Saturday, December 06, 2008

蒸雞翼

好記性既同事知道我鍾意食雞翼,每次中午去飲茶就「幫」我點碟雞翼,南乳煎雞翼、瑞士雞翼、碳燒蜜糖雞翼... 查實我都好少掂... 熱氣不特止,係茶樓食黐立立既雞翼,隨時會食到幾烏where。係,好香口,不過,一聯想返阿媽整果 d 蒸雞翼,就自然會覺得,呢d美味雞翼加工得太多,尤其是淨係覺得塊皮有味,d 肉就寡到呢~ 好似咬擦字膠咁。唔係講笑。

好勒,到我同人講,話我最鍾意食既雞翼其實係要「蒸」既,十個有十個都顯得好愕然。

乜雞翼可以裸黎蒸既咩?(點解唔得?)

會唔會有「雪味」架?(唔覺喎,想冇雪味咪買新鮮雞翼囉... 又可以加少少紹興酒,香d)

蒸雞翼好食咩?(你試過未先...)

有冇「秘」左d 水佢呀?(有時喇,你想秘左佢都得格。)

蒸魚就得遮,蒸雞翼得唔得架?(呢個問題答左你啦...)

蒸雞翼我由細食到大,係阿媽既首本名菜,亦係我最鍾意既葷菜。

阿媽話,用雪藏雞翼得勒,先用鹽腌左佢,腌幾耐隨自己口味喇,唔洗用其他野腌(紹興酒就腌既時候加又得,蒸之前加都得)。一般可以用飯煲蒸,飯滾既時候放腌好既雞翼落去(大概每次八至十二隻左右,太少唔夠我一個人食),飯熟自然可以食得。(鍾意落鑊蒸當然得,咁要自己調教火候勒。)

自己都親自落廚整過三幾次,雖然只有阿媽六七成功力,但試過既人都一致讚好,佢地之後仲會返屋企自己煮添。

雞翼蒸完之後,都會蒸出成碟雞汁,阿媽多數會留返響隻碟道,事關佢知道我地鍾意撈埋d汁送飯,而且,仲可以保持d 雞翼既濕度同溫度,唔會咁快乾搞到黐立立。連汁食真係好惹味。

嗯,我知道就算我話蒸雞翼點好食點好味都好難令你動心架勒,不過咁,我仍然好期待,有日呢個簡單菜色,唔係淨係得我一家鍾意食、唔係淨係得我一家食過。呢篇,唔係整蠱 post。

你,敢唔敢整「蒸雞翼」?

28 comments:

Justin said...

好想食好想食好想食!!!

馬沙 said...

對於有邊爐王子稱號嘅我覺得烚雞翼都好好食!

dog o said...

大佬, 小弟表示:

1。我一家都鍾意食蒸雞翼。
2。我一家都成日整蒸雞翼。
3。蒸雞翼,好食。
4。蒸雞翼,比較有益。
5。比較有益,會比較多食。
6。比較冇益的,感覺上比較好食,但不多食。

結論係,小弟,老矣。

seikomatic said...

鈴林六,食雞翼,早腳七,驚佢綠唔熟。

南區肥龍 said...

蒸雞翼好食.

蒸雞翼+雲耳/冬菇+薑仲好食.

小瓶子 said...

我阿妈都有煮蒸雞翼哦...不过到我呢代睇怕都会失传啦.....

小瓶子 said...

>>>蒸雞翼+雲耳/冬菇+薑仲好食

我阿妈又真系试过甘煮哦...

readandeat said...

蒸雞翼好食呀﹗

金針雲耳蒸雞翼。可以用荷葉包著雞翼,仲正。

MiffyPaPa said...

北姑就係人都識,北菇蒸雞(翼),就冇人知?
茶餐廳都有得食囉~

詩白爾 said...

蒸雞翼~我鍾~意食!
話時話D雞汁好多油,CM兄你咁都撈得落飯?

said...

>>好勒,到我同人講,話我最鍾意食既雞翼其實係要「蒸」既,十個有十個都顯得好愕然。
>>乜雞翼可以裸黎蒸既咩?(點解唔得?)

我前兩日同個同事講起, 佢都一樣咁既反應
真係奇怪

Yun said...

