Tuesday, August 07, 2007

當年今日

又到想當年時間。

想當年不喜讀書,一直懶懶散散。甚至會考前也沒有進行最後衝刺,只記得睡和玩。

放榜前更只是在父母不斷催促下才到學友社取了一份什麼放榜/會考指南。拿了,究竟代表什麼,要怎麼看,父母沒有說,同學間也沒有分享,我更沒有問人。大概變了煲墊。

會考成績不好,無法留讀原校。成績單上有一兩科在會考前是蠻有信心的,可是結果強差人意,這點,算是人生一個小打擊。

拿著成績單在學校內漫無目的地踱步,記得沒有太大的傷感。可能還因為少年不知愁滋味。我比較遲熟。看著其他同學四處奔走找學校,但自己第一天只留學校,不知何處去。但也肯定,失落有一點,但沒有彷徨。

應該是放榜後第二天吧(或許也是第一天),爸爸跟我一同回校,他努力地跟我的班主任爭取我於原校重讀。中六嘛,肯定沒有機會,而重讀中五嘛,哈哈,以我的操行,倒是蠻有把握的。(按:我們幾兄弟姐妹在小中學的操行,全都是數一數二的。)

好了,學校應承了我可以重讀中五。爸爸先離去。而我則繼續留在學校流連。

不知在學校受了什麼刺激或鼓勵,我竟然自行走往其他的學校,試試以自己的成績申請入讀中六。而第一間嘗試的,就是胞妹就讀的一所 ~ 女校。

回想起來,面試的過程,猶如見工。與考官針鋒相對。他/她問為何你會申請進入一所女校?年少無知,我也不記得怎樣回答他,只記得我的情緒被煽動(其實應該是EQ低),不夠兩句幾乎不歡而散。或許,那考官很高興,只是我一個人離開這所學校仍心有不忿。

之後也沒有去過其他學校報名,一心留在原校重讀。

一直到了八月二十九日(左右),即離開學前兩三天,才在一位多年好友的半推半就之下,去了一所偏遠的中學申請,他協助我的原因是:你根本是有條件升讀中六的!言下之意,似乎是說我懶去申請。非常坦白地說,到現在我還不知道什麼是有條件升讀中六,什麼是沒有。我當年,完全沒有競爭的意識。

也很幸運地,該學校也收了我這個不肖學生。九月一日開課日,我還在校務處遞交什麼費用,那時,已經看到全人類穿著整齊校服了。而我於翌日,成為一個插班生。

現在,雖然對於前景是著緊的,但似乎我也從來沒有學會要努力抓緊自己的命運。就像那輕狂歲月,我都沒有很用心創造自己的路,或為自己作出決定。我只是隨著那潮流,被動地前進。雖然如此,我知道我仍然有一雙可以使用的手,和上天步步的守護。

20 comments:

惡女 said...

咦,呢度係咪無人呀?
咁我咪第一(不可置信中)

我當年都係一舊飯咁,好彩升到中六。我見宜家啲學生有哂plan,一日飛幾次的,啲家長又加入埋撲學校行列,就覺得好驚奇,我哋以前邊有咁架。

C.M. said...

呢度梗係靜啦,因為會考淨係得我地兩舊飯咋。每年見到d學生同家長都咁頻撲,我就懷疑自己以前係太過純品,定係太過懶。(雖然應該係懶既多)

xiao zhu said...

本來唔想留言架嘞,不過見你咁講,又覺得自己應該自首咁。我都係一舊飯同志黎架!

總之講懶,你就唔好同我爭喇,我都話懶到出汁咯。當年都係懵盛盛(而家都唔好得好多),完全都唔知咩叫做為前途打算。嘿,如果我當年有而家啲仔咁"醒",我估我而家識飛喇。:P

Karen (Sze) said...

本來呢, 都不打算寫自己當年如何面對會考, 但係呢, 見到你寫, 我忍唔到手啦!

當年我都係一舊飯黎架!

大家等到的, 就等稍後我那個"當年今日"吧(唔, 有d鼓勵性o架)!

野蠻郡主 said...

