Wednesday, December 03, 2008

假如我係阿女

(警告:此篇 HR 高層或 Recruitment 從業員止步)

好早就見到鎚哥哥吹號玩「聖誕交叉卜」,查實,我都想玩。

之前冇玩,因為驚。今年未報名,都係因為驚。

驚交唔到貨。

我覺得寫卜可以當食生菜果d,真係好勁,佢地似乎係有無窮無盡既題材,信手拈來。功力深厚者寫卜可以寫到出書,犀利。我呢亭,只係希望搵到三數個人可以插下我眼既,就於願足矣,屙呢吉帝。見到呢排咁靜(好似),估計可能係金融海嘯卦。連家母同阿仁兄前排都不約而同話捐錢(well,值得鼓勵丫),我諗成條街都真係好灰,令到d人不期然諗下究竟發生左咩事。

哎呀,樂觀d得唔得呀,大哥大姐細路妹妹,得閑學下阿鶴咁啦。(真係想搵野撩興佢,等我同佢鬧下交沖喜下....)

我呢,平日最鍾意搞爛gag,撩下d 女同事傾計(仲要響佢地最忙果時撩傾計),或者一路對住部腦打打打,一路同隔離阿姐/妹傾下兒女經(似乎d人都怕左我)。就算公司愁雲慘霧、風聲鶴唳,香港政府抵打抵鬧,都一於少理。總之,我地呢種唔鍾意束縛既人,覺得最緊要係及時行樂。做到好似冰冰咁,應該幾盞鬼。

我曾經同阿邊個講,我覺得人呢,係需要有d幽默感架,(呀,唔知爛gag算唔算呢?)點解呢?我都唔知。我淨係覺得,若果一個人可以得閑搞下gag,就算瘀爆都好,其實都應該係自我肯定既表現黎既。比著旁人睇黎,呢類人應該唔洗太擔心佢會打家劫舍、殺人放火(拿,我估應該咋,亦唔係話世事冇例外架)既,至少,佢地唔悲觀囉(又係斷估)。

阿女開心好易,只要送粒糖比佢就可以開心幾粒鐘。大人醒過細路咁多,冇奶油唔得。d咩研究學者教授話大人咁Q多野諗,咁L多野擔心,梗係冇咁容易開心啦。哦,係卦。

琴日走去同隔離枱同事傾閑計(仲要揀人地超忙果史),分享一下兒女經。跟手提到報幼稚園,佢不解家長原來分兩派,即九龍塘派(or 名校派),同街坊派。佢起初以為香港地全部都係九龍塘派,依家睇真原來唔係。同事有女兩歲多,雖然佢自問九龍塘派,不過我睇落佢唔係不擇手段果種。佢只係希望,個小朋友大左生活可以舒適 d,然後就可以更開心。

嘩,好正路,好 Red Ocean

我問番果班街坊派阿姐阿妹(成派得我一個阿叔),睇落佢地真係比九龍塘派既開心d,搞gag頻率亦高d,擔心阿仔阿女身體健康多過擔心佢地學業既會多d,請假同仔女玩(或幫手做功課)既又多d。

「DaDa,乖.... 唔好喊.... 想唔想食糖糖?」

妖~ 寫左咁多字,就當交叉卜得唔得?(妖~,求求其其過日神有咩唔好!)

19 comments:

小寶 said...

嘻嘻!又第一

小寶 said...

>撩下d 女同事傾計(仲要響佢地最忙果時撩傾計)

嗚嗚嗚~今日比人大大聲叫我死開呀!瘀到爆

小寶 said...

>警告:此篇 HR 高層或 Recruitment 從業員止步

點解呀?

呵呵!又中3T(噢!今日仲要係星期三添!有運行!有運行!等我過去跑馬地先)

小瓶子 said...

当我忙的时候, 如果有人敢来打搞我, 影响我做野的速度, 我会黑面.

Hana said...

>只係希望搵到三數個人可以插下我眼既,

插其他地方得唔得?

>做到好似冰冰咁,應該幾盞鬼。

其實真係幾盞鬼!仍然覺得--活了三十多年卻像過了別人的一輩子,地獄裹來天堂裹去,精彩紛呈,如果明天就會死去,這一生也是有賺無賠的買賣。

C.M. said...

小寶:

>>今日比人大大聲叫我死開呀!
你係咪哄得太埋,定係...(唏,兩個人既野關我鬼事!)

>>點解呀?
你估俾佢地見我吞曬pok 我仲有運行既!

>>又中3T
點呀,係咪豺狼3T就有斬獲,小豬3T就輸到當埋隻鑊?

小瓶子:
若果係有個靚仔(好似我咁)撩你,又如何?(咪打頭!)

冰冰:
>>插其他地方得唔得?
梗係唔得喇,劇情需要,咁我用手可以擋到嘛。

>>這一生也是有賺無賠的買賣
願一生無憾。

said...

求其啦
不過你己經自貼左喇喎, 點膠叉呢

火鶴 said...

> 真係想搵野撩興佢,等我同佢鬧下交沖喜下....

豺狼你依家撩興唔到我架喇..

小寶 said...

>豺狼你依家撩興唔到我架喇..

喔!有人下戰書喎!點先小豺狼!
(唯恐天下不亂)

不過呢~佢真係好似比禪師點化左做左仙鶴喇近排。

Hana said...

仙鶴?有冇神針先?

之不過男人了喎,用針來形容?(小寶,祝你好運)

佚名 said...

c.m:
打完呢篇野就收得工~yeah~
都幾過日晨下

C.M. said...

鎚:
到時比篇新既你!

鶴:
(要度度先...)

寶:
點先!?嘿,我呢亭狼子性格梗係恃機而動啦。

冰:
針... 係咪“幼”既意思呀?

佚:
偷得浮生半日閑

小寶 said...

>之不過男人了喎,用針來形容?
哈哈!o拿~神針係你講架咋(嘻嘻!其實之前我都係咁唸)

>>針... 係咪“幼”既意思呀?
可能係"定海神針"呢?(即刻兜返先。)

>祝你好運
承你貴言!

火鶴 said...

> 不過呢~佢真係好似比禪師點化左做左仙鶴喇近排。

點化? 定係撚化呀?

定海神針, 幾大浪都頂得住.

佚名 said...

c.m:
偷得浮生半日閑
-->有得偷都幾好
但會唔會被人鬧先?

C.M. said...

定海神針?(唉,小弟查實第一次見呢個term... google返,原來係孫悟空果支長短棍...)

小佚:
既然係偷,梗係唔俾人知喇

佚名 said...

c.m既偷功果然利害!

Karen (Sze) said...

>>此篇 HR 高層或 Recruitment 從業員止步

sorry!我無理, 照睇! 吹咩!

我有位女同事, 成撩下d 女同事傾計(包括我), 但係呢, 來來去去都係插她老頂同佢隻馬的不是(佢隻馬都過檔了差唔多一個月啦), 於是我咪話: 有乜野等我收工至講!

C.M. said...

>>有乜野等我收工至講!
若果係靚仔單身男同事...