Friday, April 22, 2011

亞視反擊戰

琴晚臨瞓前睇到電視無啦啦插播亞視某發言人,好高調咁質疑無線同索福瑞(某不知名之但又據聞係唯一一間電視收視調查公司)造假收視率。

事件沉澱左一日,用google 搜索以「亞視」或「亞視質疑造假」為keyword既新聞...

ATV新聞新浪新聞成報TVB頻道(最後呢個用google search 「網誌」instead of 「新聞」);蘋果評論標題《無線斥亞視誣衊失實;東方標題《無線發聲明轟亞視》,留意兩報標題皆以誰作主體。


嘩!係咪好奇怪?!

奇一:Google 竟然search唔到蘋果、東方、明報等大報有關呢件事既新聞!(今次真係要投訴google!)

奇二:竟然唔覺有人挺亞視

奇三:我經常以為自己特立獨行,原來我睇開既亞視一直都好多人睇!扯...一廂情願。

奇四:查實係一d都唔出奇... 雖然我早知收視調查用咩方法,但我咁耐以黎連個收視統計器都未見過,仍然無質疑過究竟有幾可信!慚愧慚愧。

**********

本身我飲無線奶大既,開始睇亞視大概始自2003年,果陣中午有段空檔可以catch到香港新聞。然後又過左幾年,由追無線節目到「裝下」就算。心血來潮翻查自己講過乜,原來自己響2008年已經有五成時間睇亞視,到依家至少有八九成時間都係睇緊。老實講,我覺得亞視雖然自己既演員未必有無線既咁自然,之但睇得出佢地比左心機落去。新節目亦比無線有創意,唔係純粹令你心境舒暢令你滿足到聽日後日大後日。

記得有日同同事social 講開亞視播張達明主演果套《吉星高照》,佢同我都話主演果幾個d戲屎到無人有。買套咁既劇返黎真係幾眼冤,無線果d真係好佢多多聲。Well,係丫,我同意,之不過呢套胡鬧劇,亦睇得比無線果d 悲情、鬧交、冤家路窄、門口偷聽返炒無數次既自然好多播,似番套戲,而唔係似virtual reality。

聽到好多人重複一萬次話慣性收視,咁眾卿家有冇諗過點樣解決自己個慣性?係咪真係無線好睇過人?定係自己鍾意一路睇一路鬧?有冇試過「認真」俾自己重新選擇?

如果連自己都未認真試過隔離台點點點,齋話無線掂掂掂,個主播好好好,洗個面照下鏡先啦。

香港人又無冒險精神又鍾意做大眾主流.... 真係。

又或者,家陣有冇開始諗下「慣性收視」四個字,只係無線既宣傳伎倆,或者係評論員既理所當然,甚至係 refer 緊自己既惰性?

(嘿,誰知亞視竟然話收視原來可以追貼壟斷台喎。咁我係咪又變番大眾主流?)

**********

自2008年以黎,曾經略略提過亞視兩三次。其中一次,提到王征。而今次王征呢個名義上投資者,幾乎成為呢次反擊戰既幕前統帥。

今次唔止亞視反擊展開序幕,加埋今次大報傳媒偏袒、前排無線賣盤、臺灣資金入股、樂壇抵制、高層被調查,話時間係咪巧合,觀察係咪武斷,係咪有政治瓜葛我唔曉評論,之如果無涉及政治,就肯定係競爭對手打蛇隨棍上,而我亦估計幕前統帥,會乘勢革新亞視幕前幕後各項環節。與此同時,無線各利益盟友,或坐地起價或看風轉舵。

我呢個場外打手除左借此踩我前奶媽兩腳之外,亦對新乳娘同佢身邊既變化,拭目以待。

18 comments:

p.e.t.e.r. said...

亞視?

我淨喺記得當年睇睇吓麗的突然間變咗亞視。

之後一直都冇乜點睇佢。亞視嘅劇集我只喺睇過我和僵屍同埋縱橫四海,當中我又最鍾意縱橫四海。

之後,高清新聞台做做吓又冇咗,中天做做吓又比Now搶埋。依家死淨個英文台喺睇得吓㗎啫。其他佢嘅節目真喺冇乜興趣。

無名 said...

