Thursday, September 08, 2011

幾耐冇睇亞視新聞?

前兩日亞視新聞部主管梁家榮辭職。

上次問過,都有唔少人夜晚睇亞視新聞。呢個唔少人既意思,似乎都只係得小貓三幾隻。

支持亞視新聞部既人唔少,但真係有幾多個睇過亞視新聞?又有幾耐冇睇亞視新聞?

有冇搞清楚咩係新聞自由,咩係編輯自主?班抽水既有幾多個呢幾年飲過亞視新聞既奶水?

梁家榮係點既人我唔知,亦唔曉唔得閑深究,之但我係亞視新聞既忠實番屎,睇左好幾年,亦都講比人聽好幾年。我鍾意亞視新聞,但唔知邊個係梁家榮;我知道邊個係方健儀,但
唔鍾意無線新聞。

梁家榮係咪新聞背後既無名英雄我唔知,但應該係我既無名偶像。

有冇惋惜,依家未,將來雖然會唔會我唔知,但應該都會。唔係因為邊個走左,而係邊個入左黎。

報紙話係劉瀾昌喎。聽到即刻炒蝦拆蟹。

睇佢主持既《把酒當歌》真係拎曬頭。唔係因為佢口才唔得(我口才超唔掂),亦唔係因為佢鍾意搵某某上去做嘉賓(我都想睇下佢點忽悠大眾加以警惕),更加唔係因為佢背景佢資歷(理得佢丫),而係因為佢節目起首既所謂重點新聞,日日都係一堆搔不著癢處既所謂新聞。到某d嘉賓想轉下敏感話題佢馬上就避重就輕。

做節目,迴避敏感話題,預左,但幾可肯定會削弱吸引力。冇耐,呢個節目就比我打入冷宮,寧願熄電視打機同阿仔阿女夜媽媽追追逐逐嘈喧巴閉。

好景不常,竟然聽到呢位仁兄授命主管亞視新聞部!萬一佢搞新聞,都好似做節目咁主動迴避敏感話題,你話係咪死得?

雖則我真係有少少擔心我真係將會好耐唔睇亞視新聞,但我都決定對家下仲響亞視新聞部既員工存留不少盼望,好令我唔洗夜媽媽陪果隻野癲,俾我繼續擔任呢個新聞部既無名番屎。

15 comments:

Terence Yun said...

亞視新聞節目當中,我多數睇時事追擊。至於正常新聞,都係「你好,我係方健儀。」

the inner space said...

亞視舊時10:30pm 的新聞常有看,因為無線同時段的節目很無厘頭。就像今期播的就勁無聊,所以一定轉台,轉亞視看新聞。不過唔知做咩,近來才改咗10pm正播新聞。

又近來話亞視有些廣告式財經專訪某某公司,要收廣告費的當作新聞在財經環節播出,我也偶然看過一則,當時未知道是收費的廣告,已經嚇了我一驚,想問乜各位靚女咁嘅方式去做訪問架,現在當然明白了。

”把酒當歌“有施永清的我都會看,看不到呢?就會在週末看重播。剛巧今晚有梁家傑,都有看嗮!

Ebenezer said...

我主要睇有線新聞,特別係搭緊車嘅時候:(

塞米一條揚陸轟炸機 said...

其實網上媒體有無得搵?......我想講呢,外國的華人媒體真係好無料到,係時候另起爐灶挑機啦。

K said...

>>我口才超唔掂

但係您好過劉瀾昌多多聲噃! 因為佢講野好多時唔多明講乜!

又,做所謂時事節目要飲紅酒,好有問題,我接受唔到囉!

塞米一條揚陸轟炸機 said...

飲紅酒做乜? 係就學我咁,飲杯vodka再繼續砌稿做野。

C.M. said...

鹿米:

呀,有危有機,的確係新角度,好!

Space:

果個廣告式財經專訪我無留意到添!所以坊間講起呢件事既時候,真係無力理解。(唉)

個《把酒當歌》節目邀請d嘉賓其實算唔錯,缺憾只係在於個主持人。

雖然我都算軍事迷,但就唔多得閑睇《馬鼎盛講軍事》,只係睇左一兩集。欸,但就已經覺得佢主持得非常好喎。又會留足夠時間俾嘉賓發表意見,佢自己講既野又有見地,抵讚。

以便:

原來你住響新界區!

C.M. said...

塞米:

網上媒體要develop 到coverage真係唔容易。外國果d華人媒體真係無研究(咦?鹿米對呢方面應該有認識喎)。言下之意... 你係咪諗住挑機? :)

飲紅酒就唔知勒,或者響擡高身價卦。你飲完vodka唔會wing既咩?仲可以砌稿咁近?!

Karen:

咁我口才真係唔掂嘛。阿劉呢,唏。

響節目飲紅酒你覺得係咩“問題”呢?

塞米一條揚陸轟炸機 said...

係有人想搞又玩得埋既話我 會想 免費試玩架。

少少wing啦,不過咁既情況之下砌野都ok架。

C.M. said...

果然高瞻願矚吓!有冇諗過試下現成果d呢?

鄙人滴酒不(能)沾,都幾難理解响少少wing仲可以砌稿既情况。佩服佩服。

said...

話時話:

1.其實國際台同本港台啲新聞係唔同架
2.我好多時襟襟吓就會去左國際台...四個免費台當中,佢最中肯

係呀,我冇錢睇now呀,K宝呀咁

塞米一條揚陸轟炸機 said...

無識人做網台,貿貿然走入去walkin又自問無本錢丫XDDD

C.M. said...

米:

係咩!嘩,呢個對我黎講真係大發現!唔該曬!今晚試下先。

塞米:

嗯?walk-in做義工應該唔洗幾多本錢化...

the inner space said...

馬鼎盛在鳳凰衛視我已經捧他的場矣,雖然我的普通話馬馬虎虎尚可以聽得到。

塞米一條揚陸轟炸機 said...

感覺很多都有那種"你想玩咪自己開個玩囉,咪搞 我地圍威喂"的感覺...