Saturday, December 22, 2012

每每

每每去叫停他人,卻不願去叫停自己。

這就是貪念。

Wednesday, December 12, 2012

莫言政治

報紙話莫言齋講文學唔講政治,所以乜乜物物。

我心諗,政治一定要係講出口既咩?雖然對莫言既小說完全無興趣,但道聽途說,佢揭露既黑暗面同令人反思既能力,不下班自命清高既所謂學者、政客。莫言如果真係再講報紙所謂既政治,跟手俾人推舉做殉道者,最終損失既唔知會係邊個。

Sunday, December 09, 2012

稍歇,稍忙

臺灣

去了臺灣旅行,為的是找回一點點自我。是否真的找到,還看明天。


工作

雖然旅行前超忙,但歸來仍要還債。


狼英?

不提也罷。


歉意

縱使萬分歉疚,無改虛偽品格。講緊我自己,比狼英衰十倍。




活得不耐煩。活該。




一本《帖木兒之後》,一本《中國歷史》。一定會睇。




一位 Anya Marina,一位 Sara Bareilles。繼續會聽。




經歷越多,越應該寫。不可告人既經歷越多,越應該摺鬼左佢。

Sunday, September 09, 2012

漂之白、之泊

CK問:到底學童既真正得益係乜?

呢句野纏繞住我好一陣子。

承上集,如要推行社會主義,就唔需要考慮到究竟學童/用家真正既得益,而只係需要考慮點樣維持社會主義既倫理架構。學童既觀念如果影響到呢個倫理架構,就必須要犧牲學童既得益。要個體為整體犧牲,係我呢個盲毛所摸到既大象。

唔係指引問題,唔係洗唔洗腦問題,唔係國民教育四個字既問題,而係究竟香港呢個社會應該朝住邊個方向行既問題。

香港唔應該行一個,強迫個體為整體犧牲既方向。為整體犧牲,必須要係自願。被逼,邊會有幸福?

之但有人話,交稅夠強迫啦?係....但查實真係咩?如果唔係交稅可以維持法制、可以維持社會運作、可以俾機會你賺錢,你會有機會交稅咩?(呢個肺論早幾個月我都講過咯)

自由珍貴,言論自由珍貴,賺錢自由珍貴,學術自由都一樣珍貴。學術自由係一樣好值得珍惜既野 - 教,要真實,要批判,要警世,要交待,學,先至可以再教。訛傳,並非學術,只係漂白。

曾幾何時,香港推行黑社會洗底計劃,俾人改過自身。真係潔身自愛既,或者可以徹底洗滌心靈。否則,只係表面漂白,純為逃責。香港自由在你噏乜都得,就算上堂幫人漂白都得,亦好自然會有呢種人。既然水清無魚,無謂潔癖上腦。之不過,如果要我積極不干預自己仔女學校既辦學方針既話,無格,用腳投票囉。

一個無左歷史基礎既野史可以獨立成科,仲要成為呢種投票方式既決定性原因,OK,一個政府鍾意多門法定宗教,都幾得意架。所謂無宗教,潛臺詞就係自己係唯一既宗教。

講真,法定宗教既危險性,反宗教人士應該最清楚啦。雖然我有人稱宗教既信仰,但如果政府有日將呢個信仰成為法定宗教既話,我就知道香港會陸沉,唔係死守,就係走頭。人生漂泊如此,談何容易?

教番中史,學番中史啦。人,就自然會留低架勒。歷史,就係「家」之起源。

Sunday, August 12, 2012

經驗、年紀、時代

紙扎工廠有幾個部門,我以前就任OEM部,部門專責來料加工,客路穩穩定定,就算晚晚加班,夜晚都趕得切。家陣轉左去ODM部之後,一切都唔同曬。最唔同既,係對於年紀輕既一輩既睇法。

以往做OEM,跟班舊客戶,來來去去都係果籠要求,經驗因此最重要,所以我地呢班老屎忽好緊要,講野亦周時比班新人大聲好多。

ODM個遊戲規則就潤腸唔同,經驗固之然緊要,尤其響技術層面,但響了解客戶需求既層面,經驗有時反而會係一個負累。經驗成為負累既例子周圍都有,係我地呢班老屎忽唔肯認啫。如果真係虛心去諗番,我地後生果屎同當年既老屎忽相處既時候,一樣出現呢d問題。縱使事後證明我地做後生既時候真係講中曬,但輪到我地家陣做老鬼就先入為主認為班後生無知、衝動、懶有遠見理想,呢d 唔知係咩心態呢可?

