又R （今勻R到股市）

股市1

收到朋友 A 來電，佢自己一向都無參與過大染缸，但因為呢排個股市大升，見到同事朋友都有斬獲，搞到心郁郁。佢d朋友仲同佢講話，搵得幾多得幾多，蘇州過後無艇搭。心煩之餘問我呢位燈神應唔應該入市。

大佬，我呢位燈神黎架，玩咩。

股市2

收到朋友 B 來電，佢自己一路都有玩股票，呢排市況變得波動，雖然前排斬獲甚豐，但依家都有d驚。（話驚賺少左幾個巴先... 追唔上樓下班師奶個回報率... ）

頂，係咪乘機串我呀...

股市3

收到行家 C 來電，話佢老闆見到個個同事成日捕住個股市，“好似”會影響 Performance，問有冇計仔分享下。

呵呵，呢個問題就似樣勒... 不過講真，查實我自己都無認真諗過要點搞。Well，行家問到唔識好似好瘀，於是咪亂噏掟出最普遍果幾種方法比佢：

1. 拿，若果你地唔玩股票，我就加你地人工，升你地職啦。（務求高薪養廉。）

2. 又或者咁，拍爛檔，遲一陣先落盤，同我睇睇呢個project先。（打友情牌。）

3. 不過咁，若果你仲闊佬爛理，仲係辦公時間玩股票，我就出警告信，減你人工，Cut 你 Bonus，甚至炒埋你地！（睇你仲敢唔敢。）

4. 若果你覺得我太惡死兼無人性，咁我可以先日日監察你個玩股情況，然後叫主管日日督住你做野，等你唔敢亂黎。（米話我唔先小人後君子。）

5. 下？主管話d友仔太惡，唔敢閙？都得，唔比上網囉。最多set 番幾部任上網既 public terminal 係全世界前面，有需要，咪隨便用囉。（夠pok 可以試下既）

6. 哎呀。連唔比上網都唔得，班友仔真係幾惡。你不如出分 survey 比全公司，問下佢地想點仲好啦。（我係一個有社會責任既老闆。）

7. 太民主唔掂？你不如塞d工作比班友做，做到有氣無訂抖，等佢地無時間上網得唔得呀？（就斷你米路！）

8. 唉。若果公司真係咁悠閒，就米鬼理佢咁多啦。（Err... 又好似唔多妥播）

老老實實，查實你老闆想點？


借問各位高人又有冇其他方法呢？例如可唔可以叫香港休市一年呢又？（講咁多不如比幾個 lum把小弟先喇）