Sunday, December 28, 2008

聖誕交差仆之聖誕述異

我叫阿春,全名施庵春。響政府做D7 級朝廷大員,負責審批同有權否決私人機構請咩人。

經過我二十幾年黎既努力,依家各行各業都做得有聲有色。幾乎全個漁港請既人都係經我拍板既。

(不過好景不常,一個金融大浪就將阿春沖走左。)

「嘉倫!係咪你交我出黎架!我同你死過!」(標曬青筋)

「嘿,你死你事,鬼叫你上次出黎食飯串我牙。好執埋包袱扯添呀你,如果唔係嗌食蕉的走你呀。」

「搞錯!點解!點解!點解炒我,唔炒第個!呢,炒怒眼妹咪得囉!」(死纏爛打)

(此際,彪形大漢殺出搭爹,是謂昂老大也。)

「嘿,庵春,算把啦。鬼叫怒眼妹後生又靚女咩...」(條友嘴角含春)

「靚女關你鬼事牙!總之我...」

「我係鍾意靚女又關你鬼事牙!死開啦你,食蕉~」

嗚嗚嗚,我就係咁俾人逼害架勒.... (開始猙獰)要我咁順攤.... 離開左我.... 果張金座椅?....勢係假!

好彩我一早鋪定路,呢二十年黎批過唔少請人奏摺,一定有茂利感恩圖報既!好!先落到旺角 IFC。

你睇,全因我既鴻圖大略,旺角已經成為漁港既金融中心。有錢既地方,就自然請得著我呢亭人才!(值得仰天長嘯!)

「唔係化... 你響七十樓做都托手踭!」

「嘿,唔係托你手踭,而係直頭睬你有味呀!如果唔係乃念上次教我搭巴士,我打巴你好耐添呀!唔係俾你砌我生豬肉?我早就做埋堆填區主席添喇,洗響呢庶搞Trust!食蕉~ 」

我自己識行!你不仁我不義!一於落中環,果度好過你旺角多多聲呀!

「咦... ?你係... 渣估呢?」(善男曰)

「哦,渣老邪下嘛,佢搬左去旺角喇,仲開左幾十間醫務所,發左喇。」(信女曰,仲擔住條煙仔餅)

「頂!唔早響,大佬我剛剛先由果邊黎呢度架!」(善男燥底)

「嘩,後生仔,做咩無啦啦頂我呀!無禮貌,食蕉~」(信女不甘示弱)

「洗唔洗咁大陣仗呀,貴姓呀,咁巴史閉...」(善男拗底)

「嘿,認住我喇,我別號申三鑊!多數人未俾我申夠三鑊就打橫掟出街勒。」(信女欺善... 但唔知怕唔怕惡)

(兩秒鐘食蕉主管就連同成半打食蕉一齊出現,來勢洶洶。)

(故事話阿春走唔切,俾人打橫送出門口。)

我呢世都認得你!

(既然中環不留人,阿春出發去佐敦搵佢舊相好。依家既佐敦,已經成為煙花之地。)

「咦?衰鬼,你身材好左,人又靚左播。」(乘機想摸人屁股)

「係咩?真架?今次想買咩煙花呀?依家穿雲箭買一送一播。幫你點埋火都得添... 」(AK笑騎騎,一路搔首弄姿拋生藕)

「係架,你真係索左好多呀.... 」(殺入正題準備打真軍)「.... 不過咁,查實我今次係想黎搵 CK既,佢響邊庶?」

「哼!原來係搵老細下化 ..... 仲以為有生意添。佢早就做左微硬CEO喇,等你?!」(變了臉的AK非常可怕)

「咩咁大支野呀,冇理由佢做 CEO我唔知既,冇我手諭邊個可以做微硬CEO!」(變了臉的庵春更可怕)

「嘿,就係因為你唔批佢去做漁港既微硬CEO,所以去左花旗做微硬CEO呀!多得你呀....死老野!CK留口信話叫你食蕉喎。一場相好,洗唔洗幫你?」(AK身材樣貌回復原狀)

「我頂你丫....」(庵春再次忍唔住)

「食蕉~」

(阿春又一次比人踢左落樓,仲差 d 撞倒好大隻住響昂船洲既昂九婆)

「世侄,咁蹺既,你冇事嘛... ?」(昂九婆好好心腸咁問條庵春)

「哎呀... 條難產... 我第日一定報仇!」(條庵春自顧自繼續坐響地發癲)

「世侄,壓力大呢,就去減下壓喇,我係18號....」(...昂九婆係咪 sell 緊 ... service?)

