週一回顧
轉寫週記非我所願呀。日日雖然都圍住唔知乜野團團轉，但查實天天都有接觸過唔少事物會引發一d 不倫不類既感想。印象中（唔得閑實地翻查），12月1號應該係我開鋪紀念日，至今大概。。。五年啦好似。。。昃番個 folder，家下正負二三十篇posted 文書札記紀錄屁話，剛好500篇咯。（係架啦，家陣咁既精神狀態典會記得咁清楚呢，是是但但算啦）
最近自把自為，同老細做左d 未探清佢心意既人治工作。呢d 人治工作仲要係同自己完全無關添，有時真係好唔明自己點解係鍾意做埋呢d 行先死先既野。。。都好，證明我仲有團火，夠膽死先斬後奏，打死罷就，心境年輕。
去圖書館睇到1948年響上海拍既某照片，話當年超級通脹，通脹率係過萬倍計。銀行擠提，仲著長衫既男男女女，似足人肉蜈蚣咁排隊，任何兩人中間連頭髮都攝唔入。令我諗起曾幾何時有好多人話中國人排隊係都要後面推前面，好唔文明好唔禮貌。呃，其實咁樣都反映左中國人對應對爭論既態度。呢種密集隊形，縱使外表好似唔禮貌唔文明，但實際上就減少左好多插隊既爭拗，即係以一致性既行動去curb verbal arguments。
朋友同我講，話佢響內地某高級主管會不惜一切，以走後門既方式去克服前面既一道專業障礙。呢道障礙話佢唔合資格攞工傷，但佢自己就認為一定係工傷。朋友好肯定咁話佢係為錢喎。我覺得，或者啦，雖則佢真係比我清楚呢個人，之又令我聯想起goal theory裏面既goal, path, tool。個goal 無論點大義凜然，走一條藐視專業既 path，準備一筆小費做 tool，得出黎既result，就係，隨便用一筆小費就可以大義凜然咁買起呢條友既專業。
睇左《作死不離三兄弟》！同事驚奇問我點解會帶埋兩隻野去睇，識睇咩？阿仔唔識架（似乎），阿女就追字幕，但追唔切，睇唔明，不過都睇到男主角個名叫藍丘囉。有時呢，小朋友都可以偶然參與一下大人活動，世事唔一定要完全明曬先可以做人架嘛。套戲，我會用Parsley, Sage, Rosemary and Thyme去形容，五味紛陳也。
CNN話黑色星期五搶購日超熱喎。正面意見話，美國經濟復蘇啦，咁叉多人掃貨。負面意見話，就因為預期乾塘，所以咪趁早趁平掃貨囉。
比對一下BBC同CNN既Top Stories，琴日 BBC講好多英國內部野，講下 regiona。CNN呢，竟然變左中東台，埃及也門敍利亞巴基斯坦 and Bahrain！（突然諗起副歌... Ming the minibus is on the road....），本地新聞少之有少。唔知係咪都反映左英國人同美國人對新聞內容既傾向呢？又會唔會反映美國人比英國人更外向，更鍾意好管別人（閒）事呢？不過睇番CNN既 Most Popular，又係比較local囉。Oops，返轉頭，似乎係電台既定位問題，卦。
阿米上次講開專業。我既睇法係，專業既基本目的，唔係錢，而係專業本身。意思係話錢唔係目的，正如Rancho話齋，唔好追尋成功，自己做好，成功就自然黎。道理一樣，專業追尋專業，就自然成功，追尋成功，就會失去專業。呢個道理應該好易明，因為如果醫學界再以維持質素為名，暗渡保護飯碗既陳倉，呢個專業招牌唔會守得穩，因為市民會懷疑提供專業服務既目的。又如果市民真係唔信任醫學界，咁，唔該咋咋林幫我check下有咩本地中醫集團股，等我瞓身買落去！
米爸又提到豁免考試。首要諗清楚，咩叫考試。招聘專業，從來唔需要考試。因為專業團體所賦予既名銜，就等同完成考試。你係CPA，Big4就認為你合格；係CFA，i-bank 唔會俾多份試卷你考。。。一個考試唔能夠證實或為你個專業資格正名。加入一個專業機構前要考專業試，即係唔認同你個專業身份。唔認同你專業身份就會打擊專業服務既信譽。所以考試，絕對不必，亦不可。
講返入職。試必須免，但篩選必須有。事前篩選就係選定專業資格。定好邊個專業資格合乎要求，免試。如認為不合乎要求，應聘都無資格。正如Qualified Accountant唔可以因為響會計師行考左試就可以認定佢可以做 CPA 一樣。如果醫管局要考試，即係話只請輔助醫療人員，唔係請醫生。此外，事後既篩選，主要係面試，審核資歷、性格（及其他參考資料）、確認經驗係咪符合要求、夠唔夠年資等等。
至於阿米話IQ果part，等佢請食飯再講！（恭喜升職加薪！）
14 comments:
Happy Anniversary!
