Friday, September 11, 2009

明珠台說 VAK

由細到大都好鍾意睇明珠台。曾幾何時明珠台晚晚都有好戲,所以就算翡翠台有咩猛人坐鎮(對我黎講都無邊個演員叫猛人),一到九點半,就轉去明珠930。Errr.... 中肯d講,似乎係果史好睇既劇集一到九點半就收工,所以先轉到台。真係好似家陣搞到十點半咩。

唔知係我遲定係我一直游緊魂,我都係兩個月前先知道原來明珠台黃金時段,甚至橫跨果段小朋友應該上牀瞓覺既時段,一星期五晚播映唔同既外國劇集。咁多套之中,我最鍾意既梗係 The Mentalist 啦,就算遲d瞓就遲d瞓。琴晚睇 Reaper 就睇到笑爆嘴(剩低兩個細既響度發呆);呢排 Sarah Conner Chronicles 就真係悶死(上集Sarah 發幾多個噩夢,我果晚就發番咁多個,頂);Castle 唔錯,但相比 The Mentalist 遜色(唔明點解查案片都要有人死先講到故仔,好似金田一咁次次都係玩死人橋段?);啱啱果集 24 就令我差生久違既張力,雖然諗番應該算碎料遮,但我就超回味呢種興奮緊張,兩添人爆門入屋救人質果種都覺得刺激,真係唔認老都唔得;Las Vegas 同 Hotel Babylon 都差唔多既,但唔會有心癮;Heroes 同 Ugly Betty呢.... 得閑都會睇既,阿女要沖涼既話就隨時都行得開;House 同 Monk呢,太夜,線把喇。

講咁耐,離曬題,查實我想講 The Mentalist 啱啱果集

為免變左 spoiler,內容就唔講勒,我淨係想話,今集最尾比人踢爆果個哥哥仔所用既招數,我用左好(很/Q/L)多年勒。唉,呢集早應該搵我做主角啦,想問,有冇人都用過?

查實我又想講 VAK喎。A 係我三環裏面相對最弱果環。我太依賴 V 同 K 勒,所以萬一有老闆叫我好似黑人咁做 dictation,我就真係隨時死比你睇。曾經諗過去提升番 A 既能力,但硬係唔夠動力同決心。A 完之後唔洗 0.1秒就消化左,然後用我消化左果套去做野,就咁睇落好似無咩唔妥,但好多時老闆要我做傳聲筒 relay 某d message,我就企左響庶。咁當然,都會用其他 behavioral measures去彌補既,例如 take notes 啦,black and white啦... 又或者採取「三得」策略:老闆,得得得,我知道咩事,等我搞得勒,搞掂左話聲你知。

我覺得 The Mentalist 好睇,除左係工作關係(查實胡扯)之外,就梗係睇下自己估劇情既能力去到邊喇。都唔明點解鍾意同自己玩呢種 solitaire,尤其是係要同時間睇住兩個塞豆窿,估劇情遊戲周不時要中斷(但又唔可以save game喎),有時會搞到好唔自在。或者,螺黎凡,同老人斑應該係互為因果既,搵日要研一研究先。

啊,都話想講 A 咯。拿,我會好吹水咁睇,阿主角 Patrick Jane 既能力,暫時最少出場既一環就係 A。或者係劇情需要啦,例牌要好多 V 同莫名其妙既 K 先至可以令觀眾入迷,始終,家陣睇電視既佔大多數,而唔係聽電視。又可能係,次次主角用 A既時候,我都察覺唔到,唉,我都知,耳仔有屎仲未撩,失敗之中既失敗。

一個出色既 Mentalist 應該係 VAK 皆能既,如果唔係,又點可以神神秘秘咁 influence 到對方既 VAK 呢?之但係,點先可以做到呢?

(奇怪.... 點解無啦啦會諗起阿鶴,CK 同渣老邪既?)

6 comments:

火鶴 said...

> 奇怪.... 點解無啦啦會諗起阿鶴....

我同你一樣, 都係聽覺有問題嘛..
下次返嚟又上深圳撩吓耳先..

p.e.t.e.r. said...

明珠台幾年前開始除左最賣座果一兩套之外(heroes, etc),其它果D都唔係最好睇果批(可能唔夠錢買掛)。

以前930就播親都係大片/經典。依家播親果D一早睇到爛晒。

BTW如果你有機頂盒錄鬼左佢咪的囉

Morca said...

我都喜歡睇心計.

C.M. said...

老鶴:

係架,個感覺似曾相識,真係諗起你架。(可能我好快將你代入左 V,私企就代入A,而老邪就代入左K... 卦)

p.e.t.e.r.:

咁又係。(我真係背,雖然知道Heroes呀,24呀,做完好耐,但之前我幾乎一集都未得閑睇過。)唉,邊有咁多閑情/心買機頂盒,仲可以得閑播番出黎睇呀,陰功。屋企日日ER呀... 。

Morca:

呵呵呵!節奏快兼集集清,我都鍾意。

Anonymous said...

C.M. You obviously good at playing guessing games. If there is some guessing/detective competitions, I must team up with you! ^^

C.M. said...

Anon:

Why's that?