Monday, March 08, 2010

成長氛圍

雖則係因為某d關乎世代話題既comment引起,但我唔係想講世代話題。不少朋友,不論年紀,都認為年長一輩未必有能力,甚至有心去明白年輕一輩。與此同時,亦有不少朋友,不論年紀,都認為年輕一輩也一樣沒有能力,沒有心去明白年長一輩。依家無論係得獎電影既導演既感言,定係一篇尋常blog post,一提親「我唔明白點解.... 」,就會引黎反彈。

Well,人地有問題,咪試下答囉,點解要話人「因為你咁咁咁既背景,有咁咁咁既年紀,咪所以唔明囉! 」

一個係咁,都算。兩個係咁,都算。喂,洗唔洗成棚人都係咁?... 挑,問非所答。既然連自己都無答案,點解要質人唔識先。

寫呢堆字,其實係源於好幾年前,剛剛認識側田無耐。憑記憶大約係咁(Wordpress當時無自動comment forwarding,好難搵返邊篇),有日唔知係側田定係佢既朋友,post左一個關於畢業禮既文章。然後我有個情景唔係好明,所以我就問:「點解會lig住個公仔影畢業相既?」

有位朋友就留言話我,點解好咁問,你地咪睇低人之類。喂,咁我真係唔知丫嘛,咪問囉,既然我可能講得唔清楚,所以我回覆話,其實我想知,因為我個年代都唔覺得有咁既情況,唔係想叉輪廚任何人。之後唔記得邊個定側田,比左一個回應我,叫做安撫左雙方,嗯,多謝囉。

我撩返呢件事唔係話比任何人聽我家陣仲耿耿於懷,而係,我想膽粗粗咁,試下代替果d答唔到類似問題既,比對方一個似是而非既答案:「成長氛圍」。

一切都係成長氛圍惹既禍,而我之所以唔係話想講世代話題,因為呢個真係唔係世代話題,而係屬於 Learning and Growth 既範疇。

世代分析源自社會環境,而世代分析中,可能會講下社會變遷、人口結構、對外對內既經濟發展,上一代同下一代既生活環境,乜乜物物 ..... 雖然我無睇過阿呂既《乜乜香港人》,但真係斷估,佢唔會好詳細提到「成長氛圍」對於呢代果代會有咩 cognitive influence。(我撞下架咋)

成長氛圍固之然同「環境」有關,但由於環境對於唔同人有唔同既影響,所以唔係咁多人好似我咁武斷咁膽粗粗咁講,呢個可以理解。又例如點解希特拉會有咁既性格,做出d咁既事,評論人一般都需要好多佐證唔係隨口up先講到出黎。但若果咁問,有冇人睇過某d研究話某個年紀既戰後德國人,可能因為受到當時戰爭既影響,所以會特別容易出現 S&M 既病態(呢,禁室培慾果亭呢)?

可能好多人都睇過研究希特拉一個人性格既資料,但有病態既成棚人呢?(拿,唔該,唔好癲到話我暗示邊個或者邊一代有病態呀。我只係借一個自己比較熟悉既資料去解釋啫。)

我意思係,好難設身處地架。兩個人成長經驗唔同,成長氛圍唔同,所領會到所體驗到所能應付到既困難都好唔同,既然咁唔同,又有幾個多可以做你肚裏面條蟲?不過咁,理解一個人難遮,理解成堆有同樣行為模式既,其實會相對容易播。之但係,就算相對容易,都係難丫嘛。

有冇人真係可以話比我聽,點解依家既大學畢業生,就算part-time course同我差唔多年紀既,都一樣攞住個公仔影相?(啊,忽然記得當時位仁兄既回應大約係:多件野,無咁寡,之類.... 諗落,個答案可能都幾接近)

喂,呢個連我地呢代都係咁播,仲算世代話題?都話係「成長氛圍」咯!成長,唔係淨係十八廿二果史先至有,我地呢個中坑年紀都一樣成長緊,只係相對慢d,穩陣d咁解啫。

作為阿叔級,每次有其他HR同業問起我公司既client 問題,我會同佢地講,明白佢地個「有記錄」背景,唔難,但代入佢處境就唔容易,因為「成長」係唔會白紙黑字咁寫低既,就算俾你貼中,client都未必會認同,皆因連client自己都唔知點解。

呢個唔關年紀既事,唔關乜世代既事,只係關自己有冇嘗試了解自己既事,亦係係關有冇好開放咁比人地了解自己既事,更加係關你「成長氛圍」既事。

自問不答:如果一個所謂開竅既時候,適逢股市大跌,大個左就會傾向謹慎;之但人可以開竅幾次,如果第一次開竅既時候,個個好朋友都話錢唔係萬能,但第二次開竅既時候,竟然個個好朋友都走去炒股,你話大個左,又會變成點?

7 comments:

魔術師 said...

我認為, 拎公仔既原因, 係因為當事人唔知將對手放係邊。

C.M. said...

丫,都係一個幾合理既解釋。

我(地)果史係咪用手拎住文憑或這四方帽代替?

黑人 said...

近日讀日文多左體會
我覺得語言都有影響一個地方的人的性格
例如日文強調階級,文法上又分自然發生的現象及人為現象,令佢地特別在意「他力」及「自力」可以主宰的事情,從而衍生各種處世態度,例如覺得無力掌握事情而避世的宅族,或者肉食女等

又或者,廣東話先天設計的發音較大聲又突兀(有入聲),每粒字不易lur在一起,有可能因此香港「說一就一,說二就二」

英文強調時序以及將不同的物件有系統地分類,這個不用多講啦

有點穿鑿附會,但我相信是個很另類的氛圍切入點

C.M. said...

黑人,不得了!!

http://inhumanresources.blogspot.com/2008/06/blog-post_13.html

我等左成年幾想有人話我知日文既特性,多謝曬!!

C.M. said...

回正題,另類的氛圍切入點... 嗯,不錯不錯,如無意外,那可以是一個可靠的切入點。

黑人 said...

每次小弟的隨口up被CM大大當成秘笈,都不勝惶恐

C.M. said...

唔洗惶恐喎,或者係我亂吹呢~ (何況,有秘笈,都要個人有慧根先可以參透傢嘛)