究竟咩心態,我都想知。其中一個環境證據係來自年紀。

正如為退休投資一樣,年紀同埋 “social” expectancy 呢兩個因素,好多時決定左人呢一刻既選擇,究竟係趨向進取定係保守。呢個 “social” expectancy 唔係社會人均壽命,而係個人對於往後有生之年既睇法,例如如果一個20歲人,只睇往後兩三年既話,呢個 expectancy就算短。以下呢個粗略既 matrix 或者可以解釋兩者既關係。


題外話。呢個 matrix 係要好中性去睇 character,唔需要加上偏見。正如我班工友大部分雖然都係出左黎一兩年,應用呢個表黎睇,話就話多數(character)都響隨波逐流呢個grid,但無論待人定處事都好成熟,響公司都好幫得手。「跟隨潮流」,並唔係一樣值得批評既事,正如返工著西裝,出街化曬妝,冇咩出奇。

點解整呢個matrix,查實係因為近排整理番 collectivism 同埋 individualism 既舊料所得。呢排香港出現好多「爭」(爭取、爭拗、爭辯),trigger 我嘗試理解雙方既差異。而其中一個最響亮既 first shot of war,就一定係「學民思潮」,另一個,係北京一再「堅持和發展中國特色社會主義」。

原本純粹一個辯論議題,學民思潮年紀輕輕,竟然可以走出黎去貫徹呢個議題既一方,唔係好似我地當年齋講,齋由評判比分,齋按照辯論規則分正反方、主副辯、台上下。呢種行動力同自發性,除左當年暴動浪潮,邊有個年代會有咁。而同果股浪潮比較,今趟既分別亦實在太多。不得不承認,時代真係變遷得好快。

我個人傾向 evolutionary centrist,認為應該變就變,唔應該變就唔變。唔需要話呢個變係邊個導致,邊個誘使,邊個推動。因為有需要變既話,就一定會有人行出黎,無論佢地跟住係生係死。社會生態就係咁,冇野保証出頭鳥唔會有天敵,會萬世永續。儘管第一代始祖鳥已經絕曬種,但如今羽翼已豐既品種,早多如繁星。值不值得見物種多樣化,只視乎呢個森林有冇呢個承載能力。

我想有。否則,無論點講咩增強社會流動力,點樣增強經濟競爭力,都只係少量物種既流動力同競爭力。可惜丫,懂大政治既人多,識生物學既人少。

另一個燃點我火頭既,正係「社會主義」四個字。

基本上人係群體動物,亦係孤獨既動物。所有人都游走響絕對群體與絕對個體之間,亦因此有國家、有城市、有家庭、有廁所。如果要追求絕對群體,就一定違反其他人追求絕對個體既意願,亦因此適當既社會體制,會顧及雙方,而達至波動性平衡。

根據 http://geert-hofstede.com/china.html,中國仍然係一個非常collective 既國家。單以此推論,強調社會主義,強調集體,似乎符合國情。亦正因要配合集體,所以一切社會「約章」亦必須要為集體服務。不過特別在,此約章只係上者對下者有所要求,而非與社會文化相扣既collective social contract,即上者對「下者與另一下者」的要求。簡單講,要求「養吾老以及人之老」,無,亦無貫徹於機制裏面;而對國家,對領導既忠誠,比目皆是。

情況在於,一日強調「只有社會」,一日強調「只有社會主義」,即強調所有決定皆以社會為服務對象,而最終因為社會並非由「多數人」管理,所以當中既法律,亦只能以「少數社會管理者」為主要服務對象。

即覺得,如果要集體司法機制過渡去首重個體既司法機制,似乎響我有生之年,只可以響金融領域或部分大城市既基本民生可以見到。

今日我飲茶時睇到「融樂會」總幹事Fermi既訪問,令我好羞愧。我唔相信中國人係一個自私既民族。

香港,如果只係中國人既香港,佢絕對唔配「國際」之名,更唔配因「國際」知名。

Sunday, July 22, 2012

摑民教育

唔洗問,睇標題就知道我咩想法。

查實父母對子女既期望好簡單啫,我覺得,就係期望佢地「似自己」。

呃,我明,好耐之前我講過呢番說話,阿邊個又質疑呢個想法。而我呢,近乎深信不疑架。

呢個「似」,唔係在乎父母職業,話希望自己子女會走自己條路,而係在乎點「對自己既子女」(唔敢講係咪可以同樣「對他人」)。父母希望自己既子女,會好似爸爸媽媽咁對待自己既下一代。

雖則我相信實有人唔同意既,OK 喎。

就淨係上面呢句,就表明我自己對子女既期望係點:容許子女有思考既空間。

Well,唔知乜水定阿乜乜物物話,國家就好似我地父母,對我地無微不至,有要求有期望。換句話講,即係呢個國家希望佢既國民似佢地。

我呢亭做人仔女既,好明白父母既心意既,不過,如果你係要格硬塞個飛機杯俾我,話我聽用呢舊野可以領略倒人間肉慾頂峰,咁既理由呃小學生就得。我唔想阿仔淨係用杯用到老死囉。

我自以為自己係一個開明既父母,所以先會好開明咁期望子女接受一套開明既觀念。

黎緊阿女入讀小一,我會密切注意究竟呢間學校會有幾開明咁對待佢既學生,做好隨時轉校既準備,用腳投票!

下星期日,我同埋成家去。

Monday, July 02, 2012

妖!憎死我自己!

