Tuesday, June 01, 2010

Keep me company, would you?

Thomas & Friends, the Movie

男人偕女人女仔男仔一齊去睇戲。男女人足足四五年無睇過戲喇,而男女仔甚至從來未去過戲院。所以去之前,自不然就好似十月懷胎咁,誠惶誠恐。家庭票包十蚊優惠券乙張,昆你用多卅幾蚊買連紙杯紙筒兼清理費總成本三蚊既高級垃圾食品。使呢卅蚊簡直超值,加埋排隊等左成十分鐘,男女仔已經興奮到彈起。未入戲玉已足以令男女人老懷安慰。

全院七成滿,男女人仔佔既三個位幾乎屬於最差果個 quartile,側側地睇廣告預告片幾乎冚家大浪,如果睇3D 肯定嘔突。特別但又無咩特別在,未入正場雖然四處騷動,但竟然無人帶頭殊殊殊禁止造反,反而偶爾聽到媽媽聲,交頭接耳、Wee 嘩鬼叫此起彼落。

兩舊水遮,咁既場面,乜都抵返曬喇。

微弱聲線響起:「... go~ go~~~ Thomas!」馬上由騷動轉為起哄。跟手一個令成年人疑惑既藍色大頭偶像千呼萬喚終出場,粉絲斯文,未聽狂呼,只聞小叫,議論紛紛。

故事以被遺棄兼且孤獨左好耐好耐既火車頭 Hiro 為中心,詳情唔多講勒,都係話比小朋友知人間除左友情,仲可以抱不平,甚至同人地講大話(?)。整體故事側重教育意味,可惜配樂欠佳(即係根本冇!)所以女仔睇到眼定定(呆呆地)男仔就幾乎瞓著。 -_-

由一開始全場騷動,最後變左個個被催眠一樣。「兩舊水遮」呢句豪情壯語,原來早響入場前洗曬。。。

火雞stuffing

同前輩家長+小朋友兩家人食飯,不亦樂乎。前輩文化底子甚深,席間提到母校(!)、音樂(!!)以及火雞stuffing(!!!)。

講起舊屎響班上某節日被(老)點 solo,差d 要獨唱Scarborough Fair。噢畸,我係好鍾意呢首歌,但我最記得只係頭果兩段歌詞囉,中間和唱已經唔記得曬勒。正想藏拙之際,冷不防前輩一問:「咁你咪好熟Simon & Garfunkel 囉。」(!x4)震驚地故作鎮靜:「哈,都係得果兩首遮,都係多得《Graduate》 」前輩被挑起興趣,繼續追究,問眾人,「知唔知原來Scarborogh Fair 其中有段歌詞係。。。」丫well,我個條件性懶醒即時反射,即時哼出「Parsley sage rosemary and thyme」(查實我之前淨係知道parsley 係stuffing香料咋,其他都無查過)。不過對於前輩對於呢d細節既探索,好佩服。

前輩謙厚兼冷靜笑住口話,「嗯,我以前上網查過,原來呢句既意思,係《人生五味紛陳》咁解。。。咦,你係咪好鍾意民歌架?」(!x5)賴野,班門弄斧添。老婆仔女面前,面子攸關,四兩撥千斤:「查實我好立雜架,唔會特別鍾意 Peter, Paul and Mary,又鍾意其他咁既。」

之後既對答就捲入 Texas 同 Louisiana, 比較 Scarborough Fair 與及 Sound of Silence 既意境, 比較不同民歌歌手既風格, 仲有 You're so vain, Madonna, Carpenters。。。我呢,雖則面紅兼啞左,但見到一個中西醫混合體可以識得咁多 MusiK,好感動。

11 comments:

p.e.t.e.r. said...

我仲喺男仔果陣屋企人同戲院經理好熟,細個成日放學就自己掂行掂過入去睇戲(其實喺嘆冷氣)仲有超等私家位。

C.M. said...

p.e.t.e.r.:

超等私家位??係咪就據聞counter唔賣飛,淨係俾... 貴賓坐果種?

p.e.t.e.r. said...

哈哈,乜有呢樣野架咩?不過應該唔喺。總之我去親都喺坐果個位。可能當年都冇咁多人睇戲,所以從來冇人同我爭呢個第一排嘅超等位。

有次重唔覺意睇咗傳說中嘅毛片潻。不過當時唔知喺乜。淨喺覺得好悶,中場走咗。

鹿米館 said...

以前細個最多都係睇後座。

C.M. said...

p.e.t.e.r. :

d大人話有架。佢地話果d貴賓唔洗買飛個喎,而且多數都係觀眾走曬先入場。

(超等位果史好貴,印象中... 未坐過)

又,查實我想知,毛片場有幾滿座呢?

鹿米:

哈哈,你提起我先記得原來有後座呢回事!我都係多數坐後座,同時多數都係坐後座既前座。

p.e.t.e.r. said...

>觀眾"走"曬先入場

呢D唔喺叫包場咩?我喺外国都試過一次。午夜場後成班friend帶埋pizza入去睇戲。

果個唔喺毛片場,不過唔知點解會突然加咗一場遮。咁耐都喺試過一次咁大把。爆唔爆喺睇做咩戲嘅遮。

我同朋友去睇戲都坐過後座,不過坐後座嘅後座成日驚樓上超等會突然冧落嚟,坐後座嘅前座又驚上面會跌杯可樂落嚟。

C.M. said...

包場?都算架。d大人都話過,好似戲院咁,地鐵最後一班車都係包車比「貴賓」架。

又,我記得果史睇套戲叫... (等陣goo goo先)唔記得(印象中係Robin Williams+Uma Thurman,好似叫《Mad Dog and Glory》)。無啦啦有一場好awkward但又好激既"sofa"戲between Williams and Thurman。頂,果一刻雖然有反應(...),但真係覺得唔老黎,接唔到戲囉。

C.M. said...

啊,突然醒起套戲個中文名!好似叫...

《暫借的情人》

...個英文名好似啱,之但點解無Robin Williams既?

p.e.t.e.r. said...

>地鐵最後一班車都係包車比「貴賓」架
乜你坐過咩?我就聽都未聽過喇。不過只要識人揸key,想做貴賓都唔係好難嘅遮。

>真係覺得唔老黎,接唔到戲囉
接唔到戲我明,但點解唔老黎呀?
IMDB話喺Robert De Niro喎。

當年有套日本卡通上畫,屋企人比咗D免費飛叫我去睇,我傻吓傻吓咁搵咗個女同學去,點知開場先發覺原來喺甜片(當年仲未有三級制)!瘀到呢....

C.M. said...

>>不過只要識人揸key,想做貴賓都唔係好難嘅遮。

咁又係。之但班貴賓可以飄入車廂,唔洗人開門。

>>IMDB話喺Robert De Niro喎

不過我個印象成日都係on 居居個播... 唉,年紀大左,記性都差好多

>>日本卡通上畫...

你係咪講《妖獸都市》?我未睇過呀。記得呢套戲好似剛剛響三級制推出前上既。而第一套三級(Well,四級例外),好似係《情人》,而果日好不幸,我... (zipped)

p.e.t.e.r. said...

阿生,乜你搭地鐵要自己開門㗎咩?唔喺化?

冇記錯《妖獸都市》應該喺第二套。第一套(即喺我好樣衰果次)喺超神傳說。妖獸都市咁出名點會唔知吖?就喺佢個名一D都唔似果吓先中招吖嘛。