「丫,頂到你嘔藍藥水丫拿,你至壓力大呀!我不知幾爽。」(斷然拒絕昂九婆邀請)

「咳咳,世侄,我係話,18號有個中童馬拉松班,不如你都參加喇....」(似乎有人未知遇人不淑)

(阿春二話不說,正想兩掌推開昂九婆,突然有隻肥手格開春九二人)

「嘿,西裝友,見你斯斯文文,原來咁 open,連阿婆都敢搞!?」

「邊個想做架輛... 我...」(定神一睇,原來係半山肥龍)

「哦,原來係你半山肥龍!雖然你唔認得我,但你知唔知道你份牛工係邊個批架,係我呀,如果唔係我?你早就...」(未講完半山肥龍就膊頭一動,插眼指橫空而出,中!)

「嘿,我梗係知係你啦,我等左呢個機會好耐喇!哈哈哈哈!」(叉腰狂笑)

「你... 點解... 我... 好痛...」(施庵春痛不欲生,欲言又止,欲哭無淚... )

「嘿,如果唔係你,我都做唔到半山大佬,依家,成個半山都係我睇既!哈哈哈,靠你?我仲響老尖打份 ibank 牛工咋」(因為阿春領導有方,所以半山已經變左賊竇)

你條友,好有志氣下... 不過好鬼痛...

「嘿,乃念你我一齊食過壽司,就收你做我條靚喇!跟我黎,一齊劈上大帽山!」(大帽山乃有名野戰場,兵家必爭之地,你攻我守,延年益壽。)

大帽山?好似十個去親得一個返黎咋播....

「求求你啦肥龍大哥,我唔想咁早死呀... 嗚嗚嗚... 哎也...」

(阿春幾乎連尿都賴埋,跟手斷片,應該係比人仆暈左)

「... 你兩兄弟... 一個山頂... 一個山腳 ... (嘰喱咕嚕)...(吱吱斟斟)... 即係無計傾喇... 上!」(阿春其實已經醒左,隱約聽到慘叫聲不絕)

「.... 哎也!....」

「.... 哈哈哈哈!殺呀!....」

為免殃及池魚,庵春繼續詐死。

「作死牙,咋死!!起身!!你!去果邊抽佢地!....... 等等等等等!碰呀!」肥龍繼續廝殺。

(阿春自出娘胎,從未與人如斯肉搏,正羞愧搵窿捐之際....)

「阿腥,你係咪唔曉打?等我教你啦.... 」(呢條港男好面善....)

「... 哦,原來係你,漁港賭聖達達尼丫嘛...」

「你係...」達達尼一臉狐疑。

「查實我係...」有人正想揭開驚天大秘密。

「係係係係.... 係你老豆!.... 食呀,十三么!位位六五五三六!」達達尼就係雄踞山頂既賭聖,平日都幾爛口。

「嗚嗚嗚... 我賣笑得唔得呀... 嗚嗚嗚」對住惡爺,唯有跪地餵豬乸。

「嘿,賣笑?等我睇下點先喇.... 阿媽.... 過黎呀....!同佢驗一驗身,睇佢有冇暗病,如果乾乾淨淨就.... 桀桀桀」(雖然聽講十個都有一個可以落得返黎,但又聽講好似係淨左身先准落黎...)

「大少,點呀?」個阿媽胸前孭住個濕豆窿,對達達尼甚為恭敬。

「點?搞掂佢喇,唔好煩我!走走走走!」(咁樣呼喝阿媽,正忤逆仔!)

「... 呢位先生,叫我阿徐,請跟我黎....」

嘩,唔係講笑,呢個阿徐姐姐人如其名,真係徐娘半老,風韻猶存,輪到我桀桀桀喇... 桀桀桀...

「.... 哎也!....」(又斷片)

(當阿春恢復知覺之後,發現內外衣服全部換好,未有發現俾人侵犯過既痕跡。)

唉,好可惜....

