幾耐冇睇亞視新聞？

前兩日亞視新聞部主管梁家榮辭職。

上次問過，都有唔少人夜晚睇亞視新聞。呢個唔少人既意思，似乎都只係得小貓三幾隻。

支持亞視新聞部既人唔少，但真係有幾多個睇過亞視新聞？又有幾耐冇睇亞視新聞？

有冇搞清楚咩係新聞自由，咩係編輯自主？班抽水既有幾多個呢幾年飲過亞視新聞既奶水？

梁家榮係點既人我唔知，亦唔曉唔得閑深究，之但我係亞視新聞既忠實番屎，睇左好幾年，亦都講比人聽好幾年。我鍾意亞視新聞，但唔知邊個係梁家榮；我知道邊個係方健儀，但
唔鍾意無線新聞。

梁家榮係咪新聞背後既無名英雄我唔知，但應該係我既無名偶像。

有冇惋惜，依家未，將來雖然會唔會我唔知，但應該都會。唔係因為邊個走左，而係邊個入左黎。

報紙話係劉瀾昌喎。聽到即刻炒蝦拆蟹。

睇佢主持既《把酒當歌》真係拎曬頭。唔係因為佢口才唔得（我口才超唔掂），亦唔係因為佢鍾意搵某某上去做嘉賓（我都想睇下佢點忽悠大眾加以警惕），更加唔係因為佢背景佢資歷（理得佢丫），而係因為佢節目起首既所謂重點新聞，日日都係一堆搔不著癢處既所謂新聞。到某d嘉賓想轉下敏感話題佢馬上就避重就輕。

做節目，迴避敏感話題，預左，但幾可肯定會削弱吸引力。冇耐，呢個節目就比我打入冷宮，寧願熄電視打機同阿仔阿女夜媽媽追追逐逐嘈喧巴閉。

好景不常，竟然聽到呢位仁兄授命主管亞視新聞部！萬一佢搞新聞，都好似做節目咁主動迴避敏感話題，你話係咪死得？

雖則我真係有少少擔心我真係將會好耐唔睇亞視新聞，但我都決定對家下仲響亞視新聞部既員工存留不少盼望，好令我唔洗夜媽媽陪果隻野癲，俾我繼續擔任呢個新聞部既無名番屎。