Declaimer:

I no intent to replays blogger to tweeter

Sunday, July 01, 2012

在這裡細聽細看

如此環境的寫,夾雜一點煩躁,因為我還在辦公室裏。

而我已經是連續幾個月在星期六及/或星期天呆在這裡了,苦樂參半。

那天看到雙彩虹大特寫的,是在這裡。那天看見解放軍降傘演練的,是在這裡。今天聽到七一口號的,也是在這裡。難怪有人說高樓特別應聲。

不知還差幾個小時,會否聽到這代啟蒙浪潮的波瀾壯闊?

會與前度上司偶爾在這裡這刻碰面,她笑問我這種日子會否正常化?天,我絕對不想,不過天曉得。能控制的,我盡量控制,能推掉的,我已經盡量推掉。推不掉,控制不了,唯有安慰自己:鬼叫自認好打得咩,死唔肯認唔夠料~

幾晚坐的士返歸。

平常七八分鐘車程,大佬A載我就五分鐘,皆因時速120公里,聽到個偈震曬,發出超重低音兼環迴立體聲。大佬B話日更390,夜更340,以前夜更好搵,家陣日更好多自由行。大佬C話果度一單被自殺,呢度一單七月胎兼被失蹤,前面又有果單及果幾單,用超過100分貝問我呢個黨如何愛得落。

開始聽到警車聲,不久外面氣氛似乎再趨沉寂。起伏間,終於見到前度上司回來了。她回來僅能逼使我埋首工作了三五分鐘,而我又不期然再回來這裡推砌接駁我紛亂的思緒。


誰知我可能太喜歡虐待自己,太喜歡我手頭上的工作。感官移植宣佈失敗,驀然埋首,那出路卻在燈火闌珊處。

Monday, June 04, 2012

Sunday, May 20, 2012

利用規則與religious


利用規則

議事廳中,不同黨派利用議事規則,以求達到其政治目的。

老闆們強調合約條款,要求員工準時上班。

員工們利用請假半天不用醫生紙,大條道理遲到半天。

工會發起按章工作,搞掂就得,唔洗心急。

利用規則,即如二次創作,或出類拔萃,或屢敗屢戰,或重蹈覆轍。


Religious?

一個人係咪religious,我覺得並唔係佢有冇表明自己係信乜宗教,屬於邊個教會,或者皈依邊位邊個。而係佢對於「對錯」有超常既執著。

我諗好多人都接觸過唔少聲稱自己係邊個religion既人,之但唔同人果陣宗教除都唔同,有啲可能會臭狐啲,有啲可能會熏衣草啲,有啲又可能會層次豐富啲,不一而足。

不過我就好認為,一個冇religion 既人,都可以好religious。有人對於民主可以好religious,可以對社會主義好religious,可以對教會好religious,,可以對反教會religious,可以對自己既學識好religious。

俾我睇,宗教,並唔一定關乎超自然力量,但一定關乎超自然的對錯觀念。


利用規則既人,其他人應該唔會覺得佢地好religious,因為佢地既對錯,常人根本唔容易分清楚。

Sunday, May 13, 2012

常見問題 - v20120512

1.
問:你d 仔女係咪已經唔認得你啦?
答:仲認得,仲掛住我多左添!

2.
問:你係咪已經唔認得你d 仔女啦?
答:你估係你咩,日日蒲到阿媽都唔認得,我好有責任感架。

3.
問:你有冇後悔黎左呢度呀?
答:絕對冇。我只係後悔點解我冇決心過馬路唔睇交通燈。

4.
問:點解你會搞到咁夜呀?
答:你要邊個答案??年紀大,機器壞?做野慢,效率低?煲醋燉湯博紮?日日唦唦滾所以有家歸不得?

5.
問:俾你一日48小時又會唔會做得曬?
答:如果我一日可以有48小時,咁人地咪一樣可以俾 48小時既野你做~

6.
問:咁你咪冇時間同d 仔女玩囉?
答:都有既。人不在,心在。

7.
問:咁你咪好耐冇返屋企食飯囉?
答:你呢個問題係咪有仁兄之前問過呢?

8.
問:查實你琴晚有冇返過屋企?
答:雖則你見我瘦左10磅、 條皮帶鬆到要哵多個窿、 黑眼圈深左、老人斑現過以前、白頭髮再冚唔住,之但我都仲識得返屋企。

9.
問:你謝左好多喎。
答:唔洗日日問我啦下化,有眼見啦。

10.
問:咁你咪唔得閑響屋企打長文囉?
答:咁我可以好似家陣咁,響公司打長文傢嘛。

Sunday, April 29, 2012

A change is now "forced" upon you

1. Will you feel bad? Yes - go to 2; no - go to 7

2. Do you think this change is bad to you? Yes - go to 3; no - go to 6

3. Is this change bad to you? Yes - go to 4; no - go to 5

4. You scored 3 points

5. You scored 2 points

6. You scored 1 point

7. You scored no point


How many did you score?

