Friday, June 10, 2011

睇相相人自相點相

前幾日迷迷糊糊(好似)見到厚黑老師。我一黎腳痛、頭痛、唔夠瞓、重感冒、手足口病疑雲纏身、做到死仲要頂硬上。。。總之九百幾樣濕滯濕熱焗住全套burqa,一個字記若:懞。

我知道佢響我公司附近返工,但幾年黎都無撞過佢。聽講佢成日飛,所以喎。今次見到佢查實唔係好肯定,外表嘛,幾年無見,感覺呢,聽唔到佢把聲確認。我都係十分鐘後返到公司個右腦先慢慢浮番佢出黎。第一個印象,就係佢相人好叻。

相人,大概就係去 profile 一個人。相人叻既,一兩眼就睇得出對方諗緊乜,下一步會做乜。我諗,唔少人都應該遇過相人叻、三言兩語睇穿曬你既人,亦probably係你親密朋友或者老細。

雖則好多人都覺得可怕,而坦白講我以前都對呢d人敬而遠之,大約因安全感不足是也,又或者因為妒忌佢相人叻過我,卦。

當年面對佢,我潛意識+下意識降低身份同能力,去換取自以為可以換取既「學習態度」,可惜事與願違不特止,更幾乎令自己終身沉淪。後話係,呢次沉淪令我更認識自己,呢種「得著」唔係任何經濟收益可比。厚黑老師佢正係呢方面既直接功臣。

家陣見番佢,諗番似乎覺得都有少少距離(話曬佢依家係某超大企高層喎),不過就無以前果種身份上既比較。(咪駁故先喇,總之有距離唔等同身份比較!)。。。唏,是但喇,有都理得佢丫。(蝦,玩陣Angry Birds唔記得想講乜添...)

... 啊係,講開相人又令我諗起當年走去大笪地比廿蚊阿叔「測字」。當年中六七同幾個唔記得響邊度識番黎響對面海返女校既朋友一齊玩測字,雖然廿蚊測個字幾貴,但又樂此不疲。

應該就係響過時揭開自願比人品評既序幕,自此人地對我說三道四評頭品足,我都略略可以用測字既態度面對。(嗯,除左果次、果次、仲有果次、同埋果次,好似仲有果幾次例外)即係比人睇相之時,亦同時學睇睇相佬個相,以其人之道還諸彼身也。

不過可惜丫,學藝未精,碰壁既多,洩氣既更多,邊度可以好似阿CK 咁成日有團火丫(講小咩,佢話團火細左都無人信啦)。好似我細個果屎都已經無乜火氣,家下燒極都唔旺... 恨鐵不成鋼?嘥Gei屎喇。

為左掩藏我心底既空虛,於是我就走去學人「自相」,呢,即係屙督尿照鏡果種。得出黎既結果,都係話IQ幾高、EQ有咩弱點、性格有咩特質、身高體重投資能力有幾燈之類。有冇準木宰羊喇,不過我硬係覺得,比人品評測字睇相甚至自相又好,比埋幾百蚊美金買份乜乜 full profile 都好,我始終都係唔係咁易改變自己對自己既睇法。

Well,後果可以係一世無發達既,不過既然我接受得到咁既結局(Errrr....),咁叫我去遷就以上咁多計算咁多分析咁多結論,去改變去改良我自己,我又覺得無需要囉。

不過,無論點,我覺得任何人點都要學下自相,就算最終收場如我一樣,乜都改變唔到,但我肯定有樣既我係成功既:就係氹到你睇到呢度,齊齊浪費下美好既光陰。(去瞓覺先)

4 comments:

p.e.t.e.r. said...

請自post全相

C.M. said...

整緊呀!忙呀!

(又,我其實未寫完,留返個jackpot俾人hit,誰知... back to 忙得要死的status)

Maddiamond said...

C.M.
我做了很久CD-ROM, 今次不留言不行.
小弟之前正是"去改變去改良我自己,我又覺得無需要囉。"
但最近被前女友叫去上體驗式課程,又會有些得著.
問下身邊有參加過的朋友, 會是難忘的體驗.

C.M. said...

歡迎來訪,Maddiamond!

不如你講下有咩得著丫。

又,好在你來訪,提醒我要的起心肝去寫埋下半part。