人性共管
（呢篇主要吹水，順便抽水。）
我所講既「共管」，即co-managing，例如兩個team leaders 同時管理一條team。團隊共管，亦可以叫 shared leadership，一山藏二虎也。
共管有幾個形式：
(1) 兩個阿頭有完全相同既職權+功能+責任，只係執行管理既時間不一樣，例如管唔同shifts，或者比較高級既阿頭飛左，由佢第二把交椅署理事務。
(2) 兩個阿頭職權 and/or 功能 and/or 責任都唔一樣，亦同時管理同一個團隊。例如某HR Manager睇曬成個team，另主打manpower planning，而又有個AM主力睇住C&B，但隨時要 support MP team。
(3) 兩個阿頭有完全相同既職權+功能+責任，同時管理同一個團隊。
以上形式純粹以幾個簡單criteria黎分類，讓彼等對共管有個初步印象。出黎做過下野既，都可能試過同時比兩個阿頭指點 + 指指點點。基本上，大部分經歷過比兩個阿頭共管既同仁，大致上都係同樣既感覺：折磨。
入正題，我剛剛上左神枱，同以前阿頭共管一個小team。
響紙扎工廠做踏入第 n 年，頭一年做人 in-tray，成枱都係野。第二年開始，(1)， 跟住 (2)，到家陣 (3)。
成個過程由零開始，到最後 share 一 team人，唔係自己醒，而係我前阿頭不（夠）濟，加上幾個環境因素：幾個主力走左，個客又唔生性送鬼死好多野俾我地扎。我呢條粉皮能夠去到呢個階段，只係因為搭左一趟順風車遮。
我同前阿頭之間既恩恩怨怨其實一直存在，呢 part 唔講勒（雖則每次提起都想爆粗）。正如好多乜叉世代鴻溝，講出黎去self-prophesize，咪盞令自己更加唔曉得反省。我已經夠自大自我，唔想泥足深陷。（欸又，唔通我個預言咁快應驗左？）
中途抽下水，我會問，星期六日既然唔洗返工，咁要幫公司響非工作日 update facebook又算唔算返工？係，幾分鐘既事，咁你又唔做？係，因為你請我所以我要做，咁係咪見工果史已經同我講清楚我要星期六日做公司野？係，星期六日要哺住電腦前面，又無iphone 又無無限數據plan 又無輕觸式手寫，係要逼我響屋企某時段出勤，咁唔通我就唔算犧牲？最後一句，咁簡單幾分鐘野你又唔做？
呢位女上司個情況當然未必完全如我推算，但以上情況查實我想帶出，呢個正係我幾年黎既處境。
話說我地有個紙扎客，佢星期六日同公眾假期係要我地work at home 幾分鐘既（事實如此）。做左幾年，唔係覺得無野，而係既然得閑，咪做囉。但我作為一個好Q老既老鬼，最唔likey既係我前阿頭果種闊佬懶理既態度：delegate左俾你咪就係你既責任範圍囉。「如果賴野既話係你一個賴野咋，唔關我事呀。」你睇，我點會唔爆粗？之但，我爆粗唔係因為我星期六要犧牲，而係我犧牲既時候你完全無諗過 recognize 我既犧牲。如果我推算既情況無錯，果位女上司口中既八X後o靚仔既犧牲，我完全理解，呢亭上司既然睇唔到下屬既犧牲，淨係睇表面，究竟從佢身上學到咩，我呢個旁人真係好存疑。（一人離職影響運作，邊個責任大？唔通係個細咩！？）
而我，經歷過(1),(2)兩個階段，開始有自己既下屬，呢個「下屬」既意思唔係響 org chart 入面你個box下面連條線呢種，而係能夠響受formal authority 壓制既情況去運用你既影響力，去「產生」一個「垂直」工作關係。如果要好基本咁 recognize 下屬響假日既犧牲，簡單如一句「呢兩日同我 update 左 facebook，唔該曬」或者「我聽到你琴日好似去左街，我已經同你update左fb 勒」。Empower之餘不忘自己個accountability同role。咪自然有人明白上司下屬一樣會為叉錯負責。引文果位8X後令我覺得，「犧牲」只係表面原因，上司既不負責任同不體恤，先至係佢講唔出口果部分。
都係果句，我唔鍾意世代話題。之但正如我最開頭上面講果三個contingencies，其實同我唔鍾意既野好有異曲同工之妙。（我認我成日自打嘴巴）同者，就係「分類」既方法。
講返共管。
共管，存在兩個管理人。目標清晰。8X後+老鬼。目標明確。如果有個situation好容易將目標分類成「兩個」，係，易於理解，易於討論，但亦易於誤解，易於發洩。前阿頭佢無優點咩？有格，但你叫我講佢優點？不如你俾我爆曬粗先喇。CK講老鬼時我第一個就諗起佢，咁就證明左：一，我一樣鍾意「二元化」，聽到正邪黑白即時勃起；二，我能人所不能，竟然醒覺到自己會有非性興奮式勃起。
無論管理人地定係管理自己，「自覺」真係好緊要。
如果俾我再抽多少少水，我會以 co-management 角度去延伸理解+分析香港前路+為此前路追求答案，而非齋以 principal-agent 定位。最後有篇幾警惕同發人深省，但又要小心容易墮入一個非黑即白既誤區（即二元化地看人性），黎和應黑人果句：「... 一個proactive mindset，將解決問題的主動權帶回自己手上。」