Saturday, April 21, 2012

性格先決

This wheel busy arrive luck look, 所以想寫都冇力,印象中未試過掉低間鋪成三四個禮拜咁耐吽草。

忙與超忙之間,都有少少時間可以攝,例如聽同事意見不如睇下電視八下,或者應承朋友出黎食晚飯。

琴晚就去左 Beijing 樓食Beijing 烤鴨。食緊走樣丸子既時候,我突然覺得,無論工作定娛樂,都可以係一道甜品。前排(定仲係呢期?)既《大作戰》一上桌就好似唔錯喎,諗住下晚一定要再點多次,或者因為我已經忙到亂曬龍,第晚果集我已經覺得好漏(膩),再食唔落勒。同一道甜品第二晚已經覺得漏,假如唔係經濟法則使然,就肯定係男人談新忘舊所致,我覺得唔應該怪道甜品唔好食。起碼,我都曾經返尋味過半晚咁多。

咁努力去尋開心,皆因人際關係上遇到阻滯。呢個禮拜見左兩個客,一次開口及著脷,另一次準備不足丟人現眼。同事話唔似以前咁斯文淡定,精神太緊張亢奮。係,呢個係我其中一個致命弱點,而另一個就係做事唔分輕重,就好似家陣咁,忙到今日返公司清清下 in tray 都格硬要抽個幾兩個鐘頭打文。

我真係一個幾有毅力既人。毅力者,perseverance也。而我亦係一個不斷堅持,不斷以毅力勇氣交替去完成各種人生責任義務既人。呢種 repeated perseverance,絕對係我個人最大既優點,令我不斷前進,不斷 procrastinate,再不斷前進,再不斷procrastinate。周而復始,成就我家下堅毅既性格同埋人生。

所以我好欣賞我自己,亦因為呢種自我欣賞,令我自尊好扎實,唔會得閑就自慚形穢,呻冇人欣賞,顧影自憐,投訴他人點樣對自己。冇錯,係自尊心,唔係自信心。我冇自尊,所以覺得生活真係唔算太差。

其實冇自尊真係 = 好扎實既自尊咧,呢種真係邏輯黎架喎。唔好好似某d人咁,一係諗住邏輯係d 咩高深野,學極都唔明;一係就覺得聽到人下下提邏輯就好似上身咁,覺得人地冇家教;一係就下下話人冇邏輯,我高你低;又一係話你既邏輯套用唔落我地大眾全體多數market norm傳統既邏輯,迴避指責 marginalize 異見。Well,邏輯根本就係唯我獨尊架啦。講幾多邏輯都好,人既感覺永遠,或者幾乎永遠都會左右你既邏輯,左右你對邏輯既定義。信我丫,人凡親覺得討厭既都會排除出自己既邏輯體系;而唔係人先發現歸納唔到自己邏輯體系,然後再討厭佢。會有呢種覺悟既人(係覺悟,唔係理解),可能要先摒除七情六慾先可以歸納到唔同人,唔同卡屎,唔同層次既邏輯體系。如果人地話你一句半句仆街自己就蠢蠢欲動,自己就算點響人面前講自己邏輯功力有幾深厚都不過係仆街邏輯。Audit 下自己個mental account 或者可以睇到自己既邏輯體系會幾仆街,或者有幾普及地仆街。

拿,我唔係打緊牌吹水呀。唔好亂對號呀。我只係極度亢奮咋,響度諗,我係咪應該今晚抖下,聽日返黎公司再做過呢?定係我應該堅持做到今晚十二點,咁禮拜咪唔洗心掛掛可以全日休息囉。定係玩埋今晚先再算好呢?

Thursday, March 29, 2012

Wry neck,....

.... 飛滋x5,sore throat, day-round cough, conjunctivitis, .... and false hopes....

Sunday, March 25, 2012

體驗

一時做支持者,一時做反對者,就體驗到民主。

呢種精神分裂做得越多,就越體驗到民主,亦越適應到民主制度所要求既心理準備,即所謂民智。

我係佄諗。

如果只係一味支持,或者一味反對,怕且僅夠資格做個好市民,而唔夠格做選民,卦。

我估。

黎緊幾年,真係要好好體驗。

Sunday, March 18, 2012

我係一隻曱甴 (4)

EMEA

歐中東非,2011年成為全球政治焦點。

歐洲,尤其歐盟越來越成為世界公敵。一個以干預為己任的聯盟,不斷輸出規條、規條、規條。在商言商,與人無尤,但勢必作繭自縛。

英國衛報近日報導敍利亞屠夫總統阿薩德跟外界溝通的電郵,衛報宣稱已經盡最大努力查證電郵真偽。其中包括阿薩德現居英國任cardiologist 的岳父,一直教導阿薩德如何應對各負面消息,例如如何 spin 敍利亞政府軍虐待被俘孩童的youtube 報道,包括其夫人如何在戰亂期間如何奢侈花費。

非洲,一個年關難過年年過的大陸。

作為曱甴,只能對千里外既他國人們寄予無限同情。2012年,繼續袖手旁觀,繼續莫名憤恨。


巧言令色式言論自由

言論可以是善意、惡意,也可以是不中聽的善意、中聽的惡意。

在香港,壓制對方言論的最普遍方法,就是採取法律行動。

在香港,壓制對方言論的最普遍原因,就是遇到不中聽的意見,不論於大眾旁觀者是蜜糖,還是砒霜。

如果不能分辨蜜糖還是砒霜,不打緊,因為巧言令色之所以被稱為巧言令色,就正因為其道行之高深。不過,一般武者不喜歡接受別人的功力比自己高深的。

最近招聘新員工,面試經理批評何以獲轉介的人根本無法溝通。然則,何以介紹人可以?何以面試員可以?何以面試員可以測試出求職者的能力?

