Tuesday, December 15, 2009

憶三互不相干的事

頭昏腦脹,憑記憶寫敍述的為上。

人性

早前在苦瓜兄一個post內提及點點人性。有不留名朋友的感受是:「人性自私」、「人性虛偽」。

的確,誰個不是?分別在於,你如何看待它的自私,它的虛偽。

吾恩師曾告訴我,(1) 若不接受人性自私,就永不能訂立出更好的規則去把自私的人性轉化為利己利人的結果;(2) 若不接受人性虛偽,就永不能發揮更大的影響力去把虛偽的人性轉化為利己利人的結果。

若代入文化/制度論,前者似乎是以制度先決作考慮,後者則以文化先決作考慮。個人經驗告訴我,若順著這位恩師的想法,可以加大一個新計劃的成功機會的。話分兩頭,正是她提示我因著人性自私,可以循self-incentivized institutions 的方向去探索的。不過,人性虛偽嘛,此刻我仍不甚了了,辜負恩師。

世上無難事,只怕有心人。苦笑。

子女相爭

男女不一定相親,姊弟可以不咬弦。相爭之景,見者足氣上心頭。仿效名師專家之言隔岸觀火,如炒作三四線老千股,脷底丸除顫器須隨時候命。

或許百年歸老之時(或兩化骨龍見字),方發現原來得啖笑(或許)。

Makeshifts and alternatives

物資短缺,可以三餐餓肚一餐飽,也可以餐餐生雞蛋豉油撈飯。

Makeshifts 未必最好,卻足見毅力。Alternatives 未必最適合,卻足見胸懷。

垂手可得,樣樣最好最適合,卻不知 makeshifts 和 alternatives 為何物。我笑。

(實際上還有第四件:Spam 太多,自拆唔set comment verification既貞節牌坊)

Monday, December 14, 2009

意願的質感

閱罷大力哥哥一文,感覺社會少了質感。

「這個搬遷決定,反映了社署只以生硬的人口數字資料作服務規劃的弊病。」

很久前寫過 KPI。想說的是,運用一切數據作指標性參考都會衍生無數弊病。如果要分誰最清楚這些弊病,我會認為依次是:做統計的人 < 分析統計的人 < 把統計資料以自己方式發佈的人。

商界如是,政界如是。

所以有不少情況,商界或政界為免跌入陷阱,都會棄用單一指標,(至少)改用綜合指標(Composite Index)。雖然單一指標太顯眼,容易受人為操控,而綜合指標則較有層次,但用家難以理解當中的層次和關係,要社會大眾或公司群體接受並不容易。

可是,對於現代社會要求所謂程序公義的層面來看,更需要從單一指標變革至綜合指標。否則,小至公司內部的個人表現評核、市場份額增長率,大至整體社會的消弭貧窮政策、經濟發展政策,都會隨單一的意願溜走。

宜慎之。

Wednesday, December 09, 2009

樂趣

十六世紀名油畫家道爾認為人生最大的樂趣,不是讓自己達至世界的巔峰,而是在抵達巔峰之後,刻意讓人以為他是一個無能的弱者。

所以在他一生所繪畫的百餘幅幅幅巧奪天工的油畫內,都在顯眼的地方,故意加上一些瑕疵。畫蛇添足多此一舉有之,禾稈蓋珍珠鮮花插牛糞有之,總之破壞美好就是他的樂趣。

直到十九世紀末,一位名畫收藏家,珍,在Tuscany 一個小鎮的市集瞥見那幅只賣20歐元的爛名畫,憑藉她對於油畫的觸覺,驚覺這樣一幅漂亮的油畫原來被一點點刻意的荒唐糟蹋了。荒唐,正是她即時的感覺。

不過好奇心驅使她走遍意大利去尋找這位不知名畫家的其他作品,後來經過數年的時間收集了大約二十餘幅道爾的劣作,仔細發現原來那些被世間認為的荒唐手筆都是繪畫者最後的收筆,像其他名大師的簽名一樣。荒唐,正是她發現後的第一個感覺。

