事先張揚邀約蜘蛛精事件

綿綿話：

＞＞CM兄,係唔係因為你太理智啦
＞＞所以你放唔開懷抱去明白不理性既愛情?

查實呢度分開兩個問題：一，我係咪太理智呢？二，所以......？

嗯，閒人兄好耐之前講過「鐘擺效應」，大抵意思同「反作用力」意思相似。而我，呢種所謂理智，其實唔係好理智。

我呢亭表面理智，應該源於「理智失控」。點解用「應該」兩個字呢？因為我都唔肯定，而我貴為萬物疑似疑惑論者，好多時係任何文中都可以搵到呢類，「疑似疑惑」既字眼，例如「應該」「可能」「大抵」「或者」「大概」「比較」「似乎」等等，所以唔好見怪。

...... 等陣，講返「理智失控」。

簡單講，我係一個惡人。總之無論有任何人認為我唔理智，我都會發惡。放心我發惡，九成九只會發係自己身上，猛咁鬧自己點解咁唔理智，逼自己表面變得理智，就咁，周不時就搞到理智失控，反曬艇。你知喇，係呢個高度先進既社會，唔理智係一種冇文化，又唔夠國際化既表現黎架，係咪先...... （唔好介意，我又失控。）

所以你睇我好似好理智，其實呢，Errr ...... 你點話點好喇。

發完癲，講返正經少少既野。

寫blog同睇blog令我感受到人間有情。

「有情」者，唔淨止係一般以為既「有人情味」（humane），而更加係「有人情」（冇個「味」字）。一直以黎，我都不斷留意人與人之間既拳來腳往。唔一定係琴棋君子同書畫淑女既詩詞來歌賦往，先至睇到人間有情，就算係爛仔交玩插眼指夾撩陰腿，查實都有其韻味。（我係咪未癲完？）

之不過人生苦短，當游走部落越多，腳步就越急。為左腳毛數量同口水花質量可以得到一個妥善既平衡（就算唔可以成正比），所以縱使呢個世界既美廈華木多的是，我都一直記起一個人：CK。（唔知咩correlation）

係現實黎講，發現人間有情最大既好處係比我可以幫助我，同老細呀，下屬呀，阿女阿仔呀，任何人類物體呀好好溝通（唯獨靚女搞唔掂，唔知點解）。我認既，我唔係一個好識得同人溝通既人，成日開口及著脷，比人掟鞋，但我仍然好鍾意懶好學咁轉牛角尖。不過，我真心架，我亦都唔係食住 wasabi 講架。（又唔知點解會扯到呢度）

講返CK，佢呢位仁兄呢好似一個盤絲洞裏面既蜘蛛精咁。骨科專家可能會dismember 曬佢d手手腳腳，內科醫生就鍾意吉穿佢個肚腩睇下d血咩顏色，生態學家就睇下佢食開咩白骨精，而我呢隻騾狼惡人混種，就鍾意睇下佢d蜘蛛絲究竟可唔可以做棉花糖（唔係一舊舊果種）。

呢隻蜘蛛精理智到得人驚，迂回曲折但亦齊整通暢，所以我呢個惡人，想親自搵佢取經囉。Errr...... 出年唔知惡人三顧茅廬，可唔可以得到蜘蛛精寵幸呢？（求求你順便醫醫我個思覺失調丫唔該）

拿，我真心架。