我好記得,平時成績好,考十幾喊就喊到呼天搶地,勁差個d有1,2分就要燒炮x慶祝!

惡女 said...

總共五舊飯,好飽呀!

南區肥龍 said...

惡女, c.m.,

加多舊飯唔該! 依家共六舊飯咧!

肥龍當年因為太好動結果係夠分但原校唔收讀預科, 經歷人生第一次被打沉.

怒火眼睛 said...

咁....加埋我咪可以食足一星期? 嘩
而家, 大家係咪由一舊飯變成一碗粥呢. 上善若水, 由飯變到粥...都算好大進步丫.

C.M. said...

原來飯,女多過男。(定係男既唔會認自己係舊飯?)

琴日睇到新聞,原來話咁快(又)放榜,跟住同小妹傾到,係咪真係要做到咁至似莘莘學子呢?想象唔到假如個女大左考完會考,我地係咪會坐係屋企闊佬懶理呢?(世事難料。)

on dog said...

"定係男既唔會認自己係舊飯?"

唔知呢! 小9就唔敢認了, 因為飯香噴噴, 又食得落肚...

小9當年只係一舊屎...

xiao zhu said...

On Dog 果然係 On Dog!佩服!

哈哈,食左七舊飯,痾番一舊屎,啱唔啱數呢? 唔,要搵數怪黎計計至得嘞。又或者呢個轉化過程,係唔係顯示左一啲生理、甚至心理問題呢? 唉,都係做番一舊飯好啲。

on dog said...

七舊飯,痾番一舊屎?

通常唔會痾咁少播~~~

(cm兄: 唔好意思! 搞到你個寶號...)

怒火眼睛 said...

哈哈哈, 我一早估到有人會講屎~~~ 因為我幾乎講左出口, 哈哈哈~

安諾勿斯 said...

邊個係細個唔係一舊飯(或者一舊屎)。

小弟好釆可以原校升學(不過都係一舊屎),放榜果日都有陪d friend去其他中學碰運氣。一路頻撲搵學校,一路cheer up d friend,都感受到一d徬徨同無助。

會考真係人生幾重要o既一關,都希望d家長可以係放榜果日support多d d仔女啦,唔好淨係識得鬧,唔使佢地咁徬徨。

惡女 said...

嘩,各位大佬,屎都出埋,咁好難搞架喎,咁下次咪出...

係呀,我變咗粥喇,都唔係壞事o既,以前我連學友社都唔知係乜,又直情唔知原校唔收係要撲學校o既(唔係我讀書叻),而係真係一舊飯囉,如果當年出左事就大鑊桔。

惡女 said...

C.M.,仲有呀,唔駛等到dada考會考吖,入幼稚園、小學、中學已經夠你死啦!

Yun said...

我一直都係一個懶人。

C.M. said...

又屎又飯(又粥!),好對唔住,小弟不期然諗起Toro飯...

惡妹:

唉,比你提起,幼稚園呢家野真係好惡啃(仲惡過你)。曾經有有錢上司托小弟幫其兒子填寫“履歷”

此履歷乃為其兒子入讀某名小學之“申請附件”。小弟參照其他履歷做了一份約20頁紙給上司兒報讀。內容包括生活照、海外旅行照片、幼稚園及課外活動證書等等,並詞情懇切求讀信一封。此履歷主題環繞這個富裕的家庭如何提供最大的支持給子女成長...

最後其兒子終於獲得這個小學學位,可能因為我無錢,所以覺得呢次助人成功,無法帶來滿足感。

Tommy said...

估唔到今日咁勁的 CM 原來當年都係咁頹的...

我係好好彩番到原校的一批﹐但都係懶得讀書淨係掛住打機﹐於是個高考就係一片恐怖之中渡過

諗番轉頭﹐做人應該有d 挫折似乎會比較好。多謝我的高考& 大學

C.M. said...

Tommy:

好久沒見!旅行回來,好玩嗎?

小弟當年唔係頹,而係十足一舊飯遮。至於勁... 係呀,我d血壓好勁呀(好似危樓姐姐咁)...