淺談理想

此刻心情好d，所以可以用廣府話寫。

危樓姐姐有團烈火，燒到我（刺激起我）就算咁夜（唔知四點前可唔可以寫好呢？），都要諗到頭爆，要記低自己有咩理想。真係第一次咁認真思考咩係我既理想。

理想呢～ 做咩好呢...

律師？教師？總理？好父母？好老公老婆？...

諗諗下，理想理想，好似成日都係一份職業、一個身份，好悶。改改佢... 用action words～

理想係可以令到世界和平！阿女以後生生性性！阿仔大個錫（點解電視台同報紙成日打錯做「鍚」？）曬老豆！...

再諗，好似有問題。係，呢堆係好理想既理想，但只係停留係理性層面，查實究竟我心底既理想，就係呢堆野？

我唔信。

再摷下database，我既理想，可能只係想身邊既人開心，同埋做到佢地「應該」要做既野（係架，我不嬲對人有要求架）。初步我係咁睇，唔知究竟我仲有咩其他馬利安納海溝咁深既理想。而且，呢個究竟真係我既所謂理想，定係我要表現自己美好一面於人前既表面理想？我唔知，真係唔知。

諗諗下，究竟我搵到我心底既理想，究竟有咩用？（係咪要「有用」先可以諗？）

唔直接咁問自己，我就試下從阿女身上，睇下可唔可以搵到個似樣d既答案。

我咁諗（哈，我估邊個睇到呢度都應該宜不得 close window）... 就以阿女將來為例，我地既想法，其實都好一致：唔洗諗咁長遠，諗到小學一年班已經係極限。唔搞咁多富貴建築工程（因為莫財），唔搞咁多見識世界工程（都係因為莫財），睇落唔搞咩唔搞物，都係因為莫財... 唔通有財我地就會改變諗法？

查實係真既... 有水，我真係會帶阿女（等佢再大d）去下外地接觸下新事物，有水，又會比佢參加咩社交班接觸其他小朋友。之不過... 我呢種理性化性格，（依家思索番）大概唔會引導佢去追求咩現實化理想。係，我都想佢聰聰明明，但我唔係想佢做咩師咩司囉。

從阿女身上，我覺得理想，依家係，用心了解阿女個心態，令佢能夠「做應該要做既野」，同埋令佢能夠「克服應該要去克服既野」（呢句後加）... 前提係「學」。

至少，無論係出自database，定係經阿女迂迴番自己身上，理想，雖然相似，但唔太一致。

究竟... 理想係咩呢？定係發夢再諗呢？... 好眼訓。