下﹖點解奇怪呢﹖我家會蒸成隻雞的﹐(包括雞翼囉。) 好好味架。(會加好多其他野。)

Hana said...



蒸雞翼我成日都整啦!

金針雲耳再加少少杞子啲汁就冇咁漏,賣相又好睇啲。
唔落紹興酒落玫瑰露酒會會你有驚喜,下次試下。

以前啲人為咗慳火水/能源,貪方便會將餸菜放落飯度蒸,其實咁樣會瀉咗米氣啲飯就冇咁香啦!

佚名 said...

c.m:
無諗過咁多人試過蒸雞翼呢
不過用電飯煲節省資源啊!

C.M. said...

嘩,唔講真係唔知,查實原來咁多人都蒸過雞翼!

側田:
蒸雞翼好易整架,所以就算你一個人都一定搞得掂!

邊爐王子:
係呀係呀,又健康又好味!

昂兄:
原來你都屋企都係蒸雞翼一族,真係失閣曬。(咦,咁借問你有冇聽過邊間茶樓會出蒸雞翼呀?)

精工:
夜媽媽,恰眼訓,煮野要熟。

肥龍兄:
哈哈,係播。

瓶子:
試下喇,清蒸雞翼好好食架。

C.M. said...

讀食妹妹:
哎呀,食呢方面呢,真係要你指教指教喇。等我叫阿媽試下用荷葉蒸先。

MiffyPaPa:
恭迎恭迎。好開心原來有茶餐廳整蒸雞翼,可否告知邊間?

詩白爾:
好耐冇見!哈哈哈,比你捉到,查實我就係貪佢夠油香,而且估佢應該健康過豬油撈飯卦。唯一缺點係,要趁熱先好食。

鎚哥哥:
係羅係羅。搞到我以為係驚世大發現添。

雲妹:
得閑試下淨係蒸雞翼丫。

C.M. said...

冰冰:
乜加杞子原來可以冇咁漏架?好,就即刻叫阿媽試下!(多謝多謝!)等我自己試下用玫瑰露先!(除左慳之外,仲可以方便我呢亭懶人添)

小佚:
若果你試過蒸雞翼之後,話我比聽好唔好食丫。

Morca said...

金針雲耳蒸雞翼...

呢個我都有食!

Marshmallow said...

就禮拜五,我地一齊蒸雞翼!

安諾勿斯 said...

正!小弟又要食雞翼!

獅子皇 said...

嘩‧‧‧我阿媽既蒸雞翼真係五花八門,不過最好味既一定係沙薑粉蒸雞翼,好味到暈‧‧‧講起又想食。

佚名 said...

c.m:
若果你試過蒸雞翼之後,話我比聽好唔好食丫。
-->咩都唔加就唔會啦
加d菇,或者會

AC said...

我通常用鹽醃完再放蔥段蒸。

中五重讀果一年要煮飯畀細妹食,好多時靠呢味蒙混過去 (都好食架!)

C.M. said...

Morca:
茶樓既就試得多,好,就叫阿媽整先!

綿綿:
菜譜已呈,請批覆。

安兄:
咁一齊黎博。

皇兄:
沙薑粉蒸雞翼,呢個真係要試試!(我好鍾意沙薑架!)

小佚:
加菇都好食!

AC:
蒙混過去?唔會卦。應該好味到暈!

(各位善長,哈哈,呢兩日多謝曬,阿媽已經應承左整碟杞子玫瑰露冬菇沙薑荷葉包蒸雞翼等我試下勒!)

Karen (Sze) said...

如果我話您知, office的雪櫃內有一袋雞翼用來俾我在lunch時食, 問您服未!

我係白灼雞翼的, 但食之前必須要解凍一日去雪味。第二日就出水, 然後用熱水再浸, 食之前用清水加鹽放microware煑至少6分鐘, 食時點少許淮鹽, 就好好食(當然, 食少d microware較好, 建議大家用明火整)。

思媽問唔中會煮:
蒸雞翼+雲耳/冬菇+薑
薑葱蒸雞翼
白灼蒸雞翼

想起都好味!

C.M. said...

嘩,響office煮雞翼咁厲害!(我以前公司用微波爐煮飯都已經覺得匪夷所思)

佚名 said...

c.m:
加菇都好食!
-->係啊~好香ga~

office迅間幾廚神天地~

Anonymous said...

thanks for share......