Tuesday, July 15, 2008

Luck Look 工人

Luck Look,當然係講工作喇。

前幾日準備 luck look 之前,見到三位靚女,提及小弟份工。

嗯,簡單黎講,咪乏善足陳囉。

呢個老闆識左我好多年喇(總之好多年),對我真係好好,小弟真係非常感激。老闆佢呢,好有同情心,所以收留我。嗯,小弟真係無以為報。呢個亦係我呢位做細既,一直唔希望自己會有大動作既原因。係呀,請我唔洗好多錢,皆因我係好講心既。

呢間紙扎工廠,日常工作都係入下原材料,然後我呢亭工人就依照果d 眯埋眼都搞得掂既工序,扎起一個個連個客都未必會望多兩眼既紙扎公仔,昃下有冇甩頭甩尾,然後 call 車送貨。最近一個國內客就訂左批新貨,係咁,就搞到我求生不得。

*************

查實我唔係唔想自圓其說,但係,我要先搵返隻look。而且,我仲有好多廢話想講。

*************

鎚哥哥提到 Propaganda

我睇到之後覺得,好多字原本係中性既,但無啦啦可以比人一個幾負面既感覺。尤其係呢個開放社會,某d字眼其實日常用開,只係環境唔同,所用術語亦因此變得唔同左之外,呢d 字眼個背後意思同性質,其實好相近。

好似 Propaganda 呢個字,係企業管理層面,就會叫 alignment,負面咁睇叫統戰。

Marketing方面,幾乎就包含係promotion之內。精明客戶就叫玩弄文字。

學校叫標語。曳學生叫多Q餘。

工廠叫... 哎呀,唔記得。雖則為工廠一員,但我一向時運高。

其實,你可以叫洗腦。正面定係負面,只在乎立場,不在乎對錯。

所以你小心,我係洗緊你腦。

25 comments:

Clay said...

propaganda一字,可能本來是中性。愚見認為只係納綷做propaganda做得太出色(多得文宣奇才戈培爾),煽動左整個納綷德國去同全世界對抗,固propaganda係因納綷得罪全世界方成負面詞,而中譯一般作「文宣」而非wiki的「宣傳」。

>>正面定係負面,只在乎立場,不在乎對錯。

非常同意。世事難分對錯,只是各有立場。

Anonymous said...

係鬼,你邊係洗緊我哋腦呀!如果洗左,應該好乾淨架嘛,你睇你,洗啲唔洗啲、求求其其咁,越洗越撓搞呀。

Samsara said...

..... x2

C.M. said...

On兄: !!!!!!

若虛兄:

蝦,原來你都係咁諗,我自己若果一提起propaganda呢,好多時都會同阿Goebbels聯繋埋一齊。個感覺好直接。

若虛兄,另一方面睇,我覺得某d字眼,之所以被廣泛接納為正面或者負面,似乎好多時都因為政治有關,而亦好多時都係「出自」「民主自由既國家」,正面例子如 freedom, democracy, leadership;負面例子如control, authoritarianism, propaganda, socialism.

仲有,最近Bush(好似係...)話,為左「世界和平」,民主係必要既。Well,究竟呢個世界係圍繞住邊個國家而和平?其實我唔係想借呢句話民主唔好,或者反證民主唔能夠幫助到世界和平,我只係o係度諗,究竟我地呢代個潛意識,係咪受到外界影響得好緊要呢?

其實我想話,人們想象中的正面與負面,似乎多由於「背景」。個情況真係好有趣。

小黃蓉:

係你地犀利遮,我已經好努力咁洗架勒...係咪我部洗腦機唔夠勁,定係我d洗腦粉落得唔夠呢?

香妹:...... (我係咪講錯野?)

K said...

>>提及小弟份工...咪乏善足陳囉
我份工咪同您份工一樣咁"乏善足陳"囉!我無話您知咩(唔記得? 事後補上)?

>>呢個老闆識左我好多年喇(總之好多年),對我真係好好,小弟真係非常感激。老闆佢呢,好有同情心,所以收留我。嗯,小弟真係無以為報。
您老闆咪係捉到您的心理, 先至收留到您囉(嗱, 唔好插我住, 做了HR多年, 甚麼人和事都見唔少, 唔好怪我咁講噃)!
一向以來, 香港僱員的忠誠度, 比起鄰近的亞洲地區都係低。咁當然, 我亦有見到有些老闆真係對員工好好, 除非真的結業, 否則員工係唔想走(一些古舊或老字號的商店和食店就係了)。

>>請我唔洗好多錢,皆因我係好講心既。
您問心那句, 無咁好pay的話, 您點夠錢養阿moon, DaDa同阿b先?! 您估個負擔同洗費唔重咩?

係, 講心係重要, 但唔好太重感情; 當然, 若然人工好但老闆或者同事當您係一條草時, 您繼續做那份工亦無意思(對上份工就係咁, 只係做了半年)。

當年我就係重感情, 舊公司(即係那間私人機構)於02年同我續約但要cut20%人工, 我都肯做(事實唔止一個, 最重要的係未有籌碼"起飛腳", 即唔夠行政及人事工作經驗); 但在05年同我續新約時, 人工竟然無加到! 所以灰心到我要盡快跳槽。

>>然後我呢亭工人就依照果d 眯埋眼都搞得掂既工序
唔怪得您話份工無挑戰性啦!