可能我個人唔太吋嘴,小時候人人看五虎將的戲時,我就覺得我又唔會學他們的對白及反應,所以我一直看 ATV ,個人覺得可以從亞視的劇中悟得到一些野但在TVB的就找不到,唯一例外是「大時代」。現在看來,丁蟹是有亞氏保加症的。當然,有亞氏保加症的大多數都不會發展成他一樣,因為他無人教,自然可以亂來,加上他有武勇的性格(與亞氏保加無關)才會四圍亂闖。

無名 said...

This one?
http://www.youtube.com/watch?v=yxOSkFMiow8&feature=player_embedded

Geoffrey Kong 江貴為 said...

其實晚間新聞未改時間前,我都會睇亞視,因為無記實在太晏!

無記不思長進,係對手乘虛而入嘅時候!

C.M. said...

p.e.t.e.r.:

亞視節目唔係特別優勝,綜合節目既娛樂性黎計的確係無線贏九條街。而我避免睇(即唔係完全無)無線娛樂節目同劇集既原因,就正如唔想好似威威小朋友一樣,被定型做 Disney BB. 不過真,無左中天令我失落過一排。

Anon-B:

>>個人覺得可以從亞視的劇中悟得到一些野但在TVB的就找不到

可能都係,但我唔敢講係乜,無仔細睇返。

Youtube?係,就係呢段。

C.M. said...

江兄:

雖然無線dominant period未必過去,但數十年,製造市場壟斷的手法不變,不單止流失觀眾,仲流失埋信譽,舉凡陳奕迅等歌手、金像獎頒獎等已經轉台已略知一二。

selina said...

- 我都覺得金像獎唔只咁少人睇..從第二日同事的討論黎睇。我自己對華麗明星賽、獎門人之類,真係冇乜興趣,從來眼尾都唔捎。

- 收視統計器..我都未見過。而家人通常睇數碼電視或網上睇番喎..仲準唔準架? in this sense, 電話訪問,可能真係仲反映真實收視喎...

- 兩台的劇集,真係冇乜點睇,除左時事節目。兩台的英文台,間中亦只會揀下節目睇.我對煲劇冇乜耐性。個人仍覺得港台製的,始終較有質素保證,同適合我口味。。

- 亞視的新聞雖然早播(中午及晚間那節),但一般質素麻麻,個別新聞又長又冗又冇特別角度,揀頭條又奇奇怪怪,顯示班編輯採主功夫未到家。雖則,無線有時都唔好得幾多,個人覺得晚間方健儀主持既,叫值得一睇既。

p.e.t.e.r. said...

>無左中天令我失落過一排。

嘿嘿,好彩我喺用網上痕,可以喺now度睇,不過就冇得錄嚕。除非又比錢買個可以錄嘅嘢...實在太麻煩,所以睇唔到就算。

中天走咗去now令我重開鋪咗塵嘅解碼器,點知比我發覺原來重可以睇埋東森新聞!台灣新聞除咗悶到死嘅政治同民生之外,有好多得意同informative嘅嘢,香港無一間做得到咁好。

其實兩台嘅節目都唔好睇,我喺追佢哋買嗰啲外國劇集,discovery natgeo,等等。港台嗰啲都幾好。

C.M. said...

Selina:

1. 華麗乜星賽我睇過一次,好似睇仁自慰咁,好難頂。獎門人我以前好鍾意睇,heha一輪又一日,家陣有d厭(據聞已經停左?)。

2. 呢個統計器幾有代表性我好存疑,何況得一家公司去裝置呢舊咁野,真係天曉得有幾反映現實。

3. 港台果d最正,全家都睇。之但我突然覺得,如果時刻淨係播港台,香港人又會唔會覺得悶死呢?

4. 我睇新聞主要睇角度同內容,所以,嗯,好多人話會睇方健儀,我就感受唔到有果種affiliation咯。反而我覺得無線新聞太精簡,有d 重要角度令我覺得避重就輕。亦可能因為亞視無其他好節目,於是塞曬落新聞入面。

不過唔知有冇人認同我個觀察,就係亞市個幕後製作班底比以前進步左?另一個角度講,資源多左?

p.e.t.e.r.:

哎呀,東森簡直係清泉呀(雖則係誇張左d),可惜我家貧丫,裝唔到now. 家陣亞視我追緊李祘,不亦樂乎。

selina said...

