Friday, December 14, 2007

抖下氣先

呢排吊緊頸,差d 斷氣。前日趕完第一條死線之後,即時頭暈眼花,仲要旁邊位靚女扶一扶先唔洗跌親。而第二條死線又黎緊,真係從未試過咁緊湊。

講開呢兩條死線,雖然係表面上面差別唔大(都係死線,no delay),但係思考方法上,就須要轉啱 channel 嘞。

第一條死線呢,就好似一個 Strategy Proposal 或者 Feasibility Study 咁,要表明清楚個 proposal 優劣既地方,用唔同既 Perspectives 去講述同一件事係唔同情況既後果同埋資源需求。對於我黎講,呢個 feasibility study 就好似做人咁,你想點樣可以開心過,其實好睇你自己點睇,而唔同既人,就會有唔同既需要、唔同既前因、唔同既理解。一個策略性概念,其實根本唔係一個,而係千千萬萬個概念。(吹水啫,呢樣我掂呀!)

但第二條死線呢,就好似一個 Sales Proposal,做好 Analysis 然後集中去說服個客你個 plan 有d咩優點,有d咩好處,點解用呢個 plan 而唔用其他 plan...... 坦白講,呢種 proposal 我知道我自己唔係好在行。唉,之前都試過做,做到一塌糊塗。我覺得,呢d proposal 雖然可以有好多方向同方法寫,但其實又好似只係得一種方向同方法,就係要說服人。說服人之前,概念要鮮明,要有立場,前文後理要通順,總之呢,要你貼貼妥妥。(呢傢野大鑊,真係唔多曉...)

依家完成左第一條死線既工作之後,就要即時處理第二條死線既工作,條天線頻道都未轉好又黎料,真係好難應付。況且,要我做 Analysis 寫 Sales Proposal 真係取小弟狗命。唉...... 點解做人要寫咁多 Sales Proposal 架 ...... 今次實比老細插到九彩 ......

***************

做到悶悶地,忽發奇想 ...... 若果好似做人咁,明明要寫 feasibility study,但又用 sales proposal 個方法寫。而又明明應該寫 sales proposal,竟然寫左 feasibility study...... 唔知後果會點呢...... ?

21 comments:

ondog said...

插!!!

ondog said...

九彩前, 先打爆佢個頭!

on dog said...

(sorry...點解下下都出兩次?)

C.M. said...

On兄:

等小弟幫你搞掂佢!(米住,你想打爆邊個個頭先... 米飯班主唔惹得)

ondog said...

小9昨日好 X 興, 所以忍唔住比左說話米飯班主聽...換黎...

佢不斷CALL 爆小9既結果...

:... (

C.M. said...

哎呀,臨開酒前,應該要沉得住氣嘛...

ondog said...

hehe...這是"切碎計劃"中的其中一PART...

下一PART都應該到當面"小7"佢...

米生 said...

你份工好似好刺激咁喎

xiao zhu said...

曬命喇你,咁好,有靚女扶!

南區肥龍 said...

點解我成日寫sales proposal都冇靚女扶! 你竟然有! 唔公平呀?

(俾代理煩爆既時候, 有時真係要靠標童先可能攪得掂呀...凄!)

Old Cake said...

咁你老細係唔係靚女先? hehe

火鶴 said...

趕死線呢, 似唔似果D乜乜死前必做五十件事咁呀?

原來, 人死前必做嘅R件事, 就係趕R條死線.

趕好咗, 咁駛唔駛死先?

不過咁, 有靚女扶, 死都抵啦.

死囉, 我呢排成日講死, 唔通我果頭近?

Karen (Sze) said...

嗱, 我相貌平庸(但呢期竟然有同事話"驚為天人", 嘩好驚呀!), 唔係靚女, 扶唔到您. 但係寫sales proposal, 都知點樣有技巧地寫(真係幾蝦人寫, 同意).

或者咁, 不如寫隻"貓"俾我同肥龍, 睇下幫唔幫到您啦!

>>TO: 火鶴

啋過您呀! 我見到您心中的鬼, 同您驅鬼先, 等您可以過Christmas!

仲有, 唔好講到d留言者好似俾遺言咁啦! 趕客咩!

C.M. said...

On兄: 到你真係切碎既時候,記得唔好留低手尾,要乾淨利落播。

米生: 歡迎歡迎!我呢份紙扎工呢,其實同做人都係差唔多,一樣咁刺激!

小珠: 面對你,我覺得我毫無還手之力... (肥評判: 不如你早d響鐘喇,我比人KO左好耐啦。)

肥龍兄: 寫Proposal無架,要扮暈先有靚女扶架!(若果唔標童,錶X有冇又得唔得呢?)

餅兄: (咿he,果然明察秋毫)。不過今次我揀啱時機,益左另一位靚女。

鶴兄: 中哂喇。依傢我張to-do list水蛇春咁長,都唔知有冇希望搞掂哂佢... 丫,好彩你提起,應該寫遺囑先。BTW,你有冇照NMR/CT呀?有冇作嘔呀?好想食酸野咁呢?

Karen: 嘩,靚女!幫我牙?好哇,拿,依喵講唔哂,不如約出黎,先食飯睇戲再傾丫?(阿肥龍兄,你得閑個可?)

Karen (Sze) said...

阿CM生, 側聞您勁趕2 x deadlines, save番time, 唔睇戲, 淨係邊食飯邊傾得唔得?

嗱, 衣樣o野, 您arrange好啦!

又, 強調番本人並非靚女, 否則一早"名花有主"也。

xiao zhu said...

>>小珠: 面對你,我覺得我毫無還手之力... (肥評判: 不如你早d響鐘喇,我比人KO左好耐啦。)

你係唔係想講好佬怕乜乜果啲咁嘅嘢呀?(哈哈,唔好又咳咳呀。)=P

米都話唔搞咯 said...

你說的讓我想起詹德隆有關美國人與英國人寫報告的分別──英國人會先搜集所有資料,一步步根據好/壞處分析下去,跟著才作出結論;美國人呢則結論先行,再拿些正面的資料「實朴」自己的論點...

C.M. said...

Karen: 若果係趕完deadline之後呢?

小珠: 哼!你條脷出賣左你既誠意喇。

米搞兄: 呵呵,無錯無錯。就係咁既意思勒,我咁含糊都比你睇穿添。(蝦,我下期果篇best practice 終於有引子勒,多謝!)

s-pig said...

CM哥哥,加油加油!!

我忽然之間諗起"我要努力向上,不枉諸君寄望, 我要努力向上,要令朋友滿心歡暢。" 呢幾句...

xiao zhu said...

>>哼!你條脷出賣左你既誠意喇。

哈哈,係呀,我講嘅時候係冇乜誠意架。我認喎。

C.M. said...

S-豬: 多謝哂。

小珠: 我咁大量,今次就唔同你計喇。