唔食翅，鯊魚會死少d？
如果呢條係辯題，究竟有幾多人會話「唔係」呢？
前排，有人講左一番咁既說話...
香港人高叫唔食魚翅，咁d鯊魚係咪真係會死小d？
短期既答案：唔係
因為產業鏈既關係，理論上少左人食翅，d 翅會平左，咁響南美呀之類出緊海用殘忍方法（即只係切左佢地d 鰭，然後掉番落海由得佢地典典下餓死）殺緊鯊魚既窮漁民們，唯有再努力d，殺多兩條鯊魚，先可以維持番佢地之前一樣咁既生計
有冇可能會因為香港人嗌下口號，就真係會所有人都唔食鯊魚？而除非你可以做得到真係令所有人都唔食（但現實上係冇可能），否則個問題係冇解決到。
又，再諗番轉頭既，其實好多人反對既唔係「食鯊魚」，而係頭先講既捕臘方法──咁反而係咪諗下用咩方法去幫啲漁民改善佢地生活先，再搵方法規管捉鯊魚既方法... 我都明白以上講既亦都係紙上談兵... 但就算揾唔到solution，都起碼要諗到咁既層面，而唔係一味覺得嗌口號就可以救到鯊魚... 或更甚咁，一見其他人食鯊魚，就指住人去鬧...
因為咁樣，對件事（即係救鯊魚）根本無幫助，甚至，會好心做壞事。
.... （好似）而家藍鯨吞拿魚就泥絕種啦，按道理d 漁民夠冇理由要再大量捉，令自己第二時冇魚捉啦！但而家個現實就係因為d 藍鯨吞拿越少，所以d人反而越努力去捉，連dBB魚都唔放過。
唔好忘記，人永遠係短視既。短期頂得到而又方便既solution永遠都係最受歡迎... 哪怕長期其實係有害...
飲鴆止渴自古已有
丫well，講完，梗係比人圍喇（拿，邊個覺得抵死，就出黎隻楸！）。
若果唔想人地食魚翅，大部分原因係可能係純粹覺得殘忍，切曬d 魚鰭就掉左一條仲痛緊又血淋淋兼且唔會對人構成威脅既生物落海。又有部分原因，係覺得（過分捕獵）「無謂」、「浪費（生命）」、「打亂生態」（此三點總和統稱叫「環保」）。
查實，採鑽石呢？
邏輯呢家野好蝦人，你話丫，「1+1=2」呢個叫邏輯，「增加貨幣供應會導致通漲」呢個又叫邏輯，「一隻蝴蝶響南美比隻麻雀追瘦可以增加澳洲人性行為帶黎既歡愉」呢個都叫邏輯喎。
而咁arm 我記起一年前講左番咁既說話，就證實左比自己聽，縱使受過教育，都一樣可以好唔理性。
呢，講返香港呢度丫，膠袋稅唔通真係可以減少塑膠產量咩？（我諗講完呢句，加上一日一鋪屎，應該唔會比人圍，卦）
44 comments:
If I save $100 into the bank everyday, will I have 1,000,000?
短期既答案：唔係
微觀利益影響宏觀利益, 再影響返微觀利益,
我想到那些想要搞挎樓市, 以為就可以買到樓的人
現在多了很多環保袋，一個用料等於八個普通膠袋。但很多環保袋的大小都很不宜重用。
好! 今晚唔該出黎隻楸! 不過唔關大佬你UP咩事。
（不過唔夠你打，都係算啦！）
膠袋稅膠到無倫！
政府剩係識講話超市膠袋派少咗9成，但又唔話啲垃圾袋銷量上升咗幾多。
每個屋企都至少存咗＋幾廿個環保袋，總有食物、日用品大量增加的有手挽的預先包裝膠袋，還有濕貨套多咗幾層的透明膠袋...
李純恩話加下香港有兩個婊子唔舉得1)民主2)環保
今日曾淵滄話一講反對最低工資就會俾人圍所以唔會講...
