Tuesday, March 06, 2007

不知死,焉知生

(當與女之手指頭互相觸碰,父便開始怕死)


可能因為CK個夢,又可能因為渣sir個間別墅,昨日突然心血來潮,打擾正在廚房做飯的小妹。

公子:小妹,你覺得公子對你點呢?(煞有介事)

小妹:你講乜呀?唏,煮緊飯呀,出去啦。(唔多明白所以繼續其公務)

公子:你查實又知唔知公子有幾多身家呢?(愁眉深鎖)

小妹:唏!唔知呀,番出去啦!(有d唔耐煩)

公子:但係近排跌市,副身家唔見咁d 播。(神色慌張)

小妹:又點呀!.... 你都冇買!關你鬼事咩 .... 哦 .... 唔通你仲有私己錢 ?!(初則口角,繼而動武....之勢)

公子:咁又唔係,不過,之前d MPF跌左2%遮.... (誠惶誠恐)

小妹:.... 唓!番出去啦,BB要食 mum mum 啦。(好不耐煩)

公子:等陣先,聽我講埋。嗱,依家公子兩個MPF戶口,一個係匯記,一個係富記,你要記住....(耐心解釋)

小妹:咁又點丫?(眼神不屑)

公子:另外仲有兩份保險,一份係公子自己既,一份係BB既,份Policy 放左係書櫃最右手邊 ....

小妹:你想講咩呀?(開始疑惑)

公子:所以咁,你千祁唔好唔記得d文件擺左響邊。啊,仲有,若果公子有咩衫長褲短,公司份保險會賠80個月糧,你記得要追公司攞,唔好漏左。(說話條理清晰,有紋有路)

小妹:作死牙!講d咁既野!(輪到佢有d慌張)

公子:仲有呀,公司個P-Fund 都有d錢,同埋銀行都有幾百蚊,你記得攞埋 .... (認認真真)

小妹:乜都唔記得呀。食飯嘞!(驚到出面)

公子:我寫緊個blog,淨係睇左兩個post,第日公子既遺言,就係曬到.... 千祁唔好delete左佢。(繼續專心解釋)

小妹:.... 得嘞.... (似乎有d覺悟)

公子:咁,從今日開始記得要睇多d公子個blog 啦,係我地兩個點滴既回憶黎架.... (打蛇隨棍上)

小妹:哦.... 原來係咁.... 好啦,咁你一定要忘記我啦!! (雖夫妻有情,但拳腳無情....)

.

24 comments:

Anonymous said...

Thanks CM!

Pls let me know if you know any other bloggers who have run the Marathon!

Gideon said...

嗚。。我女朋友。。都唔識睇中文。。點叫佢睇都冇用。。。為左佢,我以後會用英文寫架喇。。。。

CK said...

哈!你大膽呀,同小妹講d咁野。

我一同屋企個Stephy講自己萬一有咩衫長褲短,實聽0趙呀!

不過又講時講,唔知你覺唔覺,老婆同女友睇自己個扑,感覺有時都有d尷尬…

大鐵鎚:不如叫你女友學睇中文啦!如果佢唔肯,你記住同佢講返果句:「You didn't even try…」囉!

Anonymous said...

C.M.兄,

出到依招黎谷收視...個target audience真係重點之中既重點...

AK果邊,之前Helena就成日怨出場率唔夠...依家就...唉...

C.M. said...

On兄:

呢個Blog界咁少人玩Marathon,小弟都覺得有d出奇。但咪講跑,散步10km 都會攞小弟狗命。

鐵鎚兄:

你呢排好似有d 熱氣播,飲多d涼茶降降溫啦!(一係走去睇番On兄d舊post,佢有d計仔)

CK兄:

原來CK兄都比太座o趙過!

小弟都唔知點解夠膽講。講既時候,其實佢點樣反應真係預左,但反而擔心佢真係唔識處理小弟既身後事(雖然依家無病無痛)。哎呀,性格使然,想講就一定忍唔住口。今次都好似係第二次比佢o趙。

關於睇自己個扑,查實你講得好o岩,感覺會幾尷尬(尤其小妹做期全職媽咪前,都係做人事)。但又真係好想小妹睇下佢公子寫d乜咚咚。

>>You didn't even try.... XDDDDD

AK兄:

你話勒,小弟係咪好適合做記者先!番屋企之前仲要掟個email去小妹account度,逼佢睇小弟寫左d 乜傢科!

Helena,快d!快d!快d!快d!快d!快d!!!!

hongkongpotato said...

真係勁溫馨。。。

怒火眼睛 said...

生兒育女後的確會怕死左, 反而以前無乜諗過, 自己死左父母會否無依無靠. 當然, 保單上也有父母的名字, 但與擔憂孩子的心態相比...
或者我地應該好好報答父母, 就當係提早報答自已.

Anonymous said...

哈哈,莫非真係學肥醫生話,到左春天大家都感性d?

世事難料,珍惜眼前人.我諗,有好多我而家我做緊既野,如果吾做既話,我以後一定會後悔到想撞牆.又或者,我應該再做多d.始終,生離死別,在所難免.

Blogger70th Floor said...

ok
又係我呢個扮律師出場既時候啦


立遺囑係好緊要既

正式立遺囑
重點不在於:車我又唔係好多錢又唔係分得好複雜點解要學 d 富豪咁立遺囑?
重點是:無遺囑未亡人便不能夠立即動用遺下既金錢去應急,因為,d政府 procedure 係好 Q 煩既。



C.M. 你隻手咁大既~~~~~~~~~~~

Gideon said...