(1)＞專業既基本目的，唔係錢，而係專業本身。意思係話錢唔係目的
睇吓到一個咩地步啦。
醫生、律師．．．係要俾好多時間同心血落去讀既，正如我之前都講，呢啲都係投資；如果保證唔到錢途，係一定會少在好多人去做呢幾行．．．律師你可以話少啲都得，咁醫生呢？
(2)＞米爸又提到豁免考試。首要諗清楚，咩叫考試。招聘專業，從來唔需要考試。因為專業團體所賦予既名銜，就等同完成考試。你係CPA，Big4就認為你合格；係CFA，i-bank 唔會俾多份試卷你考。。。一個考試唔能夠證實或為你個專業資格正名。加入一個專業機構前要考專業試，即係唔認同你個專業身份。唔認同你專業身份就會打擊專業服務既信譽。所以考試，絕對不必，亦不可。
唔係好明你呢段講咩？即係你搞法律文件，你認為師爺就得？唔得，真係揾次出泥講先得，寫唔得太長
恭喜、恭喜！五年開檔快樂！
原來你跟我同埋Space兄，都係差唔多時間起壇嘅：）
>恭喜升職加薪！
?!xyz&*%
邊個有得升啊？
又，你最尾加呢度加多左樣原來大家都無提而好重要既──就係呢十個人既職責同之後升職既規限會係點。
又，先補充。
我以為有一樣嘢係人人都知既，但可能我係錯既。
就係逄親真正既「專業」，考嗰個牌都係有地區性既。
即係，我嗰行，你响米國考到個執業執照，唔代表你响香港可以自稱建築師。
據我知其他行頭亦如是。所以我先唔係太明CM哥哥你講緊乜。
Space:
Anniversary咋喎，興奮度大概同中六合彩安慰獎差唔多。。。
以便：
欸！上星期真係中左四十蚊！同校長個鋪頭名一樣。
米：
升職之後生活如何？有何新掣肘？阿老哥你出黎請食飯記得慢慢細表喎。（當你升左先啦）
Re: 地區性
丫well，地區性呢個形容未夠貼切。嚴格黎講，係經濟適用性。米國資歷同英國資歷互不認可，呢個響各地都出現，一係認美一係認英。事緣呢。。。唔清楚，應該係歷史使然。專業始終有保護主義色彩，香港專業、教育文化承英聯邦傳統，本地專業既得利益者多得呢個傳統，好處只係：方便，同埋容易維持小圈子，唔洗咁多政治/人事/制度爭論。
我諗大家都係講緊同一樣野卦。
套用返落香港班醫生，咪又係大部分取得Commonwealth牌照。我未證實，查實佢地係咪可以去英聯邦國家職業？（尤其97前果批）
呃又，我寫既時候仲以為係星期一（晚），所以標題做週一，點知原來已經係禮拜二！！
咁仲唔改成週二回顧？嘿嘿
err, 唔啦，改左就證明唔到俾自己睇我份人就係佄求其，丫嘛
我記得深圳有得賣股票第一日, D人都係咁排隊架.
作死，我以為你講緊我呀 (聽朝先睇全文，未睇先like~)
>事緣呢。。。唔清楚，應該係歷史使然。
搞錯！你做人治部都唔知？
醫生我唔敢講（因為人體應該冇分別？），但起碼我嗰行，各地既法例、所要既專業知識都唔同，所以專業既執業資格真係有需要考過。
舉個例，加國起既係屋仔，同時需要抵受好大既温差（夏天三十度，冬天零下三十）；而法律上亦有啲例如起既樓同左右隔離要相類似（聽過怪獸屋未？）．．．呢啲响香港做既人都唔會知／識
又到圣诞，掛住你，來瞄瞄你！
005:
你係睇電視見到？
塞米：
該煨咯。
米：
你講緊既唔係唔啱，而係正正指出專業資格必須要通過審核。就算我recognize 你個加拿大工程師呢個專業資格/認證，我都要check下你個background（響加拿大既工程訓練）係咪符合要求（relevance），正如我recognize你英聯邦醫生牌，但你主要係響非洲醫 malaria，咁囉。
講（返）到專業資格，最緊要前提，唔係你係咪有相關經驗，而係成個牌究竟係咪由一個值得信賴/有公信力既專業機構issue. 你講既加拿大case都係一樣。先要確保issuer/certifier係乜水，到時先講你響果邊起咩屋，係咪先。
Post a Comment