派強積金方案雜感

同事問小弟對於財政預算案個「強積金派錢方案」點睇。
http://www.budget.gov.hk/2008/chi/budget84.html

預算案話 ....：

「177. 不過，我明白到，有些人士要面對生活上的各樣開支，因此他們在強積金法定供款以外，未必有剩餘資金可儲蓄起來作退休生活用途。為顯示政府對加強香港退休保障的承擔，以及減輕社會福利開支的長遠壓力，我計劃為每名月薪不超過10,000元，而且現在擁有強積金戶口的僱員和自僱人士，向他們的強積金戶口一次過注入6,000元。

178. 一些職業退休計劃的成員現在沒有強積金戶口。如果他們的職業退休計劃是界定供款計劃，他們的戶口同樣可獲注入款項。財經事務及庫務局會公布有關詳情。

179. 我已為這項措施預留85億元。要推行這項措施，我們必須修訂現行的《強制性公積金計劃條例》。在完成有關程序後，我希望在二○○八至○九年度內向有關的公積金戶口注入款項。」

雖然財政司話整個預算案，「惠及」各階層，但從政治角度黎睇，或者因為香港人覺得可以更容易從公帑攞著數，所以各項措施中，我覺得呢個「強積金派錢方案」最容易令人覺得唔公平。

就算唔質問政府點樣以一萬蚊人工作為分水嶺，若每月人工多左一毫，就「即刻」唔見左六千蚊！從市民角度睇，呢個方案唔同退稅減稅等派錢其他方案，擴闊稅階、增加免稅額等，只會稍微影響支出（或收入），但派強積金既分水嶺太陡直，容易引來批評。

不過，今次同同事講既，其實大部分圍繞當中既行政問題，因為初步睇個方案雖然有人支持（港燦似乎認為更應調撥資源推動），但方案所講既細節實在太少，依我初步黎睇，果d 細節可能足以引起更多反彈。所以同事搵我睇下可唔可以開個盤口推算下呢個方案會有咩變化。

問題一，只有強積金同界定供款計劃（Defined Contribution Schemes，簡稱 DC）人士受惠。

以2007年12月的數字約有30多萬人加入界定供款計劃。

而另有15萬人左右，加入界定福利計劃（Defined Benefits Schemes，簡稱 DB）

以現時約350萬餘勞動人口計算，兩種計劃分別只佔當中不足10% 及5%的人數。另因為維持此兩種計劃費用相對高昂（尤其DB），只有大企業及部分中型企業繼續推行，估計當中最多只再有 10%（DC）及 5%（DB）的僱員，即分別3萬 （DC）及 7500人（DB）左右收入低於10000元。佔香港勞動人口共約百分之一，雖似乎未不足道，但果班加入左DB Scheme 既僱員肯定覺得呻笨。

但再睇行政方面，政府基本上並無任何強積金以外（即ORSO）既界定供款人士既資料，將來會點安排比錢呢班人呢？問信託人？定係叫僱主自己報上名來？又係咪放入佢地個「員工」戶口呢？咁咪可能隨時唔洗等到 65 歲都可以攞呢6K出黎洗？

問題二，強積金戶口。

自僱人士其實都要開強積金戶口，但據個人經驗，唔少自僱人士收入絕對超過10K，但只作象徵式供款。所以絕有可能有唔少呢類實質上唔符合資格但又得到著數既人士。你問下身邊有冇人做free-lance就知勒。而且，我聽講有非政府機構為左維持政府funding 既緣故，會為自僱人士供強積金之餘，仲會同佢地原本三個月project，分開12個月扣強積金，等佢地人工低過5K，唔洗扣個人供款。

不過咁，又有d自僱人士，好似小販、家庭傭工、開工不足既工人咁，好多都無開MPF戶口，佢地就唔好彩囉。所以話，漏洞始終有，政府可能隻眼開隻眼閉（但議員呢？）。或者，呢個方案間接逼佢地即刻開 MPF戶口都未定。

而且，好似小弟咁，好幸運（或者不幸）參加左個界定福利計劃，雖然唔洗自己供款，但又肯定唔能夠受惠，不過，查實我可唔可以求其話自己係自僱人士（甚至開間公司，好似今年唔洗比註冊稅），然後開個 MPF Account，游下呢趟渾水呢？

問題三，咩叫「月薪不超過10,000元」。

據新聞報道，是指07年12月至08年2月月薪計。不過呢三個月月薪，係以最低者？最高者？定係平均數？係咪用 MPF Relevant Income 計？

同事話好似係最低果個月，若果真係咁，呵，果d 二月中入職既新同事呀、其中一個月放左 no-pay leave 呀... 無啦啦又多幾千（雖然可能仲要等幾廿年先到手）。

嘿，有 d二月份準備出佣金、超時補水、勤工獎、乜津貼物津貼既人士可能同僱主講體諒公司環境，不如留番下個月先出埋果一千幾百蚊佣。一家便宜兩家著。

不過咁，呢三個月係大部分僱主出雙糧花紅既月份，月薪計算標準嘛，我估政府都應該諗過度過既。

85億，每人6000，即大約可以分比140萬人。阿同事，算啦，一千幾百個損耗，其實都唔太差勒卦，個盤口... 再睇定d先啦。

補充： 《兩個利益階級之落差》