"港台果d最正,全家都睇。之但我突然覺得,如果時刻淨係播港台,香港人又會唔會覺得悶死呢"...哈,我都有諗過。唔,冇辦法,人去到某個年紀,基本上返工放工已用了大部分時間,從我角度,我需要睇d"袋到野/學到野/inspiring/略有insight"的節目,港台拍的實況節目(eg 星期日晚播的"香港故事"...有時反而仲俾到我某種趣味.)無記水準的電視劇,多謝了..我寧願上網扒多幾個blogs上下forum昅下行情吸收多些資訊感覺仲充實。

新聞..係呀,亞記有時雖然冗長,但有時佢真係詳盡得多..(不過當你睇6pm個節,同一新聞在開頭及尾段重覆出現,記者無無謂謂dum波鐘做扒,你就知我講乜)..不過無記近年新聞水準真係滑落左好多,係好多,唔知同一批老臣子過擋NOW有冇關係..但我有預感,local tv journalism..其實有少少由盛走向衰啦..

Karen said...

我睇完亞視質疑造假打假,以及無線話要告亞視,笑到半死。

不過兩間電視台都唔值得幫,一間唔多長進,播韓劇多過乜,綜藝節目太old style,另一間呢,新聞被人河蟹,同五大講唔掂數,音樂同綜藝節目很不濟,有d劇劇太犯駁,同埋太幫自己友啦(chok峯攞亞"太"區男歌手,大家插成咁多日)!

希望今年年尾開始多兩間免費電視channels,節目質素升番d啦!

C.M. said...

Selina:

>>我寧願上網扒多幾個blogs上下forum昅下行情吸收多些資訊感覺仲充實

的確如此,me too.

>>但我有預感,local tv journalism..其實有少少由盛走向衰啦

我自己呢,作為“免費電視”(即係隱藏費用唔計啦)既觀眾,唯有繼續搭順風車,睇下呢個世界點變囉。

C.M. said...

兩個傳媒互相批評,香港地當然唔係少見。但涉及造假打假呢個指控,少咯卦。

我唔會因為佢地兩個唔長進或者點點點河蟹而去判斷呢件事應該用咩角度,我係睇倘若真係存在造假,或者蓄意誤導,作為普通市民應該點應對。

可惜,我只係一個醉酒人笑眾人皆醉。我用既角度係:

1. 收視統計器係少數人擁有,新觀眾並未納入統計範圍

2. 收視統計器係幾十年前產物,呢批少數人亦係一直無變。所以當呢批人成為慣性收視既大多人既少數代表時,統計就失去普遍性意義。

3. 蓄意誤導在於,統計公司清楚知道此漏洞

4. 無論收視多少,大部分香港市民都係被蒙在鼓裏,並且容易以統計資料判斷受歡迎程度

4a. 影響一:社會價值,分析評論盡皆受影響

4b. 影響二:廣告商長久以此社會價值作為投資理據,導致另一方更缺乏資源培訓人、提供更佳製作。(即對應你所指的“不長進”,無論節目多受歡迎,都一律評為收視低,你認為這就是電視臺的“不長進”嗎?)

4c. 影響三:最終影響市民的選擇權和choice set,一方已經因為錯誤統計而導致廣告商不投資,in turn令這方因資源缺乏而節目更差,惡性循環下,市民就被逼選擇另一方的節目和廣告。

5. 所以我不認為這是笑話

6. 而我更覺得這次比港鉄事件更值得探討

7. 不過我亦“覺得”市民也好bloggers也好評論員也好,對於亞視不論心存偏見(例如覺得製作差所以沒有興趣,還是覺得亞視有大陸背景所以不管原因都寧願佢受“懲罰”?),還是沒有上綱上線的價值,甚至以為對於個人群體社會沒有大影響,所以對此事過分淡然。

8. 傳媒偏袒的情況比港鉄事件更為明顯。如偏袒屬市場主導,則此市場是否因當初的蓄意誤導而引致?倘若如此,不是比港鉄這則一炮過的消費事件更值得深入探討?

9. 不係睇邊台節目既問題,而係廿年黎多數人有冇受少數人誤導既問題。呢個係一個嚴肅既指控。

selina said...