>>係咁,就搞到我求生不得。
對住大陸客, 下一句係"求死都唔得"!

>>好似 Propaganda 呢個字,係企業管理層面,就會叫 alignment,負面咁睇叫統戰。
我記得我在自己blog度有講過統戰呢樣東西, 可以話係有些公司的策略性工具。

>>所以你小心,我係洗緊你腦。
哈, 本小姐其中一個工作就係洗腦; 所以, 分分鐘係我洗番您個腦轉頭呀傻仔!

Samsara said...

Goooooooo...da....Joooooooo...ba!

(依個爛gag要睇左爛片先明嫁!)

Juicy Runners said...

G
O
O
D

J
O
B

!

Gideon said...

咁企業管理,Marketing, 工廠,都預左佢地有 bias, 尤其明知係 promotion 就預左信佢一成都死啦。

但如果學校,國家都用呢一個方法去灌輸思想,就有問題喇...

係咁啫。

K said...

又, 問埋依條問題: 邊度會有人準備luck look(甩轆=打輸數)o架?

Samsara said...

GOOOOOOOOOOOOOOOOOOOOOOO
DA.............HAAA
JOOOOOOOOOOOOOOOOOOOOOOO
BAAAAA... HA.

(Warning: this blog is haunted by VEEEEERY mow liu yen!)

K said...

Well Done! Samsara!

C.M. said...

(唉,我個look飛左出街)

>>您老闆咪係捉到您的心理, 先至收留到您

梗係,都識左我咁多年洛。

>>您估個負擔同洗費唔重咩

咁係呀,但錢嘛,多有多洗,少有少洗囉。(最多溝稀d奶粉囉)

>>唔怪得您話份工無挑戰性啦

嗯... 查實我又冇講過話無挑戰性,我只係話比較悶d咁遮。(我周不時比d客挑戰我忍耐力架喇)

On兄,香妹:

你地兩個係傻左,定係我要條件反射咁遞手比你兼申脷?

(喂喂喂,你地講緊邊一套爛片亞?)

鎚哥哥:

嘩,咁你公司同你做alignment真係九牛二虎都唔掂。查實你間公司適唔合你架?

我近排見到有d學校掛左d橫額同標語,有d話大學之道在明明德、有d話勤有功嬉無益、有d話德行比學問更重要,又有d仲大大隻字鼓勵某某同學獲得某某運動獎。

又,若果國家同政黨施政,「獨立傳媒」作出報道。咁,有冇人做左propaganda呢?

又,前排「保衛」皇后碼頭又有好多橫額標語,嗯,係咁啫。

Karen:

下?乜甩轆=打輸數咩?

香妹:

下次約你撐檯腳。

Samsara said...

部爛戲係.....Hancock,唔好睇呀!只有個傻佬先會唔理我勁唱部戲,照走去睇。

C.M. said...

你講到咁爛,搞到我都好想入場睇下幾爛添。

火女 said...

>>請我唔洗好多錢,皆因我係好講心既。

我都好似係咁!
不過我怕俾人都冇人要!

Morca said...

:P:P:P

xiao zhu said...

火女:

唔好妄自菲薄呀!

C.M. said...

火女:

嘩,你咁講,真係成班老闆出黎認頭架!

Morca:

你條脷好長!

小珠:

下!依家終於捨得出黎見人拿,之前去左邊!

K said...

>>乜甩轆=打輸數咩?
一半機會會係咁。

>>最多溝稀d奶粉囉
喂!等陣!唔好咁做!
問過婦產科醫生, 咁做會為對bb身體唔好, 會缺乏營養, 寧願少食多餐。

又, 等您侍產完之後, 下次約你及A, D, E & F撐檯腳聚下(想知講乜? 請密切留意我下個post啦)。

xiao zhu said...

我喺度、我一直都喺度,係你心中無我、目中無我啫。

怒火眼睛 said...

嗯, 我都喺度, 但成日唔識搭爹....一係咁, 下次都唱下歌表示下存在先...

C.M. said...

Karen:

原來唔溝稀得架?但我之前個d醫生/姑娘話小朋友發燒可以溝稀d播。(我係胡言亂語)

乜...咁多人既?

小珠:

唉,唔係我想架。爆棚呀我。

怒眼妹:

我次次見親你呢,都好自然(條件反射)會肅然起敬。唔洗唱歌,跳舞就得勒。

C.M. said...

On兄:

有咩諗法唔怕講喎。我最鍾意人插我眼架勒,尤其係你添。

(係咪想話正面負面字呀?)

K said...

>>我最鍾意人插我眼架勒
梗係啦!插一隻會有番一隻(不過要換過一對啫)噃!

>>咁多人既?
呢條係疑似推理題。提示:以上的A, D, E & F您見過啦!

C.M. said...

哦,原來E同F係...