於是珍找來其他收藏家、博物館鑑賞人員去證實她的荒唐感覺,可幸她的感覺是對的。對於她也不可幸地,其他人知悉這個秘密發現,都出發去收集道爾的作品。從此她慨嘆只能開創先河,未能全部擁有這些荒唐卻又美妙絕倫的作品。

對於珍,最大的安慰獎是她最先擁有道爾的日記,並唯一有機會閲畢這本日記的人,珍在她離世前自豪地把它送給大英博物館,然後附上一張便條,引用了道爾的一段說話:

我喜歡油畫,因為它給我樂趣,因為它,給我樂趣。

而我,喜歡寫這個道爾的故事,因為它給我樂趣,因為它,給我樂趣。

就此寫給道爾和珍寥表謝意。

Thursday, December 03, 2009

窮人自白

我承認係窮,但唔承認係一窮二白。

若果你一聽到我話窮,然後即時(條件反射)「質問」我有幾窮,咁你不如先答我:窮人係咪唔可以有有錢人既生活態度先~

窮成點?舉個例子丫。阿鎚果篇《...憤怒》講連搭車都要諗過度過既「窮人」,我肯定有份。再唔係,佢入面講果位因被約「食飯而陷他們放飛機的不義」,呵呵呵,小弟好多時必定會係其中之一。最重要係,比對同輩朋友既生活環境、雜誌喜好、穿衣著鞋、電話相機、外遊次數、社會話題、配備更換率,90% 以上 incomparable,你話,咁算窮未?

不過,我唔承認生活質素差囉。

拿,咁我又唔係話我窮得有骨氣喎,亦唔會好清高咁話我唔想買車買樓買新電話買DSLR買呢買lou,我只係唔承認擁有呢d野響呢一刻可以提升幾多生活質素囉(假如我真係幾百萬未開頭,暗啞底個答案查實係:我唔係買唔起,只係家陣未有消費意欲遮。)

之但,我既諗法,並非完全同家中話事人諗法一樣。不過,佢經歷過既比我經歷過既艱難十倍甚至百倍,我諗佢應該比我更清楚「好既」生活質素係咩一回事卦。自從我試過杯麵做午餐兼掙人周身債既日子,我既精神底線係:有麵食(齋麵都得)+ 周身債但唔會比人追(有拖無欠) + 馬桶要沖到水(蹲厠,即mao厠也,可以接受)。用家陣有家室既士釘突,底線稍為上移至:全家有飯食 + 唔可以有重大債務 + 馬桶要沖到水。暫時黎講,呢個要求已經超標完成。幾滿意。

既然滿意呢一步,下一步,就自然係再提高生活質素。

全家一個星期去一兩次街食飯,算理想。茶餐廳或快餐店,舒服唔怕有束縛。如果食食下飯之時見到店員服務態度差而扯火,或者黎果碟餸貨不對辦之餘仲要燒到成舊碳咁樣既話,呢亭生活質素唯有下次補番。但又如果食食下飯果史碰到老朋友,或者快餐店免費upgrade 餐凍飲既話,呢亭,咪又係一次高質素生活既現實演繹囉。

係架,都幾受環境影響架。咁講真,查實個環境都係自己揀既,係咪完全受「環境」影響,我又覺得可圈可點 law 你話係咪先~

至少,暫時黎講我同話事人都覺得有「足夠」自主權,若果去鹿雨茶室要睇人眉頭眼額,或者去肆貴酒店要就住就住荷包,咁不如自在d,響街尾大家活整個套餐,一路猛鬧死女包周圍走,一路捉實死仔包唔比佢搞亂檔,爽呀。