「咦?點解呢度有個濕豆窿既?... 嗯... 你叫咩名呀?」條濕豆窿好乖,笑住口咁望住阿春。

「我叫阿滿呀,你叫施庵春丫嘛,阿媽話你會幫我補習喎。」條濕豆窿又好似幾聰明伶俐喎。

「嘩,真係聰明勒,阿滿,好,等春姐姐教你下.... 」好彩,原來係補習遮,我仲以為...

「喎凄!」(阿滿一閃身)

「哎也!... 也也也也也... 你做乜插我眼呀... 哎也也也... 」(呢排有人幾旺)

「嘿,徐媽媽話你可以幫我補習插人眼喎... 不過,車,睇你好似無料到,不過幾好玩咁.... 黎,再黎俾我試下!...」(阿滿欲仙,阿春欲死)

(時間過左一陣)

「且慢!」(兩人死去活來之際,竟有奇珍異獸講人話)

「我係 D9 級大員李兵兵既助理,叫 Keroro,專程賜封比阿滿既。請問,邊個係阿滿?」(氣氛凝重)

呢一刻,我仲唔甩難!

「我就係阿滿!」(阿春捷足先登)

「哦,果然年輕有為,根據 D9 既聖諭,阿滿若果係男既,就賜比冰冰做填房... 如果係女就... 」(Keroro繼續發言)「... 就封俾李兵兵既同級同事高棉棉... 至於做乜,在下唔知,事關我事頭唔係高大員。仲有... 行快 d 喇,洗唔洗請你呀!!食蕉~」(拳頭在近,你點話點好啦...)

嘩!李兵兵呢條阿伯已經有五個男既做填房,四個女既就做阿四,好彩遮...

諗諗下大鑊!上次同高大員安排左個六人 speed dating,點知俾我食曬 d 蔥,搞到佢唔可以借蔥行兇,呢次死喇。

「... 參見高大員... 」(拉長)

「平身」(清脆)

「... 謝高大員... 」(死唔斷氣)

「咩原來係你?呵呵,原來你就係阿滿,好啦,見係一場相識,原本諗住 train 你做魔術師變兔仔變機械人跳火圈,咁喇,俾份輕鬆d 過你....

嗯.... 你以後既工作,就係餵我寶貝豬食飯,日日同佢沖身就夠勒... 」咁筍!!

我見過佢寶貝豬喇,淨係飲奶,得我手臂咁長,好易搞遮!掂呀!好彩唔係去照顧佢個寶貝鶴即,如果唔係實俾佢條長頸勒死都似...

「好極!高大員,我一定會做得妥妥當當,你放心!!我一定會當阿小豬係我親人咁既!」睇黎我應該有著落勒,呵呵呵呵。(遲d先呵出聲)

「既然你咁高興,我都唔阻你勒,人黎!同我俾兩擔 LUX 呢條茂利。」兩擔?LUX?茂利?

「阿高大員,BB 沖涼用 Dove 好 d 呀,LUX 好乾架。」

「施庵春,你記得廿年前既寶貝豬係點樣嘛」

「記得!梗係記得喇,好可... 愛....傢嘛.... 廿年前!?」

「依家寶貝豬身長廿尺,體重兩噸半,每次沖涼一舊 LUX 剛剛好曬!用 Dove?痴線!食蕉~」

就響聖誕日,阿春就上左天堂。

28 comments:

亦 said...

插!第一!
哈哈哈哈

一開始睇心唸:頂咁Q長架
快Lap:咦?乜咁多朋友係度呀,好似幾過癮咁喎
下次先留心內容

>寶貝豬
哈哈哈

佚名 said...

wa~ c.m.好熱鬧下,最尾阿春一死以謝天下啊!

xiao zhu said...

>>每次沖涼一"舊" LUX 剛剛好曬!

咁點解要兩擔LUX咁多呀?

南區肥龍 said...

「求求你啦肥龍大哥,我唔想咁早死呀... 嗚嗚嗚... 哎也...」

哈哈,我唔心急,慢慢黎啦...桀桀桀...

xiao zhu said...

點解咁都有得上天堂嘅?

C.M. said...

亦:
頂,鬼知咩,寫寫下,就咁咯。

小佚:
好聰明播,竟然睇得出個原因!

