Monday, August 24, 2009

東主寫日記,停半刻批判。



呢個屋企一個人搵錢,定期繳納家用比管錢果個再分三個人洗。

每個月都係一筆過撥款。夠就算,唔夠再申請。近幾個月,搵錢果個陷入經濟危機,想減家用。咨詢後,好彩管錢果個話夠,又有儲備,又體諒。三句唔埋,決議通過。

更加好彩既係,兩個細仲未曉干涉搵錢果個同管錢果個點拗數。



前文提到搵錢果個好唔掂。無計,舊底一條友洗大左,家陣全部人縮皮都合情合理(!)。此情此景,除左望天打卦之外,仲奢望橫財就手。

講真都係奢望遮,不如搵真銀咧。之但管錢果個一句話,穩定壓倒一切。搵錢果個就拗底勒。

畢竟搵錢果個萬一真係癲起上黎,管錢果個隨時攬住兩個走佬都有份。

講緊搵工呀。十個茶煲仲去博,都米話唔癲。不過咁,搵錢果個有前科架勒,先斬後奏等閒喇。



住左小島廿幾年,離開小島十幾年,住返小島一陣間,真係好想跳出呢個小島。身痕。

搵錢果個同管錢果個講,諗返都唔明為乜。一個非常理性,但又唔夠理性既決定。(鎖你,慣左。)

小島太多人,太逼。個海?可望而不可即,有個海等於無個海,游水又唔得,真係幾笑話。

老人家成日恭祝d後生搵多d 錢,原來係傳統智慧黎既。唉,點解大早要死撐話一步一步黎呢?

再轉

凡見過搵錢人真身既,都睇得出佢生性剛烈。又有d醒目既,唔洗睇就清楚佢性格其實好沉著,個樣豬頭炳,查實精甩尾。

各位老爺大小姐,查實呢d都係佢日積月累經驗所得遮,你話丫,唔夠剛烈,又點夠應付洗錢果兩個搞搞震?唔夠沉著,又足以應付管錢果堆洗錢要求?

之但咁,有咁有用既性格,都要有用武之地先得既。得個講字,鬼信咩。

唉,點解係要逼人自命清高自討沒趣自尋煩惱自我安慰既啫。

又再轉

唔知,轉左工可唔可以徹底解決以上煩惱呢?




搵少錢+洗多錢人
2009夏 記

13 comments:

richmapoor ma said...

賺多賺少, 都應該節儉的.

一是開源, 一是節流.

賺少了, 更要慳多點才是.

一家人, 總應該互相體諒.

篤篤篤撐 said...

賺多賺少, 睇你點睇ge...

K said...

>>起

結論係:

1. 屋企一個人搵錢那位沒有要求比管錢果位返工(不論全職定兼職), 當陷入經濟危機就真係只有節流家用才是辦法。

問題在於兩位點諗長遠少少的方法, 例如管錢果位待兩個細的年紀大少少的時候重返職場。

2. 各位男士以後唔好再話大部份管錢的女士有"打斧頭"之嫌, 或者話好多私己錢, 實情係未雨綢繆, 諗到將來可能有呢一日。

不用問我問題(2), 因為我唔會答。

***

>>承

搵真銀: 問題係方法是否合法和正當呢?

買六合彩? 買一百次都未必中到一次三獎呀!
賭錢賭馬? 老友, 教徒唔可以掂噃! 就算唔係, 份份鐘債主搵上門噃, 咪制!
買股票? 大笨象仲要股東供股, 買港鐵同工銀, 個價仲未落得緊要, 其他二三線又搏唔過; 買其他藍籌, 您有無錢先?
買樓收租?樓價好貴噃!
自己搞生意? 您仲可以承受風險嗎?

>>又再轉

搵工, 好呀。問題係個市仲未好番(之前銀行請人都係請frontline賣投資野的staff, 幾時論到back office staff呢), 請人的機構都幾審慎; 就算俾您搵到, 您敢唔敢叫間公司加多您一隻啡牛呢?

不過, 轉左工未必可以徹底解決您的煩惱, 返新工人和事的磨合, 同樣帶來問題。

除非您做緊的公司就快摺埋, 有嚴重逼切搵工的需要(您所講的situation, at least仲可以status quo多兩三個月睇定d先)。

>>萬一真係癲起上黎,管錢果個隨時攬住兩個走佬都有份

去到咁絕就唔好啦!

***

>>轉

問題係您覺得個海重要d? 還是少d人無咁逼重要d?

>>可望而不可即,有個海等於無個海,游水又唔得,真係幾笑話

您已經好好彩, 間屋叫做可以見到個海, 香港有無數人間屋係無海景睇(包括自己), 仲要係互相睇到大家, 又如何呢?

望下個海, 都幾好呀!

>>點解大早要死撐話一步一步黎呢?

唔通叫人一步登天搵錢但到頭來會跌到焦頭爛額咩!

搵多d錢, 係bonus; 但別忘記等價交換呢回事(即係搵多了錢, 但少了見家人的時間, 值得嗎?)。

***

>>再轉

>>凡見過搵錢人真身既,都睇得出佢生性剛烈。又有d醒目既,唔洗睇就清楚佢性格其實好沉著,個樣豬頭炳,查實精甩尾。

真係笑死我啦!

不論是否見過真人版搵錢人, 都知佢d所謂醒目都係小聰明(分分鐘俾人騙都唔知, 哈哈), 係咪剛烈, 可能係啦; 不過, 自嘲能力幾高, 我諗這才是搵錢人的生存之道吧!

***

仲有, 有無收到我隻依貓呢?

C.M. said...

富媽媽:

多謝賜言。但自己知自己事,關鍵在己。


篤撐兄:

係!可惜我人心不足...


Karen:

1. 當然喇。
2. 哦。
承. 都係刀仔鋸大樹。
轉. 係擔心健康。
轉轉. 係籮,唔知點解,我成日比人呃!

依喵收到了,可我抱恙中,請稍等。

不敗的魔術師 said...

有人教緊你「網上賺錢」喎!

p.e.t.e.r. said...

你好似寫緊週記多D喎!

C.M. said...

阿魔師:

係咯,咁又多條財路!

p.e.t.e.r.:

哈,就係等緊你囉。(陰功,病完幾日就爆鑊,哀哉)

p.e.t.e.r. said...

唔係掛?!

保重呀!

C.M. said...

係呀,等你開金口呀。(你係講緊呢樣可)

Marshmallow said...

保重身子喎.近排職場好似好番少少, 工唔係冇, 小女子都見緊, 不過要同個interviewer慢慢磨, 磨番十令廿round之後, 再慢慢等消息.

C.M. said...

綿綿:

多謝曬。好努力咁“保”緊架勒,不過硬係差咁d。你就好,可以慢慢黎。(羡慕)

三姑 said...

啱啱開始係有D唔慣架啦, 過多排就會慢慢適應架啦...

C.M. said...

三姑:

um.... 我到今日先發覺,部分原因查實係我自卑。