不過都仍然有人覺得我地「捉襟見肘」。一個阿媽,一個話事人,甚至有朋友都係咁睇,暈。實情又未至於捉襟見肘既,只可以話,咁既環境唔可能滿足全世界。我睇,多數都係誤會黎遮。朋友約我出街食飯,一般黎講都唔會超出我能力以外既(唉,幾廿年無女仔約燭光晚餐喇,尋常食飯洗得幾多錢丫)。之但唔知係我顧家定係食古不化抑或童年陰影夠大夠黑,要我獨自去偷歡,心理障礙就好似天匯咁高(樓價+altitude)。唔係話事人唔准,而係丟低大細食住家飯自己走去食大餐,感覺太似朱門夜宴,但帶埋全家一齊又未必負擔得起(大數怕長計嘛),咳咳咳。有時朋友有怨言都在所不惜(死撐)。

關於呢樣野,家嚴會好唔同意,佢覺得我咁樣會失去好多朋友同埋 connections,甚至會失去「身份」。 或者咁講,我唔會因為失去一d 無法體諒我某d 基本個人需要既朋友而傷心(「上心」總有d既),真朋友自然會明白我(衷心感激佢地)。既然我要過既係一個響大多數情況都可以獨立自主既生活,包括為家人既生活作出最基本既保證,就要響適當時候「捨得」放手。

如果我追求緊外間所謂好徹底既「財務自由」,或者我真係會好在意身份,但我已經唔係細路,唔會將身份放響自己心口,日日比人睇住認住記住證實肯定,但亦唔會憎人富貴(點解家下做既得利益者係要好似罪人咁遮?),下下誅心論要你面壁思過。(講真,好似同人競賽跑步咁,我唔洗成日望住左右跑架下化?)所以興幸窮也好,比上不足也好,我越黎越覺得自己,甚至自己一家,都比大部分人「隨心」。

今日返歸見到家中老闆仔條「新」口水肩,原來係一塊大手巾仔圍住再用夾仔夾起既時候(汪洋大盜look),我就諗番起「窮則變,變則通」呢句老生常談。唔接受自己窮,又點通?

Tuesday, December 01, 2009

拍紙簿

犬女知道老父鬱悶,故送老父五份禮物。

女在拍紙簿前自言自語。
父在電視機前默默無言。
女在畫畫畫。
父在唧唧唧。

女:「送比你丫!」

父:「多謝~ 咩黎架?」
女:「Errr... 呢個係 XXX!」(言畢,絕塵)
父:「嘩,好多XXX喎。」(言畢,訣別)

女再在拍紙簿前自言自語。
父再在電視機前默默無言。

女:「送比你丫!」(言畢,絕塵)

父:「多謝~ 」(言畢,出神)

女又在拍紙簿前自言自語。
父又在電視機前默默無言。

女:「送比你,快d食丫!」(言畢,絕塵)

父:「多謝~ 」(言畢,驚醒)
父:「...咩黎架?」
女:「Errr... 係XXX黎架!」
父:「多謝~ 好好味!」(言畢,入神)

女又再在拍紙簿前自言自語。
父卻不再在電視機前默默無言。

父:「點解呢個XXX係度喊既?」
女:「哈哈哈,係度喊呀,哈哈哈~」(言畢,絕塵)

女繼續在拍紙簿前自言自語。
父繼續默默無言。

女:「送個哈哈笑比你,快d食丫!」(言畢,絕塵)

父:「!」
父:「多謝~」

女仍舊在拍紙簿前自言自語。
父仍舊默默無言。

女:「送個YY 比你,快d食丫!」(言畢,絕塵)

父:「多謝~~~」

終於,父不再默默無言。

Monday, November 30, 2009

贈... 如果

贈喜歡東張西望的人

如果拒絕承認每一代人都需要掙扎求存,日日埋首分析環境如何對自己不利,天天專注解釋萬事萬物如何壓制自己的自由,或許真的可以有一天,會明白到這些不辯自明的道理,或許,或許。

