求職奇遇記

今早CM閒時路經鬧市，於高級花店門前側聞如下對話，先聽為快：

人物：Partner 兩人 - 男主外，負責見客、鮮花設計等；女主內，負責會計、鮮花採購等；共同策劃市場推廣

時間：店長一名，職員數名

地點：坐落平日人流甚旺、假日鬼影都無隻既商業區

背景：花店開張年餘，成績有目共睹。老闆選擇此區開業，主因商業區的客路合適，次因可以假期休息（做零售生意既，都想放假架）。

（為免記錄有誤，下文只能夾雜廣東口語寫成）

事由：近日，因為其中一名職員於花店扭傷唔番得工（是否呃工傷不得而知），此助手插花技術出神入化，無左佢，一眾人等全部踢曬腳，管理層急謀對策之際，門外一名時尚標緻女子走黎運吉....

************************
"老細，請人嘛？聽講你地有人走左噃，不如請我丫！" 女子若。

店長問之：“...”

"下！我唔識插花個噃！" 女子驚愕。

店長說（讀"稅"）之：“...”

"唔係嘛，唔識插花都番得工？你究竟係米請人，定係謀人寺黎架..."

其中一個老細見此，過來續說之：“...”

"咁都得！比夠兩皮我一個月？！講比阿媽聽都唔信.... 算啦算啦，見你靚仔，等我贈你兩句啦.... "


經營模式 vs 請人
"你地係呢度開高級花店，目標客戶當然非富則貴，或者係比得起錢識女仔既年輕才幹啦。係呢區做既女仔，一般相信係白領麗人，星期六日都要返工既，都唔係你既對象啦，所以至少星期日可以休息，對於唔少做零售既香港人一星期要做七日，一定吸引唔少人黎見工，洗鬼請我咩。再講你地既工作技術要求唔係咁高，請人應該好易既。話就話，個插花一時番唔得工，有D冧檔，你地齊心合力都應該搞得掂既。"

"單一業務雖然要承受一定既風險，但你地選址妥當，目標客戶清晰，風險相應降低，而依家既好處，係分工毋須咁清楚，即係話你我同街邊賣菜婆都搞得掂。根本毋須為左工作無人做而發愁。"

"因為做花店既，客戶來源相信主要為個人客，而非公司客，所以前綫人員既待客精神雖然最為重要，所以就算得失一兩個客，生意都可以維持，所以暫時走左一個插花既，對花店長遠影響不會很大。"

外優 and 內涵
"我一路都鍾意得閑黎呢區行街，都有見到你地客戶真係唔少，做左成年幾，你個笑容都係咁靚仔，相信生意好不在話下，開分店都得啦。外憂嘛，唯一的考慮似乎只係新分店有否足夠客源，照情況睇，淨係呢區開多兩間分店都應該夠生意做，再多一間就唔敢講啦。既然有意發大黎做，相信叻既下屬都有些少機會升做分店店長架。"

"內涵方面，我覺得老細你請既店長，似乎都幾好，應該幫得你手既，佢有無幫你手做埋其它野呢？例如分擔一下採購、會計方面的工作？我覺得佢應該有多少潛質既，如果唔係，你點會升佢咁笨丫。公司發大左既時候，始終要有可靠既人幫手至得既。就算佢無呢方面既專長，其他職員都可以考慮架。比D機會佢地收下貨，佢地自自然然會接觸多D簿記、倉存既知識，話唔定發掘出會計潛質都有可能。不過，我講下咋，若果佢地突然話要讀會計劈炮，你唔好賴我啊。不過，以你既眼光，都係少D替你擔心啦。"

內憂 and 外患
"我睇你個人都幾好，對下屬差極有限，點解要擔心佢地走而苦惱呢？要記得你當初出黎開檔的目的。對下屬好，是天性使然，下屬肯定見到，如果唔係，都唔會搵你 Happy Hour啦，你憂得黎，都算有D 自尋煩惱。"

"內憂者，根本只係你既想當然，並唔係實情。你都知道，投身零售服務業，High Turnover 基本上係行業現象，因為普遍技術要求低，雖然唔係個個人都叻，但肯定個個人都曉。雖然我未做過零售業，但估計之所以咁高 Turnover，是因為 Prospect，可以升做店長，做Super，做Manager。但因為競爭大，做做下發覺升職無望，自然會唸跳槽。既然你會考慮開分店，Prospect應該唔係問題。"

