Wednesday, August 04, 2010

略略睇番

我一直都算係一個幾「博」既人。

講夠曬客觀既經濟性結果,博出黎之後,鑊鑊都唔係好野。反而論自我催眠既主觀性人生體會,無心插柳,終於博到首期八百萬之終身債務。

我唔係吹噓我有幾幸福,有幾自我感覺良好,只係你見唔見,我環境 ung 差,都未「頽」過。

環境差果史,我認我會抑鬱、我會乜都唔想諗、我會唔想見人、我會淨啃白飯,不過依稀記得,一定未頽過。(Well,唔係話完全未頽過既,之但一定唔係環境差果史咯,以前頽,多數會係響老頂闊佬懶理果史呀,人心不足蛇吞象果史呀,恆指跌左兩萬點果史呀咁。)

撐住啦。最緊要撐住自己,唔好俾自己放軟曬心情,就算玩瑜伽,腳趾公都要掂倒個鼻哥窿架。

好多人話正因為無野可以再輸,所以更加要博。呢句我雖然幾抗拒,但真係有道理響入面。

外面九萬幾人話「博一博單車變摩托」。講物質回報,係架。就算講非物質回報,我經常都覺得一樣可以咁睇。拿,阿仔就係樣辦。邊會諗到睇準時間都會有差池既遮。

或者又咁,我個世界觀,係大包圍既。就算一粒塵跌落地,我都可以諗得一餐,睇下呢粒塵可唔可以同阿女果日碌左兩級樓梯做比較呢?

我又曉得計劃將來,諗下一旦比人兜左,渣的士會唔會撞車兼賠錢呢?或者過兩年年老色衰靠唔到塊面搵食既時候,我應唔應該去磨皮兼去斑呢?又或者昃下自己仲係咪有心有力,整多件細佬妹比阿仔?

我知道,我得,你一定比我更得,頂,淨睇外表都贏我開巷啦。之但我家陣贏你既,其一係我博得多過你,其二係最後埋單計數,「輸」既次數多過你,而我,就係響度博大大老闆,會照顧果位黎緊會輸得好很甘既我。

8 comments:

Hana said...

>未「頽」過

真係好堅

所以我係堅服嘅

篤篤篤撐 said...

首期八百萬>>>>!!!!!
即係總值2400萬 ? !!!!!!!!!!!!!!!!

Ebenezer said...

首期八百萬>>>>!!!!!

實俾好多八十後美女傾慕死你啦!!!!

C.M. said...

冰冰: 響精神層面,我覺得你好堅。

篤撐: 大概係啦。計錯左咩?

以便: 唔會卦... 阿女一個四百萬,開始還本金。阿仔一個四百萬,仲還緊息... 係咪八十後美女特別鍾意幫人還錢?

p.e.t.e.r. said...

嘿嘿,乜你淨喺覺得精神層面咋咩?咁睇小人吖? >:)

「博一博單車變摩托」?如果博到個celin dion(細細個就才華揚溢)就喺囉。如果喺葉X歡就痾拔甩囉! :p

不過呢啲嘢唔到你話事。該屎唔駛病,可能被提呢 ;)

C.M. said...

嘿嘿,就算雞仔咁細隻都見唔到「淨係」兩個字囉。咁睇得起我呀。

痾拔甩都係咁話啦,你自己都講過幾次喇。

話事lu喎,等下次講。

005 said...

你沒有「頽」過, 是因你還未經過能你「頽」的事, 是你的幸運.

而且每人能接受逆境的能力與面對的方式都不同. 好處同時間亦有壞處.

"Both sides."

送你四個字: 將心比己.

C.M. said...

我沒有「頽」過嗎?

>>Well,唔係話完全未頽過既,之但一定唔係環境差果史咯...

我梗係頽過,都講過喇。我亦理解好處同壞處。

真係將心比己,唔好用任何原因同藉口去令自己既頽合理化、習慣化。

頽夠,就要學抽離。對於我,成本聖經個主旨,唔止係信心,唔止係恩典,而係要自強不息咁學。學到有信心,學到開懷咁接受恩典。

唔好俾過去局限自己既將來。