Monday, May 25, 2009

港鐵...德政...

苦瓜兄提到港鐵的傷殘人士設施

近日經常在港島線各站出沒,實在深表認同。

於我等 BB車的惡司機,雖然要與其他使用者爭路爭升降機爭濶閘機,但一部電梯足以抵消所有這些爭爭爭的一切力氣與怨氣(附註:怨氣來自車站設施與設計)。沒有電梯還叫老人家們如此上落這些車站,什麼星期三及假期優惠,還有將來那個傷殘半價優惠,不如美其名曰「辛勞津貼」還叫人受落。

小弟亦曾擔當派遞員上落荔枝角站,拉著廿多卅公斤樣辦來回的苦處已經不堪回首,何況每天必須如此來回的同業們,其勞不足為外人道。

聽說 MTR 經常有focus group,知否港鐵如何回應跟進?

12 comments:

Anonymous said...

其實冇電梯既,只係得d幾十年前起落既舊站;而加電梯,其中一個最大既問題係,響地面加響邊呢?

要知,香港d地,全部都有業權,地鐵可以用既地方,只可以係一d公眾地方(例如街既行人道咁);須知香港d街道,尤其是市中心地區d街好多時都好窄,要放得落一架兩米乘兩米既笠,同時要通到地下既車站(好多時啲車站其實係為左以上講既地契原因,係特登起響馬路下面既。)唔係咁易。

另外,果啲舊站既結構,好多時亦冇預到要响個牆身同地面結構中間開個兩米乘兩米既洞... 要加唔係話做唔到,但係就要搞到幾大鑊下囉。

講番錢既問題,加笠冇錯係應該,但其實好觀乎究竟果個工程難度有幾高(例如,要做幾深,要不要封路之類),造價可以係幾千萬,甚至上億。

WhyWhy

C.M. said...

唔該曬,WhyWhy,歡迎。

其實我之前都聽過下有關業權,同埋空間個問題。我覺得尤其港島線情況應該會更嚴重。錢呢方面,我絕對理解。

其實我最想知道唔止係垂直電梯,而係扶手電梯既可行性。

又呢,我都好明白,有d地方,我估其實都幾睇果度既客戶用量以及「上等客戶」潛力(形象對於邊個企業都緊要)。

以筲箕灣站為例,兩個月前我地一家四口行下(去裝下推介果間食店),點知成個站都無扶手電梯,就算新落成附近既都無。我都知道個站起左差唔多20年(印象中可能超過添),準備不足都有可能。但其中有d地方我覺得應該有足夠空間加扶手電梯既,雖然唔係主要出入口(人流相對較少),但得部輪椅台響果個出口(又慢,仲好鬼容易壞添),而且果區人口老化得咁緊要,我覺得有d公公婆婆真係幾陰功囉。

不過其實我最想講既係... 我果日仲有兩架車仔添,搬完一架上/落三四層樓梯,再擡另一架上/落黎,來來回回,真係廿四孝難做呀~~ 呀~~~

C.M. said...

又。

今日特別留意我公司附近條扶手電梯,地台係起高左一米左右,即前段為五六級樓梯,然後先到電梯。嗯,依此睇番另外一個站,好似砲台山,天后,又係好鬼衰。(過時過節,天后站真係好唔friendly囉)

唔知係咪可以掘深佢,然後放條電梯落去?

... 好,等我問問地鐵/港鐵先!

Anonymous said...

其實,新既車站都有升降機。而家,主要係港島同荃灣線(九龍段)未有。

咁個問題係邊﹖除左上面whywhy講到之外,仲有幾樣。一方面,港鐵未必有興趣做喇。二黎,亦係最主要既問題係,市區地底D野係亂黎,好多時做工程都要掘左先知下面有咩。而係九龍港島,地底既渠呀媒氣呀水管呀有好多設施,所以要起升降機會有一定難度。

(拿拿拿,起升降機好難架。不過,係尖沙咀站掘到傻整幾十個出口又好易架喎。所以,well,個主要問題都係,咩囉。)

另外,冇記錯既話,港鐵會就(1)某區人口結構、(2)車站有冇連接商場升降機、(3)工程因素作考慮。

所以,佢地上年尾先plan左係油麻地、佐敦、深水埗、尖沙咀4個站起升降機。

(冇錯,佢地最近個press release其實係翻炒上年既野,做下公關﹕除左黃大仙之外,佢地上個禮拜提既都係翻炒。亦所以,well,上面提到既「工程困難」因素,其實,港鐵又無喇喇可以係5個站起升降機喎)。

題外話,荔枝角應該短期內唔會有升降機囉。事關,而家起緊隧道去昇悅居,隧道有升降機之餘好似運輸帶都有(好似咋)。起好後,港鐵又會話,荔枝角站已有升降機連接地面,所以要優先研究其他站囉。

丫,冇記錯既話,唔記得係梁狀定前社福界代表提過,藍田定觀塘站係冇升降機,之但係有條斜道,不過條斜道既出口竟然係個冇咩人行既工廠大廈門口。一般「有需要人士」,係唔會用架囉。

~goethe

Anonymous said...

錢梗係問題;呢個係一定既,所以個問題會係:「地鐡應該為提供公平機會俾有需要人仕而付出幾多呢?」

而令呢個問題難答既地方在於,地鐡又係半公營但又上市既機構,呢個其實係問題既核心。

其實我都係好支持應該俾公平機會俾所有有需要既人,而要解決以上既問題,就真係要揾啲壓力團體俾壓力政府先得...你會問,點解係俾壓力政府而唔係俾壓力地鐡?簡單,因為地鐡話唔到事囉...