電視台黃金年代已過,頹勢已成..兩台能否來個"中興",難說準了。我反而對港台的數碼電視台有少少期望..(對不起又係港台),希望能成為一個類似BBC的台..人到無求品自高,當收視不是製作人主要concern,心無旁鶩下反能做出一些叫好的高質節目..complement明珠台的外國劇集,夠晒啦,反正唔係好多時間睇電視。

港鐵廣告風波..我覺得茶杯風波..兩方都有無心之失...我係邊睇陰陰笑﹕在邊份報紙落廣告,唔通大公司沒有自主權咩?唔落廣告,又話你陰乾報紙財源,影響新聞自由..同"黎智英大鬧長實唔落廣告"的思路真係一脈相承...我做公關真係睬你有味(雖則,原則上,越hostile報紙,越應巴結、籠絡佢,或索性在同一報紙登番自己廣告聲明,以正視聽)..不過睇番明報既case,將負面新聞同"形象廣告"擺埋同一版,難免有make MTR a subject of mockery的感覺..正路都覺得唔好啦..港鐵最初可能只係想改改日子、避避風頭,點知被人上網上線攪出大頭..

Anonymous said...

I think is TBB always provide lots of HK style program ,but ATV is foreign one ,but it is not fair that ATT TV program is very worse .

i think is HK People not like to absorb "NON_HK THings ",it is very unbelievible

TBB And ATT foreign program is not so OK ??

BUT HK is INternational city ???
THis is very "tricky"

C.M. said...

selina:

中興,或者都有可能既。就算唔做BBC,以亞洲經濟/資訊/文化交流中心做定位,都唔錯啦。劇集黃金年代就真係過勒,全世界都面對緊。

港鐵事件雖然可以引申好多野,但呢d野港人其實太熟悉,而且大致已經達至一個社會平衡點(經濟vs道德),再回轉空間已經唔多,俾大眾溫故知新咁囉。

Anon:

True. I think TVB programs style is quite HK, light and "synchronized"; while that of ATV is a bit vague, clumsy and old fashioned. Nevertheless, ATV programs are improving but those of TVB have always failed to breakthrough.

International city... vow, that's not an easy topic. Thx.

鹿米館 said...

其實大家說無線新聞被河蟹,那麼亞視沒有嗎?不是亞視更加被河蟹罷,好像亞視從不被河蟹,連王征都可以入主,試問這個新聞部又怎會是正常呢?

有日睇陳奕迅在亞視那個show,仲要係亞視高清台看,論畫留品質和鏡頭運用,其實比起平日的勁歌金曲係好九條街都唔止。

但亞視的弊病是後勁不繼,往往是做好個頭,然後沒有資源再繼續發展,便比無線抄過來再發揮。

好像亞視有個十一點特區的節目,亞視早差不多半年就有,但冇人會睇,可是無線見有有點橋,便抄過來在星期日播。

無線有的是資源,亞視是缺乏的。因為電視是一種高投放的產業,無錢不可能生存。現在無線市值二百億,縱橫全港,只有PCCW可以同佢鬥。

因此早前「撳錢」真係另到無線面青。可是now的收費台阻礙,使後勁不繼,大家仍然走去睇番無線,這是無線的其中一個先天優勢。

C.M. said...

鹿米:

你響庶真係好,你響資訊界點睇?

http://inhumanresources.blogspot.com/2010/03/1d.html

每個傳媒都有河蟹,正如阿某話齋,邊有真正既新聞自由架,睇程度遮。

不過老實講,Re: 王征and 新聞部,你最近有冇睇過亞視新聞?我就一d都唔覺得河蟹勒,aiweiwei又講,Syria又講,仲唔係篇幅少輕輕lie過果隻喎。如果你有一排睇過ATV 新聞,感覺係點?

亞視缺乏資源應該好大,好多時唔能夠乘勝追擊;作為觀眾,睇到佢既策略係將資源集中響決勝點,其他部分就慢慢累積經驗/人才/資本。有要求固然好,之但現今社會既然已經唔係單靠電視(你睇cctv就知)傳播資訊,電視臺既背景已經唔似幾十年前咁,根正苗紅就會點點點架啦。你估無綫d 劇集/節目殺傷力唔細牙,殺人于無形,你話係咪先~