Thursday, June 07, 2007

偶有鑊氣,準備好未?

昨天6月6日
這一天好面熟。

是否有朋友生日?
大清早急忙致電多年好友,他說,應該沒有吧。

還是與鹿死有關?
看看網友文章,好像沒有關係。

報稅?
早已搞定。

整日胡思亂想。
回家。

問小妹,是否有親朋戚友生日?
答案不得要領。

看到電視展示歷史片斷 ~ 諾曼第登陸日。
原來如此!頓覺釋然。

好消息告訴小妹,一天陰霾盡消。
反應冷淡,如是打理家務。

滿足了求知慾。
沖涼。

突然打雷。
浴室傳來慘叫。

六月六日。
至今剛好又一個整年...

哎呀,結婚週年呀,笨笨笨笨騾!
煎.炒.煮.炸.蒸.炆.燉.焗


......自己揀,唔好等人郁手。

38 comments:

xiao zhu said...

CM, 你唔係呀嘛!!

Justin said...

嘩。你真係呢!!!!

嘿!國際大事,又點及得兒女私情緊要!

Tommy said...

嘩你唔係呀嘛....

咁都攪得錯

仲要咁厚面皮問埋老婆

我諗你都係打蛇隨棍上「扮唔知嚇下你者﹐其實我記得的﹐仲準備左 (下省十萬九千七樣臨急抱佛腳)....」

on dog said...

CM兄:

要醒定! Good luck and best wishes!

近來好忙! Talk later....

C.M. said...

查實慘叫之後,小弟已經頻say sorry。小妹回應了一句:仲有幾分鐘。


小珠:

係呀。嗚嗚,雖死罪可免...

Justin:

咁男人梗係以大局為重加嘛(死撐)。

Tommy:

查實一個月之前都記得架(依家講咩都無用),就係到左正日就乜都唔記得,真係笨到無人有。最衰已經11點幾先記得,又無準備,你講得都啱,應該一早買定禮物,就算咁遲記得都可以“扮”有驚喜...(又係個句:依家講咩都無用)

samsara said...

丫!!!!!

咁大鑊嫁你,快d補鑊啦,遲都好過無呀嘛.

Karen (Sze) said...

識做啦, CM! 快d做o野啦(叫您呵番小妹啊)!

個日子咁易記(6月6日喎), 抵打(呢下我幫您的小妹打的)!下年唔好再失策啦!

*********************************

講開"諾曼第登陸日", 以前明珠台好多時會播番"The Longest Day"(碧血長天), 套戲好長, 但好有意義; 最近呢兩年無播, 唔知係咪copyright問題。不過, 那年的事令盟軍士氣大振, 最後令當時的德國戰降。

同埋, 唔知點解, 有些60's的朋友仔(包括J--我的ex)講起呢件"諾曼第登陸日"就特別興奮。

仲有, 我還記得某年6月6日差不多6時, 發生o左一單致命工業意外, 當時有人話:"666"作怪呢!

稍後時間, 回應您的二三線問題。

南區肥龍 said...

c.m. 兄,

唉...呢次你真係呢...

C.M. said...

On兄:

The same to you. 但千祁唔好學小弟咁失策。

香水妹妹:

查實最弊唔係咁樣衰左,而係唔識點補鑊呀!求救求救求救求救...丫!!!

Karen:

都知衰喇,明明呢個日子好鬼死易記,都會唔記得,真抵死!

講開The Longest Day,乜原來Karen你都有睇?哎喲,真架,呢套戲真係幾正架(帶有一點舊式幽默感),好多幕都令小弟好深刻。

遲d6月22日,就到德國入侵蘇聯紀念日啦...丫,唔知o個日又係咪我同小妹既紀念日呢?都係要小心行事。

單工業意外,係咪關於籠Lift架?

C.M. said...

肥龍兄:都知死囉,有冇解救?

Samsara said...

CM哥哥,我諗,要有誠意囉,睇下moon moon鍾意d乜就做乜囉.

