Thursday, December 03, 2009

窮人自白

我承認係窮,但唔承認係一窮二白。

若果你一聽到我話窮,然後即時(條件反射)「質問」我有幾窮,咁你不如先答我:窮人係咪唔可以有有錢人既生活態度先~

窮成點?舉個例子丫。阿鎚果篇《...憤怒》講連搭車都要諗過度過既「窮人」,我肯定有份。再唔係,佢入面講果位因被約「食飯而陷他們放飛機的不義」,呵呵呵,小弟好多時必定會係其中之一。最重要係,比對同輩朋友既生活環境、雜誌喜好、穿衣著鞋、電話相機、外遊次數、社會話題、配備更換率,90% 以上 incomparable,你話,咁算窮未?

不過,我唔承認生活質素差囉。

拿,咁我又唔係話我窮得有骨氣喎,亦唔會好清高咁話我唔想買車買樓買新電話買DSLR買呢買lou,我只係唔承認擁有呢d野響呢一刻可以提升幾多生活質素囉(假如我真係幾百萬未開頭,暗啞底個答案查實係:我唔係買唔起,只係家陣未有消費意欲遮。)

之但,我既諗法,並非完全同家中話事人諗法一樣。不過,佢經歷過既比我經歷過既艱難十倍甚至百倍,我諗佢應該比我更清楚「好既」生活質素係咩一回事卦。自從我試過杯麵做午餐兼掙人周身債既日子,我既精神底線係:有麵食(齋麵都得)+ 周身債但唔會比人追(有拖無欠) + 馬桶要沖到水(蹲厠,即mao厠也,可以接受)。用家陣有家室既士釘突,底線稍為上移至:全家有飯食 + 唔可以有重大債務 + 馬桶要沖到水。暫時黎講,呢個要求已經超標完成。幾滿意。

既然滿意呢一步,下一步,就自然係再提高生活質素。

全家一個星期去一兩次街食飯,算理想。茶餐廳或快餐店,舒服唔怕有束縛。如果食食下飯之時見到店員服務態度差而扯火,或者黎果碟餸貨不對辦之餘仲要燒到成舊碳咁樣既話,呢亭生活質素唯有下次補番。但又如果食食下飯果史碰到老朋友,或者快餐店免費upgrade 餐凍飲既話,呢亭,咪又係一次高質素生活既現實演繹囉。

係架,都幾受環境影響架。咁講真,查實個環境都係自己揀既,係咪完全受「環境」影響,我又覺得可圈可點 law 你話係咪先~

至少,暫時黎講我同話事人都覺得有「足夠」自主權,若果去鹿雨茶室要睇人眉頭眼額,或者去肆貴酒店要就住就住荷包,咁不如自在d,響街尾大家活整個套餐,一路猛鬧死女包周圍走,一路捉實死仔包唔比佢搞亂檔,爽呀。

不過都仍然有人覺得我地「捉襟見肘」。一個阿媽,一個話事人,甚至有朋友都係咁睇,暈。實情又未至於捉襟見肘既,只可以話,咁既環境唔可能滿足全世界。我睇,多數都係誤會黎遮。朋友約我出街食飯,一般黎講都唔會超出我能力以外既(唉,幾廿年無女仔約燭光晚餐喇,尋常食飯洗得幾多錢丫)。之但唔知係我顧家定係食古不化抑或童年陰影夠大夠黑,要我獨自去偷歡,心理障礙就好似天匯咁高(樓價+altitude)。唔係話事人唔准,而係丟低大細食住家飯自己走去食大餐,感覺太似朱門夜宴,但帶埋全家一齊又未必負擔得起(大數怕長計嘛),咳咳咳。有時朋友有怨言都在所不惜(死撐)。

關於呢樣野,家嚴會好唔同意,佢覺得我咁樣會失去好多朋友同埋 connections,甚至會失去「身份」。 或者咁講,我唔會因為失去一d 無法體諒我某d 基本個人需要既朋友而傷心(「上心」總有d既),真朋友自然會明白我(衷心感激佢地)。既然我要過既係一個響大多數情況都可以獨立自主既生活,包括為家人既生活作出最基本既保證,就要響適當時候「捨得」放手。

如果我追求緊外間所謂好徹底既「財務自由」,或者我真係會好在意身份,但我已經唔係細路,唔會將身份放響自己心口,日日比人睇住認住記住證實肯定,但亦唔會憎人富貴(點解家下做既得利益者係要好似罪人咁遮?),下下誅心論要你面壁思過。(講真,好似同人競賽跑步咁,我唔洗成日望住左右跑架下化?)所以興幸窮也好,比上不足也好,我越黎越覺得自己,甚至自己一家,都比大部分人「隨心」。

今日返歸見到家中老闆仔條「新」口水肩,原來係一塊大手巾仔圍住再用夾仔夾起既時候(汪洋大盜look),我就諗番起「窮則變,變則通」呢句老生常談。唔接受自己窮,又點通?

24 comments:

Anonymous said...

嗯,丫,梁文道本「訪問」入面,其中一個單元係訪問舒國治先生。我好鐘意個訪問,亦好鐘意舒國治既態度。

http://www.douban.com/group/topic/4925568/

~goethe

Anonymous said...

