Friday, September 30, 2011

怪獸家長揀學校

前排接左紙扎工廠安排既某個仆直,連平時僅有果三幾日旮旯空檔都抽走曬。一切都係自己攞黎。

撞啱要同阿女搵小學,上氣接唔到下氣。

鄙人查實出左名係怪獸家長。事緣有次阿女媽咪參加某次幼稚園搞既培訓班,佢分享俾其他家長聽,話我有次阿女唔肯做功課,於是我就掟左佢份功課出門口,搞到佢喊到拆樓。適逢犬女在校擔任某節目主持,在座人等薄有印象,引黎家長主任導師譁然。

住響呢個上流基層混合區(裏面既基層聚居範圍),接觸過呢區唔少中小學,至少一半都係名震港九,就算唔響璫璫,個名都已經夠雷,聖乜乜中學,咩咩官立小學,唔多唔少有種格格不入既感覺。

話就話感覺格格不入,事實上其他中產家長(同幼稚園)都唔覺逼得佢地既仔女太緊,偶然聽到佢地仔女會耍十八般武藝,但都只係少數。(補按:之但阿四媽話佢地班上流家長既小朋友,「每星期都於課餘學習五至六個項目」喎。)

反而認識唔少自細家境學歷一般,苦苦向上到家陣略有事業果批同輩,就相對超級著緊佢地仔女未來既「競爭力」。例如話驚錯過二三四五歲呢個學習高峰期,miss左排位賽首三名位置,擔心佢面試唔夠得體之類。

Well,響我心目中,同爸爸爭食「曬駱駝」、爭最快上床瞓覺、爭邊個可以最先返到屋企唔洗人抱,呢d 就話競爭遮,點知呢個年紀既競爭已經開始同成人既競爭接軌。響圍內既朋友當中,我都算怪獸(Yes! 我仲會打鬧、呼喝、跣佢地一鑊,總之聞者色變)。

一個月前,我心儀某聖乜乜女校,好在乜?嗯,我估係佢好在夠「傳統」(aka 好大直升某人氣中學),夠「出名」(aka 親朋面前夠曬威)諸如此類,卦。佢教成點、學校係點擺設點佈置,一概不知。實不相瞞,就算到家陣我都念念不忘,好想阿女能夠入到呢間小學,然後保證光宗耀祖至少六年,好彩再加六年。

講到咁,都知我今次無揀呢間。(小小background:今次只係揀一間小學,計分制,家長或子女同學校關連越多,分數越高,入讀機會越大。就算今次無收到令郎令千金,下次排名次選學校都有印象分。詳情唔講勒,因為我都唔太清楚)

反而揀左一間於我黎講事前木宰羊既小學,男女津貼小學,無同中學有關連(Well,無就假既,佢派去某名男官中人數似乎唔少),但小班教學,教師年輕,我甚喜歡。

當我同朋友講開我個擇校條件,佢地就唔係太理解我呢個精心計算。

首先,by elimination,我「一定」唔揀官校。我中小學都係有名官校,雖然已經係十年前既事,師資係點,我真係唔相信會有大變。武斷d 咁講(但又好客觀),佢地之所以係名校,純粹係班學生,完全同教學質素無關。官校班公務員個心態我真係感受甚深,係有幾個似乎真係為學生既,新意欠奉,花款欠奉,我真係擔心佢地適唔適應呢個年代既學生。

曾經有個念頭,計下如果阿女入讀我之前間小學名校會點,因為我係畢業生,阿女就係長女,入讀幾率係九成幾以上(題外話,木宰羊小學既校長竟然響開放日,提到呢間查實響另一校網既小學,並稱之「名校」!搞錯!),於是去圖書館搵下資料,發現佢地95%既教師已經響呢間小學有十年以上既服務年資,五年以上既就得5%,即係話佢地無新血!雖然好多關連名中學,唉,時不與我,都係線把啦。(呢個「公務員」觀點俾唔少朋友否定,奇怪。)好多所謂傳統名校,都有個流動固化既情況,響呢方面,可以做兼職人治既我,會有唔同睇法。

