Tuesday, February 12, 2008

記得初為人父時

本篇贈阿米爸賀東主有喜。(並送新爸「On兄導讀」一則。)

我雖非重男輕女輩,但仍屬庸人自擾徒,受世俗期望所左右。

早年想,若生了個女兒,我可會被一束擔憂所縛。

父母輩可有微言?女大可會成為被唾之港女?女生外向,是耶?女大不中留,非耶?太巧,男人會怕;太靚,男人可怕。打機、看漫畫,女兒可會陪爸?買衫、好打扮,父親可會伴女?跟親家討禮餅酒席,大概不用為父的作主吧。父親被氣,男孩可不手軟,但何堪向女兒下手?

起名 Da Da,為的就是那何堪,寄語:願聽樓梯響,毋聞打女聲。

抱前預計,初為人父者,應該喜不自禁。原來非理所當然。首次見面,抱在懷裏,腦海一片空白。那一刻,無言無感無想。既然三無,請不要問我感覺如何。沒記憶。

倘若來個事後推斷,觀乎 Da Da 現在如何討人歡喜,我回顧,那感覺起因腎上腺素急注,為免恐懼、慌張、失喪蓋過一切知識、原則、準備,自我保護的極端,就是整個信息處理機制的停頓...... 臆測,總是我的專長。

女兒尚未滿月的時候,為父的一直未曾替她作任何生理上的打點。抱抱逗逗還可以,餵奶、換片、沐浴,由當母的親自操勞。因為,女呀女,你爸我連怎當爸也不知,何德何能當保姆?藉口嗎?非也,實不能也。

分擔湊女工作,並非想象中容易,皆因,受困。Da Da 來了,為父的得了產後抑鬱。精神經常處於過度緊張狀態。因為 Da Da 的一切,都是那麼嬌嫩,而我對於 Da Da 的一切,都是那麼無知。對於她的來臨,我是過分自信的了。

朋友叮囑,新成員出現,你的付出便要雙倍,而人家的付出則反而只剩一半,要有思想準備。可惜言者有心,聽者無意。然後自然法則把我這蛙放入溫水,慢火煮數月,此蛙幾乎心力衰竭。及後,火不再灼,溫水轉涼,蛙復活躍如斯。而溫水之所以轉涼,只因理通了那情感的壓抑,知道如何為父,不再勉強那完美父親的樣式,接受當個滿身瘡疤的父親。

人家父母早已成仙,不一會便子龍女鳳。而我自己嘛,教女前,還須得先被女所教,方能得道。

如今未足兩周歲的女兒,二十磅許,我的手臂,還欠兩只大老鼠。但我謹留心張五常建議,兩歲前,不作催谷,只給無限愛心。

嘿,Da,兩歲之後,你可不要怪為父的狠心哦!

18 comments:

小黃蓉 said...

感動!

南區肥龍 said...

一個心思細密、盡心盡力的爸爸的心路歷程.:P

又,(學會)「順其自然」係一個過程.

ondog said...

大佬: 開工大大吉!

身邊有許多人士, 朋友, 和你一樣, 已漸為人父... 而小弟, 則未能被冠以"新爸"一名.


努力啊! DA DA有你!

米都話唔搞咯 said...

CM:

謝~

等我都寫番篇先~

C.M. said...

謝謝呀,小黃蓉,你的感動令我感動。(今日天寒地凍捱飯盒,d飯仲唔熱添呀,陰功)

肥龍兄,

心思細密、盡心盡力真係唔敢當。坦白講,我鍾意同個女「玩」多過「湊」佢、教佢。

落筆時,其實個心係好掛住個女。原本想寫下湊女經,但寫寫下(拿,你睇,第四段開始個心情急轉直下...),變左寫自己,於是先改左個題目。

原來要「認真」一d做老豆真係唔容易。所以我好贊成d公司會比陪產假個daddy,鼓勵新爸點樣學做daddy。(Well,有左經驗之後,第二胎應該唔洗再比 =p)

On兄,咁小弟祝你新年當新爸喇!(高唔高興呀?喜唔喜歡呀?)大家一齊努力!

