Sunday, December 11, 2011

趕科場

又係亂糟糟。

近排開始留意其他父母(幼稚園or 小學up),發覺似乎父母若果越多喜惡,佢就會越俾少選擇俾自己仔女。而希望唔係事實,佢地既小朋友亦係無咁開心。又環繞身邊朋友,緊張兮兮果個,媽咪佔多數。

好食懶非既人生,實在太多微不足道既不快,卻太少不枉此生既奮鬥。

熱血滾滾既人生,實在太多微不足道既不快,亦太多不枉此生既奮鬥。

前途似咁既人生,實在太少微不足道既不快,亦欠缺不枉此生既奮鬥。

挨年近晚,鄙人竟然同班後生爭飯食,申請左調職,諗住響第二個地方從頭黎過。以我咁既年紀,咁既環境,咁既心態臨老入花叢,真係人死茶涼。由呢刻到係咪確認調職差唔多仲有三個月時間,中間突然殺出一個程咬金或者採花賊打爛我個如意算盤,隨時可以一鑊斷送我成家人安穩既生活。開始管理自己既期望,到時食少d著少d忙多d,朝早派報紙,中午擺易拉架,瞓輪晏覺渣夜更的士,應該夠卦。

農業革命,工業革命。。。之後係叫資訊革命?科技革命?

覺得似係network(-ing)革命多d,唔係資訊,唔係科技,而係呢個世界突然間可以建立到一連串好superficial既network,上facebook、linkedin、微博、forum,虛擬變實體,實體又滲透虛擬。呢種人際網絡表面化(姑且)變成主流,opportunism 忽然大行其道,只係一個hype 定係dream come true?

我認為呢種network bubble始終建立唔到trust,無trust 可以建立,但中間就消耗左好多資源時間心力。iPhone既所謂偉大,就係吹大呢個bubble,直到開始有人醒覺,回歸基本步。前幾年管理學興講既guanxi,查實已經滲透各階層。

睇報紙有人批評香港教育政策,鼓勵求分數而唔係鼓勵求學。(欸!黑人亦認為通識科累死學生,令學生更缺乏思考)Well,觸發我響呢度懶巴閉咁試下指點江山/迷津。

問下家長,你地有幾位教過自己子女,應該點樣思考?應該點樣應對ambiguity?

係咪響佢地仲係幼稚園既時候,為佢地鋪排一條直往海外升學 via 國際學校 thru International Baccalaureate?(小珠,原諒我加左條wiki link)定係為佢地受洗受浸搬地址做埋校工,朝早畫畫中午彈琴下晝珠心算,以確保小朋友一條龍從 playgroup 直升傳統名中學?

唔係講反話,你個仔女眼睛實在太雪亮,太聰明伶俐喇。你一切既做法,看在佢地眼裏,絕對係一連串既勞心勞力!佢地大個一定會依足呢條途徑去領略呢個社會既競爭。

點競爭,就係曉得用策略,曉得繞過分數既篩選,用關係,用金錢,用所謂努力,去達到更高既social level。呢個就係仔女學到既一套競爭方法。

有冇試下問阿仔,如果發現通識科鼓勵高分低能,咁你有冇教佢點應對?教佢跟marking scheme 定係教佢率性而行?喂喂喂,叫佢呢個年紀自己決定,咪即係間接鼓勵佢跟返阿sir 果套遮。有冇教佢點樣應對自己呢個複雜既心情?有冇話佢知,如果率性而行,就算低分,老豆會一樣咁歡喜?有冇問過佢點答,然後了解下佢個分析方法?

我明,呢套野唔係個個父母都曉嘛,唔係個個都得閑嘛,我明,所以咪用錢搞掂囉,之又得閑去上慕道班囉。仔女ung細,都睇到學到你以為你冇教過既野,亦都學到你想佢學既野。

7 comments:

said...

弓起升職~

the inner space said...

諗住響第二個地方從頭黎過!《《

都是接枝啫,唔需要由頭播種,哈哈哈哈!

魔術師 said...

相同的貼文,也applicable在這兒,就容許我用在阿榮的留言一稿兩投吧。

「我哋每個人都被環境訓練到,好似倒模出嚟咁。鍾意食同一樣嘅嘢、鍾意同一樣電視節目、支持同一種政治立場、信奉同一種生老病死嘅做人方法,this city is dying, you know?」

倒模出的人生就是最安全的,香港人不是都很buy這一套嗎?這麼多年來怪獸家長就身體力行了,也不知這句話在accuse一些什麼,有什麼值得瘋傳。

C.M. said...

米米:

米玩啦,我仲要開飯架。

事卑士:

咁係,之但我牛頭接獅身,高風險喎。

魔術師:

Errr.... 我.... 想話,缺乏安全感,係軟弱表現遮,未洗生死相搏既。

the inner space said...

CM兄:這都要雄牛願接獅子身成為牛獅or獅牛!
坊間都有豬頭接龍身成為豬龍or龍豬。


嗜悲

p.s. 小弟正在搜尋記憶,以 雄牛 Bull 和 獅子 Lion 做 Icon/Logo/Mascot 仲剩返邊幾間。

hollycowplanet said...

CM,
Merry Christmas and Harppy New Year.

C.M. said...

是唄?

最弊係蝸牛接獅鵪呢。個mascot既英文名好似叫barnacle.

merry christmas.

牛牛!

聖誕快樂,合皮扭耳呀!