Friday, September 14, 2007

果條友的自白

大大老闆打電話比人治部果條友,叫佢去地處偏僻既天下第一大部門搞培訓(美其名培訓,實質炒曬班人),因為呢班人淨係識得搞到一鑊粥。(備註:果條友一向好憎第一大部門。)

係人都知,果條友雖然貴為大大老闆親信,但出名閃得就閃,卸得就卸,於是詐詐帝帝請病假,仲買埋船飛,過大海去也。

就等隻船啱啱去到海中心,突然收到大大老闆急 call,問去左邊度睇醫生。死啦,答唔出添!(喂,搞乜傢伙海中心都收到 call 呀)於是...

“喂喂喂,呀... 斯俐沙喇... 我呢度收得唔係咁清楚呀,我轉頭打比你丫!”(Cut 線)。良久果條友以為過到骨,繼續闊佬懶理,匿入廁所辦大事。

原來大大老闆早知果條友靠唔住,於是一早安排左狗仔隊坐快艇跟蹤佢。果條友既然 Cut 左大大老闆線,狗仔隊就即時醒目,做野!

呢班狗仔隊全副武裝,一開始就想強行登船,呢一招嚇死飛翼船班打工仔,以為遇到海盜。心諗,劫財都算,萬一d 海盜劫色咪死!(你知啦,d海盜肯定“屈”左好耐架喇。)打工仔們連同船長一致決定,危險,速逃!

船長於是開行馬力,有咁快開咁快...

一來風高浪急,比 d 浪拋高拋低,就算係海中歷練甚久,都頂唔順,嘔吐大作;二來班狗仔隊既大飛馬力仲強,好快就已經埋身... 於是全船陷入恐慌,不斷打電話,發SMS 比親朋戚友求救,甚至一路嘔一路求救。

船長見大事不妙,屎急馬行田,於是點指兵兵,求其搵一個出黎祭旗。音樂一起,點指兵兵,點指賊賊,一點中你怎去躲... 哦,原來係... 你!

果條友,因為辦大事甚為暢快,所以甚至架船拋到差唔多反艇都唔覺得咩一回事。不過辦完事一開門,真係六合彩都冇咁靈,就比船長點中。要果條友去同班海盜談判。

條友遠遠見到狗仔隊掛住大大老闆支旗,又見 d 打工仔嘔到成地都係,知道自己乃罪魁禍首,於心不忍。於是同船長解釋緣由,仲話“拿,你用d 廁紙好似木乃伊咁扎起我,掉我落救生艇,然後一腳伸開隻救生艇,咁隻大飛就會轉移目標架啦”。

言畢,船長水手們馬上搜刮廁紙,扎起果條友,掟佢落艇,兩腳一伸 ... 須臾,大飛果然應聲收掣。

全船人見到大飛慢慢停落黎,知道戰術成功,不禁歡呼雀躍,大聲叫好。啪啪!啪啪!(拍手聲此起彼落)

鏡頭回到被 mummified 左既果條友。條友心諗,大大老闆最多咪捉我返去~ ,又唔洗死既...

另一邊廂既狗仔隊阿頭,正係度狂敲其手下:你點做野格,係呢個時候話無油!?啪啪!啪啪!(巴掌聲此起彼落)

可憐條友仲未知道大難臨頭,飛翼船已經早已遠去,而大飛亦漂流到不知去向,呢一隻救生艇上既裹蒸粽,就惟有自生自滅。

等左一日又一日又一日,水,竟然係出奇既平靜。不過,日頭已經夠曬,水又無,人仲郁唔到,更加唔知去左邊度!果條友又渴又餓又熱又睇唔到野,心諗今次實死無生... 嗚嗚,大大老闆,我知錯勒,你唔好咁玩我喇,最多我以後同你做牛做馬喇,你快d 叫狗仔隊黎救我喇 ...

咦?好似係神跡播... 好似隻手郁得番... 點解呢... 啊,原來個人焗到成身汗,浸濕左d廁紙… (米住,頭先應承左 d野可唔可以唔算數?)

果條友終於執番條命仔,真係值得開心,不過縱使萬分不情願,唉,仍然決定頂硬上,點都要做一次牛馬。

脫險之後,幾經艱苦終於抵達天下第一大部門。

唉,呢個部門真係亂到七彩。你有你上網賭波,我有我細聲講大聲笑,果邊嘻嘻哈哈,呢邊hea 下hea 下。果條友所到之處,只得一句,炒得。

滿懷不滿既果條友,無奈記起大大老闆當年知遇之恩,同埋佢既訓示,於是就同第一大部門d人講:“唔洗兩個月,你地一個二個都可以執包袱且勒!”搞到果班 hea 友,無不打曬冷震,馬上大醒十二分精神埋位做野。

消息傳到第一大經理耳中,都差d 嚇死,下令即時整頓。上至主管,下至普工,甚至皇親國戚,至少千人,一律都自願接受再培訓,全人類個魂魄即時返曬黎。嘩,呢個簡直係神跡喇。