贈零零五

如果我能夠說一句話可以讓你了解到我的心意,嗯,我想我已經說完了。

贈Scarlet

如果我還對於名譽、面子還是過分著緊的話,將來阿仔阿女同樣也會選擇性地跟我溝通的。

贈Abigale

如果我現在才發覺我對你殘忍,你實在應該感到內疚。

贈牛牛

如果你信我是過來人,我會告訴你,若一切不變會讓一切痛苦,倒不如讓自己先變。

贈叉燒檔老闆

如果李麗珊及牟利銀行真的那麼可信,如果阿仔阿女能否成材於我這麼重要,如果阿仔阿女的將來和生死我不會顧念,如果我只會望天打卦...... 這件事真的不好說。

Thursday, November 26, 2009

此刻的人生目標

給自己一點誇獎,我的成就源自天資。若加點說教的味道,這個天資正是上天所賜的。

之所以說成就,大概意思就是笨拙愚昧的行為,輔以冥頑不靈的態度,添點自以為是的天資,得出此情此景之餘,竟還有機會寫下這樣的人生。

從功利角度,我就是死好命,或者是符碌過關。

會考相比同輩,學業成績差勁(沒女吼),僥倖進大學,論文的序像打大雷,惟跋是毛毛雨(因為沒女吼),剛畢業的工作渾渾噩噩,幾乎被上司炒掉(所以沒女吼),換過戎裝出來自僱換來一身欠債(更加沒有女吼),往後人生嫁娶如常,膽大妄為捱出兩個化骨龍(難道理所當然就此沒女吼?),輾轉回到原來工作的地方,繼續當個不進則退卻又進退兩難的小職員(禍延下代沒女吼)。若非有兩下子的三腳貓功夫,如今這口飯該輪不到我。

都是死好命。知人生福伏禍倚,好景不常,所以更不想符碌過關。

人心激蕩之時,可以振臂高呼人生有多少個十年。虛怯之時,又會想想身邊人又該值得有多少個十年?

此刻的人生目標,就是稍微的等待,輕輕咬牙忍耐,不作半點嘆息,積極打理好身體,為腦筋作點準備,好讓機會來臨之時,不會太過後知後覺。

此刻的人生目標,就是享受全家可以一起卑微過活的日子...... 開飯!

Tuesday, November 24, 2009

時政的保守觀點

我等作為主流市民,又無機會早起身去維園,唯有響呢度嗌下咪。

五區總辭

總辭目的,據聞為所謂「間接公投」(變相公投)。

1. 坦白講,從一個保守市民既角度,「目的」同「手段」唔適當,總辭既「結果」無法產生足夠說服力去確認係咪同「民主」(sort of)有關。兩個字:牽強。

2. 以上1.的感覺:傻架

3. 林瑞麟未開聲,都知間接公投要錢啦,爭在係幾多遮。不過,我唔關心錢點洗,或者洗幾多,最重要交待到點用,係咪「合法」就夠。至於係咪「低B」,我覺得凡係依正程序既都唔會好「高B」,咁呢個答案ok嘛?

4. 我唔明點解無人提出「直接公投」囉。

4a. 我唔明點解民主派(咩咩派咩咩黨都好)唔提出「直接公投」囉。

4b. 如果又係錢作怪,所以唔提出直接公投,咁「錢對於民主」又係咪好重要呢?(好勒,唔用「錢」,用「經濟力量」勒)

4c. 如果錢重要,點解「合理既經濟情況」唔可以係民主化既其中一個先決條件呢?(醒播,見我番炒)

4d. 唔係red herring。

5. 係咪越輸得起果個,就最想搞五區總辭呢?and vice-versa(我係話民主黨,亦係話社民連,更加係話政府... 唔明?睇多兩眼就明)

5a. 輸贏似乎好重要。

5b. 但點先叫贏,點叫輸先...

6. 如果無輸贏,搞「公投」又係為左咩?

7. 「公投」最大得益者將會係邊個?係咪應該要係「市民」?

