明白與不明白
最近同阿女去賣旗，先知道原來「會主動」買旗既人，大部分都係上左年紀既阿婆，然後輪到中年女人或帶子阿媽同埋上年紀既公公，跟住到女仔，最後先至輪到一眾中青男士男仔。雖然大部分阿婆捐既錢好多人（包括我）都未必睇得上眼，但睇到佢地同細路女打招呼既方法，同埋點鼓勵小朋友既態度，顯得聖經入面果位捐身家既老太婆既故事，原來好合理。
我唔係未聽過已經離開 NGO 既舊同學講過賣旗既錢會點洗，不過我覺得，就算呢個社會真係邪惡成咁，或者呢個外表風光既組織黑暗成咁，做老豆既我，都唔應該抹煞剩番果1%既光明。呢場賭博，我自信輸得起。
果日我帶住佢，先問左佢幾個成人問題，諸如「點解賣旗呀？」「d 錢點用呀？」「點解爸爸要賺錢呀？」「無錢點算呀？」之類連我自己都答唔到既問題。由同佢一齊搣旗仔、一齊揹住個錢袋，然後企響佢後面support佢處理成個marketing + sales + admin + cs既作業，到最後企響佢對面等佢自行發揮，先發覺原來放手唔係難，亦唔係易，只係需要好有紀律咁調節自己個心態，等自己有充分準備既時候，就要決絕咁比佢獨立。
唔否認，同個女賣旗絕對係一個好值得珍惜既親子活動，我要放棄呢個所謂機會去比我觀察佢處事既另一方面，的確掙扎過。老實講，唔係我權衡輕重過，寧願放棄一個機會去換取另一個機會，甚至奢望兩者兼得，而有少少係想體會一下，人係咪一定要明明白白咁犧牲自己好明白既野，然後先可以不明不白咁獲取自己永遠都唔會明白既野。真係一個謎。
12 comments:
同仔女賣旗, 係一個好好既體驗過程, 培養小朋友付出, 建立"社會"既概念, 好值得做~~
好﹗以前覺得義工好無聊，近年有多少改變諗法。不過，到而家，或者我衣世呢，都應該接受唔到「制服團體」衣家野~
~goethe
賣過旗，又買過旗。
賣唔賣得出同自己肯唔肯買，係好睇邊間機構的，因為大家而家醒左，會望下個旗袋係咩料先。
又，好多時見到有父母帶住小弟弟小妹妹走埋黎叫我買，尤其是大熱天大冷天時我會衰心軟買鬼左。有次買完先知原來係「XX教XXXXX學校」籌旗建校....妖~
>最近同阿女去賣旗，先知道原來買旗既人，大部分都係上左年紀既阿婆，然後輪到中年女人或帶子阿媽同埋上年紀既公公，跟住到女仔，最後先至輪到一眾中青男士男仔。
有妹妹仔賣祺我即科水:P
>賣唔賣得出同自己肯唔肯買，係好睇邊間機構的，因為大家而家醒左，會望下個旗袋係咩料先。
呢個係重點
>>人係咪一定要明明白白咁犧牲自己好明白既野，然後先可以不明不白咁獲取自己永遠都唔會明白既野。
這是增進認知的其中一個過程，划得來的！
篤撐：
我耳聞目睹其他父母講佢地個仔女好似好明白呢個世界發生咩事，但我個女就仲係一舊飯咁（淨係約略知道原來世界上係有小朋友會因為無野食所以「有骨」），長路漫漫呀...
靚仔：
義工好呀，就算平日帶阿婆過馬路，響網上寫幾篇教曉d盲毛（即係你啦），都已經係發揚緊義工精神喇。
制服團體咯喎，係咪因為「紀律」呢家野所以接受唔到呢？（斷估你唔會因為乜乜誘惑卦）
Zeabor：
＞＞會望下個旗袋係咩料先
哈哈，查實我都會。我買旗呢個行為都幾條件反射，小弟弟小妹妹老人家走埋黎，無論咩機構，買既機會就大（關鍵睇下我有冇散紙，若干情況出廿蚊都會既）。
反而太靚女我會縮，可能係motivation crowding out 卦。
阿米：
我明明係麻甩一個，竟然妹妹仔反而唔得囉。奇怪。
校長：
＞＞划得來的！
有你支持，個心竟然定好多。唔該曬！
************
題外話，想問下點睇賣旗個手法。
今次我並無主動帶阿女上前賣，賣之前同阿女講，話今次唔洗主動同人講「幫我買支旗」，淨係將個旗袋放響前面，渣住支旗等人過黎。願者上鈎。
呢個手法，個零鐘頭賣左近80張，不乏有人（不論性別）響果邊買完再黎幫襯我個女。（其他家長+仔女都大致係咁多，特別係其中一組竟然賣曬400支旗，好誇張。）我諗法係，一，我唔係賣口才，二，唔想人唔好意思，三，願者上鈎對雙方都更有意義。
（嘻嘻，其實怕面懞... 所以最後半個鐘我就送阿女出大海自己搞掂...）
「所以最後半個鐘我就送阿女出大海自己搞掂」
嘻~唔驚個女俾人拐左去？
又，C.M.兄你係醒o既，釣勝於魚，早賣晒仲要再出去賣多D添呀。
咁我又唔夠膽放佢出海既同時又gup實佢既。
哈，你講起，我地賣完旗果晚，我問佢「今日爸爸唔響你身後便，驚唔驚呀？」佢話：「唔會，我都唔驚有人捉我既。」似乎學校教佢地點同陌生人接觸都幾收效。
＞＞早賣晒仲要再出去賣多D添呀
真架？原來我都有先見之明... :)
青男士男仔要留個錢照顧身邊的女士女仔,其實更偉大呵!呵呵 =)
Anon_b
同仔女賣旗, 係一個好好既體驗過程..hahahahaha
第一次申手同人乞錢咁，俺賣過旗，知道箇中味道，所以逢星期六出街都會帶定散紙，雖然只系一蚊，比既唔系邊間團體，系果位企系街既朋友。
最近既問題系八達通買旗最低消費五蚊，好多人都唔拾得。
Anon_b:
咁難怪我咁偉大咯。呵呵呵。
晶晶：
都啱喎，家陣賣旗只係為左攞咩義工分，真係難為班學生咯。
Post a Comment