Tuesday, January 12, 2010

虧佬褲與懶佬鞋

地鐵好逼,走左班車。
(天寒地凍,應該無邊個想郁,唉,點解我仲咁夠pok?)

更衣室風扇無人拴,三度。
(嘩,後生真係無敵,除曬衫褲個身一d都唔覺有震,對腳... 白雪雪,仲企得好穩,隻手呢... 係咪手汗?... 喂喂喂,你望乜呀。)

熱烘烘,玉帛相見,春光乍洩。
(好巴閉咩,咁好啱啱放工梗係要一件件咁除喇,家陣人地除左五件衫之嘛,有咩出奇嘖?)

Strip poker,輸到趴街。
(凍到呢~ 真係好奇怪佢地點可以咁慢條斯理... )

不失風度,摺外套,摺冷外衫,摺冷內衫,摺冷背心,摺恤衫,仲摺埋條tie 同西褲。
(噢畸噢畸,我係比你著多條虧佬褲遮,洗唔洗望咁耐呀,好,我扯~ 懶佬鞋加運動褲,型咧)

地板硬掘掘,凍冰冰,醫生話腰骨痛唔好赤住腳行。
(點解唔響門口放鞋柜呢?門外又得果兩三張凳,搞到我成日唔係爭凳仔,就係大打赤腳如履薄冰。慘。)

北極熊休息。
(好彩張墊唔係凍冰冰嘖)

做拜月式,呼,吸,呼,吸,右腳,呼,左腳唔呼吸,吸,呼,吸,呼,吸。再黎一次...
(有運動真係暖好多)

大休息。
(對腳板好凍 ga ga ga ga... 好彩有條虧佬褲頂住...)

做兔仔既同學,對手要輕輕壓住地面。
(呵~ 庵~ 個個都打喊露,我都唔執輸。呵~ 庵~ )

曲腳魚式
(查實我呢個時候係咪應該咪埋眼呢?)

鱷魚休息
(好靜,唔想諗野)

俯臥,蝗蟲式
(吸... 呼... ... ... 個名點解咁熟面口?)

仰臥,背立
(...... 咿... 條腰幾時先唔會震成咁?)

弓式,做唔到既同學可以做燕子
(得啦得啦,全班得我一個做燕子嘛)

強化心臟呼吸。
(查實仲有邊個會好似我咁扯曬蝦?)

金剛坐,吹息。
(... 嗄,右腳幾時先可以申得好似左腳咁直?... 痛!)

同學魚貫離場,少年跆拳道班佔場。
(得得得,唔好催!我呢對係皮鞋,唔可以踩踭架!)

更衣室風扇長開。
(著鞋唔著襪,唔荒有秘密。我有秘密。)

赤條條少(青/中)年大方露體,兩點半盡入他人眼簾。
(沖完涼抹左身未架,唔凍咩?十一度咋喎!)

風繼續吹,不忍遠離...
(慢慢黎喇,急咩呢。反正對鞋都已經唔洗綁帶咯)

放低幾 tael 待何時?
(唉,真係幾麻煩。多條虧佬褲,係搵得耐d 架勒。)

8 comments:

Terence Yun said...

做多幾次,你就好壯啦。到時學南韓軍人咁都得呀。

C.M. said...

你都試下丫,瑜伽減壓幾好架!

Anonymous said...

唔係麻,玩瑜伽﹖玩跑步喇﹗衣排我愛上跑步,得閒無事都去運動場....事關原來香港幾多靚姐姐跑步(當然...可能我倒果為因喇...)`

~goethe

p.e.t.e.r. said...

哈哈,講真我冇心機睇你寫果D分段分到我眼花撩亂又地到我一知半解既野(唔好意思),不過D留言我又忍唔住多口想搭嗲 XD

如果真係倒果為因既話,我寧願去游水嚕 ;)

又,男人當然要學拳(邊種都好)喇!

C.M. said...

蝗:

你唔記得前排果套韓國電影咩?殺手都玩瑜伽喇。(你話跑步多靚姐姐定瑜伽多d勒)

p.e.t.e.r.:

學拳我都想呀,我鍾意柔道!(點游呀家陣,我依家八件衫包住丫)

p.e.t.e.r. said...

我都係覺得游水多D喎。通常呢...D姐姐見唔到個樣係靚D架 ;) 如果係跑步或者上緊堂果陣見到呢,100次有99次都會唔想再跑或者想立即落堂。

你冇聽過室內/暖水池咩?八件衫包住肯定唔會韃親喇,成個波咁。

Terence Yun said...

我都有玩架,我在尖沙咀一間yoga中心,是一位印度女性master大師。
但我仲未做到將自己放入個保險箱度,哈。

C.M. said...

p.e.t.e.r.:

咦?又係播,但會唔會夏天個景色秀麗d呢?暖水池唔就腳呀,屋企樓下又無會所...

鹿米:

哈哈,原來你都有玩!有次我格硬試下用腳趾liu鼻屎,但扯到隻腳痛左兩個月!