又曾幾何時,有老師批評家長,為何你子女平日上課時無異樣,如今考試測驗只會交白卷?然則,這個當老師的,不是該先問問是否與自己有關?

言語愚拙代表了一個人的愚拙嗎?同樣地,語言聰敏就代表一個人的智慧嗎?

請告訴我,縱使社會大部分人都有這套 heuristics,但你例外,會克己謹慎。


Rise of Institutions - 小圈子交叉感染

盲搶柴米油鹽醬醋茶,親子王國王子公主被拐帶,假雞蛋流入港島。

家長寧可信其有,不可信其無。前說被拐去不知何故,再傳賣去偏遠作繼子,後傳割腎救大頭寶寶。

人前就是幾率原因加愛子心切,人後心底夜闌人靜時,輕者缺乏信心安全感,重者自以為港孩零捨矜貴,港孩一個腎價格比鄉童乳臭貴百倍。

一切都可以簡單地從「成本」解釋。

如何偷港孩回內地,如何證明買家此乃矜貴港孩,如何逃避港方中方總動員緝捕,如何割腎可以冰鮮保存,如何證明來自一個更健康的港孩腎,如何確認此腎適合移植。甚至何解有錢買人家的腎,卻不先花錢為寶寶買貴價入口奶粉,為大頭寶寶花錢治療。

Institutions 內如果只有positive feedback mechanism,即自我強化機制,卻沒有negative feedback mechanism,即自我檢討機制,幸運的小圈子,可以是virtuous circle,不幸的小圈子,就是 vicious circle。

嘿嘿,老兄,不要心存僥幸啦,一次的不幸,足以corrupt 整個institution。呢個不幸,叫做「自圓其說」。


電視論壇

或許阿梁支持者好睇重阿唐爆高層會議內容呢個所謂誠信測試,以後無人(高層)敢同佢開會,中央都唔會信呢個人,頭先同朋友傾偈,我反而認為:

敢唔敢同佢開會唔係因為阿唐曾經爆過開會內容,而係開會既時候,講左d唔應該講既野,或者係犯眾憎既野。如果自問為人民服務,怕咩比人公開開會內容?

大家開過會十幾年,公開爆響口固然可以係基於個人利益原因,所以無怪乎呢個商界政界乜界咁痛恨人口疏,但呢個公開口疏既行徑,同狗仔隊有冇分別?同報紙所指既消息人士有冇分別?同whistle-blower有冇分別?

Well,絕對有分別。分別就係,你夠唔夠pok以自己既仕途博一博。


阿梁做特首

其實如果阿梁真係當選,我諗對香港最大既好處係,對於大力提升市民對普選既渴求、align全體既意願,有意想不到既效果。


茹素、食齋、植物

草食有唔同層次,下期再續。

我呢隻曱甴係雜食既,佢棚牙同腸胃同整個身體亦係為左適應呢類食物而留存,算順應自然卦。

Tuesday, March 13, 2012

我係一隻曱甴 (3)

阿嫲過左身,感觸良多。不過最憂心的階段已經過去,而且親友們都已經為此做了準備,所以不致太傷感。縈繞心中的,除了可惜,還是可惜。

曱甴要生存,就先要守住自己個心,尤其一個會守護他人既心。所以我應該唔係一隻好曱甴。

切雞飯

唔該切雞飯走翼。

雞翼皮多肉薄、雞胸有益、雞背夠滑、雞髀夠肉,32蚊一個飯,走翼乃必然之選。

行左十零分鐘返到公司,打開飯盒。切雞飯走翼變左切雞翼飯,幾乎氣上心頭。兩秒後諗,之前我應該搵切雞飯既著數太多,所以今次要捱下。

算啦,好又一餐,唔好又一餐。

選完又選

特首選舉峰迴路轉,惟曱甴無暇呐喊助威,管不了誰的生死,更管不了自己的生死。

不過,响我正式轉性寫周記之前(which 我唔會考慮),我好想聽下各位過客熟客稀客,有冇留意各大報响桃園小叙之前,佢地有冇比較明顯既立場,企邊便?

聽講明記幫阿梁,星記撐阿唐,方向唔知扶邊個。呢幾間咩立場我查實唔多在意,唯獨萍記睇得出係企阿梁呢邊,我就覺得奇怪。有冇人都佄覺得?我之所以奇怪,係萍記既立場,幾時變左選舉既站台人?你話同阿何拉票就話合情合理啫,同阿梁拉票喎,唔通佢係法治先鋒,民主鬥士?唔明唔明,有冇貴客指點迷津?