阿米爸,呼~

今次講唔到湊女,抱歉,因為自己開始放縱佢勒。教佢個責任留番比小妹囉 =p。佢學講野算比其他小朋友遲喇,其他小朋友連句子都識,DaDa就... 不過有d人話遲講野其實有其他專長喎。但睇見好多小朋友都識講好多野播...唉。我既心路歷程真係啱啱先開始咋。至於咩Playgroup呢、玩具呢... Oops. 第日先講。

南區肥龍 said...

落筆時個心係好掛住個女,証明你既父愛經已發揮得好成熟啦~~

見你寫得咁開心,我又忍唔住繼續寫.(我其實做咩要搵藉口呢?而且我都係加把咀遮:p)你話你鍾意同個女「玩」多過「湊」佢、教佢,係好架.有時如果太多規舉,太多目光,太多道理,其實你個女都未必收到,而且佢得兩歲,真係收到都未必明白.依個時間,應該嘻嘻哈哈架嘛.^^

不過行為禮貌如打招呼呢,我就應該開始早啲灌輸下,可能快啲習慣.肥龍有個親戚,就係由細到大都唔會(主動)稱呼人,而且愈係叫佢做愈唔做.你可以話我小心眼啦,不過禮貌又非一日可以培養.咁小時就ok遮,大過會點呢?

最後,你話“有左經驗之後,第二胎應該唔洗再比...”你係咪另有所提示啫?

阿5 said...

Hey, 係屋企悶悶地的話可以download 返 transport tycoon (14MB)
http://download.transporttycoon.net/

C.M. said...

肥龍兄:

呵呵,掛住個女就叫成熟?咁客氣呀。

見你忍唔住寫左咁多,但又言詞閃爍,你係咪... 桀桀...

不過見你講到話同個女玩咁好,好啦,今日唔抽稱你啦。而且好彩你明白,我唔教佢,其實唔等於我唔引導佢。亦都多謝你再提醒我。正如CK今日所講,父母之做法和對各種事件的反應,先更重要。

查實我都打過佢手板架喇。唉,似乎做老豆既要開始踏入第二階段勒。

至於小弟果句,純粹管理角度睇。拿比著係小弟呢亭「潛在記得利益者」,幾大搶得就搶la!

阿5:

多謝!正!(不過頂唔到癮幾耐...)

BTW,你可唔可以用你自己個角度寫篇「教會政治」呀?不過講明先,我會post出黎過播。

VC said...

控制情緒,可以不再打的。

sun said...

補上遲來了的新年快樂
祝身體健康
DaDa 聽教聽話

開始要煩入邊間幼稚園未?

C.M. said...

Sun兄:

也奉上小弟遲來的新年祝福
祝你身體健康
工作順順利利

要煩入邊間幼稚園?未呀,依家計劃緊入邊間中學先。

C.M. said...

VC兄:

冇呀,我情緒穩定架。(定係你講緊我個女?)第三階段我就會考慮圈禁佢架勒,你放心。

C.M. said...

VC兄,漏了。

祝你新年快樂,身體健康!

leona said...

Da兩歲之後,若看到這篇文章,應該會好感動!

你為她示範了什麼叫真正疼鍚一個女孩子
她將來的情人,好危險!
:)

C.M. said...

Leona:

祝你新年快樂,身體健康!

呢篇查實愛黎補鑊架,其實我係驚佢見到我其他post貼佢d玉照咋。我疼鍚佢?嘿。

至於她將來的情人... 她的一定虎視眈眈。

VC said...

祝你合家身心健康!

做人Easy D,好好享受你的福氣。

P.S. Time to 整多個仔。

Old Cake said...

"Da Da 來了,為父的得了產後抑鬱。"<---

c.m.兄,
咁你好翻未呀? ^_^
祝你同你一家人身體健康, 事事順利!

C.M. said...

VC:

多謝。到時多件既話話你聽。

餅兄:

T_T 慘,抑鬱到依家。所以成日都要返公司散心。