咪以為俾兩個阿頭 managed 係折磨，co-managing 果兩個一樣持續互相折磨。所以話，唔好淨係掛住睇自己，試下企響人地角度睇下喇 ....... 仆guide。（家陣好想有人和應）
小 C.M. 今日假期孤獨地響辦公室書於 4:20 PM
16 comments:
你返工用泥打咁長篇嘢，佩服！
梗係，響屋企邊有機會講廢話呀，係咪先~
辛苦晒您啦! 公眾假期仲要返工兼寫咁長篇野。
亦因為係咁，我都寫o左篇野，cap埋您呢篇。
http://skaren-space.blogspot.com/2011/02/blog-post.html
我覺得每個階層都有共同的職場問題，只是把後生仔的問題放大了(在騏兄5月10日的文章您會見到我的見解)。
共管不易，當兩位管理人理念不一和在工作上有conflict，那些被管的同事同樣只會兩邊不是人(I am suffering)，當然我也會企佢地立場諗，不過佢地唔會企我的立場諗。
所以我對自己個team，兩個team leaders share我地兩個同事來用，到頭來搞到我同個同事做得辛苦兼兩頭唔到岸(尤其係呢兩個人同時間要本小姐即日完成兩件工作，仲要俾某人"崔"時，真係想鏟佢上天花板)。
問題係其他team唔會share同事，佢地話咁做係有synergy，但係我不覺得個productivity因此而高了----即使我曾經feedback過咁樣有問題(that's why I would like to quit my existing job)。
對於共管，我是有點保留的----或許我未明白其好處吧€。
Come here to say hi. Managing an organization is probably more complex than managing an individual; look at you, I feel better with myself. :)
做IT，有OT．我自願但唔好take it for granted囉
諗起以前見一份工，一年半合約月薪萬五蚊，不過開頭幾個月由三千開始，之後補返，因為佢教你野，唔想幾個月走人晒佢錢．Well，呢個都唔係問題，我最後好隨便問左一個問題：約滿有問bonus？個老細好坦白，無．
間野得一個office仔，ｄ”奴隸”全部去個client果度開工，去個client果度on the job training．
人真係可以幾盲目下，真係當你係”奴隸”，哈．
Karen:
抽人水之嘛，辛乜苦丫。（湊女仲辛苦！）
我睇左勒琴日，不過真係要得閑先講到野咯。呢個禮拜六日都要返工呀...
放大，縮小，上崗，下線，唉。我覺得不如俾d創意，發掘多d更值得研究既題目仲好啦。
如果要打破某d共管或者被共管既宿命，其實proactive d，出路都唔少既。比如我家陣咁，出路仲有好多d添，簡直人生充滿希望。Well，只係我鍾意一路充滿希望，一路將我既怒火燒盡身邊既雜草咁遮。
如果話：唉，你唔係我，你點知咁多丫。我明，我梗係明喇。之但你千祁唔好同我講：唉，總之無出路喇。
至於共管咩好處？有係有既，不過唔係共管ing果兩個，亦唔係being 共管ed果堆，而係管緊共管ing果個囉。
Anon-B:
嗚嗚烏，仲講風涼話... 如果我好似你咁professional，我就唔會搞到今日咁淒涼...
Eric:
願意lik咁既糧，自然有佢做“奴隸”既原因同好處既，家陣小弟咪一樣做緊屋企兩隻野既奴隸，係咪先－－
查實,那句可以倒轉用,藉來自我安慰。我知你唔會介意既 =)
最好回到五千年前,你做酋長,請我做個巫醫,有什麼人事問題時,我幫你燒紅隻龜背,占個卦,一切看甲骨裂紋,由上天決定不得異議,佳大歡喜。
呃，阿巫醫，不如你先同我診個症，睇我幾時瓜得？等陣我仲要返公司搏殺呀。
啊酋長,我們的都是彼此彼此。我現在都是在十面埋伏的環境下作戰。
如果成功過渡六月中,就到下一個戰場。那時都唔知地勢如何,唯有到時見步行步,回氣時來探下你。
仲有一個月就過六月中啦，撐住呀
Anon-B
過左六月中咯喎，OK曬啦下化
已進入下一個迷宮中,上次是能力的終極試練,今次是森林豺狼中求生存,再在九月中的三師會戰中過關。總壓力及兇險情度不下於六月,但因為戰場分散及隱閉,容易顧此失彼,過了九月才就是豺狼森林的下半個迷宮,集中對付各式各樣的動物,可輕鬆少少。
抱歉抱歉。忙到碌地。
你個情況咁兇險，我諗我draft定email問你九月戰況好勒。
嗯，不過見你六月已經化險為夷，三個月後應該否極泰來既。（嗯，此乃昨夜觀星所得，大吉）
謝謝你為我專登夜觀星象。
忙到碌地,任君發揮也是人生一樂。祝安康!
忙裏偷閒一樂也。
也祝你順利。
Post a Comment