8. 最大潛在損失係邊個?一定唔係老曾,話明間接,查實係「太間接」,點扯上去佢身上唔會有好大作用。

9. 五區總辭唔係政治化妝,而係化妝左既政治。

10. 阿靚仔,比十分鐘我係得咁多,亦好難比多十分鐘,唔夠貨。

10a. 其他市民想法:市民鹿1,市民波,市民鹿2

政改方案

我等保守兼無知既市民,聞說今次政改新加左五個民選及五個區議會互選議席。

1. 政府話可以「更加民主」(又或者增加民主成分)。我啞左。

1a. 「更加民主」... 咁我不嬲對於「民主」兩個字都好含糊既,所以我啞左

1b. 「更加民主」... 咁我不嬲都只係關心「民主文化」,所以原來咁樣就叫更加民主,所以我啞左

1c. 「更加民主」... 咁我不嬲都覺得睇得到既「較」「民主政制」都係市民直選議員既,所以我啞左

1d. 「更加民主」... 咁我不嬲都覺得連自己都呃唔到都照好暢順咁講得出,所以我啞左

1e. 「更加民主」... 咁我不嬲都覺得點樣政改都好,都唔好用「更加民主」做原因囉,注定我啞足一世

2. 我自己其實漸漸以「以法制為基礎的妥協文化」去定義「民主文化」囉

3. 將來會唔會改定義我唔知

4. 我唔明政府點解唔讓步,完全唔明白就算無左五個區議會議席(變直選又好,完全取消都好)有咩大不了

4a. 從政府角度,我唔信少左五席推行唔到政策

4b. 從「爭取更加民主的民主派」角度,我唔信多左呢五席就係民主倒退,但我亦唔認同係更加民主

4c. 從保守市民角度,我唔信政制會倒退囉,因為假假地,呢五席係間接從區議會直選產生

4d. 之但從個人角度,我唔信我一方面可以接受「間接公投」但唔接受「間接議員」囉(or 唔接受「間接公投」但接受「間接議員」)

5. 一個問題,點解兩個都要咁「間接」?

5a. 我只得一個解釋,有創意。

5b. 呢個創意,係creative,唔係innovative,因為洗錢未必有成效

6. 如果睇錢份上,政府讓步喇。

7. 點解唔叫議員、市民讓步?

7a. 咁你話點解要市民讓步丫?咁碎料,以後你有求於市民既時候,咁你認為會點?

7b. 咁你話點解要議員讓步丫?我無諗過喎。政府讓步,唔等於議員唔可以讓步喎。

8. 講共識喎。下?查實交換下利益,權衡下利害,咁咪好快共識囉。

8a. 不過呢個要求,唔係淨係對政府既,亦係對議員既。

8b. 要培養「以法制為基礎的妥協文化」,就係要慢慢試下點樣達到共識喇。

8c. 當然,我無話上街示威唔係以法制做基礎喎。

8d. 所以既然「依法施政」(雖然我覺得依法施政根本上好笨),做到足,依到法,咪算囉

9. 區議會嘛...

9a. 心態一:慢慢捱喇

9b. 心態二:我知足

9c. 心態三:為本區市民,我盡心盡力

9d. 心態四:繼續爭取區議會議員合法進入立法會

9e. 心態五:是但喇

10. 有得必有失得中有失,失中有得,解構主義也

10a. 市民施庵春對零五政改之見

Monday, November 23, 2009

人浮於...

罪該萬...

昨天我幾乎在圖書館丟失了阿女,阿女幾乎哭成淚人...

高官之一...

不管議員的質問問題如何裝滿彈弓,高官總需要風度和智慧,可是...

高官之二...

其實大家誤會了,點睛之處不在他的笑,而是他側側的fing頭...

促進...

要促進一個地方「以法制為基礎的妥協文化」,便需要「完善的」...

1. 公共財政系統
2. 公共衛生系統(例一)
3. 公共教育系統

Capitalism vs socialism...