香港地的雞蛋正在將蛋漿融入高牆內，好到极！以後只(能夠)講風花與雪月。
蝦如果政府包底所有六十歲供養咁限制埋外勞南亞勞力低下人力市場馬上出現缺口到時無人掃地洗碗倒垃圾就唔屎最低工資啦福利社會體驗資本主義既共生魚翅同吞拿俺都小食同讚成停食正如蟲草同髮菜除非學下威而明令禁止市場力量到絕種果日都未必有效。
>> d 翅會平左，… 殺緊鯊魚既窮漁民們，唯有再努力d，殺多兩條鯊魚 >>
CM，逆向經濟理論乎？老闆必開心死了。只要將工人時薪減低，佢只會加班工作，而唔會考慮跳槽，亦即漁民只會繼續捕鯊，唔會去捉其他魚改善生計。
John:
XD 你好搞笑。（但你啱！）
Icarus：
嗄，一段精簡經濟論述。多謝。
Kenka：
上星期有冇睇亞視《時事追擊》？講推出膠袋稅前後膠袋用量/產量，膠袋稅對於減少塑膠生產真係廢既。家陣環保袋我一屋都係，學校又派、乜乜又派，好似送禮咁。
昂呀昂，
我最近收左份大禮，搵日post俾你睇。正到無倫。又，搵日丫，之但我真係得番半條人命，慘不忍睹。（嘿，我一定唔同你隻楸，我知你一定讓我既。）
冰冰：
同悲同悲呀。d人好似當環保袋係禮物/贈品咁送... 不過諗諗下，如果唔送環保袋，好似以前咁送好難寫既原子筆，一樣係送la ji。
最低工資呢，我就無話可說勒，講原則，三年前咩都講曬咯，依家講水平、講豁免、講經濟影響，咁專業，唔識講咯。
晶晶：
＞＞除非學下威而明令禁止市場力量。
我蠢，我市井，所以暫時淨係曉得呢種方法。但禁食，唔禁獵，查實又得唔得呢？我寫/抄呢篇之前，其實我係有個現實做對比既：象牙
CM兄，其實可唔可以唔好咁短視呢？
萬事起頭難，環境保育工作非朝夕可完，個個都唔開始停止食翅，最尾咪一鑊熟(只限人類)。
雖然，人類絕種都係個拯救地球o既好方法...
另，膠袋稅只係苛捐雜稅，長遠立法搞回收先係路。又，要係香港成功搞回收，除非搞港獨......
波老闆：
嘩乜原來有種逆向經濟論？講多d講多d！
又，用番Ceteris paribus，查實兩個case可以好似。睇下以前香港紡織業工人，由人工高產量少，到依家人工低都要死做（如果無公共房屋就大鑊），加班唔計較、減人工無辦法。
原因係，佢地睇到「環境」不可逆轉。
如果家陣平常老闆話減人工加工時，呢個「環境」可以逆轉。要製造一個不可逆轉既環境，呢個推動力量要好強好強。
諗返象牙呢個case，我會諗點樣可以製造呢個「不可逆轉既環境」呢？
1. 創造代用品
2. 提升awareness
3. 禁獵
4. 禁貿易
嘩，真係可以有好多野講。
詩詩：
咁快睇到短視？嗯，邊一方面短視呢？係呢個辯題所引申既應對方法，定係講「我」？
哈哈，都無所謂，唔洗咁客氣。
如果focus響題目，就知道問呢條問題既人，唔係冷血，亦唔係視而不見（查實，呢個問題，唔係我發起既）。都知道萬事起頭難，不過，呢個題目係希望我地「面對現實」。
面對現實唔係乜都唔做，或者否定家陣做既野，而係希望有人「考慮到可能後果之後」，「願意承擔後果」，而唔係一廂情願認為自己做既野對得住天X良Y。
咁睇，你會唔會認為個題目係譴責？或者係借題發揮？
我想話，一件事既後果最終係點，我真係唔知，鯊魚係因邊個而死，亦相信永遠無法得知。我淨係知，我地依家做緊單方面既野，遠遠救唔到鯊魚，或者令佢地少d痛苦。
