無獎競猜遊戲 - 答案

成兩個月前搞左個無獎競猜遊戲，個答案係時候揭曉勒。

問題一： 果個賊仔全名叫咩？

答案係： 阿里Da Da （請鼓掌）

********************************

事緣呢，個賊仔（即係阿Da 啦），當係我地一齊去街食飯既時候，自己一個走左出去玩。

[再講之前先插兩句嘴：其實小朋友食飽飯要落地玩好正常，我一向都唔會制止佢，因為係時候比佢出去學獨立（係呀，點丫！）。好彩係女咋，仔既話仲走得遠呀。若果佢聽聽話話坐定我仲驚，一d 好奇心都無或者比你（係呀，你呀！）嚇到言聽計從，我諗絕對唔係好事。]

好勒，繼續。

果屎阿Da 見到一坡有好多吊飾既聖誕樹，係咁就停低左，然後手指指，指住一個二個吊飾，然後加上一連串外星文。似乎佢好有興趣，開心到歌以言志。

[又插嘴：唔知點解好多人都覺得d 小朋友呢個「手指指」動作好有問題，周不時有人問我點解阿 Da 咁鍾意手指指，覺得呢個手勢好無禮貌云云。下？哦。有時我覺得成年人既世界，真係未必容納到小朋友既天真，下下都要d 小朋友遷就大人，唉。]

好勒，又繼續。

雖然佢離開我地張食飯檯唔係好遠，十米左右啦（係呀，算近喇！），不過仲處於我視線範圍，所以我都好放心（重覆：唔係掉以輕心！）。跟住有個餐廳姐姐走黎同佢玩。我可以肯定，阿Da 真係人見人愛架，我估，至少可以維持到兩歲。

玩玩下，個姐姐就拆左其中一個聖誕吊飾送比阿 Da。不過唔知係我家教唔夠嚴，定係佢自己唔怕羞，一手就接左個吊飾，然後笑眯眯咁就走（跑）出餐廳門口，似乎想逃之夭夭！好彩個姐姐醒目捉佢番黎，然後我又絲絲然咁繼續食飯（我咁既處理手法當時幾乎受盡千夫所指）。

[再插嘴：各位家長父母，其實好多餐廳酒樓都有免費託兒服務架，自己親身體驗下喇。]

個姐姐捉佢番黎之後，仲再送多樣野比佢。係呢個時候，我就覺得唔係太好勒，無功不受祿嘛。於是我決定介入，好彩當時講左一句個女就即刻還番曬d 公仔比人喞。（屋企已經成堆垃圾，佢已經唔再左顧右盼，而係左支右絀，你地好心既話就唔好再送比我個女勒，多謝曬）

以上就係成件事既經過勒。

********************************

至於問題二： 你睇完呢個故仔有冇咩啟發？

答案係： 斷擔挑。

全部都估中既朋友，多謝與小弟分享呢個故仔既苦與樂。感激感激。