新年利利是是

（十分鳴謝江康泉！）

利是呢兩個字，雖然一年先會出現一次，但都係呢幾年先至比較容易接受「利是」呢個「概念」。

或者好多人都覺得利利是是非常尋常，而我果時之所以斤斤計較呢個概念，大概係同「錢」有關。講真（...嘿，提起「講真」呢句口頭禪，小黃蓉又會抽稱我之前果d係咪講假...），又講真，我細細個開始就唔鍾意講「錢」，到依家見得銀碼多先至慢慢接受得到，呢個可能係童年陰影，唔好問咩事同點解，因為我唔曉答。

我細個唔係嫌錢腥，不過只係唔鍾意銅臭。咁清高？當然！

記得幾年前有位歐洲客人，佢原來都知道中國人有個派利是既習俗，但佢就好唔鍾意呢個習俗，因為中間涉及「錢」。我冇問佢點解覺得同錢有關就有問題，不過我當時就同佢講：“From the view of how this tradition works, I would say it is just another form of marriage fund.” 果位歐洲客人聽到之後，就笑左一笑。（或者笑我無知。）

呢個結婚基金運作好簡單，由其他結左婚既人同你供款，替未婚者係結婚前進行儲蓄。當你結左婚後，就有筆錢比你搣。正面d睇，呢個基金反映能者多付原則，唔多唔少因為標簽效應 ~ 有能力先至會結婚，以「施比受更有福」既手段鼓勵人去結婚。但又負面d睇，時間越拖，舊錢就一路仲可以滾大，咁就越唔鼓勵結婚。想平衡「施」同「受」一d既話，以七十歲命計，受三十五年，然後施三十五年就差唔多勒。

係呢度我想同阿Da 講：

「記得施比受更有福，所以唔該你唔好受咁耐，廿零年就夠哂勒。」

我認識好多人其實都同我細個一樣，覺得派利是好罪惡，尤其是係某d 比較保守既教會既朋友。大概會覺得講錢失感情，或者因為派錢好似鼓勵不勞而獲，又或者唔好太早將錢呢個概念灌輸比d天真無邪既小朋友，驚佢地會貪錢向錢看，諸如此類。我呢，大大個可能開始要自己搵錢養自己養家，所以就漸漸唔覺得錢係d咩罪惡既野。

對於小朋友，我覺得，「錢」呢個概念究竟係好定壞甚至無分好壞，其實同其他人一樣，都視乎父母家長點樣灌輸。係人都知咩叫「應洗得洗」，但唔係係人個「應洗得洗」概念都一樣。

所以又係呢度想同阿Da 再講：

「阿Da，錢呢，其實只係代表自由。自由多左，唔一定係好，要睇你自己節唔節制。自由少左，唔一定係唔好，要睇你自己根本需唔需要咁多自由。」

對於我，派利是唔係意頭，而係心意。再講清楚一d，「心意」係「派利是」，唔係「派幾多錢利是」。好明顯，我唔係市儈，而係我知你地鍾意講心唔講金遮。


祝大家新年快樂、身體健康、幸福滿載。