我既個人感知係，到左海洋保育呢個層面，係需要professional knowledge, concerted action & statutory regulations. 三缺一，都可以加速鯊魚既滅絕。（好希望我只係聳人聽聞）
「」
//殺緊鯊魚既窮漁民們，唯有再努力d
叫人唔食魚翅，短期唔一定有幫助．要令有足夠嘅人轉行係難，但係都要有第一步，有人注意先囉．
如果講環保，scarlet就同我地幾兄弟姊妹講過呢番說話：「最環保就係殺曬你地」
詩詩，好多人，包括你，我覺得，係唔相信人既"awareness"係「要」培育既。亦因為咁，會有人覺得世上有好人壞人，會覺得世上有聰明人蠢人，好人憎壞人，而聰明人又憎蠢人。
有機會，不如你試下講下自己對於ecology, evolution既睇法。生物世界，唔係一個physical既世界，而係一個循環不息既世界。一鑊熟呢個論調，你又點睇呢？
Eric+Zeabor:
其實你地講得好啱架，而我亦無否定救鯊魚人既努力。
不過。
係，不過，有冇睇亞視套《篤姬》？剛剛果集講勝大人（勝麟太郎）話（大概）：「要證明比日本人攘夷係唔成功既話，被英國打敗就係一次好機會。」
象牙又好，咩保育（尤其海洋保育）都好，如果要升上regulatory層面兼全世界concerted action，必須要有好大「逼切性」，以及awareness，以至引起全球關注。
呢樣（世界性），香港雖然算係做得唔錯，但遠遠做唔夠，因為鮮有主動接觸世界另一邊既人（漁民），理解下如果唔靠獵鯊，可以點生活（並維持如今生活水平）。
睇日本，獵鯨獵海豚可以不理外間，就知道海洋保育所要求既concerted action 係幾高層次。
而且，當一個需求首次被創造，並被激發之後，就已經難以收回。所以當有人問左一個問題，希望環保人士去正視，若只顧繼續埋首現有的action，忽略配套，失望可期。
而我，樂觀睇，鯊魚唔會滅絕；悲觀睇，佢最終人口只會係如今既百分之五。而呢個悲觀結論，亦已經計算埋保育人士既最大努力，否則，可能只係剩低百分之一以下。
「」
查實呢，雖則我好怕比人圍...
但如果你地知道有咩facebook 保護鯊魚群組，不妨比呢條link佢。
我梗係希望我廢up啦，但更希望，會有人認真考慮呢個辯題，係咪真係一個值得考慮既題目，囉。
CM兄，小詩所指o既短視，係指大家太現實了，看不到將來。
我無計劃圍任何人的，只不過討論一下提出質疑。
提出呢個問題的人，明顯地係引人墮入將「絕對」同「相對」混淆o既狀態。任何方法都會有瑕疵，假如你提得出更好o既方法，有志者當然樂於採納。但假如淨係如提問者咁胡混視線，咁一定無進展，我唔排除提問者係有固定取態，例如係海味商。
解唔解決到個問題係視乎大家o既取向，假如我地面對現實，而唔係選擇被金錢蒙蔽自己，我捻人類仲有得救o既，但而家o既一代永遠無為下一代人著想o既勇氣同高瞻遠矚o既眼光。以香港為例，從普選教育到經濟政策都睇得出呢一代o既短視。又，其實留一點愛心俾下一代，真係咁困難？
--------------------------------
Ecology我認為係生物科學裡面o既社會學。生物間有唔同階層有唔同關係有唔同社會功能，你愈了解佢除左會發現生命間循環不息，仲會發現物種之間環環相扣o既關係，即係電視劇o既對白「我死左你都唔會有好日子過」。
你讀過ecology的話，應該知道咩叫Keystone Species。Habitat食物鏈上面
