Tuesday, March 08, 2011

找錢丫,唔該

良心老闆, 不推不是人 - 北河燒臘飯店(今期《飲食男女》:老字號 俠客行 北河燒臘飯店 2011年02月25日)

部分節錄:

*************************

「喺咁 o架啦!有啲失業咗幾十年,有啲老人家又冇人理,呢度成日有道友呀,羊癎症嗰啲人嚟食,亂咁大叫又有,食食吓暈低又有,好平常啫,都係人一個,都要食飯嘅!」
為了讓人們有飯吃,他一年開足三百六十二日,只年初一至三關門。
餸菜也不求其,有魚有肉有菜,有蒸有炒有炸,務求營養均衡一點。
材料都有考究過,泰國米、韓國糖、荷蘭麵粉,絕少用大陸劣貨。
「辛苦搵嚟自在食,日日食曳嘢,人都頹啲啦!要平得嚟又要好先得 o架!」

為了收得平又做得好,他扭盡六壬。人家一早去菜欄買靚貨,他專登留到十一點才到。
「頭輪攞完,剩番嗰啲菜販會減價,係冇頭輪咁靚仔,但係唔差得幾遠咋,最緊要平好多吖嘛!」
一有時間,又會去人家的貨倉,找些接近過期的減價罐頭,慳一大筆價錢。
天天用的豉油,是去元朗曬場找最底層的頭抽。
「呢層豉油有渣,冇人要,最便宜,其實返去隔一隔渣,同頭抽一樣,豉油味仲濃啲添。」
甩了頭的蝦、斷了腳的蟹,他買回來炮製。用茄汁煮一煮,用咖喱炒一炒,頓時起死回生。
「冇錢賺 o架呢啲,不過食客每次見到,對眼都會放光,梗係!十幾廿蚊有海鮮食喎!去邊度搵?」

也許好人有好報,他的平價飯菜,得社區組織協會青睞,主動跟他合作,推出飯票,免費派給有需要的貧苦家庭,賙濟窮人。高佬明知他們做善事,更特別減價,每套飯菜,收平兩蚊。後來東華三院又向他買蒸飯,送給老人院。
教會和私人機構找他合作,做飯盒派給露宿者。高佬明也只收回成本價,不望圖利。
只是,仗義而行,並不代表無風無浪。
很多批發商,就是算準他老實,想盡辦法騙他,賺到盡。牛肉灌水呃秤,菜噴上化學劑扮新鮮,死魚死蝦死蟹端上來。
「呢行好多蠱惑嘢 o架,入貨真係要打醒十二分精神!」
所以,他每天買貨都要親力親為,跟奸商鬥智鬥力,忙得連食飯都要五分鐘搞掂。

*************************

咁啱 C.M. 開始中年甩毛,問朋友 K 有冇識得咩上海理髮幫佢頭頂做搭橋手術。

K 話:「喂,你問阿 Q 喇,佢前排去樓梯底飛,五十蚊貨仔,效果幾唔錯,遮到下。聽講阿Q仲醒多十蚊當貼士,抵玩啦。」

講講下先知原來阿Q既洗錢哲學係(K轉述,甩毛C傳譯):「做人最緊要consistent。開口埋口投訴貧富懸殊,但自己就蹺住手食住花生鬧政府唔做野點得架。你以為逼到政府之後就一定如你所願?先唔講呢個可能性有幾大,省察下自己先。你話受人以漁咩?有冇落手落腳教人先。濟貧咩?你又有冇做過先。」

「好,就算你做齊,係咪夠consistent?未必喎。夜晚同條女撐法國餐,埋單俾左幾多貼士廚師呀,同朋友落bar 叫啤酒,又俾左幾多貼士拳手呀,去剪個髮5舊水又醒左幾多俾個靚女洗頭呀。」

「人地唔夠工開,你唔會專登幫襯俾佢地開多d工;服務賣平d你又覺得 quality 接受唔到;好有一餐唔好又一餐你埋單都係揦喳面正正廿三蚊,明碼實價唔俾多唔俾少;阿婆鋪塊席賣十蚊一個指甲鉗,唔係嫌貴就係擔心唔知邊個用過。下下叫班官體恤民情,但就望都無望佢地一眼,甚至一生人犧牲一兩次,忍受下自己個髮型、肚皮,又高舉咩大市場,話擔心令佢地有false hope以為自己既service 或product值一個更高既價,最終害左佢地.... 乜乜物物去 rationalize 自己個想法,令自己個理念更consistent.... 如果真係擔心比多d 貼士佢地會令佢地有日開天殺價導致走火入魔、影響競爭,諸如此類有違人道既普世價值,咁,be consistent,同你鬧緊班官握下手,一齊做番d 各不拖欠明買明賣既等價交易啦.... 我咁講,絕對唔係話你應該乜人都俾溢價,亂咁黎,之但鼓勵人自力更新呢個溢價,唔通你俾唔起咩?....唉,總之,be consistent 啦,咁大個人唔洗教。」(此段經甩毛哥哥修飾+加鹽加醋+狂抽水)

K 話果次俾Q 好似教訓完之後,成個人醒曬,即係咋咋林上左深圳dup X骨,話以後遇到平價貨都會俾多d貼士喎。

頂,真係好學唔學。


殊途同歸:由富商到阿嬸的對話

8 comments:

魔術師 said...

>人地唔夠工開,你唔會專登幫襯俾佢地開多d工;服務賣平d你又覺得 quality 接受唔到

當一般香港人愈來愈藍血,愈來愈中剷,就愈來愈追求quality,樣樣講衛生(EEEE, 我唔食大排檔!),賣相,... 貧苦大眾無工開,就係因為呢班咁嫌尖腥悶既人.


PS 岩岩發現有人留言話我抄人野,如此中傷,可怒也!

鹿米館 said...

欣賞

怒火 said...

掂呀(c.m. 有QK...)

C.M. said...

魔術師:

都係社會既錯啦(夠政治正確卦)。當資訊唔平衡,或者反過來資訊嚴重汎濫,為左安心安樂安全起見,追求 quality 都係人之常情遮。(哎呀,唔好話我喇,我用廁紙真係有要求架...)

嗱嗱嗱,問番你勒,查實貧苦大眾無工開係咪一定係人地嫌尖腥悶先。唉,結構性又好,乜都好,總之供求失衡喇。

(你會抄人野?哈,可能係人地未睇清楚遮)

鹿米:

阿Q 有時真係幾阿Q。

怒火:

我d QK無咁容易比人發現既。

seikomatic said...

電視話星級阿鴻都怕攪大左多過一間就做唔番所謂水准同人情味,不過如果大渣樂同勿當奴話你知原來佢地都系...材料都有考究過,泰國米、韓國糖、荷蘭麵粉,絕少用大陸劣貨.....你信嗎?有feel嗎?

C.M. said...

我真係覺得你好醒,最後果幾段food quality我曾經諗住係延續我篇垃圾institutions架。

意思係問,d人成日話毒奶坑渠油係咪反映緊國人本質?而大渣樂同勿當奴用咩油咩奶你唔係唔知化。

你屋企又用咩米咩糖呢?點解大企業用既同小家庭用既會唔一樣,而你又係咪認定小企業一定會用平野,講規模效益;定係雞先過蛋,正因為唔要求規模效益,所以只能做到豆潤咁大間?

Ebenezer said...

好鬼抵死嘅啫^^

C.M. said...

阿Q份人有時懶係煞有介事果個樣其實好搞笑。