大大老闆好快知道佢地轉軚既消息,就伊喵比第一大部門,話今次唔洗強制培訓勒,不過以後醒定啦。

喂!明明聖旨話要天下第一大部門冧檔個播,但依家竟然話會“保”佢地,咁果條友梗係扯火啦,搵著 d 細既黎較飛,玩咩!!於是發晦氣離開第一大部門,徑自沖涼揼骨去,洗洗冤氣。

與此同時,大大老闆就靜靜雞安排一位靚女服侍果條友。呢位靚女國色天香,滿身芬芳,玲瓏浮凸,手勢一流。咁樣揼骨法,爽呀!簡直係男人畢生夢想!

條友正沉醉於男人夢想不及五分鐘之際,突然該靚女一聲溫柔話:“先生,大大老闆話夠鐘喇,拜拜!”哇,乜咁搞,九成九你係大大老闆派黎玩我架啦,我依家劈跑唔撈喇,仲要自殺添呀!(... 原本舒舒服服,依家大發脾四,要生要死。)

此際,大大老闆推門而進,斥責果條友:你發咩脾氣!(條友仲駁嘴話,我死都唔關你事!)個靚女同你非親非故,你尚且愛不釋手,何況班人每個都跟緊我?就算無功,都有勞卦?我點都要諗清諗楚。

此刻,果條友似乎再次見到神跡發生係自己身上。


********************

小弟藉著這個改編故事,試圖闡述我自己對於“神跡”(這裡,跡 = 蹟)之義,讓那些想看到神跡的人,多一個參照。至於看倌如何看待這個參照,實悉隨尊意。因為曾有人說過某樣的一番話,所以,我相信,現今所能見的神跡,可以從在這裡開始了解到。

... 雖然,這種神跡,誰也不覺得驚喜。因為,只有知道做錯了事,才有機會見到神跡。

15 comments:

Anonymous said...

大佬! 又係到喉唔到肺個種...

唔...頂...

Marshmallow said...

CM兄那一行看來相當好玩,小女子再次慨歎自己入錯行,唉!

火鶴 said...

「呢D嘢, 我係唔會試架!」
我以為呢句先至係果條友嘅自白喎.

Blogger70th Floor said...

好深...

Anonymous said...

都係估估下,不過個故仔幾好睇。

Anonymous said...

C.M.兄,

大哥,依排真係好似睇緊迷離境界...愈來愈難明...

有咩諗唔通既...搵兄弟幫拖啦...

野蠻郡主 said...

我睇係船個段..有d魔盜王決戰海盜王feel,型爆!

不過呢…最尾二段有d難明…要多少少時間消化…

Blogger70th Floor said...

藤木同學做咩呀

K said...

>只有知道做錯了事,才有機會見到神跡。

問題:

1. 咁唔知道自己做錯了事的人, 就見不到神跡?

事實係: 有人唔知道自己做錯了事, 但都見到神跡。

2. 係咪要係耶穌教教徒才會機會見到神跡?

事實係: 我唔係耶穌教教徒, 但都有幸見到神跡。



我的結論係: 見到神跡, 看緣份。

C.M. said...

On兄: 咳咳(比你頂到氣咳)

棉花妹妹: 小弟呢行,咪就係人生囉!

鶴兄: 有時試過,錯過,才會成長。

危樓姐姐: 藤木同學佢呢排好卑鄙,所以要搵神跡。

香水妹妹: 唔洗估估下喇,你啱左啦!

AK兄: 呢排小弟雖然要食咳藥水,不過,都暫時頂得住,不過酒就...

小郡主: 好哇,消化倒係好架。(其實我寫得詞不達意就真,唔好見怪)

Karen: 係呀,人人都可以見到神跡架。願意從心改變就得架啦。條友果次都大約見到三次神跡啦!

Anonymous said...

將*果個*故仔(你知我講邊個喇)重寫到呢個樣,證明CM兄唔係食古不化。

人生道理,其實不外乎應用,四面牆裏D人,我唔係蔑視佢地,但因為好多無實戰經驗,就一定寫唔出呢篇文就一定寫唔出呢篇文。

K said...

講番之前的事:

我欠你的"Living with Ambiguity"回應, 已經post了。

希望你同pk可以comment一下, 我對Ambiguity advantage的意見。

C.M. said...

ac: 多謝(我當你比compliment我架)。小弟唯一的榜樣,就是一個錯的榜樣。

Karen: 好。正趕來。

學 霖 山 莊 said...

等我再看多幾次先...

C.M. said...

學兄:

多謝你。(也多謝你上次贈送我的資料)

神跡於我,不是眼前一亮、瞬間亢奮、甚至是Believe it or not 的一種奇異事情。

神跡於我,不過是含蓄但有力、平凡但又實在的線索 ~ 悔改