什麼自由都好, 包括「財務自由」,只要有所想追逐, 就只有白忙一場~!只有精神自由, 才能隨著我們肉身,去到離去既一刻!

大佬! 都好耐冇見了!不如揾日去大9樂整個賣飛佛茶餐聚聚吧~!

Gideon said...

大佬﹗又對號入座...
我啲抑鬱都唔知係咪你傳染我既囉

Anonymous said...

這篇saved起,人生觀差不多…可以大胆講句「非常接近」,…自己經歷,對人/病人的同理心都是這樣浸淫出來。 

Anonymous said...

又...

>>好似同人競賽跑步咁,我唔洗成日望住左右跑架下化?

咦!跑緊了吧~!?

英倫肥龍 said...

咁我會覺得都唔駛太在意其他人既一套,主要都係自己知自己事...

不過咁諗/講可能有人會話太傻太天真囉~

C.M. said...

阿靚仔:

雖然好長,都睇曬。舒國治既態度真係好得意...嗯,幾「出世」,但又幾實在。真係好想睇下佢講果返説話時既表情、眼神係點。

昂兄:

自由啦你!相對你,我仲走緊空轉呀。(最衰係個身子,嘿。)大9樂?好哇,但我想同你去食魚生播...

阿鎚:

點敢對號呀... keke,借題發揮咁遮。咁啱個情況又同我一鬼樣,咪博下你同情咁囉。(老實講,要頂住你響鋪頭傳出黎果d負能量真係要六神合體至得~ 你真身正面好多囉)

C.M. said...

Anon(Nic?):

咁合拍?真的很想聽一下你的故事。

昂兄:

跑左幾年啦!家陣仲有三件一齊陪跑添,幾熱鬧呀。

龍兄:

講得對。自己知自己事仲緊要。我諗你同我應該都唔會介意人地話太傻太天真卦...

Anonymous said...

唔似咩?唔係講笑,改少少時間地點和人物,真係差不多。好的,等我切好個故仔先,到時跑下跑下,如果你有閑情想聽,我咪講故仔 =)

Anonymous said...

CM 兄,

>>...咁不如自在d,響街尾大家活整個套餐,一路猛鬧死女包周圍走,一路捉實死仔包唔比佢搞亂檔,爽呀。
哩啲至系真歡樂真財富, 系有大把錢買唔到或買唔翻! 好好愛你身邊嘅人, 不讓他們受苦 (你現在的生活一點也不苦), 你依家就已經系最大最成功的富翁啦!

安諾勿斯 said...

我都幾buy你個套…不過,當你見到人有你冇,仲要係你條o靚o既時侯,個心硬係有啲「銀」住「銀」住。我都係凡心太重,要過多幾年先可以收心養性。

Anonymous said...

1st同理心, 2nd 我咪講故仔 =)anon by Nic

C.M. said...

Anon:

聽故仔就絕對有閑情喇(講故仔就吃力d...)!講丫講丫。

安兄:

人在江湖身不由己,查實我好認同。現代人仍然好似原始人咁,睇到你生活/衣著/飲食(對己)無要求,就有反射話你對工作/付出(對人)無要求。我明既。

條o靚有你冇,自不然會照鏡睇下自己有冇呢種要求。響職場,無可厚非。你估我家陣返工真係牛仔褲咩。

不過,既然響工作以外既情況我可以選擇自在,咁,咪盡量爭取多d自在既時間囉。

C.M. said...

Nic...

Samsara said...

我有十分老死既兩公婆,有次男問我:「你估吓我地今年結婚三周年去邊度食?」

S好悶地以為又要聽豪門夜宴九大鬼之類既故仔啦,結果佢話:「我地去左大家樂打邊爐....仲好豪華地加餸!....都係百幾蚊咋!」

女:「係呀,仲有d師9兩個人叫一個火煱,跟住自己在袋度攞d菜出來煮!」

我覺得依pair人去到一個好穏定幸福舒服既境界。

Samsara said...

又,馬桶沖到水十分重要。

Anonymous said...

3/12/09 13:04,
3/12/09 20:03,
4/12/09 06:26
先係我。sorry.
Nic

(其它的Anon非小弟)

Anonymous said...

結婚周年有咩理由去大家樂架....緊係去吉野家喇﹗吉野家打邊邊價錢平D,仲好食D添﹗

~goethe

黑人 said...

> goethe

去吉野家好食d,仲有意頭
返到家吉返野先至訓

C.M. said...

香妹: 嘩,最別致係,兩個人有共同想法! :)

(查實我想加埋熱水爐架,曾經番大陸住宿舍,試過連熱水爐都無,天寒地凍果史真係..唉)

Nic: Thanks!

阿靚仔: 但吉野家唔收Octopus,好唔方便。

C.M. said...

黑人: Well,盡在不言中喇。^^

Morca said...

真係好熱鬧~

K said...

多o野食可以去九龍城方榮記(上個月去過)或者金沙角(近我住o個度呀), 約埋成班人都唔錯o架!

C.M. said...

Morca:

就快新年嘛。

Karen:

金沙角?昃昃地圖先〉