小珠:
哦,你唔明咩?若果寶貝豬突然開大,噴到成身都係,兩擔都掹掹緊呀。

龍兄:
嗚嗚嗚...溫柔d丫唔該...

小珠:
呢亭咪係神跡囉。

xiao zhu said...

>>若果寶貝豬突然開大,噴到成身都係,兩擔都掹掹緊呀。

開大會噴到成身都係嘅咩? 肚瀉至會咁架噃。

xiao zhu said...

我知,你會話肚瀉都係開大嘅一種吖嘛。

C.M. said...

嘿,我幾乎想講架勒(聰明得你丫)

不過我查實想話,大蛇all尿就好多人見過,但冇幾個見過小豬all 史囉。

xiao zhu said...

>>大蛇all尿就好多人見過,但冇幾個見過小豬all 史囉。

大蛇 all 尿我都未見過喎!我估小豬 all 史應該冇大蛇 all 尿咁可觀囉。嗱,教埋你喇,噴到成身都係果啲就叫做 All Nancy 嘞!

七十樓危危下望 said...

唔製呀
我d戲份咁少!

xiao zhu said...

70:

你仲話戲份少!有咁多句台詞!我呀,根本都冇得出場呀!嘿!

Samsara said...

CM哥哥:我本來想提提你,掟鞋先係信女既絶招...但係,今朝睇新聞,掟鞋果位記者,應該會被處死,佢真係會做烈士。

信女以後都唔會掟鞋。

Karen (Sze) said...

嘩! 原來我咁早出場喎!

話時話, 我寸人的口吻有少少似!

>>鬼叫你上次出黎食飯串我牙。

無錯, 衣個故事教訓您唔係係人都寸得!

C.M. said...

小珠:
冇咁可觀?唔係嘛,不如你形容下喇。(我估就算唔可觀,都肯定好壯觀。)

姐姐:
果日越寫越興奮,一路驚收唔到掣,萬一弄假成真就弊。

小珠:
原本想加多幾個同埋俾多少少戲份架,但導演話畢值問題,所以就咁煞科算喎

香妹:
雖然我未知何謂外交,但我覺得若果唔特赦,美國響伊拉克就永遠都翻唔到身。

Karen:
哈,又中喎,犀利。呢個係其中一個比我既教訓勒。

xiao zhu said...

>>原本想加多幾個同埋俾多少少戲份架,但導演話畢值問題,所以就咁煞科算喎

嘿,你俾個咁嘅解釋我,仲唔尊重過唔俾戲份我囉!算嘞!

C.M. said...

係我老實遮。

不過,又咁,個導演話已經有老細肯注資,新年左右應該有新戲喎,依家準備audition。

海火火女 said...

好熱鬧呀......(仲好驚嚇?!)

各位, 新年快樂!

dog o said...

施庵春...

仲以為大佬你要講你位舊同窗添.

Marshmallow said...

嘩嘩嘩!呢個唔只係交叉扑,簡直就係周圍扑,亂咁扑!信唔信我高棉棉扑濕你...

安諾勿斯 said...

Keroro好重戲份呀!!

不過,真係唔知你o翕乜…

C.M. said...

火女:
祝你新年快樂身體健康!

昂婆:
舊同窗就冇... 舊相好就...

Khmer Cotton:
我估條庵春既下場,應該好慘。

Keroro:
冇奶油,睇真d先喇。

佚名 said...

c.m:
阿春唔死,可能仲有排玩,佢見咁黑仔都係死早d好d

HollyCow said...

CM:你好得呵!去Hollywood寫劇本吧!
剛從Orlando回來,就上離探你。
位位兄弟姊妹新年顺利,快樂快樂再快樂!

p.e.t.e.r. said...

最近越來越忙
可能會少d上黎玩嚕…
anyway 新年快樂!

^_^

C.M. said...

小佚:
哈哈,死得合時真係好緊要!

Holly:
What a "seasoned" greeting! 祝你開心開心又開心!(若果有日我去完Orlando呢,一定即刻黎探你!)

p.e.t.e.r.:
真係LTNS。希望來年有緣相聚! ^_*

祝你新年快樂!

HollyCow said...

好!兄弟,我等!

C.M. said...

好姊妹!