我呢排有火咩?其實我心情呢排真係好好,睇乜都好容易笑。

其實又,中文真係好鬼難學。。。英文都話有拼音,中文都唔知點教佢認字,佢話隻隻字都係咁四四方方一舊舊架啦,我望佢識睇晒餐牌上D字,出街曉叫野食已經放心喇。

C.M. said...

薯兄:

你都努力搵番個啊!

怒眼媽媽:

多謝賜言,小弟都要多d孝敬父母(雖然有本難念的經)但當小弟與小女進行ET接觸的時候,總會把自己的父母抛諸腦後...

香水姐姐:

真的嗎?但又似乎係。小弟都有d感受到好似CK兄講佢自己呢排既感覺。你覺唔覺得呢排個人好似有d沉鬱呢?

祝你和你家人生活愉快!(同埋青春常駐)

危樓姐姐:

難道你以前讀過Com Sec?若果咁,小弟係個Blog度立遺囑,又得唔得呢?若果得,係咪要公開自己既身份呢?又,Beneficiary Form 上面既 Nomination 又算唔算遺囑一部分呢?

又又,隻大手要黎保護兩母女家嘛...

鐵鎚兄:

哦,係個心有團火遮,而且仲係麻甩火... 不過你真係好鬼搞笑,小弟差d又比老細周到...

不如咁啦,你可以學下Geoffrey,中英對照咪得儸,你d英門又咁近!

Blogger70th Floor said...


在我有望成為一名雄赳赳的信託律師的那一天
我一定會主動為 c.m. 提供專業服務


Com Sec
好悶
可見既將來
唔會做
(除非有人打本過我開間咩專業 Com Sec 去幫 d 中小企做下 filing 呀 offshoring 呀咁烏搞搞啦)

(喜歡我有大志嗎?)

K said...

嗯, 很warm呢!

您雙手這麼大, 顯得我和您小女的手那麼小。

Anonymous said...

您小女的手很cute!

祝福你們!

C.M. said...

危樓姐姐:

好有大志,小弟鍾意!到時唔好收小弟咁貴播,辦遺囑應該唔洗好多錢掛。

不過,可否送d增值服務,免費同小弟寫墓銘誌?

Karen:

近況如何?找到幫手沒有?查實小弟隻手仲未能夠“包住”小女隻手,真係有d遺憾... 查實女孩子手仔細細,真係幾可愛。

On兄:

多謝你的祝福!小女依家很喜歡扮ET,鍾意同小弟手指指,讓小弟好不開心,但小妹就好不妒忌。

祝大家豬年有喜!

C.M. said...

Err... 好似係墓誌銘...

Blogger70th Floor said...

嘿!
遺囑?
到其時實屈你成立信託啦
努力搵錢啦


你向兩面老闆到吹d咁既風
大哥哥又會話我寫 blog 溝仔架啦
我文筆咁好學養咁好
咁講
好侮辱我囉我覺得
(拿,我真係介意架)

C.M. said...

投降!

你點話點好啦,最多努力儲錢開Trust啦,Trustee姐姐。

Marshmallow said...

很人都說過,知道有了孩子之後,第一時間想到的便是買保險。不過,保險還保險,還是在世的時候去珍惜眼前人好。

祝你和小妹永遠都甜甜蜜蜜啦!

Anonymous said...

七十樓姐姐,C.M.:
那一段留言恰恰俾我睇到⋯果度係我開始講先既⋯如果有咩得罪⋯真係唔好意思呀⋯

Blogger70th Floor said...

多謝 c.m.
你有風度
第日
嘿!
我實收順d既


小 Justin
我無野
之不過
如果有 foreseeable trouble
我一定會避開
所以,你,如果可以,請,嘿!

Tommy said...

我來洗板了

CM 大手...睇來仲大過我隻手

咁即係話 CM 真身應該比 1.8m 仲高...Anyway, 唔好揭爆人地身份好d...

未有兒女﹐唔知係乜野感覺。

反而想講講﹐你改左個版面。

黑底襯瑩光綠色字﹐就係我最喜歡的配搭!(your blog posts' titles)

喜歡到 ICQ 又係用呢set, MSN 又係用呢set , 連公司個 e-mail 都係用呢 set

貪佢「黑底唔刺眼﹐綠色夠溫和﹐瑩光夠突出」!

Anonymous said...

七十樓姐姐:
那個,我,有點難度,因為我不是用blogger account留言,要渣爺出馬。

C.M. said...

棉花妹:

>>還是在世的時候去珍惜眼前人好

小弟一定會好好努力,多謝!

呀,你也要努力珍惜機會啊!恭喜!(無論公私,一樣要珍惜啊!)


Tommy哥:

小弟食飯前即時走去度高,發覺o岩o岩5尺,應該算一般身材啦。

當小妹懷孕之前和之初,小弟都有很多幻想。但到小女出生當日,給小弟抱的一刻,立即頭昏腦漲,感覺...已經唔係好記得,淨係記得有d暈,但心跳正常,沒有驚慌。當小女越來越長大,那種感情就如江江滔水...

關於個版面,多謝!!最近先知道原來可以咁改/玩,夜深時分改過好多次。雖然效果同以前差唔多,但自己睇落就覺得清晰好多。同埋整大左d字,令自己唔洗咁早老花。(仲有,之前聽講,綠色比較寧神,所以維持用綠色,並且再光多少少,完全同你講既符合)

不過,點解你又唔用黑底綠字係你個Blog度呢?


危樓姐姐:

刀下留人!(小女喊得好犀利)

天下太平道。