Wednesday, May 04, 2011

靚女高管

好怕靚女,除左因為令人分心之外,仲因為暗黑老師曾經警告:矮人多計,靚女免問。

佢話一切都係同動物既催情激素有關。矮仔好多因為外形欠佳,所以會努力用腦搭夠。而靚女,因為由細到大都靠樣殺曬,所以九成自信爆棚,自視過高。

睇黎CK講既Kathy隨時靚到dum一聲。如果真係咁,俾著我就一定三思三思再三思勒。

我遇人不淑?唔覺得播,我識既靚女裏面,職位越高,穿戴越正既靚女(拿,我唔係講一般靚女,而係講連隔離公司都會談論既靚女),佢地既能力..... OK 啦,但一定唔值果個數。有d懶到出汁,淨係識得delegation,有d 乜都唔識,除左識得鬧,有d 好好學,但咪一路學囉。其中仲有d ,去到邊升到邊,好似好醒,查實只係靠個助手,自己不過係搭順風車遮。

係,靚或者真係可以幫公司帶黎生意,帶黎和諧既氛圍,帶黎九百幾樣美學感官上既得益,不過維持得幾耐?真係好實在?

之但呢d都唔係我最唔想請靚女既原因,而係高管,除左響單打獨斗了得,可以響自己部門獨當一面之外,最重要係幫助到老細。

而老細(泛指一切見到靚女就充血既老細),最重要既,就係佢大腦。當靚女日日響身邊chik cheuk咁轉,少不免比一個鬍鬚核凸既孫明揚(or孫柏文?)肺腑之言來得舒服,但就因為呢種舒服,老細就隨時喪失部分大腦功能。亦正如果呢個靚女醒到加零一,老細就更容易迷失,以為美貌與智慧並重既高管全因自己幾生修到。傻啦,呢種靚女百中無一,若果神級高管智慧萬中無一,兩者合體全港都只係剩得十個唔夠,唔通咁都博得過?

咁當然外貌同智慧都有分高低,要求唔高都可以搵到個左右手。不過最後都係果句,奉勸見到太靚既,就要睇得格外清楚,否則一個唔好彩俾個假象蒙蔽,到最後唔想要佢幫手果陣,以我宅男經驗,靚女比醒目女仲收買人命呀。

8 comments:

老麥 said...

好文,加埋呢篇,就算完美啦:

慎用曾经的一把手

http://blog.sina.com.cn/s/blog_751ee6d10100qmit.html

seikomatic said...

見到靚女腦先會缺血,所以一般會用有血到既地方思考。


不過俺既親身經驗,同一個靚女出外邊做野,唔止話街上既人會望住你、或者應該系你身邊住位靚女,陽光特別燦爛,工作特別順利,d客都非常客氣有笑容。如果有錢,俺一定請靚女。

林行止有話過有篇論文話有錢人會越泥越靚,因為佢地可以娶靚人(仔or女)傳宗接代。

無名 said...

我就有個 partner ,留長指甲。她話學不到怎樣控制儀器。我話教她,她話她的指甲太長, hold 不到些細微野。=)

C.M. said...

老麥:

純粹職場見聞遮我,不過講真,工作上我對靚女真係高度戒心架。另,原來係九霖,謝過!

晶晶:

嘩,你就好福氣喇,可以同靚女一齊出外邊做野... (我就寧願佢同我去街食晚飯勒)

Anon-B:

你個partner... 極品,好想見識下。

p.e.t.e.r. said...

哈,你唔講都唔知原來嗰邊又開返檔喇。

C.M. said...

唉,最衰自己記性差兼發雞盲丫,原來早就有人話佢上年已經提過果位靚女... gush!

Karen said...

我的見解係: 不論靚女定係姿色平凡女子,做到管人的位置的,一定要打醒精神。

識唔少女性管理人,勤力不在話下,最重要的係肯搏兼寸咀。

怪不得您話: "請靚女做高管,我會特別嚴格,甚至達到一個挑剔既地步,以免最後恨錯難返。"

C.M. said...

之所以挑剔,尤其因為自己係男人。