Tuesday, March 06, 2012

終亦有時

昨夜無月,霧裏無雲

終此一生,誰主浮沉

迴夢賜我,白璧一朵

聖容難誌,焉明祢心

Thursday, March 01, 2012

我係一隻曱甴 (2)

曱甴之所以生命力頑強,唔係因為佢曉飛,而係因為佢好怕死。

我唔想死。

琴晚做到差唔多淩晨一點先收工,預計將來既日子都會係咁。雖然睇落好多人已經係咁,例如阿二近幾年都survive緊呢種生活,比上黎我呢幾年真係同渡假無分別。

不過臨老先黎為左一個未知前景搏殺,十足中年再培訓後出黎創業一樣,(摺),係誇張左,但體力眼力注意力行動力,似乎都唔係好配合我呢個被眾人稱之為犯賤之舉。

咁曱甴係咁架啦,腦細搵食靠轉膊架咋,邊度會諗到咁多丫。

之但曱甴都有情緒,都唔想英年早逝。

咁,咪犯賤囉。又怕黑,又怕死,又怕搵唔到食。咁仲唔係曱甴係咩!

天呀,我點解要係一隻曱甴?

Tuesday, February 28, 2012

我係一隻曱甴

公司門口又撞見妹妹仔,佢知道我黎緊新任務會歷盡艱辛,語帶雙關話我似「隔砸」。

其實我都知死架勒,明知山有虎,偏向虎山行,又冇 jetso,又冇明顯incentive,最大回報係加班有飯津,直落免的士返屋企,並貪佢有新野俾我呢個老野見識下,聞下新屎坑咁大把。

素知曱甴生命力頑強,死而不僵,僵而不腐,腐而不滅。妹妹仔都知 Blattella 出世早過 Homo 好多好多,連學名咁旁門左道都曉,家下後生可畏。

想當年預科入讀新學校,我同另一個同學連同兩個中七男生,四依為命之時,就正其中一位師兄個花名就叫「曱甴」。問返班女同學,點解幫佢改個咁既名,佢地話佢烏糟喎。Well,唔覺丫。我地幾個男仔無論小息定午飯,都一定匿響連住禮堂後台既後樓梯果度,響果度鋪張紙皮瞓晏覺,響果度圍埋睇《Yes!》,響果度大啖食大大兜炸魷魚鬚,響果度品評邊個女仔夠省鏡,響果度埋怨點解要同阿眾Sir share一個廁所... 縱使外面風雨飄搖,但「曱甴」時刻保持風采依然。咁當然,學校老師都有分寸既,招得入黎既男生雖然無睇頭無咬口,不過都未至於無人品無厘頭,所以我總覺得烏糟二字,只係源自阿曱甴生人勿近既自卑感,絕對唔係來自佢既身世。至於我個花名,陳年舊屎,唔方便講咯,總之唔多好野(或唔算太差)啦。

講番妹妹仔,佢好疑惑我點解一聽曱甴兩字都可以發表謬論,問我「你耿係好鍾意成日上facebook或者寫blog架勒」。嘩,家下我做人治定你做人治呀,可唔可以預測下我呢隻曱甴既life expectancy有幾長呀?係死於殺它死,定係死於請君入甕,甚或死於安非他命?

「既然話係曱甴,你邊會死得咁便宜丫,批你係爆血管多咯。。。。Aye aye aye,仲有,你寫二三百字好勒,長文頂唔順押。」如果哥哥仔真係Blattella,好肯定妹妹仔絕對唔係Arachnida,絕對唔係。

Tuesday, February 21, 2012

小巴車廂桃花劫

司機大佬正耐心地等候最後一位乘客。

雖草木皆兵,環顧四周老弱婦孺絕無厲色斜視,瘦身毒男於是徐徐上車。

毒男佔去司機正後方的座位後,立時發覺靠窗的套裙獨女,往外看得出神。

獨女瞟了毒男一眼,嘴角絲毫沒有含春。唯毒男總隱約覺得,血光之災後,必迎來桃花之劫。

大佬尚未等待毒股坐暖,已即時手起腳落,一個大拐彎,越過雙白線,連超三巴士,欲駟馬難追,五十尺止步。

煞車太急,毒男有餘悸,眉頭一皺,咒大佬放浪,獨女留餘地,梨窩淺笑,笑獨男有型有款有個性,前座傳餘韻,大氣傳電波,訪問那位以過去勇績為榮的女將葉劉氏,一槍挑三英。

恕毒男宅而無當,不知江湖實三英缺一,大相公有之,小相公亦有知,好牌難打,更莫問壁上觀之捨身仁似另有所圖,於是急取隨身聽以止塵俗荼毒,正襟危坐。亦恕獨女絲襪太黑,碎花斜紋令人目不暇給,gup 少一眼都會有損失。再恕大佬太狂妄,對寒冬薄衣的葉劉氏毫無憐香惜玉之意,急欲一窺全豹。

電台住持雙雄也,一太極九段,一散打無敵手。葉劉氏終於要用電波 wee wung wung 的在陣前擎槍吶喊,可是由於車廂太嘈雜,聽者無心,gup者有意,該知情人士依稀憶述:

「我有好多支持...(匙絲啥啥)...同政府好多部門合作過...(匙絲啥啥)... 好多人支持我... 」獨女拉低套裙,獨男大呼無癮,忽見大佬竊笑。

「我又同好多部門合作過... (匙絲啥啥)...同幾萬警務人員關係又好...(匙絲啥啥)... 我過去做過乜佢地真係有目共睹...(雖電波繼續匙絲啥啥,唯成語最鏗鏘入耳)...」全車該聞大佬含笑狗全,小巴雖左穿右插,卻無損毒男耳聞目睹之雅興。

「我同地產商無關係... (匙絲啥啥)...但前排又同幾個富豪見過面... (匙絲啥啥)... 佢地都好... (匙絲啥啥)... 支持我參選 ... 」挑~~~ 呢條腸粉做乜L咁 X埋黎呀!稍一分神,電波中斷,到站落車。

隨身聽仍往耳內塞,心思卻不知因何飄到九霄雲外,下車後朝車尾方向走,若有所失又不敢回望獨女黑絲花襪,以應桃花,或預言、或詛咒、或痴迷。。。芳澤何去解寂寥?

失魂。

落魄。

什麼是得?

什麼是失?

獨女?

葉劉?

小弟?

大佬?

大佬?

大佬。。。?

大佬?!

落車唔記得俾錢!!

不出十步,車蹤渺然。

大佬,你何故忍心我命犯桃花,要欠你一世區區十蚊小巴錢呢~~~~

Friday, February 17, 2012

就算我唔支持唐英年。。。

都唔代表我唔堅決反對梁振英!

Monday, February 13, 2012

年廿八洗完邋遢,諗住切個橙食開心下,唔知係橙皮太跣,定係把刀太鈍,第一刀就切到食指頭,即時見血提早開年。

好彩有手指甲頂住,只係切到少少,如果唔係要聯針都似。

不過諷刺既係,把刀如果利d,就未必會跣出黎切親手,之但就係因為唔夠利所以先至切得唔係好深。問返,原來把刀前排已經磨利左喎。

痛左幾日,記得初三好凍。

隻手指雖然好得七七八八,但都隱隱作痛。我呢亭姿整怪沖涼既時候,都仲要就住就住唔好濕水。

我諗天係要鍛煉我既,就就下既時候就無啦啦失平衡,跣左一下腳。隻腳趾尾突然刺刺痛,賴野!

唔知實際造紅過程係點,可能係跣果下扯到拖鞋唔知邊度,總之又見紅。

剛剛開始對刀同橙有陰影,又黎多件拖鞋。我份人都幾大驚小叫。

誒,過左成個月,以為弱小心靈復原喇,琴晚諗住試下開個橙食,補償一下忙碌勞累既生活。

Well,我醒架啦,今次唔用刀切(仲係陰魂不息),用手搣!

係,真係講都冇人信,用手搣都賴野!隻手指公一插落去塊橙皮到就馬上見紅。d血又未至於爸爸聲咁流出黎,之但都從指甲嚹輕輕泛起紅霞,美不勝收。

我諗呢年內除左人地搣埋俾我食(如果切俾我就唔該行遠d先切),都應該唔會對橙有興趣囉。

Tuesday, February 07, 2012

鬧情緒

呢間舖開左幾年,原先講下人治野,偶然拉埋講下有味gag,得閑炒粉牛雜雞蛋仔共冶一爐,心情起伏自我調節,好不愉快。

直至近年人大左,做埋人老豆舅父阿伯,開始日日受嘈喧巴閉既政治柚影響,EQ波幅十足過山車,難再以翩翩君子自居。

好似果班由「曾經好似」現升格叫「自以為」果堆終日「口不擇蝗」為樂既正義友,我已經頂唔順。

本以為大學之道,除左係培育一班有理想、熱愛自由既學子之外,就係俾個珍貴機會班學子去取長補短、他日貢獻社會,甚至為不平事伸張正義。

挑,仆佢個街!家陣仲響大學校園亂扣人蝗蟲,以為隨便貶低某某,搞到大學學生竟然受被政治取向排擠既恐懼,唔通咁就叫民主自由高人一等平等正義香港人?仆街la.

如果正係你製造誤會,而同時仲有些少責任感既話,唔該你自己搞番掂,小弟佩服你硬漢子真性情,仆夠街就好返屋企勒。


一樣米養百樣人,係硬漢子定係掛名天子門生,再諗清楚,回頭是岸啦施主。我都想做硬漢子,返璞歸真,不管政治無聊事,翻兜人治二三事咯。

Friday, February 03, 2012



「爸爸,藍色加黃色會變成什麼色?」
「綠色?」
「啱!」
「咁一加二等於幾?」
「係咪三?」
「啱!」
「咁凍加暖呢?」
「少少暖卦?」
「錯!係熱呀!」
「??點解係熱?」
「隻凍腳放落d 暖水度咪覺得好熱囉。」

