(Rise of) Institutions

呢排超級腦震蕩。

撞車未暈完，要做 Proposal，仲要死頂修改一萬次既 client work ...都未完，選舉後感又湧埋黎，湧湧下再搶奶粉，啱啱先完成某個 simulation training（個大綱）... 個 schedule 密到呢... 我仲想 keep 住寫閲讀報告架...

不過咁，好彩多得咁多貴人，令小弟省卻好多思考既煩惱，多謝各位賜教。

今日見到阿米爸果篇《乜都有毒》，多謝！令我想補充 Incremental Mobility Model。（查實我又想膽粗粗用 Entry Barrier 甚至 Porter's 去連貫某d missing links囉）

（不過見依家成三點，涼都未沖，都係留番聽日再講...... 唉，我要逐日飲曬d 雞精佢呀陰功）

我想試下講 Institutions. （查實係一種我完全唔熟悉既野。）

***********************

幾年前係一間國內五金廠幫手做質檢，負責一d 簡單野。

有日以超值價新請番黎既小肥，走黎問我呢個工廠有冇依照行業指引做。

先講下小肥，佢有 ISO 底，之前做開錫罐鐵罐（例如曲奇餅罐），雖然（記憶中）好似唔係大學本科畢業，但呢個後生好有衝勁，求知欲強之餘，仲唔似班老師傅咁淨係鍾意玩權術。佢係首位令我肅然既中國新一代。

講番佢個問題。我話冇。而呢間廠做低技術五金工具比一般家庭，所以要求好簡單，你同我都睇得倒咩叫質量，唔係高科技野。

佢就質疑查實係咪間廠冇遵守行業規則呀，冇理由會冇格。佢話好似制罐咁，因為唔可以俾d空氣走入或漏出個罐，所以封邊個要求受到行業規範。（按：鐵罐查實係「捲」出黎既，捲完之後，就將鐵皮既兩邊「摺」埋一齊，唔洗落膠水都可以造到密封。又，對話印象中，小肥講既係「行業規範」，唔係法例要求。）

我就跟住同佢一齊討論咩叫「行業規範」，ISO 同法例有咩分別，我最後叫小肥，不如我各自返去自己諗下，聽日再傾。（再按：當時有位在場既會計妹妹事後同我講，話我地好似鬧交喎。）

之後果日... 嘿。（想講咩... 嘿）

***********************

據我個人非常有限既理解，國內其實有唔少由行業內各企業聯合組成行業「協會」。成立「協會」的目的，就是為了合力推動行業在市場的發展，例如以其「專業名聲」推出產品認證（想快速了解行業協會有咩作用，可參考呢度）。而其中，就有「中國奶業協會」。

香港有無數呢類協會，但同國內似乎有少許分別，就係國內既協會，多數由企業組成，但香港則唔少由「個人」或個別專業人員組成。先不論呢個分別，成立行業協會既目的，始終一樣，就係匯聚同業，一齊擴大市場個「餅」。其中一個手段，就係建立專業形象，例如通過提供優質服務，或以專業產品認證來確保同業產品質量。

呢d行業協會，可以算係一種比較狹義既 Institutions。

以歷史發展黎講（例如可參考 Wiki介紹果本：Institutional Change and Economic Development），經濟性歷史事件對於一個行業有越大既衝擊，Institutions 就會轉向「強化」，以免整個行業完全被淘汰。

雖然政治情況可能會左右 Institutions 強化的方法和進程，而 Institutions 本身（尤指由人主動成立的，即狹義Institutions）亦會受其 decision-making process （微觀）影響，但一般來說，保護和促進行業利益，乃 Institutional development 的基本推動力。

***********************

於我，「也許」態度比米搞兄樂觀，「大概」因為性格使然。

不過，今次三聚氰胺（Melamine?）事件，跟孔雀石綠、豆腐渣工程，在 Institutional Development 的角度，有明顯的分別。

這個分別就是，三聚氰胺可以顛覆整個奶品行業的將來，但孔雀石綠和豆腐渣工程則不可以影響漁業及建築業的將來。

再深入了解各方面，例如從品牌依賴性、是否包裝產品、需求、受影響階層的廣泛和深入程度等等，就可以看出三聚氰胺與孔雀石綠豆腐渣等在「社會衝擊程度」上的分別。

之所以強調「衝擊」，因為只有大的衝擊才可以推動一個懶惰的行業再次進步。

正如國內的漁業協會和建築業協會等類似組織，相對中國奶業協會，對於自家行業「所能作出」（而非「已經作出」）的貢獻明顯地是非常有限。

中國奶業整個出路，若只單靠政府監督、發牌，雖然必須和關鍵，但也長路漫漫。而且，最重要是，倘若將來任何一個奶業中人，再引發一次新的三聚氰胺事件，奶業將只能依賴消費者的依賴性續命，而不能把奶業進入新的層次，甚至跳出中國。

Institutions 於我，並唔單止係一所能夠自我監督既單位。最重要係能夠自我反省。尤其經歷大衝擊。

我相信任何人，縱使曾經埋沒了良心，但遇到重大衝擊，一定會反省。衝擊越大，反省越透徹，無論反省過後又有多少人會真正的找回良心，但始終，一定有，也一定比沒有良心的更有魄力去展現良心，還會集合其他有良心的人，去推廣良心。

這就是我所認為 Institutions 能夠在大衝擊之後會自我反省的原因。

中國奶業協會相對其他類似協會，因為有行業龍頭企業聯合組成（而且並非壟斷性龍頭企業），所以「理應」會更關注自身行業的將來，亦會加緊籌組並領導一次徹底的改革。雖然這個 Institution 欠缺的，就是獨立專業人士的參與。

人會繼續向上尋租，Institutions 亦會。但當遇到社會不能接受、政府不會容許的環境，Institutions 便會尋找出路，繞過尋租的方法，走出應走的路。（「免檢制度」讓奶業中人各自為政，他們所認識的選擇，或許就只有尋租）

所以，我相對樂觀。

我覺得 Wikipedia 正是一個成功而值得信任的 Institution。

（另見量子、港燦、七十等如何講及此事件。）

（2008/09/23後按：我認為是「蛋白精飼料廠」作怪，我越寫越嬲...）