最頂果個species一定係predator，而且呢隻又一定係Keystone Species。佢o既Biomass一跌，咪天下太亂囉。鯊魚點計都係海洋o既Keystone Species吧。
至於Evolution，我會形容為「典形香港人形態」，為左搵食保命繼後香燈出盡板斧改變自己適應環境變化，但變身係需要時間，而且並不能短時間內有大體physical上o既改變。
我個人最喜歡用的例子就係病毒同細菌，佢地每廿分鐘又會有新血出世。你捻下你o既一日就等於佢o既七十二世。假如你係細菌，俾抗生素恰左對上七十二世你都唔曉變種適應頂住呢班滅門仇人，咁就抵你X家富貴啦，係咪？
套用番係鯊魚，佢一生有三十歲命，再咁殺落去，你認為佢果一個class上下有機會等到變種曉自動生番對鰭出來o既一日咩？就算有咁多時間，你認為又有咁樣o既演化咩？
------------------------------
點樣去令捕鯊o既漁民轉行？菲律賓o既辦法係教佢地搞觀光船，同埋參加科研。萬事都有轉機的，但點控制自己o既慾望，就要靠大家了。
其實大家都係憑直覺「覺得」然後搵邏輯。所以都係，有排講。
不過長遠咁睇，都係由唔食開始架啦。唔通又要逆向理論，我地食多反而會令魚翅價格貴咗？而漁民就可以捉少啲鯊魚？
有時我地係咪乜都要逆向，先至會搵倒真理？我覺得似走火入魔多啲。
都係嗰幾句，(但我忍唔住又要講喎)。短期黎講, 漁民係有機會捉多咗鯊魚。但唔好唔記得，係太多供應，即存貣上升，先導至價格下降。而漁民因為價格下降而而捕捉多咗鯊魚既行為，只係短暫，因為存貣會繼續上升，而最終價格下降到無論佢地捉幾多條都無以為生計，就會停落黎。
你可以話，當價格下降，會引發大陸或其他知識水平較低或其他較窮既人變得魚翅 affordable, 繼而食多魚翅，即增加返個需求。咁講亦自打嘴巴啦。既然若你 assume 到大陸個市場咁大，需求 significantly 增加返，咁價格自會上升，咁漁民又無需要捕捉多兩條鯊魚，咁 worse case 咪去返香港人唔食魚翅既水平囉。咁起碼，大陸人食多咗魚翅，希望終有一日，會食到厭, 會好似香港人咁唔食囉。
始終都係個句，想大家都唔食魚翅，就梗係由慢慢越黎越少人食咁開始架啦。好難一 Q 過全世界突然唔食魚翅架喎。欲促則不達呀。(shit, 我變咗曾特手？)
大家記住唔好食魚翅，起錨喇﹗﹗
詩詩：
真好真好。對於人，通常對於兩種事我會特別開心，一，有人提點我，二、令我對人改觀。而你，兩者有之。可喜可喜。
這樣說吧，如果不來否定邪惡動機，也不先否定短視，你會看這個疑問，會否成真？
我看的，不單是一個結果會否成真，而是面對外間質疑的時候所抱持的態度。近日我遇到一些情況，支持者面對反對者質疑的時候，是不斷以論據支持自己的行動，還是確切反思自己的行動有否缺失？
前面幾篇，甚至早年的Angel's advocate和Devil's advocate，其實也在重覆這個小道理。說服自己現有的行動如何正確容易，還是找出自己缺失容易？我在尋學人。
而我不是嘗試給你答案。
**********
至於我問ecology以及evolution，主要是讓我明瞭你我之間在看生物互動關係的異同。相異者，我相對比你“不可知性” （uncertain），相同者，皆覺得世人有責。
而最後菲律賓的情況，正是我所樂見的。只是海洋，就像公共空間。管理公共空間，而底線是人的話，將來應該是如何？