混亂

病左好幾日,咩都做唔到,瞓都瞓得唔好。不過因為就快要離開家陣個崗位,又要加緊計劃新崗位既工作,呢個病黎得真係唔知係咪合時宜。病,雖則可以逼家陣班同事快d pick up我堆偶有鑊氣既dream tasks,但就令我接唔切新崗位既野。呢個係咪叫進退失據?定係進退兩難?定係進可攻退可守?好亂。新崗位阿頭(仲未知佢係咪我新阿頭!)同其他同事之間既工作分配同阿亂章無分別,用數量有限既煲蓋去冚茶煲,唉,你話點就點啦。呢個情景都係韜光養晦為上策。

混賬

自從上年唔知邊個月,好似係五月(定七月?),家庭基金個position完全未update過!死啦,我仲爭個基金好多錢啊,幾時先還曬呀。。。

混噩

唔知呀。你話點就點啦。

混戰

應該好多人都知道我好鍾意同人拗無謂野。之但有d 人認為,唔拗就係無guts、就係讓步、就係理虧、就係唔為公義發聲、就係對敵人仁慈諸如此類。大佬,你咁既(高)水平我點夠班同你拗呀。

呢堆混戰令我諗起東西德,同南北韓。兩者能夠統一既可能性存在好大差距。東西德統一左廿年,唔曉講喇。南北韓嘛,我總覺得真係再打仗,南韓真係可以不費吹灰之力就可以統一北韓,原因(我相信)係北韓既既得利益者,遠比弱勢群眾少。不過,如果你係南韓人,就會唔會擔心統一之後,呢批北韓人口會否拖垮經濟、會否同自己爭飯碗?

一講到飯碗同競爭,我都唔敢大聲講話自己未驚過。之但,唔講競爭,都可以講道理既。又如果講道理,我就會話,一個社會之所以係一個公民社會,就正因為每個公民都係教育緊另一個社會人士。如果好似某d 人響自己專欄話齋,香港人無義務教育其他訪港人士,咁唔該港人唔好稱自己做公民。要做公民,你估打打鬧鬧、以偏概全就可以咩?無咁上下程度既公民,淨係向空氣施壓、玩標簽玩歧視、嘴巴投訴d 明鑽空子既人就得勒咩?去到改變公共政策,facebook 可以做更多,而唔止係發洩多餘情緒咁簡單。

所以我亦反對內地汽車自由進港,之前聽到新聞話入境處淨係諗住收返百五蚊(入境處)成本,低Q能,淨係空氣污染、交通堵塞、交通事故等可預見成本及風險條數都唔止百五蚊。呢個入境處+處長咪係唔知得咁緊要呀。(據聞FB有個反對群組,搵到我一定參加)

混日子

自己好清楚性格上有一個盲點,就響自尊呢度。阿CK話暴發戶既自信,如果俾我形容,其實係自尊、唔係自信。自尊係對自我形象既評價,自信係對自己能力既評價。Well,我相信每個人既自尊上面都有盲點,之不過我呢個盲點既底線有其實比其他人低。意思係,如果有人故意攻擊我自尊,我係一個好vulnerable既人黎既。所以近呢幾年,我都好努力咁建立我既自尊防禦系統,以免太過不堪一擊。

例如要防備他人話我樣衰,女人既做法可能係塗脂抹粉遮蓋歲月痕跡,而我就係廣交異性朋友,令事實勝於雄辯。又例如為免人地話我對社會貢獻少,俾人睇到既做法咪上多d facebook,參加多d 群組,開blog鬧鬧鬧,集資登廣告囉,而我就默默耕耘,話你知:你知個屁!故作高深從來都可以呃得下人,又可以呃到自己。我呢份故作高深既自尊,唔係用錢買得到既。

混熟

年幾前都講過,好多香港人對於self-identity 其實在不斷摸索中,根本未有一個定案。都現時為止,好多人都嘗試用 by elimination既方式,去確認自己既identity:我唔係呢種咁既人,我唔會響街邊大小二便,我唔會點點點,將一d 厭惡既身份剔除。又或者靠攏d 熟悉既role model,話我會咁咁咁,會讓座,子女父母唔係雙非,會點點點,作為自己身份既reference letter。Whatever!

簡單問下自己,如果深思熟慮之後都可以得出一個答案:我唔需要靠其他人既身份或佢地既表現去確立自己既身份既話,咁,就證明你既自尊,都好實在,相比好多人,可以更大膽講話自己,活得有尊嚴。

Friday, January 13, 2012

欲筆還休

自己動筆就好似返教會一樣,一唔返開,就會冇左動力,冇曬紀律,開始搵藉口。



原因唔係冇野想講,至少個Catch(一個app )每日都有少少新野,而係自己選擇左用逃避既方式去對待呢排既 distress。

I am too dark to be light.

自己逃避既方法,一係以更強既 motivation 去蓋過自己既 depression,果排所以經常聽 Rihanna (but this video sucks)。

另一個就係跟 Adele 隨波逐流,等自己慢慢 settle。

Always feel too old to be young.

一定要起返身。(唔可以淨係掛住 Rihanna 同埋 Saints Row III)

Sunday, January 01, 2012

Last year

Last year, I didn't quite like myself.