怪獸家長揀學校
前排接左紙扎工廠安排既某個仆直，連平時僅有果三幾日旮旯空檔都抽走曬。一切都係自己攞黎。
撞啱要同阿女搵小學，上氣接唔到下氣。
鄙人查實出左名係怪獸家長。事緣有次阿女媽咪參加某次幼稚園搞既培訓班，佢分享俾其他家長聽，話我有次阿女唔肯做功課，於是我就掟左佢份功課出門口，搞到佢喊到拆樓。適逢犬女在校擔任某節目主持，在座人等薄有印象，引黎家長主任導師譁然。
住響呢個上流基層混合區（裏面既基層聚居範圍），接觸過呢區唔少中小學，至少一半都係名震港九，就算唔響璫璫，個名都已經夠雷，聖乜乜中學，咩咩官立小學，唔多唔少有種格格不入既感覺。
話就話感覺格格不入，事實上其他中產家長（同幼稚園）都唔覺逼得佢地既仔女太緊，偶然聽到佢地仔女會耍十八般武藝，但都只係少數。（補按：之但阿四媽話佢地班上流家長既小朋友，「每星期都於課餘學習五至六個項目」喎。）
反而認識唔少自細家境學歷一般，苦苦向上到家陣略有事業果批同輩，就相對超級著緊佢地仔女未來既「競爭力」。例如話驚錯過二三四五歲呢個學習高峰期，miss左排位賽首三名位置，擔心佢面試唔夠得體之類。
Well，響我心目中，同爸爸爭食「曬駱駝」、爭最快上床瞓覺、爭邊個可以最先返到屋企唔洗人抱，呢d 就話競爭遮，點知呢個年紀既競爭已經開始同成人既競爭接軌。響圍內既朋友當中，我都算怪獸（Yes! 我仲會打鬧、呼喝、跣佢地一鑊，總之聞者色變）。
一個月前，我心儀某聖乜乜女校，好在乜？嗯，我估係佢好在夠「傳統」（aka 好大直升某人氣中學），夠「出名」（aka 親朋面前夠曬威）諸如此類，卦。佢教成點、學校係點擺設點佈置，一概不知。實不相瞞，就算到家陣我都念念不忘，好想阿女能夠入到呢間小學，然後保證光宗耀祖至少六年，好彩再加六年。
講到咁，都知我今次無揀呢間。（小小background：今次只係揀一間小學，計分制，家長或子女同學校關連越多，分數越高，入讀機會越大。就算今次無收到令郎令千金，下次排名次選學校都有印象分。詳情唔講勒，因為我都唔太清楚）
反而揀左一間於我黎講事前木宰羊既小學，男女津貼小學，無同中學有關連（Well，無就假既，佢派去某名男官中人數似乎唔少），但小班教學，教師年輕，我甚喜歡。
當我同朋友講開我個擇校條件，佢地就唔係太理解我呢個精心計算。
首先，by elimination，我「一定」唔揀官校。我中小學都係有名官校，雖然已經係十年前既事，師資係點，我真係唔相信會有大變。武斷d 咁講（但又好客觀），佢地之所以係名校，純粹係班學生，完全同教學質素無關。官校班公務員個心態我真係感受甚深，係有幾個似乎真係為學生既，新意欠奉，花款欠奉，我真係擔心佢地適唔適應呢個年代既學生。
曾經有個念頭，計下如果阿女入讀我之前間小學名校會點，因為我係畢業生，阿女就係長女，入讀幾率係九成幾以上（題外話，木宰羊小學既校長竟然響開放日，提到呢間查實響另一校網既小學，並稱之「名校」！搞錯！），於是去圖書館搵下資料，發現佢地95%既教師已經響呢間小學有十年以上既服務年資，五年以上既就得5%，即係話佢地無新血！雖然好多關連名中學，唉，時不與我，都係線把啦。（呢個「公務員」觀點俾唔少朋友否定，奇怪。）好多所謂傳統名校，都有個流動固化既情況，響呢方面，可以做兼職人治既我，會有唔同睇法。
其次，我想搵男女小學，等阿女上中學之前可以響呢個俗世（試下）同班馬騮交往（即係prefer 師姑庵）。如果中小學都係齋校，儘管我可以帶佢去參加多d男女混合既課外活動（例如ballet之類必定剔除）黎抵消佢呢方面既潛在社交局限，始終一個人係咪成長點樣成長，唔應該只係得學業做唯一既判斷準則。
而呢次最終以木宰羊小學為目標，可能只係因為佢個校長夠直腸直肚，似足我個女，又或者，佢只係我地想呢區唯一參觀過既小學。（講真，洗乜去咁多丫，睇完咪又係唔知教成點，唔知仔女究竟適唔適合套方法～ 好似其他家長咁請埋假走訪幾區，名義上俾自己多d 選擇，實際上擔心唔能夠證明俾子女睇，自己係一個盡責既父母。咁都擔心第日自己個仔女竟然會為咁小事而怪自己，究竟邊方面要檢討呢可？）
聽落好似太快手喎，之但我唔求其架。至少我度過，阿女就算呢輪唔收，縱使佢參加既興趣班唔多（除左畫，無琴棋書，無豬心算，無瘋歷史。）以佢大鳴大放既性格，應該OK既。而且如果真係入到呢間學校既話，佢仲帶俾我一個 benefit，就係到阿仔讀小學時，唔洗再煩。
怕煩，係我呢亭怪獸家長既通病。
**************
題外推介：塞米講香港交通系統，與民息息相關。