阿鎚：
我唔想學人抽水同你一齊講起錨，大聲話唔食魚翅。但我亦會鼓勵唔食魚翅，主要因為覺得浪費。
既然你覺得結果無野好講，亦唔值得考慮同討論，咁我最多收聲。
查實我亦唔想講推論，因為我唔知唔識亦唔係好肯定咁推論，我最想係，可以從中得出更好既辦法（你見我十次有九次都係嘗試derive better solutions, 你唔覺得咩？）。
應對暴發戶食翅當漱口既風氣，我覺得唔係採用香港人呢套就得，如果result-oriented，應該採用「標籤」（即係出術，有時都幾唔道德）；應對老人家就用懷柔兼愛心；應對漁民又要用其他方法，給予代用品，甚至規管。
如果單係鬧、指責就可以解決問題，咁打仗就夠。而辯題既反方，即係話「唔係」果個，目的亦好明顯唔係講結果係咪會如願，而係講，要避免真係如願，做既野，就要更深入。（係咪先～）
而我，或者亦係借題發揮講政治都唔定。
（理得佢順向逆向，「謙虛既可承地土」，算順向定逆向？）
又，海洋裏大生物既存量，恢復速度好低。而時間，唔係企響大生物呢邊。
越講越口痕，我想打比喻添。哈哈，係，根據逆向思維既理論，我想打比喻去將個問題簡單化去表達，結果只係會將個問題複雜化。好勁。逆向思維响一班走火入魔既人裏面，幾乎可以講係無敵﹗
我個比喻係，想減肥，最簡單既做法，係節食同做運動。
然之後，會有人出黎講，做運動冇用架，運動後會令你食更加多既野，而節食後，你會成日都肚餓，結果只會增加你既欲望，而食更加多既野。
然之後，就係有班走火入魔既人會話，係喎﹗減肥邊會表面睇得咁簡單吖﹗
然後就會去搵營飬師整營飬餐，搵私人教練去咩咩隔日做帶氧運動，每星期有兩日做舉重。總之就係「越複雜就越正確」。
結果，當然係減唔倒啦。營飬師會話，你梗係唔跟足餐單，食咗其他野啦？私人教練又會話，你梗係成日都唔出現，都做唔足，點減？
點減？其實好簡單。只需要少少意志力，keep 住做運動同節食囉。
嚧，好明顯我係黎踩場。得個十幾個人回應，點算係俾人「圍」？
哦，簡單複雜化就係逆向思維，咁肯定近喇我，周不時都簡單複雜化架啦。
之但逆向思維既極致，係咪應該用Atkinson果套，定係齋食脂肪肥肉可以減肥呀...
又，可能係我冷處理成功，所以無人黎圍我卦。
又又，我開始感受到呢個辯論既氣氛有幾精彩。哈哈哈哈。
呃，衰左添，唔係Atkinson，係Atkins，即所謂Atkins diet
係，應該係勁食脂肪肥肉可以減肥。要連續日日食，每日四餐怎至五餐脂肪肥肉。呢套療程應該唔駛一個星期已經開始生效，會開始出現吐疴、嘔吐、食欲不掁等症狀。可能仲好快死添。
鎚, 勁食脂肪肥肉都還好, 無咁快死住. 但如果一話食魚翅, 即死添啦.
鎚兄，Atkins Diet係傷身的，但唔會咁快死人。係安全至上o既科學文化下，通常「副作用」都係少數人有。你有，只能自嘆「好彩」。
講番Atkins Diet，人係有三條route去製造能量原料(pyuvate)，先後次序係單糖、蛋白質拆出來o既amino acid同埋脂肪酸。
Atkins Diet只係強迫身體轉用amino acid同脂肪酸造能量原料，降解o既物質會變尿酸，你肝腎負擔因此會高左好多的。食得耐Atkins Diet，可能會器官衰竭的。
-------------------
奇怪講左咁耐點解無人提魚翅水銀超標呢件事.........
