Monday, July 19, 2010

談判再培訓

小羊憤怒的逃了。

老練的豺狼伺機行事。

羊:「唔啋你呀!」

狼:(唔啋咪唔啋囉,又唔係第一次,嘿)安坐梳化。

羊:「唔准入廚房!」

狼:(嘿)竊笑。

羊:「你地全部都唔准入廚房!」

狼:(嘿嘿)大安主義。

羊:「你地全部都唔准入廚房!」

狼:(嘿嘿嘿,有冇講第二句呀...)豺狼外張內弛,亦步亦趨,啟動談判程序。

羊:「你地唔好行埋黎!」

狼:(嘿,竟然有新意喎)

羊:「你地唔好行埋黎,唔係我就跳落去!」

狼:(!!!)(!!!)張弛不定!

羊:「你地唔好行埋黎,唔係我就跳落水!」雙手推門

狼:(!!!)(聽真d 先,唔好驚住...)豺狼穩住心神,再跟羊媽吱吱噚吱吱噚。

羊:「你地唔好行埋黎,唔係我就跳落水!」雙手推門

狼:「拿,開門先啦,爸爸唔會鬧你」有人開始失去方寸,打亂章。

羊:「你地唔好行埋黎,唔係我就跳落水!」繼續雙手推門(唔鬧?信你至奇!)

狼:「拿,乖,不如開門先,媽媽想入廚房呀。」(這部分屬於談判程序嗎?)

羊:「你地唔好行埋黎,唔係我就跳... 落水!」繼續雙手推門,開始甩字

狼:「乖,爸爸依家入黎.... 唔好推門住,會夾親爸爸架....」慢慢接近疑犯受害人,準備賺門嘭嘭嘭安撫工作

羊:「都話唔好行埋黎咯,我會跳落水!」小手似乎無力,開始放軟

狼:「真架,爸爸唔會鬧你,比爸爸入黎先...」(成功進門)

羊:「哼!我係唔會啋你格!」餘怒未消~

狼:(... 唉,今次一定唔會同你計較...)

羊:「哼!」繼續發佢個脾四。

狼:「阿女牙,頭先講咩話?講多一次比爸爸聽?」豺狼半跪,套取羊女機密

羊:「哼!」談判破裂?

老狼緊抱羊女十餘秒,坐下,驚魂未定。

羊:「Hum! 」變調,屬軟化跡象

狼:「乖啦,你講多次你頭先講乜啦~」外表輕鬆,外弛內張

羊:「Errrr.... 『唔好開門』?」表現輕鬆,卻眉頭稍緊... 一樣外弛內張?

狼:「係喎,你有講喎,仲有呢?」

羊:「Errrr.... 『乖』?」

狼:「都係,不過仲有冇呀?」(patient.... patient....)

羊:「Errrr.... 」

狼:「呢~ 你係咪話跳落.... 水?」

羊:「Errrr.... 係。」誠惶誠恐

狼:「哦?原來你想游水牙?」

羊:「係!我地走走走,跟住剷起 d沙,然後用 d沙堆堆堆.... (下刪數十火星用語)!」

狼:「好好好,不如咁啦,下次如果Da Da又推住道門咁要講咩呀?」

羊:「.... 對唔住。」

狼:「都係。咁啦,下次如果你唔想俾爸爸媽媽入廚房,你可以話..... 『你地唔好行埋黎,唔係我就... 食曬 d雪糕!』」

羊:「!」瞪大雙眼。

狼:「又或者話....『食曬 d 提子!』」

羊:「哈哈哈,食曬 d 雪糕呀.... 食曬 d 提子呀.... 哈哈哈哈.... 唔係我就.... 哈哈哈哈.... 食曬d .... 食曬d ....」

狼:「益力多!」

羊:「哈哈哈,唔係我就飲曬 d益力多... 哈哈哈哈.... (再下刪數十亢奮宣言)」

7 comments:

said...

呢招應該係由香港啲官度學番泥!

多謝賜教~

005 said...

屁服! 咁你都得.

Anonymous said...

借問聲,你屋企既雪糕係哈根戴斯、牛奶公司定dryers先...不過我鐘意食dryers咖啡味,真係好好食,仲好食過哈根。

~goethe

p.e.t.e.r. said...

舊覆新貼:父之過

C.M. said...

米米:

下?唔係化,邊個官先...

五五:

無曬計,唯有出下策。

德德:

咁梗係牛牛公司貨色喇,窮養呀只可以。

彼彼:

我認衰,遺傳。XD

xiao zhu said...

天清氣朗好曬晾。

C.M. said...

大熱天時好過冬。