儘管有人認為經濟學、社會學、心理學未必盡然是 exact science,但畢竟這些學科累積著數十甚至過百年的學術基礎,忽略這些基礎所帶來的含義,而單靠「目的」來指導行為,其結果必將符合這些學問所揭示的「問題」,而非讓學問本身在現實中解決問題...

需求先決 vs 供應先決...

Citizenship 先決 vs Leadership 先決。「文化」本身就是一個「社會需求」,一個社會有那樣的文化,就反映那些會出現需求,亦反映那些會出現抗拒。

普通話與英文...

日久失修,危危乎矣...

Infantrie greift an...

此書的重點是:

1. 凡被提到的名字,絕大部分都英年早逝
2. 戰場上最重要的武器是「手帕」
3. 軍官的高死亡率,與團隊的高成功率存在一個正面的相互關係
4. 戰爭遊戲最難 simulate 的,就是 fear factors...

First World War...

原來法國前線在戰事的高潮有過一次大規模的叛變,還讓我學到一個新名詞:conscientious objector...

丟失...

就在翻閲First World War 的史料時...

Thursday, November 19, 2009

惡保鏢與惡老闆

年紀大,機器壞,個腦又實曬。

查實呢排有好多疑惑,例如咩「貧富懸殊」,對於大部分既坊間定義,我都覺得唔太妥當。正因為關乎政策點樣制訂,所以我覺得搞清楚「貧富懸殊」個本質,甚至搞清楚咩先符合一眾產權擁有者對於公平既「期望」,然後再講採取咩方法對症下藥,咁先至叫正路。Well,咁話明係疑惑,即係我自己無結論喇... 腦栓塞,下次先講。

趁腦栓塞(阿邊個一定好開心),不如講下某日阿保鏢同阿老闆出巡果日發生咩事。

老闆興起,話要微服出巡喎。咁為左符合禮節,出門前當然要沐浴更衣啦。(題外話,市場部認為海豚可以promote老闆人性化既一面,所以整左一條同佢合照)


老闆出巡,自然有保鏢傍住。(睇實我呀!)

(拿,要睇到真實既一面,就唔好去最墟冚果度... 你睇,我巡得幾有風範!)

(查實我地有冇汽水機業務呢?買個番公司都好播。)

(老闆!我呢邊捉左個戴黑超既疑犯!... 不過我可唔可以飲汽水呀...)

(一齊飲都得,但你記得阿皇太后要你睇實我喎...)

(麻鬼煩,有得飲,跟實你又點話... 喂,垃圾桶烏糟架)

....
....
....
由於轎夫們行色匆匆,又見長途跋涉... 最終老闆保鏢需要共坐一轎。

(喂!唔好挨身挨勢黐咁埋啦!)

(我今日成日睇住你咁辛苦,X開啦你)

(唔好逼住我呀!!! -- 備註:不明此言出自何人,總之此起彼落)

(你做保鏢架咋!我淒!)


自此,保鏢與老闆每日都從朝頭早,爭到天黑。

Wednesday, November 18, 2009

晚飯餐單

今晚有灼菜心,鮮菇豬扒,豆腐蒸大魚,還有紅蘿蔔煲豬骨湯。

昨晚,不記得了。大前晚,也不記得了。

一般都是三個菜,湯一星期一次左右。

剛結婚的時候,三個菜會令我慨嘆吃得太飽。常著她,兩個菜夠了,一份冬瓜煮瘦肉,加一份青菜。

縱使有兩個小朋友在,我還是覺得,兩個菜已經足夠。太豐富,小妖精們還不是要偏吃那三兩味,大人們還不是一整碟留待明天清貨。

喜歡的話,一兩道板斧早可滿足半生。

不喜歡的話,萬人空巷大排筵席仍解不了一生的飢渴。
(掃興之言,還是說過就算)

Monday, November 16, 2009

各位醒定

您的中銀金卡主卡於2009-11-07簽賬HKD18879,查詢2853####,選語言,1,卡號,証件號,1,0

Sender: +85295009500820003300