嗱嗱,你唔好話唔知,諗唔到呀.老夫老妻都要maintain嫁嘛.

又,正路有小朋友既太太,都會想有一個二人世界既break既...一晚咁多啦.

xiao zhu said...

求救?唔似係你囉,CM。嗱,我唔係幸災樂禍呀,我講真架。你應該係一個好有心思嘅人,應該諗到點補鑊去氹番佢嘅。

同埋,女人最終都係鍾意講心嘅啫,有心、有誠意,形式只係其次;做得你老婆嘅,我相信都唔會係果啲淨係識得睇生日呀、周年紀念呀、情人節呀架喇。

死嘞,諗諗吓我會唔會講錯嘢呢呵? 嘿,死就死喇,我都係有果句講果句啫。=P

C.M. said...

香水妹妹:

>>嗱嗱,你唔好話唔知,諗唔到呀

R爆頭... 小妹都成日話我:咁你以前點樣氹d乜知己物知己架!(鬼有咩知己遮...)

小珠:

查實小弟又老實,又無情趣,又乏善足陳,又一事無成...真係唔曉得呀(我都係有果句講果句啫...)。

若果比著事件發生之前,都可以計劃一下既,但係今次係補鑊播。死喇死喇死喇死喇,個人好騰呀... 希望今次大步攬過啦。(哈... 若果同佢講話:希,呢d野,形式黎既遮,老夫老妻唔mind既... 你話我有幾多生存既機會呢?)

南區肥龍 said...

c.m.兄,

冇咩解救架...不過可唔可以衰衰咁認自己大頭蝦, 不如咁啦,星期六晚"已經"訂咗枱想過吓二人世界...

記住! 係已經"訂咗枱....唔好話最多去訂...咁咁咁....

Karen (Sze) said...

回答如下:

1. 無錯, 睇o左The Longest Day2次啦!

2. 單工業意外,真係關於籠Lift的。

3. 用肥龍的suggestion啦! 若然touch wood咁唔好彩的話, 速成學整幾味啦(不一定收diamond至夠誠意, 通常婚後收diamond有另一意思, 切記)!

Gideon said...

下?我啲相識週年呀乜週年呀永遠都唔記得喇喎,跟住咪...係喎﹗係喎﹗因為大家都唔記得左...

xiao zhu said...

喂,你好喇喎,你知乜嘢叫IP 架呵? 我開題都識避忌喇,你竟然公然抄足晒? 嘿!不過見你而家個騰樣,就真係唔忍心雪上加霜嘅。

傻佬,梗係唔係叫你同佢講啲咁戇居嘅嘢喇。我嘅意思係究竟你平日表現成點,就好影響今次嘅評分嘞。最終都係坦白從寬嘅啫,你老婆脾性係點、最鍾意乜嘢,只有你先至最清楚,我哋周邊啲閒人分分鐘好心做壞事喇。

嗱,私人醒你,記住,有心思同搞花筍係兩回事黎架。千祈唔好搞出個大頭佛呀,兄弟!(其實你都識喇!)

Marshmallow said...

CM兄—失策,失策!今次連小女子都幫不下手了...

快,快!危機處理,找個人看實Da Da,然後訂位二人燭光晚餐,山頂有大地在我腳下之勢,半島/君悅的日式自助餐也不錯。紅酒一枝,鑽戒一隻,夠薑的話把追女/求婚/結婚/生仔「案件重演」,加上情深的說話一千句...

祝補鑊成功!

不敗的魔術師 said...

碧血長天係老父教我睇既,佢最鍾意睇以前d明星

明珠台無播係因為有線買左版權,電影版權要響電視台播,版權係有限期既,所以一個台播左n年後就會去左第二個台.

ak said...

C.M.兄,
騾仔一生辛勞,d肉一定又老又UN...不過將就d,好又一餐唔好又一餐... Moon姐姐可以選擇:

煎騾肉餅...記得重點係一定要用手打既騾肉,唔好用機攪...

