Tuesday, February 28, 2012

我係一隻曱甴

公司門口又撞見妹妹仔,佢知道我黎緊新任務會歷盡艱辛,語帶雙關話我似「隔砸」。

其實我都知死架勒,明知山有虎,偏向虎山行,又冇 jetso,又冇明顯incentive,最大回報係加班有飯津,直落免的士返屋企,並貪佢有新野俾我呢個老野見識下,聞下新屎坑咁大把。

素知曱甴生命力頑強,死而不僵,僵而不腐,腐而不滅。妹妹仔都知 Blattella 出世早過 Homo 好多好多,連學名咁旁門左道都曉,家下後生可畏。

想當年預科入讀新學校,我同另一個同學連同兩個中七男生,四依為命之時,就正其中一位師兄個花名就叫「曱甴」。問返班女同學,點解幫佢改個咁既名,佢地話佢烏糟喎。Well,唔覺丫。我地幾個男仔無論小息定午飯,都一定匿響連住禮堂後台既後樓梯果度,響果度鋪張紙皮瞓晏覺,響果度圍埋睇《Yes!》,響果度大啖食大大兜炸魷魚鬚,響果度品評邊個女仔夠省鏡,響果度埋怨點解要同阿眾Sir share一個廁所... 縱使外面風雨飄搖,但「曱甴」時刻保持風采依然。咁當然,學校老師都有分寸既,招得入黎既男生雖然無睇頭無咬口,不過都未至於無人品無厘頭,所以我總覺得烏糟二字,只係源自阿曱甴生人勿近既自卑感,絕對唔係來自佢既身世。至於我個花名,陳年舊屎,唔方便講咯,總之唔多好野(或唔算太差)啦。

講番妹妹仔,佢好疑惑我點解一聽曱甴兩字都可以發表謬論,問我「你耿係好鍾意成日上facebook或者寫blog架勒」。嘩,家下我做人治定你做人治呀,可唔可以預測下我呢隻曱甴既life expectancy有幾長呀?係死於殺它死,定係死於請君入甕,甚或死於安非他命?

「既然話係曱甴,你邊會死得咁便宜丫,批你係爆血管多咯。。。。Aye aye aye,仲有,你寫二三百字好勒,長文頂唔順押。」如果哥哥仔真係Blattella,好肯定妹妹仔絕對唔係Arachnida,絕對唔係。

13 comments:

the inner space said...

女校男生!

C.M. said...

Well... 竟然睇得出。

the inner space said...

兄台寫得好淺白,
女校男生好矜貴。

C.M. said...

之但,我覺得好隱晦咯喎。

Terence Yun said...

點解妹妹咁留意你既?哈哈。

C.M. said...

我出左名鍾意送死丫嘛,咪個個都埋黎送我一程囉。

005 said...

隔砸? 曱甴? 咔嚓?

C.M. said...

據聞正字係:

甴曱

the inner space said...

蜚蠊 漢語拼音:fei lian
即甴曱也亦稱蟑螂。

【維基大典】蜚蠊,蟲名,分類屬蜚蠊目。北方俗稱蟑螂、粵地通稱曱甴。

文少 said...

唔好離題﹐咁究竟你個花名係乜﹖(爆)

C.M. said...

sPace:

蜚蠊!! Feline! 係咪即係貓既親戚?

文少!

乜咁錯蘯?歡迎歡迎。我個花名... 唔係靚仔就係才子架啦... 總之一定唔係7頭之類啦(一定唔係)。

xiao zhu said...

哈哈,你果然有自知之明,知道靚仔、才子只可以係你嘅花名。

C.M. said...

-_-''''