"要留意，話就話D 店員工作係Sales，但其實佢地只係Customer Service，同一般時裝零售店差唔多，Walk-in 客走入黎，個個都Serve得，分 Commission 梗係唔合理啦，因為始終係集體成果嘛。但有無考慮過分花紅呢？甚至年初計清楚條 Budget，然後全體公佈花紅標準，半年或年底再公佈業績，唔知可唔可行呢？好處是使員工團結，但唔好處是店長既公平管理乃關鍵，而且福利易放難收。萬一業績不好，你要有周詳準備。"

"講起店長，因為始終不是技術性專業人才，所以其去留相信不會影響日常運作。但也因為店長與前綫員工關係密切，其身份亦算得上是 Emotional Leader，所以操守至上，處事也要公平公道。受人愛戴，就更好，因為你可以少左唔少煩惱。一個有衝勁、誠懇、尊重下屬既阿頭，永遠都係維持員工關係既關鍵人物。無論你呢個做老細既，比幾多錢 D 職員，若果比個阿頭壓制，你日日登方向報、生果報請人都唔掂。"

"外患者，就係你自己。一切事情只係市場法則使然。而呢個法則既意義係：既然做生意，就要分清楚你的目標，不要被眼前既突發事件蒙蔽，誤以為係障礙。有危必定有機也。"


調整你的手段以配合你的目的
"B.H. Liddell-Hart 有兩句令我印象深刻，大約係講：

1. 調整你的工具（Tool）以配合你的手段（Approach）；
2. 調整你的手段以配合你的目的（Objective）。"

"老細，你插花個工傷啫，無論真假，都要認清自己的目標：做生意（時尚女子後按：目標應該為創造顧客）。"

"你今日既工具突然工傷唔番得工，你就要調動你既人手去配合你既手段，維持個運作。而對於如何應付將來如果又突然有人工傷，上策應該係認清行業現象，以調整你既手段。意思係，不要以為此事有礙長遠發展，因為有時流失對於成本既控制有一定既幫助，亦可以定期為花店帶來新生氣。雖然各人要重新合作和互相適應陌生人，但當你所建立既企業文化能夠建基於互相幫忙、齊心合力既正義環境底下，新人員對於花店既政治環境，應該仍然能夠處於你既鼓掌之間。入之前所說，風險只有一個：店長。"

"其實係花店有好多可以學，至少服務技巧、溝通技巧都已經是一門學問，如果你能夠說服自己原來這些都是可以持續進步既技術，員工自然會感受到。不要以為因為工作種類不多，覺得久而久之，員工可能會覺得悶，但要記著，就是因為工作種類不多，加上技術性不高，員工流失所帶來的風險其實很低，如果要同時加強各員工既整體技術水平，以及降低流失風險，可以考慮 Job Rotation。當然，執行Job Rotation 時要小心，以免被員工以為有人可以頂替佢個位，或者花店覺得無左邊個唔會死之類的想法。最重要係比員工知道都係老細為佢地好，比佢地真係有朝一日要離開花店，都有一技之長防身，縱使想走，佢地都會感激你。而且如果你既 Training 做得好，當佢地佢到外邊做，見表現咁好，你間花店到時就響嘞。"

"老細，員工工傷或會導致技術流失，但此種流失既補充相當快，你毋須擔心。要調整既，就是你既手段，即是你對於流失既態度，如某人所講：緊要而不緊張。"

我們 vs 我
"老細，當花店越搞越大，你就要重新衡量自己同公司既比重。我既意思係，你有部分態度必須改為《我們》，而非《我》，即是要從公司角度考慮，而非從自我角度考慮。如果你因為員工工傷而耿耿於懷，就是從《我》出發，而非《我們》出發。當你可以係某些關鍵情況，用《我們》角度睇野，咁點樣都唔會令你心煩，豁然自然開朗，而且你已經睇得比任何人都清楚。將來，你亦要於適當時候將同樣信息帶比花店其他職員，慢慢令佢地接受和接手《我們》這個概念，員工流失將會只是雞毛蒜皮既少事。集中精神做大事好過啦！"

You and me
"好嘞，老細，講左咁耐，講番我地個筆先.... 你幾時得閑番屋企飲湯呀！你已經幾個禮拜無陪我買餸噃，衰佬！重有啊，你比兩皮野我番花店唔係唔得，咁屋企個三條化骨龍搵你湊牙？！"



C.M. only
BB消息：見某牌子嬰兒食品（糊仔）推廣，指如果購買滿300盒，送大型電動玩具車一輛。天啊，就算一天食 1 盒，個BB 都 1 嵗，到時重食唔食糊仔呀？何況一盒可以食3日？！我屋企重剩低 200 幾盒糊仔啊陰公....