花枝片騾肉炒西蘭花...有d菜,清清地都好...

水煮騾肉...四川風味,不過騾肉易老,唔好一次掟哂落去...

炸騾肉球...日式免治煮法,不過可能熱氣...唔好俾DaDa試依個...

騾肉蒸豆腐...又係一個清清地...雖然騾肉無火腿咁重味,不過Anyway,將就下...

炆騾腩煲...加腐竹伴食...

燉騾腦...騾仔既記憶力唔得,可能無豬腦咁補身...

葡式焗騾扒/騾架...依個難整d,不妨成件拎去沙田搵d師父幫下手...

唔知幾時可以試到阿嫂既手勢呢...

(C.M.兄...唔好見怪...事關...你今次依條係死罪,仲要斷到咁正,做兄弟既都幫你唔到...)

ak said...

C.M.兄,

Btw,阿嫂請食飯果日,ak一定帶枝好酒到賀...同On Dog兄一齊享用騾肉食譜...

xiao zhu said...

嘩,AK兄精心設計呢席"笨騾宴"簡直係無得頂呀!

唏,不過如果加多個湯變成九大簋就更加 good fit嘞。我唔叻煮嘢,最好AK兄度埋佢。如果想十全十美,就加多度甜品,咁就真係無以尚之嘞。

CM,幫我問吓阿Moon 我到時可唔可以掹車邊,敬陪末座呀。至多我幫手睇住DaDa喇。

ak said...

Xiao Zhu,

湯嗎...?這個容易,反正有條尾剩番,拎埋去做西式騾尾湯...

甜品就真係難少少...或者仿效中式古法羊羹(唔係果d日本仔野),做番個騾羹...先將騾肉煮爛煮熔成為羹湯,再雪番凍佢就可以食啦...

諗起都有d肚餓,又到lunch時間,入廚房整番碟炒丁先...

ak said...

Xian Zhu,

哎...個騾羹差d唔記得要落大菜添,好彩...如果唔係凝固唔到架...順手「飛」左d油,再加番多點糖先...

Marshmallow said...

嘩嘩嘩,想不到AK兄你是煮菜能手,好仰慕啊... :-)

xiao zhu said...

AK兄好犀利呀!真係要跟你學吓嘢至得嘞。

CM,唔好意思呀,我哋越講越興奮咁,好似唔係幾好啊呵? 咁你而家究竟咩環境唧? update 吓大家,睇吓仲有咩可以幫到手!

C.M. said...

呀...啊...呵...嗄...丫...哦...哎... (持續不斷的慘叫聲,不絕於耳)

肥龍兄:
小弟依足吩咐,但衰多口講多左兩個字:“啱啱...訂左”(雖然記得死撐係男人必殺技)

Karen:
緊記緊記,好彩咁耐都未送過diamond遮(結婚時都慳番)

鐵鎚兄:
拿,你呢句就啱聽嘞,明明結婚周年,梗係兩個人既事啦,點解一定要男人一力承擔遮...(不過,呢幾句放係心既)

棉花妹妹:
呢幾晚同今日已經連番受刑,真係後悔點解之前無加reminder落電話度,年紀大左,記性都差左好多...

魔術哥哥:
鼻血長天真人版,你又有冇睇過...?6月6日,盛大獻影!(希望快d落畫啦)

AK兄:
果然好兄弟!(仲好“夠”兄弟!)
最初以為你淨係識得飲,誰不知原來你連仲識食同煮添!(一路讚一路咬牙切齒)今日我同小妹講:阿女后(呂后?),依家都蒸左兩日兩夜喇,可以收爐啦...

帶埋酒黎... 拿,係攞黎飲至好呀,唔好學On兄咁,帶支孖蒸或花雕黎,整個咩酒爙騾子我就真係死比你睇嘞。

(AK兄,呢餐搞到咁大/高興...下次不如輪到小弟整比你丫)

小珠:
呢個時間梗係補緊鑊啦,查實都有d轉機既,好彩小妹火遮眼唔睇小寶號遮,如果唔係,見到Karen個diamond建議就弊傢伙。

d騾肉煮左咁多日,都應該差唔多卦。而且你都講得好啱既,佢脾性係點,我都應該清楚...佢脾性咪又係個句:唔可以得罪女人囉!