詩﹕其實煲多幾次「魚翅水銀超標」既新聞，效果會大過講人道。 XD
鎚鎚：
減肥於我，絕對係一件視死如歸既大事！
鶴鶴：
火鶴本色。（係赤紅既。）
詩詩：
有疑問。查實 metabolism 個優先次序係咪調轉左，係咪應該依次carbohydrates/mono-saccharides 然後到fatty acids，最後先到amino acids 呢？中學Bio果史好似咁教喎，大學biochem有冇證實呢點就唔記得咯。
魚翅水銀超標呢件事！？未聽過，真有此事？
又，見方潤在此，特推介方潤點睇ecology（較少） 同埋evolution（較多）。
方方：
甚是甚是。
（嘿，肯定會嚇親scarlet，然後佢就會勒令一干人等禁食魚翅。）
我貼了在三個fb群組，但兩個被鏟，一個沒有人理會。
哎吔，真係唔該曬，之但又要鎖你先。
我擔心會唔會有人當你踩場呢？或者會對你...另眼相看呢？
非Kenka之醉也。
CM兄，小詩o既biochem只有大一程度...(講起metabolism，佢果張「地鐵全圖」真係大到「丟那媽」~)
anyway, polysaccharides放到入口都有消化道的amylase拆到變單糖，肝的glycogen存貨都要變番做glucose才整到pyuvate吧。
另，點解係AA(amino acid)先而唔係FA(fatty acid)先呢？呢個就係我o既錯了!唔好意思，我無提係食物被吸收後o既即時使用o既先後次序....你講o既係存貨使用優先次序。
因為拆FA變pyuvate功夫係幾花時間，而AA就可以變得快D。而且AA唔會存過夜，唔用都會變urea掉落尿尿，咁o既情況下真係老X都用AA先啦。
水銀超標的新聞，小詩睇到都唔敢話俾hana姐姐聽，我驚再講多D事實會俾佢鬧~XD
URL:http://orientaldaily.on.cc/archive/20080509/new/new_a61cnt.html
咦？唔通你同我同過班？唔好提metabolism，個地鐵全圖殺曬我班lower quartile 生，唔好講，淨係glycolysis果part都已經夠取我老命。又，多謝你提醒我AA先過FA喎。咁我記得勒，唔該曬。
唉，果史雖然我first choice係bio，但睇成績+興趣，都唔係first choice. 自作孽也。
我都係鍾意environmental多過biochem好多。
水銀超標單野原來咁耐拿，難怪我唔知喇，瘟女瘟仔瘟到癲左。
小詩後生過CM兄好多的，今年先畢業，唔會有機會同班卦~(笑~)你應該未聽過班MBBS人過黎讀Biochem收晒成堆biological science人皮吧。
Btw，小詩係environment的人(邊間大學就唔好估了，你肯定估唔到)，而家頭痕搵工中。(愁~)
o_O|| （蠢!又自作孽多次添。）
不過又，雖然我鍾意environmental, 但最後走左入mic-bi。傻架我。
唔洗愁，你有青春，夠頂有餘。
micbio好啊，有機會做專才移民外國，而家搞生物能源好多水fund啊，搞得成又財源滾滾。唔o岩安安定定做食品廠，生力啤又返黎搞，養下酵母驗下野又一日。
你睇而家紫金出左事，又係micbio人發國難財o既好時機了!我地environment人就算有機會，都係冒生命危險入去搵命搏又睇又度，然後收人錢幫人地掩飾部分事實吧!
最弊我係lowest quartile果批呢，響香港搵份工都難呀。做專才移民真係發夢至可以咯。（又，果史一舊飯，咩野叫專才完全木宰羊）
而且果史個demand好細，生活悲苦...四面楚歌...（聽到小提琴聲嘛？）
紫金出事真係有排都未輪到micby人喇，environmental人都可以食到頭啖湯，整色整水。micby最多係搞掂曬之後，以圍權人士身份深入險地就得，搵錢應該無機咯。
Wo! You got flamed!
As long as I am not incinerated, it's still nice~
好耐唔見, 呢個post係第43個喎!
講起膠袋稅實行之後, 我發現:
1. 無丫丫多了叫做環保(但一點也不環保)的不織布袋(仲成20幾個呀);
2. 手袋必帶1個大布袋/尼龍袋;
3. 屋企多了平口袋用。
我家的手抽袋, 其實係變成垃圾袋, 但好快無貨, 睇o黎要買垃圾袋。
>>膠袋稅唔通真係可以減少塑膠產量咩？
我唔認同囉! 大把o野由塑膠做, 加上襟用, 咁易被replace咩!
Karen:
乜你有廿幾個不織布袋咁多呀！我就用多左垃圾袋（屋苑俾），感覺上計用量（重量），同以前差唔多，不過個好處係少左累積手抽袋。咁計，膠袋稅最大個好處係可以令人讓成習慣，提高自覺，用少d膠袋。
Post a Comment