Thursday, October 14, 2010

一月一度又甩look

忙到抽筋,講正經野唔夠閑情,心情唔好,講廢話都無心機。

求其講幾句,參與一下大眾「消費」。

紙扎工廠

真係自作孽,繼續死守紙扎工廠。就算忙到死阿蛇仲有新仆直要我跟,跟手有份生死狀要我去簽,簽之前要我渣扶埋個內容。真係佢都得。

我話不如唔好搞呢味野喇,簽左死唔去咪丟人現眼,如果有幸死左,咁我熬夜渣扶呢份生死狀既心機咪白費?唔好喇。我呢個星期已經得番半條人命啦,放過我啦。阿蛇話,咁牙?。。。你下星期一比我囉。(頂)

紙扎工廠雖然最近必唔到幾個大仆直,但舊客比既新仆直真係夠玩死我兩個月,到出年三月前又係我一支公去砌,諗番兩年前數手指既日子,俱往矣。

無黎政經

施政報告,無野講。有轉變已經算好事。要十全十美?揀啱果日結婚就得,搞民生邊有10年10月10日10時10分10秒架。

就算兌現其中3成,擴交通津貼,留港305日夠資格拿生果金(之但剩番果60日點算?),加書簿津貼.... 已經幾好。樓市點?花無百日紅,是但啦(萬一租左五年後我唔想買樓會唔會沒收打算退比我果一半?)。

都話領導力咯

唔記得響邊庶講過,竟然同阿示巴拿講既意思一樣,其中都話「有領導能力唔多,就算有都未發圍」。再記得上兩星期阿某某專欄,好似係阿王生,話人奢求有出現領導能力既人可以咩野「強政勵治」係無聊諗法(「無聊」呢個評語係我interpret得出既,並非佢原文)。

雖則佢近來寫既野比以前持平左好多,無咁多小動作同怨氣,但如果我當面聽到佢講呢番話呢,我就真係想「請教」佢究竟咩叫領導力呀。

記得我舊公司有位Pantry阿嬸,佢真係雷,唔係皇親國戚,唔係蠱惑中女,一丁友可以搞掂得幾條team人化敵為友,仲以初中程度既學業水平搞掂幾條team既客戶難題,就算升左senior OA,走埋,幾添人都阿姐前阿姐後當佢再生父母咁。呢d 咪leadership practice囉。仲未講果d唔係head住人,但人地自然聽你支笛果幾個尋常你我他。領導力唔一定要強政勵治、教無類殺無赦黃袍加身果種既。

人走茶唔涼,都睇到一二卦。

3 comments:

Karen said...

都叫o左您過o黎我地呢度做啦!

起碼我唔使晚晚做到咁夜, 仲有個人幫您o架!

******************

>>好似係阿王生,話人奢求有出現領導能力既人可以咩野「強政勵治」係無聊諗法

您係咪講緊毅力先生呀? 有些comment我不太認同, 但有部分會buy; 不如等佢出新書時, 約埋一齊請教佢囉!

又, 您那位pantry阿嬸, 咁受歡迎係因為和您們沒有利益衝突, 而且懂人情世固, 處事圓滑(但同學歷無關, 切記), 呢種算係charismatic leadership。

Ebenezer said...

charismatic leadership? 阿嬸原來係靚女?^^

C.M. said...

Karen:

好耐無見,唉,真係做到luck look,家陣先得閑覆。去你果庶?... 乜你有介紹過我?哎呀,鎖你,我又老人癡呆勒。

呢位王生,叫永平,似乎屬於大政府主義者。請教佢呢... 講下遮。

阿嬸呢,未算charismatic喎我又覺得,佢真係靠「能力」同個「心」架。無利益衝突呢,都算係既,但可以帶住「咁既」職分都可以令發緊火既管理層耐心聽佢講野,就算無利益衝突,都係唔容易架。


以便:

哈哈,響好多人心目中,佢真係一個靚女。