同埋,咩叫IP?Internet Protocol?呢家野問鐵鎚兄好似清楚d播。

咁遲覆,唉,咪又係因為呢幾日...乏善足陳囉。(咪掟鞋!)

samsara said...

男人,衰就要認,打就要站定,千祈咪駁嘴.結婚係戀愛既墳墓真係無講錯.

AK哥哥好勁呀,騾肉宴我又去,但係無甜品既?不如綠豆沙呀,清清地又幫moon moon下火.

xiao zhu said...

CM,你咪成日喺度詐傻扮懵呀吓!Internet Protocol? 扮晒嘢喇你。你侵權呀,Intellectual Property 呀!你仲黎喎,嘿!

放心,我唔會掟鞋咁蠢嘅,我會同我律師商量吓先。

on dog said...

重諗住出埋最後一支99年絕版54 degree 酒鬼 幫幫兄弟添.....

ak兄, 幾時整番餐, 一於隊左佢....

ak said...

C.M.兄,
Mark哥話齋:做兄弟既...

Xian Zhu,
其實講真...騾肉做食材,始終差左d...都係揀過第種,放過隻騾啦...

Samsara姐姐,
d騾羹又真係太似點心,唔係好似中式甜品...C.M.兄 suggest左一度酒釀騾子...不過就綠豆沙都好,d騾肉燥,降下火...

On Dog兄,
咁唔差在AK拎埋枝Blue Label黎...

怒火眼睛 said...

死罪可免活罪難饒.
拿,一係你送多個記念日俾小妹勒,博大霧話係當年初吻又好拖手又好精子遇上卵子又好,送件禮物加張卡,卡內最緊要寫多D 字呀,千祈唔好簽個名算.
以後年年呢日都要送呀,鬼叫你咁日子都可以唔記得丫.
老公咁樣,確係激氣,嘿

一木 said...

今年是第一週年呀? 紀念日可以算農曆,又可以算西曆,靈活運用嘛.

C.M. said...

o夏 o夏 o夏 o夏 o夏 o夏... (喘氣中)

啱啱搞掂屋企隻鑊,今日公司又黎一劑,唉...只能怪自己不濟。

香水妹妹:

我都企得好定嫁啦。呢兩日仲落雨,玩困獸鬥,差d難逃一死,好彩小妹大量,不過呢,呢次教訓真係大囉。綠豆沙,最好就係冰凍既,嘩...正!

小珠:

原來IP係Intellectual Property既意思,鎖你鎖你。你知啦,小笨騾讀得書少,又一事無成,邊識咁鬼多野遮。

律師?唔知危樓姐姐會唔會幫我打呢單畸屎呢?

On兄:

嘩,又一個要索命的“好”兄弟!

AK兄:

酒釀騾子...你都似乎唔係幾夠厚道播。

怒眼媽媽:

得唔得架...有d懷疑播。不如咁問:若果怒眼爸爸有日係咁,你覺得你跟住會點對待佢呢?(同埋,我仲以為老夫老妻,一切應該盡在不言中嫁拉)

一木:

你好嗎?今年已經係第四年啦(你話?咁都唔記得真係罪無可恕丫!)。

農曆、西曆?咦?呢招好似洗得播,等下次又唔記得,就試下博大霧先!

ak said...

C.M.兄,
玩過左火位...Sorry Sorry,下次唔敢。自罰一碗。

C.M. said...

AK兄:

呵,你又借加依呃酒飲!

(女士們請迴避.....)










(BTW,AK兄,小弟見到呢味菜色,突然有d心邪...)

>.<

xiao zhu said...

Uh Oh!

Karen (Sze) said...

嘿嘿......

我回應了您的二三線問題。