你老頂好唔掂?

靚女B 快人一步，早前取得雙糧後不久，即已蟬過別枝。

新公司比舊公司更具規模，新崗位無論待遇、職稱等都較舊崗位理想。可是靚女B 上班沒多久，便到處訴苦。與其大半個小時對話中，沒有多少耐性的 CM 全程被逼接收到一個信息：「佢老頂好唔掂。」

與此靚女B 相識數載，對其為人略有認識，對於靚女的觀點，CM 並沒有採取 HR常用的「反省」方法（即保持中立，說服申訴者先要自行檢討過失，然後勉勵其接受對方短處，再給予建議使其能重新投入工作），今次反而袖手旁觀任佢發洩，節錄如下。括號內為小弟的回話。

「我見工個時，已經比佢從頭到腳啤勻曬，早知佢唔簡單格。」
（咁你又返工？）
「人工好嘛，又大公司。」

「我新返工第一日咋，佢就指指點點，叫我先睇下d filing，然後叫我去幫我個 clerk 做 report，喂，你請我返黎，係做Middle Mannnnnagement個喔，都唔知有冇搞錯！」
（喂，你新公司乜都唔識，比你睇下d filing，又做下report，咪即係想你快d上手。）
「但始終佢就忽略左我係做Middle Mannnnnagement呢點，你問邊個都講唔通啦下話。」

「叫我睇 filing，咪睇下先囉，之後我發現佢有日file錯左，佢話個clerk有時都會file錯，叫我幫佢執番。我心諗，filing咁基本都錯，你點睇住D細架。」
（file錯日子好正常遮，反正咪比個機會你同個clerk溝通下，不知幾好。）
「我話公司請我返黎要我坐佢個位就真！」

「跟住我咪好客氣咁問佢有冇其他野比我做囉。點知佢就串我咁係d filing 當中睇到d 乜野，我黎左半日咋！都唔知識唔識尊重下屬既，我忍你！」
（下！咁點樣先唔算串親你呢？你又有冇串番佢呀？）
「我冇，不過佢都醒水，即刻拎個 Org-chart比我睇，不過冇耐HR走過黎，搵我簽埋份約，我先至放過佢，佢都唔掂既！」

「個HR同我講，話佢地公司個文化，好重視Teamwork。好啦，你地講曬佢啦，意思即係要我以後聽聽話話遮。你話！係咪條氣頂到上心口！」
（哈哈，HR都係想個新人早d 適應工作環境遮，唔洗咁上心既。）
「鬼叫我新黎咩！大公司老臣子最鍾意蝦新人架啦！」

「呢d 都算，重有啊，我老頂原來連 Excel 都唔識架，成日要走黎問我」
（咁咪好囉，你老頂一定覺得你好幫手！）
「你唔係嘛，請佢返黎係做野架，唔係學野架，我咪話我都唔識囉！」

「我當然醒目，d普通野，話咁快就搞掂啦，佢跟住就好過分咁將佢平時做既野 pass比我，咁佢唔洗做囉播。」
（咁請你返黎，咪就係幫佢家嘛。）
「梗係唔係啦，佢唔識做先 pass比我咋！你究竟幫邊個架。」

「重有啊，前幾日，佢見我開始上手，就周不時拉住我開會，開會時講野又冇point，都唔知佢點解做得我上司。」
（佢d睇法又點冇point法呢？咁你有冇出聲啊？）
「總之就冇point啦，個會又唔知up 乜，我出聲咪塞錢入佢袋，費事教精佢。」

.... 心諗，靚女，等你呢句好耐啦。

***********************************

CM 後記：僱主和僱員經常會有不同且拉鋸性（恕小弟直覺上不認同「對立」一詞）的期望。

對於僱主而言，要有效管理員工期望，很多時需要主動和先發制人。無風無浪不等於已經滿足了僱員或下屬的期望，反之，其實可能已經四面楚歌。解決方法不能單以「多點溝通」就可以，個人認為最直接有效的方法，是「真誠的關心」，而更有效但「表面上」比較冒險的方法，則可以考慮採用引發小型雪崩的方式：在預設的環境下，引發回響（不是巨響或地震），並緊記「治水不在堵，乃在導」。

（備註：當積雪過多並變得極為不穩定時，最輕微的震蕩會隨時引發雪崩；而為免雪崩造成傷亡，故先於積雪過多前，用炸藥等引發小型雪崩，減少積雪。）

對於人力資源從業員來說，引發小型雪崩不難，但不少管理層的態度一般都傾向可免則免，寧願眼不見為乾淨，所以以往CM 雖然曾主動引發小型雪崩，但一般都控制在自己的管轄範圍內。非老闆者宜加留意。

另一方面，對於僱員而言，則如何達到僱主的期望（或使僱主滿足自己的期望）或許只能靠自己的個人努力 —— 「恒常檢討、用心工作」。想上司引發小型雪崩？唔好喇卦！

至於靚女B 後事如何.... 佢過倒 Probation 先算啦！

Special Reference: 《AM730》2007/02/06