其次,我想搵男女小學,等阿女上中學之前可以響呢個俗世(試下)同班馬騮交往(即係prefer 師姑庵)。如果中小學都係齋校,儘管我可以帶佢去參加多d男女混合既課外活動(例如ballet之類必定剔除)黎抵消佢呢方面既潛在社交局限,始終一個人係咪成長點樣成長,唔應該只係得學業做唯一既判斷準則。

而呢次最終以木宰羊小學為目標,可能只係因為佢個校長夠直腸直肚,似足我個女,又或者,佢只係我地想呢區唯一參觀過既小學。(講真,洗乜去咁多丫,睇完咪又係唔知教成點,唔知仔女究竟適唔適合套方法~ 好似其他家長咁請埋假走訪幾區,名義上俾自己多d 選擇,實際上擔心唔能夠證明俾子女睇,自己係一個盡責既父母。咁都擔心第日自己個仔女竟然會為咁小事而怪自己,究竟邊方面要檢討呢可?)

聽落好似太快手喎,之但我唔求其架。至少我度過,阿女就算呢輪唔收,縱使佢參加既興趣班唔多(除左畫,無琴棋書,無豬心算,無瘋歷史。)以佢大鳴大放既性格,應該OK既。而且如果真係入到呢間學校既話,佢仲帶俾我一個 benefit,就係到阿仔讀小學時,唔洗再煩。

怕煩,係我呢亭怪獸家長既通病。

**************

題外推介:塞米講香港交通系統,與民息息相關。

11 comments:

said...

近排响我個draft籮嗰度有篇講揾幼稚園...

塞米一條揚陸轟炸機 said...

> 佢地之所以係名校,純粹係班學生,完全同教學質素無關。

但係同學才是一同學習的對象呀。趁早讓子女明白識見靠自習這個道理,很 重要的。


P.S. : (我以為你潛水了...都唔覆...)第一篇文我都只係set左key point....工餘時間執research.....月尾前出到貨 的話應該要感恩啦= =

C.M. said...

米:

Yi? 我好想八卦下你點搵喎。我呢亭怪獸家長求其得黎,又順風順水,萬事勝意,甚感恩。

塞米:

>>但係同學才是一同學習的對象呀。趁早讓子女明白識見靠自習這個道理,很 重要的。

曾幾何時,我幾buy呢套,不過家下會好謹慎。比如我先簡單咁問你:你公司既同事係咪你學習既對象?

呢個題目,得閑我會比心機寫下。

唉,如果唔係接左呢個仆直,呢個時間我放緊假添呀。我年底前仲有成>12日假期,唔知點算...T-T

塞米一條揚陸轟炸機 said...

都有架。不過呢一兩年全職freelance,請來幫忙的sales倒是我教他們比較多...............


喂,趁我架車未賣,快手黎melb打個圈啦。

Ebenezer said...

好多時都會人算不如天算架,隨遇而安,順變囉。

C.M. said...

塞米:

你班同事好學嘛?有冇d特別難搞既呢?

MELB? 乜地方?

以便:

哈哈,人算不如天算,甚是甚是。

塞米一條揚陸轟炸機 said...

好學是好學...不過實戰經驗吸收不 良,要時日碰壁才能學準。 培訓新人我不在行呢。同埋,做得搵客sales,一個根本問題 : hea。

melb = melbourne

C.M. said...

>>做得搵客sales,一個根本問題 : hea

搵客sales唔係commission based既咩(at least part of la)?何來咁多時間hea?

你意思係,hea住學你d野?咁呢個明喎。

塞米一條揚陸轟炸機 said...

因為他是個part-time sales......

C.M. said...

that might explain everything...

Anonymous said...

thanks for share........