又或者,好唔正治正確咁講,如果有一日有一個阿婆因為要行呢啲冇電梯既地鐡入口而仆到變左殘廢,咁呢啲加梯工程咪會加快囉。

whywhy

Anonymous said...

whywhy,

你又會引到cm講,「社會責任」究竟係手段(公關)定係目的(公義)...:p

當然,兩者唔係排他。

又,講開又講,王國興同鄭家富痴架,近排興講八達通。佢地,知唔知八達通一年賺幾多﹖資產回報率有幾多﹖用王國興個講法,我差d以為佢要將八達通「國有化」。

~goethe

********

香港商報
B05 | 商報論壇 | 興思錄 | By 王國興 2009-05-26

加強監管八達通

立法會議員王國興

「八達通」這種電子貨幣智能卡系統自1997年引入香港至今,已經近12年了。12年來,「八達通」改變了全港市民的日常付款模式,過去市民每日乘車、買報紙要預備許多輔幣,今天一卡傍身便可通行全港各種公共交通工具。隨「八達通」電子貨幣交易服務的發展,現時不少商店如超市、食肆、戲院、停車場……等等都可以「八達通」繳費,「八達通」的使用已經越來越普遍,是市民日常生活的一部分。

但是,本港對「八達通」這種電子貨幣的監管卻遠遠落後,首先,現時市民繳付的每張「八達通」按金,永遠成為發卡公司的搖錢樹。本月初,財經事務及庫務局公布八達通公司至今發行了逾1900多萬張「八達通」卡,以每張卡要繳付50元的按金計算,自1997年起滾存之今,累積金額已經高達6億8千2百多萬元。這筆按金收益不但令「八達通」公司無本生利,而且利疊利,其累計收入還可永遠滾存下去。對此,政府沒理由視而不見,任由該公司蠶食廣大消費者的權益。一般紙幣都沒有收市民按金,電子貨幣成本更低,何解可以予取予攜?

其次,「八達通」近年經常扣錯數。過去一年,一共有681宗不適當扣款的個案。筆者估計,這只是「冰山一角」,因為許多市民每每不會特別留意被扣錯數。還有一個不合理的情況,是市民如要向該公司查超過倒數十個交易紀錄,便要額外付款,此舉殊不合理,損害消費者的知情權。

最後,政府迄今未有完善的法規監管「八達通」,只靠卡公司自律的所謂自我規管指引,全無紀律約束力,不能保障消費者合理權益。

綜上所述,筆者促請立即制訂法例監管「八達通」電子貨幣的運作,要求「八達通」公司將按金和利息收入全數回饋消費者,保障全港市民在電子貨幣交易中的合法合理權益。不這樣做,便是政府失職。

文章編號: 200905260010180

Anonymous said...

>唔知係咪可以掘深佢,然後放條電梯落去?

工程既嘢,冇乜係唔得,係錢同埋係唔係cost effective既問題...如果為左加一條梯而要俾一億,係咪真係值得做?(當然,一億係誇張左,但,幾多錢先係「值得」?)

whywhy

Anonymous said...

>社會責任」究竟係手段(公關)定係目的(公義)

响香港呢個連政府都歧視弱勢社群既地方,答案已經寫在墻上

whywhy

Anonymous said...

>係尖沙咀站掘到傻整幾十個出口又好易架喎

同一件事,我又有唔同睇法:就係連尖咀呢啲咁有商業價值既地段,搞呢條遂道都要掘咁耐,可知做呢啲工程,難度真係唔細

不過亦同意係「有冇心做,而唔係做唔到」既問題囉

whywhy

C.M. said...

曾幾何時我有段時間,好唔妥果d同我爭路爭升降機爭濶閘機但又兩手空空跑跑跳跳既後生。

但某日忽然諗,點解要遷就我地班司機先~ 我諗若果呢d設施淨係為我地而設,只有我地先可以用,咁可能真係幾浪費。

到依家雖然我仲係有d唔憤氣,點解可以咁大條道理同我等司機爭爭爭,但就仍然唔明因咩事唔憤氣(我都不過同佢一樣遮,咪排隊囉)。唯一既解釋唔係鄧班老人家、手拉車唔抵,而係班後生(甚至唔後生)咁多選擇,都要先「享受」同阿公阿婆唯一既選擇。

***********

德哥:

講到錢(OK,資源運用),你應該在行既。

不過咁,單從企業角度睇,我會好主觀咁認為,響尖沙咀站起幾十個出口,好過響筲箕灣站起多一兩個囉。(唉)

又雖然社會責任可以帶黎某d/其他收益遮,咁我估真係要等有大型老人宿舍落成先得囉。我坐地鐵咁耐,香港人對老人家(對大肚婆)點都咪話唔... 咩囉。(諗落d火又黎)

**********

乜八達通犯法咩?點解屈政府失職?我同八達通唔係你你情我願咩?死囉,我係咪豬得咁緊要其實比人搵緊笨?(拿,最後呢個問題唔好答我丫。)

**********

WhyWhy:

我絕對同意錢係問題!

值得唔值得,我好同意,真係可圈可點。

我好明白淨係從環保角度,越用得多錢,所耗能源同物料就越多(大概喇)。若果好多錢用左,但受益人好少,呢個真係會好唔環保。(=浪費)

咦?不如考慮call人(地鐵職員)扶阿公阿婆上落樓梯好過。(幫埋我攞車仔都得!)

Anonymous said...

>咦?不如考慮call人(地鐵職員)扶阿公阿婆上落樓梯好過。(幫埋我攞車仔都得!)

其實係得架,不過要等囉

whywhy

C.M. said...

唔該曬,咁我下次曉點做lu。