「信徒」，「學習」背後的目的，就反映你「對誰謙卑」。

你現正準備對誰謙卑呢？

Cleopatra 的男人簡史

我叫 Cleopatra。

渣估同怒火眼睛前排寫情史，鼓勵左我寫番篇男人簡史留念。

先講下我自己。

我，外表麻麻。個名仲成日比人話太長，發音有難度。雖然都叫 Cleopatra，但就肯定我唔係可以傾國傾城果隻。

做開 Boutique Sales，日日都會見到唔同既客人。不過可能黎我地Boutique既都係女人，所以識既男人，都係"有根有據"，絕對唔隨便。

不過我呢班男人，唔係全部都係情人，有d，係知心；又有d，算一刻霧水；大部分，其實只係我呢個簡史既路人甲。

Achilles，係我個首任男友，當年大家無啦啦走埋一齊。雖然佢屋企人都好鍾意我，而且大家有過一段開心既日子，但路途曲折，分手收場。

Belisarius，與 A 相識，我地兩個曾經有過一刻火花，但因為 A 既出現而安樂告終。

Caesar，倉務部主任，年輕（當年）靚仔（依然）。因為果時同 C 經常出雙入對，所以被其他同事一致看好。不過後來 Cecilia 主動出擊，我嘛，醒水退出。

Donitz，補習班同學，曾經有段時間同佢單獨去街，有日係牡丹樓問我，可唔可以講清楚我地兩個既關係，佢話好迷茫。

Elliott，新來行政部同事，又一個年輕靚仔。阿 C 同 Cecilia 係一齊之後，各同事大跌眼鏡，替小妹不值。又因為我無機心，所以周不時同 E 去街。再次引來其他同事誤會。

Florentine，物流部新星，見到我就口花花。單身，有學識，又靚仔，好男人一個。

Gardner，來歷不明新同事。因為 G，我同 A ... 必須了斷。但佢經常生活於上流，同我呢種鹹魚青菜既女仔，根本唔夾。自從佢同另一位來歷不明既女仔一齊之後，我往後幾年都放唔入其他男仔。

Harvey，進修班同學。唔... 唔知點解，我對佢有一種莫名既好感，但佢就若即若離。

Iverson，新公司會計部精英。都係我衰，講野無分串。有晚捉我出黎，問我承唔承認我講過既野，死喇，我係講過，但不過成班人搞下氣氛遮...

Jenkins，我第二任男朋友，同事。曾經一齊落 disco 比警察查牌，見我地兩個無乜可疑，於是淨係的左我地兩個出場。原本故仔到此為止，但後來比人唱話我地兩個落D fing頭，然後咁咁咁咁咁...

Kesselring，又係同事（好悶）。大時大節，竟然約左成棚女仔飛起我。我足足萌左幾個月。個仁兄仲話唔知點解我啦啦啦咁耐。

Lafayette，銀行職員。又係我衰多口，講咩話無男仔吼遮！我唔係 X 剩蔗！

Massena，絲絲入扣，不過我知道，佢對我好，非因男女之間，而係我倆心靈相通。

（監考官： 各位，時間到。Times up, pens down. ）

......

監考官： 喂，好停喇，如果唔係就......

Cleopatra： 係幾年前，我已經同自己講過永遠唔再聽、唔再唱呢首歌... 不過，今日，我實在無能為力...

Love will abide, take things in stride... And I never drew one response from you... Wait for the day, you go away. Knowing that you warned me of the price I had to pay...

Linda Rondstadt - Long Long Time


監考官： 喂，好停喇...